*#في~مهب~الريح《15》*
*#الجزء~الاول♡*
*#بقلم~مها~حولي~الزاكي*
*ــــــــ♡ــــــــ♡ــــــــــــــ♡ــــــــــــ❥ :00:00*
بالنسبه لي دور المعلم ما بس بختص بالتدريس و التهذيب ، المعلم عادي جداً يكون في مقام الأب و في بعض الحالات في طلاب المعلمين بالنسبه ليهم بكونوا في مكانة أهلهم أو أقرب ، مرات كتيره في مشاكل بتحصل مع الطالب ما بحكيها لأمو أو أبوهو أو أي فرد من عائلتو بس ممكن يحكيها للمعلم ، نحنا بندرس ، بنهذب ، بنزرع قيم و بننشر تسامح و محبه و نحنا بئر الأسرار لمعظم الطلاب ، لو علينا ما نشوف طالب زعلان أو مهموم ، الطلبه ديل بنعتبرهم زي أولادنا أو أخوانا الأصغر مننا و لو بنقدر نساعدهم ما بنتردد ، طول مدة السنوات الدرست فيها قابلت طلبه كتار و مشاكلهم كانت أكبر من أعمارهم بكتير ، هدفي التاني بعد أداء واجبي التدريسي هو كان إني أعبر بالطالب دا ل بر الأمان ، كنت بحس بالفخر و العظمه لمن اشوف طالب لي جاب نسبه كبيره و قدر يتحدى ظروفو و مشاكلو و دخل الجامعه العايزها و المجال الراغب فيهو ، ايوه انا ما قديم في التدريس كلها يمكن 5 سنوات بس قابلت فيها كميه من الطلبه و كنت مصاحبهم و مدي نفسي حرية إني أتدخل في مشاكلهم و أخليهم يحكوا لي و الحاجه دي للأسف عملت لي مشكله مع مدير المدرسه الكنت شغال فيها و إتهمني إني بستدرج الطالبات و بتودد ليهم و كلام كتير انتشر في المدرسه كلها ، أنا ما حاولت أبرر ليهو لأنو أنا قبل ما أكون أستاذ معاهو في المدرسه كنت جارو و هو عارف كويس أنا شنو و جاي من أي أسره ، من دون ما أتردد خليت المدرسه و اشتغلت في غيرها و المره دي بقيت ما مركز شديد مع أي طالب و تعاملي كان في حدود عكس زمان ما كنت بتشدد مع الطالبات لدرجة انهم بقولوا أي كلام قدامي و عادي كانوا بقولوا لي نحنا مكرشين عليك يا أستاذ ! رغم اني كنت بستغرب بس تاني بقول دي كلها حركات بنات خاصة انهم في العمر دا و أي أستاذ بجي يقيف قدامهم بعجبو بيهو و الموضوع بالنسبه لي ما كان خطير شديد لأنو من الأسباب البتخلي الطالب شاطر في الماده هي إعجابو و حبو للمعلم ! بس مها غير...
أنا من أول مره شفتها قدرت أعرف إنو البت دي متحمله حاجات أكبر من عمرها و في مشاكل كتيره هي بتواجه فيها ، الشي الخلاني أقرب منها و أحاول أعرف الحاصل معاها شنو هو مستواها الدراسي الممتاز شديد ، أنا ياما شفت طلاب كانوا كويسين و مستواهم فوق بس بسبب مشاكلهم الخاصه مستواهم وصل الأرض و تعبوا شديد عشان يقدروا يرجعوا زي ما كانوا و في طلبه فشلوا في محاولاتهم و اتحولوا من أوائل الفصل ل طيش الفصل ، عشان كدا خالص ما حبيت يحصل معاها كدا ، شطارتها كانت باهراني ، ما أنا بس ، كل المعلمين كانوا مبسوطين منها و دائماً بجيبوا سيرتها و معروف يعني الطالب الممتاز بكون مميز عند المعلم ، برضو من الحاجات الكانت واضحه عليها و بالجد خلتني أفكر ادعمها بأي طريقه هي انو هي كانت مسكينه شديد و طيبه و زوله على نياتها و ما بتعرف تدافع عن نفسها ، دا كلو كان باين عليها و دا الخلى معظم البنات يحقروا بيها على راسهم لين ، مها بالنسبه لي حاله خاصه و مستواها كان هاميني شديد ، كانت ولا زالت من أفضل الطالبات عندي ، حتى بعد الحصل....
مبدئياً كدا كلنا عارفين انو الطالبات بطبيعتهم بنجذبوا للمعلمين و بحبو يضحكوا و يهظروا معاهم و دا الكنت متوقعو من مها و عاديها حاجه عاديه و ما شايفها مشكله كوني أكون أستاذ مفضل عندها و تجي تتكلم معاي أنا من بين كل المعلمين ،، على الأقل دي حاجه ح تخليها تحافظ على قرايتها و مستواها في الفيزياء تحديداً ، بس يبدو إنو الموضوع أخد منحنى تاني و أنا خالص ما بلومها هي ، أنا الإتجاوزت حدي معاها و أبداً ما كان أساعدها في إمتحان الإنجليزي لأنو يمكن الحاجه دي خلتها تفتكر إني بنظر ليها نظره تانيه غير نظرة المعلم لطالبتو ، لأنو من بين كل البنات أنا ساعدتها هي بس ، الكلام الكتبتو في ورقة الفيزياء ما هظار ، لو وحده غيرها كنت طنشت الموضوع زي ما بعمل لمن الطالبات يكتبوا لي كلام حب في السبوره مثلاً و ينكروهو أو لمن ألقى في كتابي حق الفيزياء إعتراف من طالبه مجهوله أو أو أو....بس هي عشان بقيت عارفها كويس و عارف إنها حساسه و أي تصرف مني بعد كلامها القريتو ح يجرحها و يأثر عليها أخدت زمن و أنا بفكر أتصرف معاها كيف ، لأنها شكلها ماخده الموضوع جد ! ...
ما عرفت اعمل شنو ، هل أناديها و اسألها عن الكلام الكتبتو قبل الإجازه ولا أعمل رايح !!
في الآخر قررت إني اعمل رايح بس كنت عامل حساب إني ما أديها وش تاني و اعاملها زي ما بعامل البنات و أصلاً بقيت عامل حسابي مع كل البنات و بقيت اتعامل معاهم بحده...
كنت مفكر انو مها لو شافتني بتعامل مها كدا و مع كل البنات ح تفهم انها بالنسبه لي زيها زيهم و ما ح تحس اني متغير عليها هي بس ، اتخيلت إنو مع الأيام الموضوع دا ح ينتهي من دون ضرر أو ضرار ، هي يمكن نست الكتبتو أو ما متوقعه إني أكون قريتو ، المهم أنا ما ح ألومها هي و تعاملي الإتغير دا ما عقاباً ليها ولا القصد منو إني أحرجها أو أجرحها ، دا كلو عشان تتذكر إنو هي طالبه و أنا أستاذها من دون زياده أو نقصان ،، بس لمن كنت بصحح الكراسات و لقيت انو هي ما مشتغله و أدت غيرها يشتغل ليها عرفت انها اتأثرت من طريقة تعاملي معاها و دا الزعل الما خلاها تشتغل و لمن كان عندي حصه معاهم هي رغم انها كانت موجوده بس ما حضرت حصتي! يعني كأنها بطريقه غير مباشره بتعاتبني !!
إحترت اعمل شنو بس لو كان عديت ليها الموضوع دا و ما وقفت فيهو كانت حتفهم غلط للمره التانيه ، عشان كدا رفعت صوتي عليها و شاكلتها زي ما بعمل مع غيرها و كتبت ليها تعيد الكلام دا 10 مرات بس والله فاجأتني لمن ما كتبت العقاب و كانت قاعده عادي كأنها بتتحداني و بتقول لي ما خايفه منك !!
برضو ما كان لازم أسكت ليها على عدم سمعانها للكلام و لأنو كل الفصل عارف اني في الحصه الفاتت قلت انها ح تتعاقب و شددت على كلامي ف ما بقدر أتراجع و ما اناقشها و غير كدا أنا بالجد موضوع انها بقت ما بتكتب و بدت تهرب من حصصي مضايقني شديد ، لأنو انسانه شاطره و مجتهده زيها ما تستاهل مستواها يقل لأي سبب من الأسباب حتى لو كنت أنا السبب دا....
و الشي الحيرني أكتر انها فجأة كدا اتغيرت !! حتى نظراتها ما كانت نفس النظرات البريئه ديك ، بقيت بشوف كميه من الكراهيه في عيونها لي ! الموضوع دا ما بفرق معاي كتير و ما بهمني والله بس كمان ما عايزها تضيع نفسها ساي ، لأنو لو استمرت كدا في النهايه هي الحتكون الخاسر الوحيد...
أنا ح أجتهد عشان أفهمها بطريقه مباشره أو غير مباشره انو ما ينفع يكون في شي بيني و بينها لأنها طالبتي و أنا أستاذها
____________________
