حب بعد الزواج

شريان 11

#حب بعد الزواج (11)
#بقلمي :زينب أمير

"السودان" بيتناا
خاتين قدامهم صينيه فطور، وبتونسوا،، امي سألت رحمه، وقالت، البت دي م اتصلت عليك نهائي؟ ردت ليها رحمه وهي بتكب في مويه،، لالا والله وبعدين هي عروسه،، م بقدر اتصل عليها وهي في شهر عسلا ! ولا شنو ي خالتي؟ هزت ليها امي راسها بدليل كلامك صاح وكده،، بعدها قالت ليها انتي احمد ده مالو لا بياكل زي الناس ولا بتونس معانا، لي زمن منو! الولد ده شكلو عندو حاجه مضايقاهو ولد بطني وبعرفو تب،،رحمه قالت ليها مشغول بس والله قالو الشغل اليومين ديل ضاغط شويه بعدين زاتو بكره الجمعه بكون قاعد،، منها زاتو يتونس ويرتاح شويه من ضغط الشغل وجرجرتو،،، قالت ليها فعلا فعلا كلامك صح ي بتي، كدي اكلي شغلتك بالاسئله، آها وانتي كيف مع الحمل في شي تاعبك؟ ،، ابتسمت ليها وقالت،، كلو تمام الحمدلله، دعواتك بس اقوم بالسلامه، قالت ليها ان شاء الله ي رب ي رب..

*عندنا*
بعد يوم طويل متعبب،، كنا قاعدين في مطعم(بيجا) طلبنا وبقينا منتظرين ،، وقفت ع حيلي وقلت ليهو عن اذنك،، فتشت الحمامات، ودخلت، غسلت وشي وظبطت الميكب ،، بعدها اخدت نفس طويل وطلعت ليهو،، كالعاده لقيتو شغال بتلفونو،،قعدت "بملل"عاين لي وم قال حاجه،، دقائق ونزلو الاكل،، ختا تلفونو جوه جيبو،، شويه شويه بقى يتكلم معاي ويسألني عن المتاحف والاماكن المشينا ليها،، رديت ليهو "بابتسامه وحماس" رهيبين والله، شفتا الصوره حقت البت الراكبه حصان؟ عسلل عسلل عديلل، كل العارفاهو اني كنت مبسوطه شديييد وانا بتكلم وبحكي ليهو،، وهو ساكت ساي بسمع فيني.. كل م يحاول انو يتكلم بقاطعو بموضوع تاني او اذكرو بحاجه،، ضحك ضحكه خفيفه، عاينت ليهو وسكت،، ضحك تاني وقال لي كملي كملي سامعك...

*جانب منذر*
مرت يومين من جينا ألبانيا، فكره السفر دي اصلا م كانت واقعه لي نهائي ، لحدي م اتكلم معاي مدثر اخوي وسألني ح تسافروا وين؟ قبلي م ارد عليهو لقيتو بدي فيني في اسماء مدن قال لي في حاله م قررت ح تمش وين،، شوف الأماكن دي، وقتها اول صوره وراني  ليها كانت تيرانا (عاصمه ألبانيا) طوالي قلت ليهو اخترتا دي،،، ياهو الايام مرت ومرت لحدي م اتزوجنا وسافرنا،، في الطياره وساعه المره قالت عايزه تبدل بتصدقوني لو قلتو ليكم فرحتا؟ لاني عايز بقدر الإمكان اني اكون بعيد منها وم عايز احتكا بيها كتير، غريبه صح؟ طيب مش انت قلت الزواج مسؤوليه، وحاجه عظيمه وحاليا انت بتتهرب من مسؤولياتك وبتتجاهل في وحده المن كم يوم بقت زوجتك!! ،، أمكن لمن لقيت الكلام بقى جد جد،، لوهله حسيت بالندم لاني عملت خطوه كبيره زي دي،، وبقي  ماف مجال للتراجع، كل م اكون قاعد معاها بحاول قدر الإمكان م اتكلم معاها ولا اشتغل بيها كتير، بقعد اكبر فتره ممكنه في التلفون لمن تكون معاي ع طول بكون ماسكو،، بتذكر لمن كنت بضحك عليها وهي كانت بتبكي،، مديت يدي ورفعتا ليها راسها كانت بتبكي بدون صوت،، شفتا الدموع في عيونها جاريه وقتها بقيت بحاول اهديها،، في حاجه حصلت وخلتني اتوتر بطريقه عجيبه، صدقوني وقتها ممكن تقولو اتجمدت عديل، ولا هي كانت خلعه؟! بسبب حاجه وحده،، حضن منها !! كان كافي يحصل لي الحصل..

*عندي*
شلت بجامه واخدت شور، طلعت من الحمام، لقيتو راقد في السرير،، قفلت الباب براحه، وقفت قدام المرايا، مسكت العطر، بخ، بخ، بخ، فرشتا المصلايه وقلت بعد اصلي اسرح شعري وانوم طوالي، لاني تعبانه شديييد شديييدد،، في قريب لينا مسجد نسبه ل انو نص الناس في ألبانيا مسلمين،، اليومين الفاتو منذر كان بصلي فيهو،، قمت ورفعتا معاي المصلايه، اتوجهتا ع التوليت، فكيت شعري وبقيت بسلك فيهو، عايزه الفو، جاني صوتو وهو بقول،، خليهو ساي،، "بصوت مليان نعاس" اتخلعت والبانده وقعت من يدي لاني فكرتو نايم، ي ربي ليه كل م اقول نايم القاهو صاحي ويخلعني؟ قبلت عليهو وقلت ليهو هاا؟ كرر لي تاني كلامو، خليهو كده وتعالي نومي هنا " ضرب السرير خفيف احساس هنا" مشيت باتجاه السرير، قعدت واديتو ضهري، قال لي، لجين! مالك في حاجه،، جاوبت ليهو وانا برقد جنبو ،لا، تصبح ع خير،، فجأه حسيت بيهو قرب شدييدد، مسك شعري بيدو، وقال لي "بصوت واطي" شعرك طويل وحلو!! حرفيا وقتها اتجمدتا واتوترتا شدييدد، دقات قلبي الكانت بتضرب بصوره فظيعهه،،صوتو تقيل وبعيد، وهو بقول لي انتي ليه حلوه كده؟؟ وتاني م سمعت ليهو صوت،، بقيت بعاين ل يدو الفي خصري، بعد مسافه طويله وانا لسه صاحيه فيها،، مسكت يدو وقبلت عليهو براحه، بقيت بعاين في ملامح وشو، وقفت عند الشامه، الفوق ل شفايفو،، اترددتا كتير قبل م اعمل الخطوه دي، قلبي ضرب شديد ساعه قربت منو اكتر في محاوله ل اني ابوس الشامه !! بحركه سريعه زحيت منو لمن لقيتو بتنمل في نومو وقبل بالاتجاه التاني،،غمضت عيوني سريع،،بقيت بأنب في نفسي لحدي م لقيت نفسي نمتاا..

يتبع...