#تحدي_الحب

البارت 22

#تحدي_الحب
البارت 22

نيفين
وصلت لبيت عمتي
استقبلتني عمتي وخبرتها فادي جاي وراح نسافر
عمه كالت خابريهم كليلهم معزومين يمنه ع العشه هو وبيت اخته خلي نتعرف عليه
اتصلت بي وكتله معزومين بيت عمتي اتفقنه على ساعه 6 يجون
لاول مره راح نتشاوف وجه لوجه
طلعت فيتان قصير وبسيط لبسته ورتبت شعري وخليت مكياج بنفس الوقت بنات عمتي جانن يباوعلي بحقد
طبعاً عمتي عدها 2 بنات

ريتا مواليد 1987
تولاي مواليد 1989

صارت ساعه 6 وربع اندك الباب طلعت عمتي وزوجها استقبلوهم طبو للصاله اخذت العصير قدمتلهم وهنا شفت فادي بالصور جان يبين طويل وضخامه بــَس طلع ضعيف حيل وبنيته ناعمه ابيض شعره بي شقار وعيونه صفر
تقرب عليه باسني من خدي انطاني جنطه كال هاي جبتهن الج هدايه اخذتهن منه وديتهن للغرفه  الي كاعده بيها اني بصف غرفه البنات غرفه صغيره رتبتها عمتي وخلت بعا جربايه وكنتور كالت ابقي هنا بين ما تسافرين
طوبتها للغرفه ورجعت يمهم بالصاله اشوف تولاي وريتا بينهن يسولفون ويباوعن عليه وعلى فادي
حضرنه العشه وتعشينه قبل ليطلعون كال العمتي باجر آٍجُـٍي اخذ نيفين حته نطلع اني وياها ونتعرف ع بعض اكثر
وراحو رحت للغرفه شِفـٍـْت الجنطه الي جايبها فادي مفتوح سحابها ومن فتحتها جانت مفركشه بيها ملابس وعطور ومكياجات وعلبه مال هديه ذهب بس فارغه بقيت حايره شنو بيها دورت الجنطه كولها مالكيت شي اتصل بيه فادي
فتحت خط
كال عجبنج الهدايه
تشكرت منه
كال والسوار شنو رايج بي اشتريته من هنا قبل لنجيكم

هنا عرفت جايبلي سوار ذهب بــَس هو ماكو استحيت اكوله ماكو لان حيل واضح مأخوذ من الجنطه كوتله اي عجبني وتشكرت منه
سديت الخط طلعت ردت اسال البنات عليه بس كولت عيب من عمتي هــًـًســًه تكول بوكتنه واكيد هنا حته لو ماخذاتها راح ينكرن سكتت وسديت الموضوع
ثاني يوم بدلت وتحضرت اجه اخذني طلعنه افترينه وللمولات وهم اشترالي شغلات هوايه وكعدنه بالمطعم تغدينه ورجعنه للبيت قبل لنرجع اشترالي ورد طبيعي من طبيت للبيت جنت شايلته بيدي هنا والعلاليك طبيت للغرفه سفطت الملابس وجبت كلاص بي مي خليت بي الورد
وبقه يوميه يجي حته نطلع وبكل طلعه ارجع محمله علاليك بكل مره يسالني عن السوار ليش ملابسته واكوله نسيته
يوم عن يوم اشوف الحقد والكراهيه بعيون بنات عمتي يزيد اكثر خصوصاً من اطلع وارجع الكاهن منتضراتني بالكراج ونضراتهن اليه والفادي تخوف حيل حاولت مااحتك بيهن الى ان نسافر مابقه شهر واحد ونسافر
صار على جيه فادي اسبوعين واحنه يوميه نتشاوف اني وياه مر الاسبوع الثالث بــَس حسيته صار يبتعد عني بقه يجي للبيت مال عمتي بــَس ميقبل نطلع يبقه بــَس بالبيت وبنفس الوقت حسيت باله مو يمي ودائماًانتبهله صافن  يوم بعد يوم صار يتغير عليه آِٰلُّى درجه صار يرزلني كدام بنات عمتي وميحترمني ودائماً يكولي جيبي تليفونج ويضل يدور بي اني ماسحه كلشي من تليفوني حته رقم فراس حفضته بكلبي ومسحته خفت من المشاكل
صرت اشوف نضرات الشماته بعيون تولاي وريتا.
مره جنت كاعده يم عمتي الصبح من وقت كعدت سوت ريوك وكالت روحي كعدي البنات يجني يتريكن
طبيت لغرفتهن جانن نايمات سمعت صوت الفون مال تولاي يدك عايفته على الشحن ع الميز رحت شِفـٍـْت منو يتصل انصدمت واتساب فادي الي يتصل راساً سويته صامت اريد اعرف فادي شعنده متصل على تولاي اخذت التليفون وطلعت ع كيف طبيت للحمام
انسد لاتصال بــَس طبيت ع المحادثه مال واتساب
شِفـٍـْت مراسلات بينهم
والي صدمني الكلام الي حاجيته عليه