(من دون دليل )...

Part(6)(لعبة)...

✨مغامرة جديدة من مغامراتي نخوضها معاً في أحداث مشوقة و مرعبه تحبس الأنفاس و خيالية واذا تشابهت مع الواقع فإنها من سبيل الصدفة...

من قصة (من دون دليل )...

#الكاتبة_نمارق_الاسدي

#الكاتبة_نمارق_ميثم

#الكاتبة_N

تأخرت بالحكم لكن تأكد بأن الحكم عادل 🧩..
______________________________________

البارت السادس (لعبة)...

أبابيل...

اخذت الجثة و رحت بيها للمشرحة حتى ابلش فحص بيها وصلنا للمشرحه نزلوها للجثة حتى يباشرون بأجراءات التشريح و تسجيل الجثة اني رحت لغرفتي بدلت و حضرت نفسي للتشريح...

بعدها رحت لغرفة التشريح و نضفت الغراض بالرغم من نضافتهن ادري بي حيدر منظفهن شويه ودخل وياه الجثة...
حيدر: صباح الخير على الجثث...
أبابيل: ها حيدر من الصبح تنك؟؟...
حيدر: الريحة لعبت روحي...
أبابيل: ميخالف خل نخلص شغل حطها على السديه رتب الوضع؟؟...

ضل يرتب بموقع الجثة و نقلها للسديه الخاصة بالتشريح شفته هو فعلاً وجهه اصفر يمكن بسبب الريحه فعلاً مقرفه سبحانه الله الإنسان طول ما هو حي افضل المخلوقات و بس يموت يصير كتله من الريحة المقرفه...

توكلت على الله و بلشت شغلي و حيدر واكف يمي فتحت الجثه بالمشرط حيدر ما تحمل حجه:
حيدر: بس اريد افهم انتي من وين جايبه هذه القساوة اني رجال و لعبت نفسي من الريحة و من المنظر...
أبابيل: استاذ حيدر بلا زحمة لتلهيني عن شغلي هاي اولاً و ثانياً اني دا اشتغل ما اعتبر نفسي دا اشتغل بجثة اعتبر نفسي دا اشتغل بشي مثل من اطبخ لو من انظف و اريد يطلع كل شيء على اكمل وجهه و ثالثاً اذا تكدر تساعدني ابقى متكدر تساعدني تكدر تتفضل...
حيدر: العفو ست أبابيل مو قصدي كملي...

بقى واكف يمي يساعدني و بدون ما يحجي..
اخذت المخ و كان تقريباً نصه خلايا ميتة منظرها مو غريب عليه و ركضت على الجثث الباقيه الي نفس هذه الجثة و انصدمت...

الخلايا الميته نفس مطابقة ويه الخلايا القديمة ضليت مصدومه ما اعرف شنو اسوي ايدي رجفت ريكي نشف لاحظ عليه حيدر اجه يمي ابتعدت عنه و عفته و طلعت من غرفة التشريح هو طلع ورايه...

حيدر: شصار؟!...
أبابيل: اتصل على ابوك خل يجي بسرعه...
حيدر: غير افهم شنو صار؟...
أبابيل: من يجي تعرف...

رحت لغرفتي كعدت على المكتب حاطه راسي بين ايدي شويه و دخلوا مهند و حيدر سويه...
مهند: شكو أبابيل؟!...
أبابيل: قاتل متسلسل...
مهند: يعني شنو؟؟ و قصدج على منو؟؟...
أبابيل: جثة اليوم الصبح هسه دا اشرحها و طلعت نفس الجثتين السابقات نفس الطريقه الي ميته بيها الخلايا العصبيه و الدماغ الفرق انو هذه الجثة فترة طويله صار الها من ميته اما السابقات عرفنا بسرعه بيهن هذا الفرق الوحيد ممكن تكون هذه الجثة الثانية لان حسب الخلايا و المواد الي فارزتها بين الجثتين هي ميته اذا قاتل متسلسل...