في مهب الريح

1

*#في~مهب~الريح《01》*
*#الجزء~الاول♡*
*#بقلم~مها~حولي~الزاكي*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
استعجلت و عملت الشاي و ناديت ياسر أخوي ، لمن جاني قلت ليهو شيل الشاي دا وديهو لأبوي ، قال لي أبوي طلع ، قلت ليهو متين ؟!!
قال لي من قبيل ، قلت ليهو خلاص اقعد أشرب الشاي دا و اتخارج على مدرستك ، قال لي انتي ما ماشه ولا شنو ؟؟؟
قلت ليهو أمشي كيف و انتوا لسه بتتكاسلوا لي !
مشيت دخلت الأوضه و لقيت براءة و رغد لسه نايمين !! جريت من كل وحده بطانيتها و قلت ليهم المدرسه دي بتاعة أبوكم ! قوموا ياخ !!
رغد قالت لي الله يحرق المدرسه و سنينها ، ياخ في الإجازة كنا مرتاحين و بننوم و بنصحى على راحتنا ، قلت ليها إجازه و إنتهت ، قومي اجهزي يلاااا عشان أنا برضو ماشه!
براءه قالت لي أنا ما ماشه ، قلت ليها ما على كيفك ، قالت لي دا أول يوم ما ح يدونا فيهو حاجه ، ح يخلونا ننضف المدرسه و الحمامات ، قلت ليها برضو أمشي ، قالت لي ياخ ما ماشه و جرت البطانه و اتغطت!
رغد قالت لي و أنا ذاتي ما ماشه ، يعني أنا بيتنا ما قاعده انضفو أمشي انضف المدرسه ! بري مالي و مالا ! قالت كدا و إتغطت هي كمان ، قلت ليهم كويس خلوا أبوي يجي و شوفوا كما كلمتوا ليكم ، مشيت المطبخ لقيت ياسر لسه ما شرب الشاي ، قلت ليهو خير مالك انت كمان !!؟
قال لي يعني اشربو شاي ساده كدا ! ماف لبن بدره أو حليب ! قلت ليهو لو في أكيد ما كنت كبيت ليك شاي أحمر يا ياسر ، براك شايف و عارف وضعنا كيف و الشاي الساده دا احتمال بكرا ذاتو ما تلقاهو ، قال لي خلاص ما عايزو ، قلت ليهو أحسن ليك أشرب عشان ما يصدع بيك ، قال لي ما بقدر اشرب شاي ساده من الصباح ، أديني قروشي بس ، طلعت ليهو قروش و أديتها ليهو و قلت ليهو اوعك تشتري بيها حلويات و ما تفطر ، لو جيت البيت جعان ما ح تلقى حاجه تاكلها ، قال لي طيب و طوالي شال شنطتو و مشى ...
استحميت و سرحت شعري و جهزت نفسي ، شلت قروش و مشيت دخلت الأوضه و قلت ل رغد دي 500 جنيه شوفي بتفطركم بشنو لأنو ماف تاني ، قالت لي خلاص ح نشتري اتنين اندومي ، قلت ليها لا ما تشتريها ، ما ح تشبعكم ، أنا شايفه إنو أحسن تجيبوا ليكم عيش و طعميه تفطروا بيهم ، قالت لي خلاص بشوف هسي عايزا أنوم ، قلت ليها حاسه نفسي حأمشي و أجي ألقاكم لسه راقدين الرقده دي ! قالت لي لا ح نقوم بس بعد نكمل نومنا ، قلت ليها المشكله إنو نومكم ما بكمل ....
المهم مشيت خليتهم و لمن طلعت قفلت باب الشارع ، أثناء ما أنا ماشه على المدرسه لمحت ياسر أخوي من بعيد بلعب في الميدان و جادع شنطتو !!
من مكاني داك طوالي مشيت عليهو و لمن قربت من الميدان ناديتو و قلت ليهو الليله يا ياسر أصبر لأبوي ، طوالي شال شنطتو و قام جاري على المدرسه و الأولاد المعاهو ذاتهم لحقوهو ، المهم استعجلت في المشي لأنو الزمن شبه أتأخر ، لمن وصلت المدرسه لقيت الباب مقفول ، ضربت الباب كدااا لحد ما جا راجل و فتح لي و طوالي دخلت ، لقيتهم واقفين طابور ، في وحده كانت في واقفه في نص الطابور لمن شافتني أشرت علي و قالت زي دي مثلاً! جايه متأخره .... طبعاً أنا اتخشبت في مكاني و كل الأنظار اتجهت علي ، المره أشرت علي عشان أمشي و اقيف طابور مع باقي الطالبات ، قالت أهم حاجه عندنا في المدرسه دي هي الإنضباط و الحضور في المواعيد ، بس بما إنو اليوم اول يوم و في ناس جديده و ما عارفه الحاجه دي ما ح نعاقب زول ، إتلفتت علينا و قالت لينا سامعين الكلام دا يا أولى ثانوي ؟!!
قالوا ليها ايوه ، قالت ليهم بعد دا انتوا بقيتوا بنات كبار و بنات ثانوي يعني كل حركات الأساس ديك ح تخلوها و من اليوم لازم تعرفوا ضوابط و قوانين المدرسه دي و خليكم عارفين إني ممكن اتساهل في أي شئ إلا التأخير.....
المره قالت كلام كتير و في الآخر عرفتنا على نفسها بإعتبار اننا طلبه جداد و ما عارفين زول ، قالت انها هي المديره و إسمها فايزه ، بعدها جوا إصطاف المعلمين و المعلمات و عرفونا على نفسهم ، لمن خلصوا المديره قالت يلا تعالوا يا أشجان و نمارق قدموا الطابور...
المهم البتين طلعوا و قدموا طابورهم و عرفنا إنهم سنه تانيه ، المهم بعد ما خلص الطابور ، المعلمات وجوهنا على فصولنا ، كانوا مقسمننا على فصلين (أ_ب ) قالوا لينا في ورقه معلقه قصاد الفصلين ألف و باء كل وحده تشوف اسمها تابع لأي فصل ، المهم مشيت و لقيت اسمي تابع للفصل ألف ف دخلت طوالي و قعدت في الكنبه التانيه لأنو في غيري قعدوا قدام ، المهم بعد حكاية دقيقتين جات أستاذه داخله ، بعد ما سلمت علينا قالت لينا معاكم استاذه هناء و ح أمسكم مادة الرياضيات ، المهم بدت لينا حصتها و كانت دبل و أنا زهجت بالجد و اشتقت للأساس و معلماتو ، بعد ما خلصت و طلعت كانت فسحة الفطور بس انا ما مشيت ، قلت ح أوفر قروش و أساساً ما حاسه نفسي جعانه ، طلعت كراسي و قعدت أكتب من السبوره لحد ما زمن الفسحه خلص و الجرس دقه ، استعجلت و طلعت من الفصل و مشيت شربت مويه من المبردات ، لمن جيت راجعه الفصل لقيت في أستاذ دخل ، دقيت ليهو الباب ، قال لي اتفضلي ، بعد ما دخلت هو واصل شرحو ، قلت للبت الجنبي دي مادة شنو ؟؟
قالت لي قال إسمها فيزياء ، قلت ليها اهااا ، فجأه كدا أحس ليك بطباشيره واقعه بيني و بين البت ، لمن عاينا لقيناهو دا الأستاذ ، قال لينا انتوا جاين تتونسوا ولا تقروا !؟ قلت ليهو أنا بس سألتها عن اسم الماده ، قال لي و تسأليها هي ليه شايفاني حيطه هنا !... طبعاً أسلوبو زعجني....قال لي لو اسم الماده دا بهمك شديد كنتي دخلتي الفصل قبل ما الحصه تبدا و بعدين اسم الماده  مكتوب بخط طويل و عريض في السبوره معقوله ما شايفاهو ولا بس عايزا تتكلمي و خلاص !!
البت قالت ليهو خلاص معليش يا أستاذ ما ح تنعاد تاني ، طبعاً شميتو شديد و حسيت إنو أهاني قدام البنات كلهم ، المهم اتكلم لينا عن خصائص الماده و لمن خلص قال في زول عندو سؤال !؟؟
قالوا ليهو لا ...المهم شال حاجاتو و إتخارج ، بعدها جونا كذا معلم و معلمه و أنا صراحة ما كنت طايقه أي زول ، أنا بطبعي لمن أحب مكان و أتعود على ناسو ببقى صعب علي أتعود على مكان غيرو و اتأقلم مع ناس غيرهم رغم انو في كذا بت من الهنا قروا معاي الأساس بس مع ذلك مفتقده شديد حصص الأساس و المعلمات كلهم و طابورنا الصباحي 😭💔
المهم ما صدقت متين خلص اليوم الدراسي ، طوالي شلت شنطتي و على طول مشيت البيت ، لقيت براءه و رغد فاتحين اسبيستون و بحضروا ساي ، قلت ليهم فطرتوا ؟؟! رغد قالت لي ايوه ، قلت ليها ان شاء الله في عيش ، قالت لي في زي 5 كدا ، و في طعميه شويه..
قلت ليها  خلاص ح أخلي الطعميه دي ل ياسر و أنا ح اشيل عيشه أشرب بيها الشاي ، فعلاً مشيت سخنت الشاي و شلت عيشه شربتو بيها ، بعدها صليت الضهر و جيت قعدت معاهم ، قلت ليهم ياسر دا اتأخر ، براءه قالت لي بكون بلعب في الشارع ، جنو لعب هو ، قلت ليها أكيد...
طبعاً أنا ياداب بقرا في اولى ثانوي و اليوم كان أول يوم لي و أنا أكبر وحده ، بعديني رغد بتقرا في سابع ، بعدها ياسر في خامس و آخر العنقود براءه في تالت أساس..
المهم ياسر جا متأخر ، شاكلتو و قلت ليهو تاني أول ما يفكوكم تجي البيت طوالي و بعدها لو طالع أطلع ، قال لي خلاص عرفنا ما تجوطي ساي ، قلت ليهو أمشي المطبخ في طعميه شيلها و شيل معاها عيشتين و خلي الإتنين التانيات لأبوي ، قال لي كويس و طوالي مشى....
المهم العصر لمن أذن صليتو و دخلت المطبخ و بقيت أقلب فيهو ، فتحت معظم الجرادل و في آخر واحد لقيت حبة رز ، غسلتو و كبيتو في النار و كبيت فيهو مويه ، فتحت علبة السكر لقيتو شويه ، كبيتو في الرز و معاهو شوية ملح ، رغد جات داخله ، عاينت في الحله و قالت لي رزك دا ما كبيتي فيهو زيت ، قلت ليها بعملوا فيهو زيت من البدايه يعني ؟؟ قالت لي غيتو شفت أمي بتعملوا كدا ، شلت زيت و كبيتو في الحله و قلت ليها المهم ح يطلع رز في النهايه و حاجه نملى بيها كرشنا ...
المهم بعد ما الرز جهز ختيت منو في صحن و خليتو يبرد شويه بعدها شلتو و مشيت بيهو الراكوبه و ناديت ياسر و رغد و براءه ، ياسر جا عاين كدا و قال لي ما عايز أنا ، قلت ليهو ماف شي بتأكل تاني ، قال لي دا ذاتو ما بتأكل ، براءه قالت لي أنا جعانه شديد ، قلت ليها اقعدي أكلي طيب ...ياسر طلع من البيت و أنا الأكل ذاتو غلبني ، قلت ليهم أكلوا انتوا ماشه أحضر ....دخلت جوه و بكيت بحرقه و قلبي كان بتقطع حته حته ، أنا قلبي ما واجعني إلا على براءه الصغيره دي و البقت تتحمل الجوع بالساعات ، بعد مسافه كدا أبوي جا داخل ، براءه جرت جابت ليهو مويه ، ناداني و قال لي أكلتوا ؟؟
قلت ليهو اي ، لقيت رز و عملتو ، قال لي كويس ، على بال ما هو يصلي مشيت ختيت ليهو رز و طلعت العيشتين ديلك قلت ياكلهن ساي بس اتفاجأت لمن لقيت معاهم طعميه ! قلت معناها ياسر شال منها و خلى الباقي !!
المهم شلتهم و جبتهم لأبوي ، قال لينا تعالوا أكلوا قلت ليهو شبعانين ، رغد قالت ليهو مها ما أكلت ، قال لي تعالي أكلي معاي قلت ليهو ما جعانه أنا يا أبوي و أساساً فطرت متأخره في المدرسه ...شال الرز و أدانا العيشتين مع الطعميه ، أديتهم ل براءه و رغد ، اتقاسموها و أدوني معاهم رغم إني قلت ما عايزا...
المهم بعد المغرب طلعنا سرايرنا برا ، طلعنا 4 سراير ، أبوي كان راقد في واحد و التلاته لصقناهم مع بعض ، براءه راقده معاي و رغد و ياسر كل واحد في سرير ، براءه قالت لي طلعوا لينا التلفزيون نحضر ، قلت ليها عليك الله نومي ساي ، رغد قالت لي خلاص ما تكوركي فيها ، قولي ما عايزا تطلعيهو و خلاص ، أبوي قال لينا في شنو يا بنات !
براءه قالت ليهو عايزين التلفزيون يا أبوي ، قال ليها المطره دي شايله شكلها حتجي بعد شويه ، عاينت فوق في السماء لقيتها فعلاً شايله ، مشيت صليت العشاء و دخلت الأوضه فرشتها كويس قلت ليهم عشان لو المطره جات تدخلوا طوالي و كل واحد على سريرو ، المهم رقدنا برا و كل واحد مقبل على إتجاه ، بعد شويه قلت رغد !
ما ردت علي ، قلت ليها يا بت طرشه انتي ؟؟
قالت لي بصوت ناعس مالك ؟؟
قلت ليها صليتي العشاء؟ قالت لي نعسانه والله ، بنوم و بقوم أصليهو ، أبوي سمعها و قال ليها لا قومي صلي و تعالي نومي و انت ذاتك يا ياسر قوم و براءه دي صاحيه ولا نايمه ؟؟
قلت ليهو براءه نايمه يا أبوي و صلاتها ذاتا اخير عدمها ما شفتها بتكلفتها كيف و مره تصلي و مره لا ، قال لي برضو أحسن من العدم ، لمن تستمر فيها كدا بعدين براها بتنعدل و تقوم تصلي من دون ما زول يكلمها.....المهم رغد و ياسر مشوا صلوا و جوا راجعين ، أبوي كان تعبان و فتران شديد عشان كدا نام طوالي ، ياسر و هو راقد قال لي الأستاذه قالت لينا إنو الزول البصلي ربنا بدخلو الجنه و بديهو ثواب كبير و حاجات كتيره لكن نحنا بنصلي و ما أدانا حاجه عشان كدا أنا ما عايز أصلي تاني...
إتلفت عليهو بخلعه و قلت ليهو ياسر دا كلام شنو ؟؟! جبت الكلام دا من وين انت ! أوعك تاني تقول كدا ، أبوي لو سمعك ح يشاكلك ، يلا نوم عشان بكرا تصحى بدري ، المهم هو رقد و أنا كمان بس أول ما غمضت عيوني كدا المطره بدت تنقط ، أبوي صحى و قال لي صحي أخوانك ديل ، صحيتهم التلاته ، براءه و ياسر دخلوا طوالي و رغد لملمت معاي اللحافات و المخدات دخلناهم جوه و خلينا السراير في الحوش ، أبوي رقد في الراكوبه و نحنا دخلنا الأوضه و قفلناها علينا و المطره اشتدت و صوتها كان عالي شديد في الزنكي حق الأوضه و كمان الكهربه قطعت ، بعد شويه كدا رغد قالت لي المطره قاعده تنقط فيني ، شلت البطاريه و نورت في السقف لقيت فعلاً في فتحتين بنقطوا مويه ، حركت معاها سريرها للمكان الما فيهو مويه ، لصقنا سرايرنا في نص الأوضه و نمنا....