حب بعد الزواج

#شريان (مرااسم)

#حب بعد الزواج (6)
#بقلمي :زينب أمير

الليله مرت تلاته أسابيع من جيت ناس خالتو ندى،، امي ورحمه كانو بجوني كل م يلقو ليهم وكت،، حمله تسمين،، نضافه،، ماسكات وش وجسم،، ده الكان حاصل في الأسابيع الفاتت، اخر مكالمه لي مع امي كانت قالت لي فيها أهلنا كلهم جو، اصلا امي دي وحده، عند أهلها،، وعندي تلاته اعمام، عبدالله(عندو ولد واحد اسمو علي ياهو زاتو راجل لمى اختي) ياسين(ده أصغر واحد م متزوج وعايش في إنجلترا) وياهو ابوي،(اكبر واحد)م عندي عمات.

بالعصريه كده كنت راقده في السرير ساي، جات داخله مزن وفي يدها صينيه متوسطه، ختتها وطلعت سريع، عاينتا للصينيه لقيت فيها نشأ وفواكهه ولحمه بطاطس، شويه َجات داخله شايله بتها " لين" في يدها وجك عصير، قلت ليها ده شنو ي مزن؟ لو بتتذكري من ساعتين بس،جبتي لي مديده!! وبتذكر كمان رجعتها ليك فاضيه، وبعدها طوالي جبتي لي كبايه لبن وشربتها، في شنو؟ قالت لي ولو متذكره كمان باقي للعرس اسبوع بس وانتي للأن م زايده غير خمسه كيلو ومفروض تكوني اكتر من كده، وبعدين ده بتديني ليهو خالتي ندى، انا م عندي شغله، اتكلمي معاها انتي براك ، وبعدين عليك الله الاكل ده برفضوهو؟ قلت ليها محسساني انك قاعده تاكلي ولا ظاهر فيك، م ياهو عامله زي، ردت لي حبيبتي ده عرسك انتي م عرسي انا تمام، تاني حاجه قومي اكلي وهاك، "ختت لي بتها في حضني وتمت كلامها"، لين دي صحت أسي وشكلها زاتها جعانه اكليها معاك، اتحركت مشت، وقفت تاني وقبلت على وقالت، امشي واجي، القى الصينيه دي فاضيهه! قلت ليها بالله..! فاضيه عديل م بالغتي فيها شويه؟ حمرت لي قلت ليها خلااص سمح سمح ، مشت وهي بتضحك،، قبلت ل لين قلت ليها دي منو السمحه دي؟ وحلاتي يناس بقت تعاين لي وهي مستغربه،،، بقيت اشاغل فيها واكل واكلها معاي..

صحيت ب صوت رحمه وهي بتربت ع كتفي وبتقول لي لجين قومي العشا اذن، فتحت عيوني براحه وقلت ليها متين جيتي انتي؟ معقولهه انا نمت ده كلو؟ والمغرب م صليتو شكلي كمان،، قالت لي قومي صلي وتعالي اعملي الماسك ده، زائد جيت قبلي شويه مع احمد، وصلني ورجع فات، قمت ع حيلي وخليتها مشغوله مع كريمات في يدها،، طلعت غسلت وشي واتوضيت،، صليت صلواتي وقعدت ليها، عملت لي ماسك حق لبن بدره وشاي أخضر،، سألتها من اهلي قالت لي كلهم جو الا عمك ياسين قالو بجي بعد بكره قلت ليها تمام، قالت لي شايفاك م زدتي نفس الوزن الخليتك فيهو من يومين.. ! م قاعده تاكلي ولا شنو! قلت ليها رحمه براك قلتي يومين دايرني ازيد بالسرعه دي!! وبعدين بأكل والله لكن كلو ماشي في الشعر بس، اعمل شنو انا، قالت لي تمام تمام، ح اعمل ليك نشأ أمكن تنفعك، قلت ليها اعملي الدايراهو لكن برضو م بنفع قالت لي انتي م عليك حاجه غير بعد اعملو، انك تشربيها، قلت ليها تمام حاضر وي ستي اعملي البريحك، مسكتا المرايا، لقيتو نشف خلاص، رحمه قالت لي ادعكيهوو بيدك قلت ليها تمام،، بعدها مشيت غسلتو وعملت زبادي بارد في وشي وقعدت بيهو.. زي عشره مساء كده احمد جا ورحمه رجعت معاهو..

اليوم التاني من الصباح كنت شغاله ماسكات طبيعيه،، ونشويات،
مع المغرب كده جو بنات الجيران وبنات أهلنا كانوا عاملين حفله دلوكه يشيلن ويغنن، والزغاريد دي م ليها حد، نمتا وخليتهم لسه بغنوا،

يتبع..
يجماعه دايرين اكتب كل يوم بارت وارسلو، لكن بكون بسيط ولا تنتظروني لحدي م انتهى منها بالكامل ولا كل يومين تلاته والبارت يكون طويل..
ي ريت تدوني رأيكم علشان اكبر تصويت اقدر امش عليهو!!..

يتبع..