ليلة في ديسمبر ... قيد الكتابة

57

عارفة انا إحترمت رغبتك و خليتك هناك وم اصريت على رجعتك ليه؟

امجد ممكن تسمعني..

انا سألتك سافرتي مع عمار لولاية جديدة غير الإنتِ فيها ولا لأ؟سؤال بسيط جاوبي عليه

ايوا سافرت يا امجد بس..

طيب مع السلامة يا شهد قفل الخط في وشي

رجعت إتصلت..

الو يا شهد 

رفيدة اديني امجد 

هاك يا امجد،امجد،يا امجد بتكلم معاك انا..

اااااا شهد امجد طلع..

دموعي جات جاريه 

في شنو يا شهد احكي لي،جد الصور المرسلها عمار دي إنتِ وهو؟

بانفاس متسارعة قلت ليها صور شنو البتكلم عنها امجد دي ؟ومنو فيكم المتواصل مع عمار اساساً ومرسلها لمنو يا رفيدة؟

والله يا شهد عمار اكتر تواصلو مع شهاب ف نحن رسل لينا الصور دي شهاب عشان نحن كذبناه لما قال لينا شهد وعمار شبه حلو مشاكلهم ورجعو وحالياً هم مع بعض وشهد إنتقلت مع عمار لمدينة جديدة وكلام كتير ،المهم حتى بعد الصور دي كذبناه امجد بالذات كذبه وقال ليه لو كلامو صاح وهو صادق كان رسل صور كاملة ليها عديل ما صور زي دي،وإتناقشو كتير شديد وحصلت جوطة في النهاية شهاب قال ليهو بدل ما تجوط فيني انا وتعمل قصة إتصل على أختك واسالها إذا صح ولا لأ

الصور دي شنو يا رفيدة ؟رسل ليكم صوري انا؟

 دقيقة ارسلها ليك يا شهد

كنت برجف وانا ماسكة التلفون وفاتحة الشات ومستنيه الصور..

نزلت عندي الصور،بقيت اعاين ليها..

صورة ونحن جمب بعض في الطيارة ،وصورة لتذاكرنا مع بعض ما عارفة كيف تذكرتي وصلت لي يده ..

وصورة لما كنا في المطعم بناكل

وصورة ونحن في مكتب العقار

النقطة المشتركة بين كل الصور دي إنه ما مظهر وشي،في الطيارة مصورني وانا بعاين بالشباك وماسكة الكتاب..

صدمني وجود صورة مرسلها ليهم وهو ماسك إيدي في مطعم ظاهرة فيها يدي والدبلة بس واصلاً دي دي صورة قديمة ما ليها علاقة..

شهد إنتو رجعتو جد؟يعني إنتِ هسي مع عمار؟

ايوا انا معاه بس..

سمعت صوت عمتي بتزغرد،الف مبروك يا بتي،ربنا يهدي سركم ويجعل المودة والرحمة بينكم وما تفترقو ابداً،اي نعم ربنا قال اقضو حوائجكم بالكتمان لكن ما بالطريقة دي نحن اهلك يا بتي كان ما فرحنا لفرحك البفرح ليك منو؟