*#في~مهب~الريح《19》*
*#الجزء~الاول♡*
*#بقلم~مها~حولي~الزاكي*
*ــــــــ♡ــــــــ♡ــــــــــــــ♡ــــــــــــ❥ :00:00*
المهم بعد فتره رغد رجعت عاديه و بقت زي زمان ، يوم كنا بنتكلم مع خالتو خنساء و قالت لينا إنو في تحسن في حالة عمو سليمان و إنو بدا حرك أطرفاو ، انبسطنا شديد والله ، قالت لينا بعد دا قربنا نجي ، قلت ليها نحنا إشتقنا ليك والله ، قالت لي أنا ذاتي والله و فاقداكم شديد ، قالت لي رغد نتيجتها قربت صح ؟؟ قلت ليها ايوه قالوا خلال الأسبوع دا أو البعدو ، قالت لي ربنا يوفقها ، بإذن الله رمضان ح نكون معاكم قلت ليها ان شاء الله ، بعد قفلت منها دخلت الفيس و بقيت لافه في القروبات المفيده زي قروبات تعلم الإنجليزية و قروبات النصوص و أقوال الأدباء و الشعراء ، رغد جات و قالت لي كفاك أديني التلفون ، قلت ليها صحي اتذكرت وريني رمز الواتس حقك شنو عشان تاني ادخلو و اتكلم فيهو مع خالتو خنساء ، قالت لي ليه الإتصال مالو ؟ قلت ليها برضو قولي الكلام دا لنفسك ، قالت لي أنا عندي صحبات بتونس معاهم و بنشوف حالات بعض ، قلت ليها المهم أفتحيهو لي قالت لي يا زوله نزلي ليك واتس تاني و اشتغلي برقم الشريحه زين ، قلت ليها بيييس عليك التقول ح آكلو ليك ، كلامك مع صحباتك دا فيهو شنو الخطير عشان تقفلي ليهو الواتس ! قالت لي كدا ما بحب زول يقرا ونستي مع صحباتي....المهم نزلت لي واتس تاني و سجلت فيهو الرقم التاني و أديتها التلفون ، المهم بعد أسبوع كانت نتيجة رغد ، عمتي آمنه جاتنا من الصباح و خالتو خنساء تشيل و تتصل و أنا متوتره أكتر من رغد ، عمتي آمنه هي الشافت النتيجه ، في البدايه عملت حركات بوشها نظام انها زعلانه و كدا ، وقعت قلبي والله ، لمن قالت 268 أنا ما صدقت والله ، من الفرحه ختيت يدي على قلبي و بقيت شغاله ل رغد سامعه عمتي قالت شنو ؟ سامعاها ؟
عمتي آمنه قعدت تزغرد ساي و ضمت رغد عليها شديد ، وعد و عهد قالوا ليها طلعتي خطيره والله ، رغد بقت تنطط و هي شغاله لينا بعد دا خلاص بقت بت ثانوي 💃💃
في اليوم داك عملنا لينا قعدت جبنه ظابطه مع فشار و زلابيه و حلويات ، كلهم جابتهم عمتي ، شالت جزو من الزلابيه و ختتها في صحن و لبست توبها ، قلت ليها ماشه وين ؟؟ قالت لي هسي برجع ، مشت و ما طولت لمن جات وعد قالت ليها مشيتي وين يا أمي؟ قالت ليها مشيت اضوق جيرانكم زلابية نجاح بتنا ، رغد قالت ليها لكن جيرانا ديل مسافرين ، قالت ليها لا لا أنا قصدي السجمانه ليلى ، قلت ليها ما كنتي تمشي للكريهين ديل ، قالت لي ما حبا فيهم مشيت اتشمر و عاد من دخلت لقيت بتها بتبكي ساي اظنها ما نجحت أو مجموعها بسيط ، رغد قالت ليها تستاهل عجبني ليها الكلبه المعفنه ، عمتي قالت لي والله أنا مبسوطه منك شديد ، اخوانك ديل ما قصرتي منهم ، بقيتي ليهم ام و أخت و أستاذه ، قلت ليها ربنا يقدرنا نجازي أبوي ، ضمتني عليها و قالت لي ياريت لو أولادي زيك والله ، عهد قالت ليها هسي نحنا مالنا يا أمي ؟😂 قالت ليها ولا شي....
المهم عدت الأيام و جا رمضان و طبعا أمي جاتنا فيهو مرتين بالدس من دون ما أبوي يعرف ، ما كنا بنتكلم معاها كتير بس ما بنكر اننا مشتاقين ليها و متمننها تقعد معانا لأنو مهمها عملت هي في النهايه أمنا و ما بنقدر نكرها ، ممكن نزعل منها بس كراهيه لا.... طبعاً ما كلمنا أبوي ، سكتنا ساي ، المهم الليله و بكرا العيد عمتي آمنه اتصلت و قالت لينا بكرا خلوا أبوكم يجيبكم لي ، قلت ليها غيتو بكرا أنا ما ناويه اطلع و ناس رغد كمان ، طبعاً فهمتني ، بعد العملو راجلها ما حاسه انو عندنا نيه نمشي ليها في البيت....
المهم يوم العيد كالعاده ما مشينا حته بس أبوي أشترى لينا حلويات و بجامات ، المهم زي الساعه 9 كدا سمعنا صوت الباب جرى ياسر و فتحوا بعدها سمعنا صوت خالتو خنساء و حبوبه سعاد ، نحنا ال3 طلعنا من الأوضه و قمنا جارين عليهم ضميناهم شديييد و فرحنا بشوفتهم ، أواب و أمجد ذاتهم جوا معاهم ، كانوا شايلين كميه من الهدايا ، دخلناهم و فضلناهم بعدها بشويه أبوي جا راجع أصلا قال ماشي قريب و جاي لمن لقاهم سلم عليهم بحراره و سألهم عن عمو سليمان ، بعدها مشى جاب ليهم بارد ، بعدها وزعوا علينا الهدايا كلنا كانو جايبين لينا عطور و فساتين و عبايات و تلفون ل رغد ، طبعاً قعدت تنطط و مشت حضنت خالتو خنساء.....
المهم إتونسوا قدرتهم و مشوا ، بعد يومين أبوي ودانا ليهم عشان نسلم ل عمو سليمان ، المهم جهزنا نفسنا و مشينا ليهم ، أواب هو الفتح لينا الباب ، سلم علينا و دخلنا جوه ، سلمنا على خالتو خنساء و قعدنا ، شويه كدا أمجد جا داخل ،، قال اوووو منورين والله ، سلم على ابوي و بعدو نحنا ، قال لينا شنو يعني لو ما أمي ما بتجوا تطلعوا الناس و تشوفوهم ، أبوي قال ليهو العفو والله ، لكن ما كنت عارف انك رجعت عشان الجامعه و انو أواب رجع بعديك طوالي ، المهم ابوي قعد شويه و قال طالع. مشوار ، قال لينا بعدين ح أجي أسوقكم ، و هو طالع كدا أمير جا داخل ، وقف اتكلم معاهو مسافه و مشى ، أمير لمن جا داخل سلم علينا و مشى طوالي ، أمجد و خالتو خنساء كانوا بونسوا فينا ساي و أواب دا خشمو ما فكاهو ، أمجد قال لينا متذكرين لمن لعبنا بالكوره في الحوش الورا ؟؟ رغد قالت ليهو ولا تفكر ، بعد دا نحنا بقينا كبار و أنا بت ثانوي ، تاني إلا تلعب مع رغد و ياسر ، قلت ليهو ما عندي مانع لو لعبت 🌚
قال لي زوولتي والله ، رغد قالت ليهو خلاص انا ذاتي عايزا معاكم ، أواب قال ليهو اخوانك قصروا معاك شنو عشان تلعب مع البنات ، أمجد قال ليهو انتوا ما بقدر عليكم لكن ديل ...🤣🤣🤣
قلت ليهو قصدك اننا ما بنعرف نلعب ! كويس يا أمجد أرح و بنوريك ، خالتو خنساء قالت ليهو ما تستخف ب بناتي ديل ، أرحكم و أنا ح أكون ليكم الحكم.....
أواب قال ليها انتي ذاااااتك يا أمي !؟!! قالت ليهو ايييي مالي يعني ؟ ضحك و قال ليها ولا شي ولا شي ، المهم طلعنا مشينا حوشهم الخلفي ، أواب ذاتو لعب معانا ، هو و أمجد و ياسر فريق و أنا و براءه و رغد فريق ، أول ما لعبنا هم جابوا فينا قون بس خالتو خنساء كذبتهم و قالت إنو ما محسوب ، قالوا ليها كويس و تاني جابوا فينا قون ، زعلت شديد ، بقيت شايته الكوره و جاريه بيها لحد ما وصلت الشبكه حقتهم ، أمجد هو الحارس ، أول ما شت الكوره عشان أجيب قون هو مسكها ، زهجت و قربت أبكي ، مع إنها لعبه بس اتضايقت شديد ، أواب قعد يضحك و قال لي خلي روحك رياضيه ، قلت ليهو انت أسكت مني ، المهم واصلنا في اللعب و هم سجلوا فينا 3 أهداف دون مقابل ، رغد هي الكانت الحارسه ، بدلتها و بقيت أنا و برضو جابوا فينا قونين 💔😭
و بكدا هم الفازو ، دموعي قربت تنزل و أمجد قعد يكاوي فيني شديد ، أواب هرشو و قال ليهو خلاص كفايه يا أمجد ، طبعاً خالتو خنساء دخلت جوه سبقتنا لمن دخلت ما لقيتها قلت أكيد في المطبخ و مشيت عشان أساعدها بس ما لقيتها هناك ، أول ما جيت أطلع من المطبخ كدا لقيت أواب في وشي ، قال لي لو زعلتي بسبب مكاواة أمجد ليك فأنا آسف نيابة عنو ، قلت ليهو ما مشكله حصل خير ، قال لي و حاجه تانيه لو انتي زعلانه مني في حاجه أو عندك مشكله معاي كلميني يمكن أكون ما منتبه لأني حاسي انو الوضع بينا ما تمام ، قلت ليهو لا لا ماف حاجه ، قال لي ما عايز كذب أنا لو في حاجه قوليها لي في وشي ، قلت ليهو والله ماف حاجه ، مد لي يدو و قال لي طيب أصحاب ؟؟
قلت ليهو ما بصاحب أولاد 🌚 ضحك و قال لي حاجه كويسه بس ما قصدي اصحاب أصحاب قصدي انو نتعامل عادي من دون ما يكون في حساسيه بيناتنا ، يعني زي تعاملك مع أمجد
قلت ليهو طيب 💜
المهم عملنا الجبنه و قعدنا نتونس كلنا و بقيت اتكلم مع أواب عادي ، حتى أمير جا و قعد معانا لأنو القعده كانت ظريفه و كلها ضحك ، خالتو خنساء قالت لأمير مالك انت يا ولد ليك كم يوم ما تمام ، أمجد قال ليها يمكن في وحده غاشاهو ، أمير حمر ليهو طوالي ، خالتو خنساء قالت ليهو دي منو يا أمير ؟؟ أواب قال ليها في الآخر ح تعرفيها ، قالت ليهو عايزا أعرفها من هسي عشان اشوفها مناسبه ولا لا و غير كدا أنا حاجزه ليكم عروسات ، أمجد ضحك و قال ليها أنا طلعيني برا ، عرسي لأولادك الكبار ديل قبل ما يشيبو ، أمير قال ليها و أنا كمان طلعيني برا برنامجك دا لأنو في وحده في بالي و لمن اتفق معاها ح أخليها تجي تزوركم ، أواب سكت ما قال حاجه ، قالت ليهو و انت كمان زيهم مش ! أصلاً ماف واحد بسمع كلامي ، قال ليها لا لا أنا ما معاهم ، إختاري لي البتعجبك واثق في ذوقك أنا ، قال كدا و عاين لي ، أمجد قال ليهو معقوله تخاطر للدرجه دي ولا عارف العروس ؟؟
قالت ليهو ما عارف لكن واثق في إختيار أمي ، خالتو خنساء قالت ليهو انت الزيك منو عاد...
أمجد قال ل أمير أرح علمني السواقه بعربيتك ، قال ليهو ما فاضي ليك أنا خلي أواب يعلمك ، أواب قال ليهو أرح أرح أنا ذاتي قاطع موضوع ، براءه قالت ليهم سوقوني معاكم ، قال ليها ما ماشين بعيد قاعدين هنا في الميدان ، أمجد قال ليهو خليها تركب معانا لكن أوووعك بعدين تقعدي تصرخي و تقولي عايزا تنزلي ، قلت ليها براءه لا لا ما تمشي معاهم ، أواب قال لي اتطمني ما بتجيها عوجه ، المهم هم مشوا و ياسر ذاتو مشى معاهم ، شويه كدا رغد لحقتهم قالت برضو عايزا تتعلم السواقه مع أمجد ، أنا قعدت مسافه مع خالتو خنساء بعدها قالت لي أرح نطلع النشوفهم ، طبعاً الميدان قدام البيت ، لمن طلعنا شايفنهم لافين بالعربيه ساي ، فجأه عيني وقعت على البيت المسكون الكنا ساكنين فيهو و بديت اتذكر الحصل و أنا بعاين كدا خالتو خنساء قالت لي رايك شنو تجربي تسوقي انتي كمان قلت ليها بري بري ما عايزا ، شويه كدا أواب جابهم كلهم بالعربيه ، نزلوا و دخلوا جوا قالوا جعانين ، خالتو خنساء قالت لي خلي أواب يعلمك السواقه ، ضحكت و قلت ليها عشان أسوق شنو ؟؟
قالت لي ما معروف انتي بس اتعلمي ، أواب قال لي شكلك بتخافي ، قلت ليهو بري ما بخاف ، قال لي تعالي طيب ، خالتو خنساء قالت لي أمشي معاهو ، المهم مشيت ركبت معاهو ، ركب و دور العربيه ، قال لي ركزي كويس ح أوريك خطوه خطوه ، بدا يشرح لي و هو سايق ، بعدها نزل و خلاني أركب مكانو ، قلت ليهو أواب أنا خايفه والله هسي لو عملت حاجه غلط و حصل لينا حادث ، قال لي أنا معاك ما تخافي ، المهم هو وراني اعمل شنو و أنا نفذت كلامو ، بقيت لافه الدركسون براحه براحه و هو و أنا ما عارفه اعمل شنو بعدها أو أمشي وين ، أواب زاد السرعه شويه و قال لي خليك ماشه طويل ، فجأه طلع شافع في وشنا و أنا إتوترت و فكيت الدركسون و ختيت يدي على خشمي بقيت اقول لأواب وااااي الولد ح يموت ، هو كان شغال لي لفي لفي و أنا خلاص هبطت ، مال علي و لف العربيه و طوالي وقفها ، إتنفست بعمق و قلت ليهو هسي لو كتلنا الولد قال لي ما جاتو حاجه و أصلا أنا عامل حسابي ، قلت ليهو ما عايزا تاني رجعني البيت ، قال لي بيتكم ؟؟ قلت ليهو لا قصدي بيتكم انتوا ! قال لي بيتنا هو بيتك برضو ، المهم نزلت و هو رجع ركب مكانو ، قال لي طيب خليني ألف بيك شويه ، المهم بقينا لافين بالعربيه و هو بحكي لي عن الجامعه من يوم كان برلوم ، صراحة استمتعت و أنا بسمع ليهو و بقيت آخد و أدي معاهو في الكلام لحد ما وصلنا بيتهم ، خالتو خنساء قالت لينا طولتو والله ، المهم اتغدينا معاهم بعدها أبوي جا و رجعنا البيت ، زي الساعه 8 كدا أواب رسل لي في الواتس و قال لي بالمناسبه سواقتك ما بطاله انتي محتاجه شرح أكتر و تطبيق أكتر على أرض الواقع و ما شاء الله عليك بتفهمي بسرعه ما زي أمجد التعبني و أنا بشرح ليهو ، رسلت ليهو إيموشن ضحك و قلت ليهو أيوه عااااارفه نفسي 😎
قال لي انزلي أنزلي ماف داعي للغرور ، قلت ليهو لازم لازم ، قال لي هااا جاهزه ل تالته ولا لا ؟!
قلت ليهو أكيد جاهزه ، قال لي دا المتوقعو منك ، شدي حيلك كويس عشان ترفعي راسنا كلنا ، قلت ليهو حاضر ، قال لي أنا واثق فيك و في ذكائك و شطارتك اجتهدي بس و أنا بأكد ليك إنو في مستقبل مبهر راجيك ، قلت ليهو ان شاء الله و بكدا خلصت الدردشه...
بعدها بإسبوع نزلنا تالته ، صراحة من نزلت كنت متحمسه شديد و قبليها بيوم أواب كان بتكلم معاي و بحفزني عشان انزل بحماس و دافع أكتر ، طبعاً رغد وزعوها في نفس مدرستي الثانويه ف جينا سوا ، أول ما جيت شفت أستاذ أحمد من بعيد مشيت ليهو و قلت ليهو أستاذ كيفك تمام ، قال لي مها أهلين كيفك و كيف الإجازه معاك ، قلت ليهو كويسه إتمنيت إنها ما تخلص ، قال لي أنا عكسك حسيتها إجازه طويله و ممله ، قلت ليهو اكيد اشتقت ل جملة اكتبوا التمرين و اجمعوا الكراسات و الما ح تكتب ح تتعاقب ، ضحك و قال لي إشتقت لحاجات كتيره ، اتكلمت معاهو مسافه بعدها مشيت سلمت على باقي المعلمين ، في اليوم دا ما كان عندنا حصة فيزياء و سمعت من البنات إنو أستاذ أحمد ما ح يمسكنا في تالته ، قالوا إنو أستاذ مأمون هو الح يمسكنا لأنو ثابت انو ماسك تالته ، زعلت والله و مشيت سألتو قلت ليهو صح انك ما ح تمسكنا في تالته ؟؟
قال لي ايوه ، قلت ليهو ليه ياخ نحنا ما عايزين أستاذ غيرك ، ضحك و قال لي هووي ما تعملوا لي مشكله مع أستاذ مأمون ، قلت ليهو نحنا متعودين عليك انت و بنفهم شرحك ، قال لي أستاذ مأمون أشطر مني و الفيزياء دي شاربها عديل ، قلت ليهو برضو عايزنك انت ! قال لي منو انتوا ؟؟!
قلت ليهو كل الفصل ، قال لي لو احتجتي أي مساعده بتقدري تجيني مع انو أستاذ مأمون ما بقصر ، قلت ليهو الخبر صدمه صدمه كبيره ياخ !! عاين لي مسافه و قال لي ليه في السنه دي تحديداً أنا حاسي انك بقيتي كبيره و عاقله شويه ! قلت ليهو من يومي عاقله ، قال لي لا جد والله في تغيير حاصل حتى في طريقة كلامك ، قلت ليهو غيتو أنا ما حاسه كدا ، قال لي بالمناسبه أختك بتشبهك شديد و ياريت تطلع زيك ، قلت ليهو رغد شاطره والله ، قال لي لأنها أختك ....
المهم لمن رجعت البيت مع رغد اتصلت على خالتو خنساء و اتكلمت معاها و حكيت ليها عن يومي الدراسي كان كيف ، بعدها قعدنا أنا و رغد نتكلم عن اليوم في المدرسه و أنا شغاله اقول ليها في أسامي المعلمين ، قالت لي أستاذكم داك الكان جا وصلك مع المعلمات ديلك سألني و قال لي انتي اخت مها صح قلت ليهو أيوه و سألني عن أسمي و عرفنا أنا أول وحده في الفصل 😎قلت ليها ح تتشهري بسببي ، ضحكت و قالت لي أنا ذاتي ما هينه و شاطره شديد ، المساء أواب رسل لي و سألني كيف كان اليوم و كدا ف قعدت أحكي ليهو في النهايه قال لي موفقه ...
المهم عدوا أسبوعين من ما نزلنا و أنا كل ما تواجهني مشكله أو أحس إنو أستاذ مأمون ما شرح كويس أو أنا الما فهمت كويس طوالي بمشي لأستاذ أحمد لدرجة انو قال لي خليتيني أدرس مقرر سنه تالته دا بالغصب ، طول الإسبوعين ديل أواب كان برسل لي و بسألني عن الدراسه و مرات بحكي لي عن الحياه في الجامعه و بسألني عايزا ادخل جامعة شنو و اقرا شنو ، كنت بقول ليهو خليني أمتحن اول ، كان بقول لي لازم تحددي من هسي ، طبعاً ما كل الفصل مشوا علمي ، جزو أدبي و جزو علمي لأنو التقسيم كان حسب النسب ، لين دي سمعت انو كانت ناقصه كم نسبه كدا عشان تدخل علمي ف أبوها دفع ليها قروش النسب ديل و طوالي دخلوها علمي ، طبعاً كل الفصل كان شايل أحياء و أنا رغم اني بحب الهندسيه و الحاسوب بس شلت أحياء ،قلت بعدين لو مثلاً غيرت رأيي بقدر اقدم في مجالات الهندسه و الحاسوب ، المهم بعدها عدت فتره كدا بقيت ما بشوف فيها أستاذ أحمد كتير لأني ما قاعده أمشي ليهو بس كنت عارفه أخبارو لأنو رغد بتحكي لي عنو و عن باقي الأساتذه ، قلت ليها أستاذ أحمد دا أمسكي فيهو قوي لأنو أستاذ شاطر شديد ، قالت لي أي ظاهر عليها ، كل ما أعمل حاجه غلط أو ما اركز في حصتو بقول لي أبقى زي مها أختك ، كانت بتقفل لي الفيزياء 😂 قلت ليها أي أي لازم تستلمي الرايه من بعدي ، المهم لمن الإمتحانات التجريبيه قربت كنت زهجانه شديد و كل مره بشكي لخالتو خنساء عن الإمتحانات ، قبل الإمتحانات بيومين أواب جا زارنا و قال لينا أرح سايقكم مشوار ، قلت ليهو أنا ما ماشه أمشوا انتوا ، قال لي على فكره امي اتصلت و استأذنت من أبوك عشان أسوقكم ، قلت ليهو أواب أنا عندي قرايه ، قال لي للسبب دا عايزك تطلعي ترفهي شويه ، المهم طلعت معاهم في النهايه ، كنت راكبه معاهو قدام و رغد و ياسر و براءه راكبين ورا ، أواب كان بتونس مع ياسر و براءه و بسألهم عن المدرسه و كدا و شغال ينصح في ياسر ، كنت بعاين ليهو ساي زي الهبله كدا ، فجأه هو إتلفت علي و قبضني بعاين ليهو ، رفع لي حاجب نظام بتعايني لي ليه ، لفت وشي منو و أنا بحاول أخفي إبتسامتي ، المهم ودانا لمطعم و طلب لينا العايزنو و في الآخر اشترى لينا آيس كريم ، صراحة انبسطت شديد و مزاجي إنعدل ، لمن رجعنا البيت ، مسكت تلفوني و دخلت الواتس و كتبت ليهو : شكراً ليك يا أواب
رد علي طوالي و قال لي شكراً دي تقوليها ل زول غريب تمام ، ضحكت و قلت ليهو طيب اقول ليك شنو ؟؟
قال لي : اقول ليك قولي شنو ؟؟
قلت ليهو اي قول لي مدام ما عايزني اقول ليك شكراً قول لي كلمه بدلها عشان تاني أقولها ليك ، قال لي امممم ما هسي ، قلت ليهو ليه في شنو يعني ؟؟
قال لي كل شي في وقتو حلو ، قلت ليهو هي كلمه و لا قنبله 😂😂😂
قال لي أضحكي كويس..
المهم بعدينا الإمتحانات التجريبيه ، كنت كل ما أرجع من إمتحان بلقى أواب مرسل لي و بسأل عن الإمتحان ، قبل إمتحان الفيزياء قلت ليهو أنا خايفه من الماده دي شديد ، زمان ما كنت بخاف منها و دي كانت أسهل ماده بالنسبه لي لأنو كان ماسكنا أستاذ أحمد....قال لي الأستاذ الحالي مالو ما بعرف يشرح ؟؟
قلت ليهو ما عارفه بس انا متعوده على أستاذ أحمد 😭😭 قبيل لمن مشيت ليهو في المكتب عشان يشرح لي اكتشفت إنو ليهو يومين ما جا 💔ياخ أنا من دونو ما بقدر على الفيزياء دي ، قال لي أستاذ أحمد دا قدر شنو ؟؟
قلت ليهو أستاذ شاب كدا عمرو 26 ، قال لي طيب أستاذكم الحالي دا عمرو كم ؟ قلت ليهو يمكن كم و أربعين بتسأل ليه ؟قال لي أكيد العمرو كم و أربعين هو البعرف يشرح أكتر ، قلت ليهو لكن أنا ما بفهم إلا من أستاذ أحمد ، قال انتي بتحبي الفيزياء دي ولا لا ؟؟
قلت ليهو أكيد بحبها ، قال لي طيب دامك بتحبيها اجتهدي فيها براك من دون ما تلجئ لأحمد ولا منو دا ، قلت ليهو أستاذ أحمد أكتر أستاذ وقف معاي و بديت احكي ليهو عنو من الصف الأول ، في الآخر قال لي ح تمشي تقري ولا ح تقعدي تتكلمي عن أستاذك دا ؟؟!
المهم في اليوم البعدو كان آخر امتحان ، يلي هو فيزياء ، غيتو شبه إشتغلت كويس ، مشيت افتش أستاذ أحمد بس ما لقيتو لمن رجعت البيت ما لقيت ولا رساله من أواب ، زعلت شديد ، رسلت. ليهو و قلت ليهو أواب أنا ما اشتغلت كويس 😭😭
بعد مسافه استلم رسالتي بس ما فتحها ، تاني رسلت ليهو و قلت ليهو من هسي بديت أخاف من فيزياء تالته ثانوي دي
برضو استلم الرساله و ما قراها ، حسيت نفسي مخنوقه و بالجد زعلت شديد 💔
*لن تجدني مؤذيًا أبدًا، حتَّى إن خاب ظنى فيك سأُغادرك بلُطف، فإنتهاء الرغبة.. أشدُ من الكُره."*
