ليلة في ديسمبر ... قيد الكتابة

٨

ليه ساكتة إنتِ وم عايزة تتكلمي وتقولي ليه الحاصل بالضبط؟
شهد طارق واضح إنه بحبك يعني م ملاحظة إنه متغير من متين؟
قلت ليها ما بحبني ي ستي ما بحبني انا متأكدة من الحاجه دي
قالت لي والمخليك متأكدة كدة شنو ؟
سكتت
قالت لي مافي سبب ما تتوهمي ساي ي شهد

قلت ليها انا إعترفت ليه قبل كدة ورفضني م اعتقد في سبب مقنع اكتر من كدة..
قالت لي شنو؟ما فاهماك؟كيف يعني؟😳
قلت ليها إعترفت ليه قبل كم  سنة كدة ورفضني،قلت ليه عديل يا طارق انا بحبك تعال سوقني معاك ، م كنت صغيرة كنت في بداية عمر العشرينات وقتها كنت حيدة جداً وحزينة وما عندي غيره،رده لي كان  إنتِ أختي وانا بتعامل معاك على الأساس دة ومستحيل أفكر فيك أكتر من كدة في يوم،شهاب نفسه لما شاف مدى التقارب بينا قال ليه تعال نعرس ليك شهد دي عديل قالها ليه  وهو رفض وقال ليه شهد بالنسبة لي زي ما هي بالنسبة ليكم  وانا عرفت الحاجه دي فيما بعد ،هو بأي شكل كان رافضني  ..

حتى إنه لما عرفت موضوع رفضه لي من شهاب  الموضوع دة عمل فجوة كبيرة بيني وبينو في وقت ما  وعقدني نفسياً إنتِ فاهمة الزول دة رفضني مرتين بصورة مباشرة،فاهمة انا اخدتة وقت قدر شنو حتى قدرت اتعالج من عقدة الرفض دي؟؟خصوصاً إنه كان اول زول احبو في حياتي مع مرور الزمن فهمت وإتصالحت مع واقع إنه بعاملني ك اخته فعلاً واي شي بعملو عشاني ك نوع من الإمتنان لأمي الله يرحمها على وقفتها معاه وكدة،انا اتأقلمت عليه كدة..

بقت ساكتة وتعاين لي..

قلت ليها عايني الحاجة دي انا م قلتها لزول قبل كدة
قالت لي مرتاحة إنك حكيتي هسي؟

قلت ليها من وقتها انا بفضل اسكت دايماً على إني اقول كلام يكلفني مراجعة طبيب نفسي عشان اتعالج من ردة الفعل البلقاها نتيجة الكلام دة،انا بكره اتكلم كتير ،بكره التبرير،دايماً بشوف إنه كل زول يفهم العايزه وخلاص

قالت لي طيب يعني هسي هو إذا ما بحبك ولا عنده مشاعر تجاهك مالو طيب،؟

قلت ليها م عنده ميل يمكن عشان معتبرني من ضمن ممتلكاته الخاصة ،عارفه إحساس إنه تكون في علاقة في خانه الكونفرت زون؟يعني لا إنتو مرتبطين ولا ما مرتبطين ،علاقة كدة م عندها إسم كل الوقت مع بعض نتشارك اليوم من اوله لأخره ،دعم ندعم بعض،خططنا المستقبلية مع بعض ،كل شي بيوحي بإنه نحن م مرتبطين ،نتشارك كل شي ويقول لي كلام لطيف بس م ينفع اقول ليه بحبك،ما  ينفع اقول ليه مشتاقة ليك، طارق زول خااتيني في الخانة دي م عايز يرتبط بي وم عايز يسيبني في نفس الوقت،  بس دة الشي الأنا فاهماه وبتعامل معاه على اساسه رغم إستنزاف المشاعر النحن فيه دة

طيب ودة يتسمى شنو إن كان م حب ؟

قلت ليها ممكن نسميها انانية،وبعدين بغض النظر عن كل شي  م حأكون انا البت الخربت على بت عمها اكيد م حأعمل الحاجه دي ،
ولو في زول عايز يعقد المواضيع ف هو طارق نفسه،انا م عارفة هو بفكر في شنو وكأنه عايز يوجعني بسندس لكن حلال عليه م حيلقى مني غير البرود والتغابي واللامبالاة دة خياره هو،