إسراء؟
كنت حاسة بالنعاس شوفة الرسالة طيرت النومة من عيني،واصلاً سياف م كان موجود في الغرفة
إسراء منو؟ نزلت من السرير وشلت تلفوني ووقفت وانا بعيد قراية الرسالة وبرجع اعاين للرقم
م متذكرة إسم زولة بالإسم دة ابداً،كانت الدهشة مرسومة على ملامحي لدقايق بعدها قلت لنفسي:
ممكن تكون دي حركة من عمار؟
الفكره دي شويه خلتني اهدأ
طلعت من الغرفة ووصلت المطبخ وانا لسة مركزة في تلفوني
صباح الخير ،قلتها بدون م اعاين حوالي
بعد لحظات ،رفعت راسي م لقيت سياف موجود
طلعت من المطبخ وانا بنده عليه اكتر من مره م كان في اثر لوجوده في البيت، قعدت في غرفة المعيشة لفترة من الزمن وانا بقلب في تلفوني متجاهلة التفكير في الرسالة او محاولة الرجوع في الرقم عشان إحساسي بقول لي إنها حركة من عمار
دخلت الحمام إستحميت وغيرت ملابسي سمعت حركة..
كعادتي حسيت بخوفة في البداية ،فتحت باب الغرفة براحة لقيت سياف في وشي بخلعة قلت ليه بسم الله الرحمن الرحيم
صباح الخير مالك؟
مشيت وين إنت من الصباح؟
طلعت اجري،ودخلت اشتريت حاجات للبيت
كان شايل اكياس في يده ،إتفضلي دة بتاعك
شنو؟
شوفيه
شلته وفتحت الكيس وبديت اطلع في الحاجات كان جايب لي منتجات عناية بالبشرة وعطور
بتاعتي؟
وانا بشتري في حاجات البيت جيت لحاجات الحمام طلبت من الموظفة تساعدني اشتري حاجات لمرتي ف دة إختيارها انا م بفهم فيهم طبعاً
ضحكت وبقيت اقلب فيهم وهو بعاين لي ومبتسم
حأدخل الحمام استحم واغير انا طيب
من ضمن الحاجات كان في ماسك،شلته و مشيت وراه قلت ليه عايزة اجرب دة ثواني إتسابقنا وبقينا نتشاكل في باب الحمام
عيب يا سياف البتعمل فيه دة إنت زول كبير وعاقل ياخ معقولة تتشاكل معي في حمام
طيب إنتِ خليك زولة عاقلة وخليني استحم م باخد منك 5دقايق
ابيت عايزة ادخل انا اول
بقى يضحك
عضيته في كفة يده ،وقلت ليه ياخ دقيقتين بس عايزه اجربه والله أحرده،فتح لي الباب بغيظ وقال لي يلا
أنت تقرأ
ليلة في ديسمبر ... قيد الكتابة
Romanceرواية سودانية بقلم شهد عبد الله "أحبّ الاحتفاء برصيد اللحظة الهادئة التي تأتي بعد يوم مزدحم بالسعي،وإنها لعافيه أن يكون لديك ملجأ امن وملاذاً لطيفاً يحنو عليك عند غروب شمس كل ليلهه...🌻♥️
