ليلة في ديسمبر ... قيد الكتابة

٣٣

اسوأ إحساسي حاساه وسط كل العشته دة إحساسي بفقدان الثقة تجاه كل حاجه حوالي،بقيت دايماً في حاله شكك مع اي حاجه قدامي،اي شخص،اي تعامل..

على قدر م بحاول اتجاهل الشعور دة وم ابينه في تعاملي مع الحوالي على قدر ما انا بقيت حاسه بعدم الأمان حتى وانا جوا بيتي ومع نفس،الأمر اشبه بالوسواس القهري،بحاول على قدر ما اقدر إني احافظ على إتزاني النفسي ولكن كل الظروف المحيطة بي اكبر من ثباتي،حاسة إني حتى صفة اللين إتنزعت مني وبقيت بتعامل بقساوة..

وانا في البيت إتصلت علي رفيدة اول ما فتحت الخط قالت لي شهد جايبة ليك اخبار حلوة شديد،الحمدلله امجد إتلقى ي شهد،إتلقى بألف صحة وعافيه،كانت كانها بتبكى..

قلت ليها عرفت الخبر..

قالت لي من وين عرفتي؟

قلت ليها المهم عرفت 

قالت لي شهد عايني ربنا سبحانه وتعالى لطيف وحكمته بالغة ،يعني نحن م كنا متوقعين نلقاه والحمدلله إتلقى،حتى لو لقيناه ما كنا متوقعين نلقاه بالف صحه وعافيه كدة قدر اخف من قدر،واكيد الجاي كله خير،وان شاء الله يطلع منها،طارق نزل من السعودية مخصوص عشان الموضوع دة وهسي قال حيسافر ليبيا ومعاه حسام ،اصلاً نحن ما حنخليه 

قلت ليها ممكن حسام واهله يكونو بعيدين من الموضوع دة؟

سكتت 

قلت ليها يا ريت توصلي كلامي دة ل حسام او اديني رقمه انا حأقول ليه الكلام دة وم عايزاك تتواصلي معاه ي رفيدة،كل مكالماتك معي م بتخلى من إسمه،انا عندي اسبابي البتخليني اقول ليك الكلام دة وحيجي وقت اشرح ليك فيه كل شي بس ما هسي،حاولي ما تتواصلي معاه،وم تخليه هو ولا ابوه يعرفو اي حاجه في البيت فهمتيني ي رفيدة؟

قالت لي فهمتك ي شهد،حاضر،العايزاه ببقى 

قلت ليها طارق جا متين؟

قالت لي اول م عرف بالخبر دة من امي نزل السودان 💔

وبالمناسبة شادي كمان جا هو ومرتو وحالياً معانا في البيت،فتح شقة خالتو سلوى فوق وشبه قال حيستقر خلاص بعد كدة..

قلت ليها الحمدلله على سلامته،حيسافرو مع طارق لأمجد هو وشهاب صح؟

سكتت مسافة وقالت لي اي ان شاء الله، المهم انتِ ما تشيلي هم كلو بعدي على خير إن شاء الله 

قلت ليها بابا كيفو؟كويس ؟عرف بموضوع امجد؟

قالت لي لسة خالتو سميرة قالت م يكلموه عشان م يتعب

قلت ليها احسن،ما تخلوه يعرف لما الموضوع يتحل 

قالت لي جايه متين انتِ ي شهد؟بجد البيت محتاجك شديد ماف غيرك حيرتبه والله انا متأكدة لو جيتي كل شي بتصلح كفايه جداً إنه تكوني موجودة 💔