في مهب الريح

6

*#في~مهب~الريح《06》*
*#الجزء~الاول♡*
*#بقلم~مها~حولي~الزاكي*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
بعد ما فطرت مع براءه أديتها الأدويه ، بعدها ياسر جا داخل ، جدع شنطتو طوالي و طلع لا قال جعان لا سأل عن براءه و ذاتو ما إتفاهم معاي ، بقى غريب و عنيد و ما بعمل إلا الفي راسو و خالص ما بسمع مني...
المهم لمن رغد جات حكيت ليها الحصل ، طبعاً براءه لمن انا خليتها و مشيت عشان أبيع التلفون هي قامت عشان تشوف أنا مشيت وين بس من شدة المرض و الجوع و التعب جات واقعه ، رغد قالت ليها كر عليك يا برو ما تستاهلي والله ، شالت مني التلفون و طوالي إتصلت على عمتي آمنه و كلمتها ، قالت ليها لو لقيت طريقه بجي عليكم ، قلت ل رغد ما كان تتصلي عليها ، ماف داعي نحملها مسؤوليتنا و نبقي ليها الهم همين ، براك عارفه ظروفهم شنو و غير كدا المسافه بعيده و المواصلات غاليه ، قالت لي في النهايه هي عمتنا و نحنا حالياً محتاجين ليها ، المهم ختيت ليها أكلت و دخلت الأوضه عشان أقرا بعد ما اتأكدت انو براءه نامت ، المهم أبوي لمن جا أنا لا كلمتو لا خطر على بالي أكلمو من الأساس لأنو ما ح يفرق معاهو و ردو أحسن عدمو ، أنا و رغد طلعنا السراير برا و فرشناها ، شلت براءه و رقدتها برا في الحوش ، أبوي جا قال ليها لسه عيانه ؟؟
هزت ليهو راسها بس ، خت يدو على جبينها و قال ليها حرارتك مرتفعه شويه ، نادى رغد و قال ليها أمشي ارفعي لحافي ، تحتو ح تلقي قريشات شيليهم و جيبي لأختك دي بندول و قرض و كركدي من الإجمالي ، بلوا ليها القرض مع الكركدي عشان تشربهم بعدين و بكرا بتبقى كويسه ، رغد قالت ليهو ماف داعي يا أبوي لأنو براءه ودوها المركز و أدوها أدويه للملاريا و الأنيميا ....استغرب و قال ليها الوداها منو ؟؟
فطوالي رغد حكت ليهو ، أنا دخلت شلت الأدويه و جيت أديتهم ل براءه تاني لأنو دا موعدهم ، أبوي قال لي المره دي منو ؟؟ قلت ليهو ما عارفاها ، عاين ل براءه مسافه و بعدها مشى قعد في سريرو ، رغد ختت ليهو أكل بس أبى ياكل حتى الشاي رجعو و قال ما عايز شي...
المهم اليوم البعدو كان يوم جمعه ، من بعد شراب الشاي أنا و رغد لمينا هدومنا كلها و قعدنا نغسل فيهم ، بعد ما خلصنا رغد مشت جابت لينا عيش و زبادي فطرنا بيهم ، قلت ليهم يلا بعد دا كل واحد يمسك كتابو و يقعد يقرا و العندو واجب يحلو ، براءه قالت لي أنا عيانه ، قلت ليها اي انتي نومي ساي لمن تبقي كويسه ، ياسر قال لي أنا ماشي ألعب ، رغد قالت ليهو هسي قاعد تلعب مع منو انت ؟؟ ناس عماد ديل مش اتشاكلت معاهم قبل كم يوم ؟؟ قال ليها يعني ماف غير ناس عماد ديل !! قلت ليهو ياسر اللعب ملحوق احسن تقعد تقرا ان شاء الله صفحه وحده بس ، قال لي بقرا بعدين ، قلت ليهو ح أكلم ليك أبوي ، قال لي كلميهو أنا ما بخاف ، عاين ل رغد و قال ليها جيبي التلفون ، قالت ليهو لا ماف ليك إلا تقرا ، قال ليها أنا ما بهاظر معاك يا زوله ، جيبي التلفون دا معناها جيبيهو...... طبعاً أنا استغربت في نبرة صوتو الكان بتكلم بيها !! حسسني كأنو راجل كبير أو كأنو هو أكبر مننا ، قلت ليها ايوه اوعك تديهو التلفون يا رغد ، عاين لي بطرف عينو بس و دخل الأوضه و قعد يفتش على التلفون لمن ما لقاهو جا طالع من الأوضه و هو شايل ليهو كتاب ، قايلنوا استسلم و عايزا يقرا بس اتفاجأنا لمن انتبهنا إنو دا كتاب رغد ، قال ليها توريني التلفون وين ولا أشرط ليك الكتاب دا ، قلت ليهو ياسر مجنون انت ولا شنو ، رغد طوالي قامت جاريه عليهو ، جرى منها للحوش و قال ليها والله لو جيتيني ح أشرطو ، أول ما مشت عليهو كدا شرط غلاف الكتاب ، طلعت ليهم برا و قلت ليهو رجع ليها الكتاب ، والله لو جيتك يا ياسر ما أخليك ، قال لي والله تجوني ح أقطع ورقه ، لمن مشيت عليهو قطع الورقه البعد الغلاف ، رغد صرخت فيهو و قالت ليهو بلا يخمك ياخ !! قالت لي خليهو و طوالي دخلت جوه جابت التلفون و جات طالعه ، كان في سرير في الحوش قال ليها ختي لي فيهو التلفون و زحي منو ، عملت القالو فطوالي جا شال التلفون و جدع ليها الكتاب في السرير و قام جاري على الباب و طلع ! رغد مشت على كتابها شالتو و بقت تنبذ في ياسر و هي عايزا تطق من الزعل.....أما أنا فكنت مذهوله بسبب الحصل ! ياسر دا كل يوم بتغير و كل يوم ببقى لئيم و حسود و دا كلو بسبب أبوي لأنو ما حصل مره شاكلو أو قال ليهو ديل أخواتك ما تتعامل معاهم كدا ، أبوي مديهو حرية التصرف بقول ليهو انت راجل البيت و انت الح تغير حالنا و ترفع راسي....
المهم يوم السبت قعدت اقرا من كل كتاب درسين تبع اليومين الغبتهم ، في حاجات ما فهمتها بس العرفتو قريتو ، المهم بعد الضهر كدا عمتي آمنه جاتنا عشان تشوف براءه و حمد لله هي إتحسنت شويه ، عمتي قعدت معانا لحد العصر ، قالت لينا كما الراجل الفقر دا كنت ح أبيت معاكم ، المهم المساء رغد كوت الملابس ، طبعاً لحد بعد العشاء ياسر ما جا ، أبوي طلع الشارع و جا راجع و قال الولد دا بمشي وين ؟؟
رغد قالت ليهو بقى لئيم و قليل أدب يا أبوي ، شال مني التلفون و طلع بيهو من قبيل ، قال ليها انتي ذاتك ليه مدياهو التلفون ؟؟
حكت ليهو العملو ياسر ، قال ليها معقوله ياسر يغلبكن انتن الإتنين ؟!! قلت ليهو نعمل ليهو شنو يا أبوي ، غلبنا عديل ! قال لي ما للدرجه دي...
سكت خليتو و ما حاولت اشرح ليهو أكتر لأنو ما ح يفهم إلا الحاجه العايز يفهمها و ما ح يقتنع إلا بكلام نفسو و مستحيل يشوف كلامنا صح أو معانا حق ، خاصة لو كان الموضوع ليهو علاقة ب ياسر....
يعني أبوي دا من وعينا على الدنيا دي لقيناهو منحاز ل ياسر و دائماً بدافع عنو ايوه مرات كتيره وقف معانا و أنصفنا بس برضو كان بفضل ياسر علينا بس مع ذلك نحنا ما كنا متحسسين شديد من الحاجه دي لأنو وجود أمي و عدلها بيناتنا كان مكفينا و ما محسسنا بنقص بس بمجرد ما هي إتطلقت من أبوي و مشت عرست تعاملو معانا إتغير شديد يعني كأننا السبب ، بقى يقول ل ياسر انت الوحيد الح تنفعني ،  لو قريت و إتخرجت حتتوظف و تكون زول محترم و ليك مكانتك و هيبتك و الناس ح تحترمك ، حتلبس أحسن لبس و تسكن في أحسن بيت و ح تعرس البتعجبك و البتأشر عليها لأنو النسوان ديل أكتر حاجه بتعجبهم في الراجل قروشو ، ماديات لأبعد درجه و الوحده مستعده تبيع نفسها و مستعده تخلي أولادها في سبيل إنها تعيش في رفاهيه ، عشان كدا بقول ليك اقرا يا ياسر عشان ما تعرس وحده تعمل نفس العملتو أمك "" .....دا دائماً شكل الونسه بين أبوي و ياسر ، يعني نحنا من دون ذنب بنتعاقب على حاجات ما لينا يد فيها ، إذا أبوي زعلان من العملتو أمي و باقي ليهو حار ف نحنا واجعنا أكتر منو و فراقها و غيابها أثرو علينا كلنا ، 3 سنوات و أنا متحمله مسؤولية البيت و أخواني ، 3 سنوات و أنا بحاول أملا الفراغ الخلتو أمي في البيت و في نفوس أخواني ، حملتني مسؤوليه أنا ما بقدر عليها ، كبرتني مية سنه و خلت كل تفكيري يدور حولين : أفطرهم بشنو ؟؟ اجيب شنو بالقروش الشويه دي و اذا ح تتم ولا لا ! خلتني أنوم و أنا شايله هم بكرا و البعدو و دا غير شيل هم قراية ياسر و رغد و براءه ، مسؤوليات كتيره إتختت في أكتافي و أصعبها التربيه ! بالذات تربية ياسر و التعامل معاهو ، براءه بتسمع الكلام مرات كتيره بس ياسر عامل فيها فرعون زمانو و أنا حقيقة بغلبني و ما بعرف اعمل معاهو شنو و أنا في نفسي ذاتي محتاجه زول أكبر مني يوجهني و يصححني ، زمان لمن يغلط على وحده فينا كنا بنكلم ليهو أمي بس هسي نشكيهو لمنو ؟؟ منو الحيوقفو عند حدو و يعلمو الصح من الغلط ؟!!
المهم يوم الأحد ما كنت ناويه أمشي بسبب براءه بس رغد أصرت أمشي و قالت هي ح تقعد مع براءه ، فعلاً مشيت بس انا قلبي كان مع براءه ، والله طول الطريق بفكر و بقول هسي لو حصلت عليها حاجه و أنا ماف ، قلبي ما ريحني لحد ما وصلت المدرسه ، ريما و شروق جوني جاريين بعد ما سلموا علي قالوا لي غايبه ليه ان شاء الله خير ، قلت ليهم كنت عيانه ، قالوا لي سلامتك ، ريما قالت لي ما شفتي الحصل ، قلت ليها حصل شنو ؟؟
شروق قالت لي حدثين حصلوا يوم الأربعاء و الخميس ، يوم الأربعاء وصال جات المدرسه و جابت معاها ولدين كبار كدا و شكلهم بخوف ، جاطوا شديد مع المديره عشان فصلت وصال فلمن الأساتذه اتدخلوا واحد منهم كان ناوي يطعن سمير أستاذ الإنجليزي ، المهم بلغوا الشرطه و طوالي جوا في المدرسه و حصلت جوطه كبيره و كل الفصول طلعت و بقينا ملمومين حولين المكتب ، الشرطه رفعت وصال و الأولاد المعاها و مشوا معاهم 3 معلمين غيتو اليوم داك حصلت هيجه كبيره في المدرسه  قلت ليها واي مبالغه! معقوله حصل دا كلو !! قالت لي اي و السمع ما زي الشوف ، قلت ليها طيب عملوا ليهم شنو ؟؟؟ قالت لي بري ما عارفه....
ريما قالت لي أما يوم الخميس ف أستاذ أحمد أدى الكراسات لبت عشان تجيبهم لينا ، المهم لمن الكراسات وصلت الفصل و إتوزعت اتخيلي انو كل إجاباتنا غلط !!
قلت ليها شنو ؟!! كيف يعني غلط ؟؟
قالت لي تعالي ، مشيت معاهم الفصل طلعوا كراساتهم و كراسي الكان مع ريما ، ورتني إجاباتهم و قالت لي أفتحي كراسك ، فعلاً لمن فتحتو لقيت كل الإجابات غلط !!
قلت ليها دقيقه بس انا ما كاتبه الإجابات دي !!
شروق قالت لي نحنا برضو دي ما إجاباتنا و لو متذكره نحنا حلينا سوا ، قلت ليها طيب الحصل شنو ما فاهمه انا !!؟
ريما قالت لي ببساطه في زول مسح إجاباتنا الصح و كتب إجابات غلط و الزول دا معروف ....قلت ليها لين !!؟
شروق قالت لي أكيد لأنو هي الجمعت الكراسات و نحنا أول ناس أديناها كراساتنا و لمن واجهناها نكرت حطب و شاكلتنا ! ريما قالت لي البت دي ماف زول بقدر عليها و المشكله الحقيقيه إنو نحنا ما عندنا دليل ضدها !! تاني بس ما نجمع كراساتنا عندها حتى لو اضطرينا نوديهم برانا للمعلمين.... طبعاً إتغظت و إتحرقت قدرتي 💔
لمن الجرس رن و كنا ماشين على الطابور ريما قالت لي ما قلنا ليك أدونا جدول الإمتحانات التجريبيه ، قلت ليها بخلاص عدين بنقلو منك ، طول الطابور أنا كنت سرحانه و متضايقه شديد من البت الإسمها لين دي ، المهم لمن دخلنا الفصل نقلت جدول الإمتحانات من ريما ، شويه كدا جات أستاذه هناء داخله ، يلي هي أستاذة الرياضيات ، بعد ما سلمت علينا قالت لي مها وينك غايبه ليك يومين !!؟
صراحة اتفاجأت !!
أبدا ما إتوقعت انو يكون في زول لاحظ غيابي ! قلت ليها كنت عيانه ، قالت لي سلامتك و طوالي بدت الحصه و أنا من جواي حسيت بإحساس حلو كدا ! يعني ما مصدقه انو غيابي كان ملحوظ بالنسبه للمعلمين ! حتى لو كانت واحده !!
بعد ما انتهت و طلعت قلت ل ريما عايزا أكتب منك درس يوم الأربعاء حق الرياضيات ، قالت لي طوالي و أدتني كراسها ، قالت لي يوم الأربعاء استاذه هناء لمن جات لحصتها سألت عنك و يوم الخميس جات الموجهه و استاذه هناء جات و قالت عايزا 5 كراسات من بينهم كراسك بس قلنا ليها انك غايبه ، قلت ليها اهااا ، المهم قعدت أكتب لحد ما جرس الفطور رن ، شلت كراسي و مشيت صححت الدرس حق يوم الأربعاء بعدها اشتريت فطور و مشيت قعدت في المكان البقعد فيهو على طول يلي هو تحت الشجره الجنب الباب ، شويه كدا جات ريما و قعدت كان باين إنها زعلانه شديد و الحاجه الملحوظه إنو شروق ما معاها لأني من يوم عرفتهم عرفتهم مع بعض ، 24 ساعه بكونوا لاصقين في بعض .... طبعاً ما سألتها لأني ما بحب ادخل نفسي و اسأل سؤال ما بهمني إجابتو خليتها قاعده و رجعت الفصل شلت كراسي حق الفيزياء و مشيت المكتب بس لقيتهم بفطروا عشان كدا طلعت طوالي ، بقيت قاعده جنب المكتب و الأساتذه بقوا يطلعوا يغسلوا يدينهم لحد ما جا أستاذ أحمد طالع عشان يغسل يدو ، لقاني واقفه جنب الباب ، قلت ليهو يا أستاذ ، قال لي ثواني ، مشى الوضايات غسل و جاني راجع ، فتحت ليهو كراسي و قلت ليهو الإجابات دي ما أنا الكتبتها ، قال لي ايوه صح واضح انو كتبوها ليك أخوانك الصغار !
قلت ليهو أنا حليت التمرين دا و متأكده انو حلي كان صحيح ما عدا المسأله القلت ليك اني ما متأكده منها ، قال لي المعنى إنو إجاباتك براها اتغيرت !؟
كلامو بزعل والله ! اتنهدت و قلت ليهو يمكن ، قفلت الكراسي و كنت ح أمشي بس وقفت لمن قال لي انتي عايزا تقولي انو في زول مسح إجاباتك !! إتلفت عليهو و قلت ليهو دا الحصل ، قال لي طيب منو الزول دا ؟؟
قلت ليهو ما عارفه بس انا متأكدة انو دي ما إجاباتي لأني عارفه نفسي كتبت شنو ، حتى لو لاحظت في الكراس واضح إنو في كلام إتمسح ، عاين في كراسي و قال لي تمام لحدي ما أجيكم ، هو دخل و أنا طوالي مشيت الفصل ، طبعاً ناس الكنبه الورا كانوا عاملين حفله ، بغنوا و بصفقوا ساي! فجأه كدا جات أستاذه تيسير أم الفصل ماره بجنب الشباك ، قالت ليهم دا شنو دا يا أولى ؟!!
طوالي قعدوا يغنوا ليها : تيسير شبه القمير الضوا عليكم الله 👏💃 تيسير غيرها قلبي شن بسوي عليكم الله 💃👏لابسا توبا بنظام عليكم الله نادوا لي تيسير 👏👏
طبعاً قعدت تضحك ، قالت ليهم انتوا بالجد مجانين و مشت طوالي ...المهم قعدت مكاني و هم لسه بغنوا ، شروق ذاتا كانت معاهم ، ريما جات داخله عاينت ليهم بس و صرت وشها زياده ، زحيت ليها عشان تدخل ، قالت لي ان شاء الله الأساتذه يسمعوهم و يجوا يودوهم للمديره عشان يخلوا الشغب حقهم دا ، قلت ليها شروق معاهم ...ما ردت علي ، فجأه أستاذ أحمد جا داخل !! البنات طوالي سكتوا و كل وحده رجعت مكانها ، قال لينا غيتو انتوا يا أولى !! وحده قالت ليهو قلنا نعدل مزاجنا شويه ، قال ليها ما ممكن مزاجكم دا ينعدل بالقرايه ؟؟
كلهم بصوت واحد قالوا ليهو اكييييد لا !! لين قالت ليهو القرايه دي هي سبب الإكتئاب و النفسنه و المود الضارب ، ضحك و قال المهم يا شباب خلونا نبدا حصتنا..... طبعاً أنا كنت متوقعاهو في أي لحظه يجيب سيرة القلتو ليهو و يعمل حاجه بس كأني ما جيت و قلت ليهو حاجه !!
بعد خلص حصتو الأولى قال لينا في زول عندو سؤال ؟؟
قالوا ليهو لا
مسح السبوره و كتب مسأله بعدها إتلفت علينا و قال : تعالوا يا رهام و وشاح و لين  و إيلاف و شيماء ... طبعاً كل الفصل بقى يتلفت !!
قال ليهم كل وحده تجيب معاها ورقه و قلم و تجي ، لين قامت أول وحده و مشت ليهو بعدها طلعوا الباقين ، قال ليهم عندكم دقيقتين حلوا فيها المسأله دي ، كل وحده ح تشتغل براها ، أول ما الدقيقتين ديل يخلصوا كل وحده تكتب اسمها في ورقتها و ترجع مكانها...
طبعاً نحنا كنا بنعاين ساي !! مشى وقف جنب الشباك و قال ليهم أبدوا منتظرين شنو!!
أنا كنت ماسكه قلم في يدي ف لقيت نفسي بكتب المسأله بالرصاص في كراسي ب ورا ، لاحظت انها قريبه شديد للمسأله رقم تلاته في التمرين الفات ، تركيزي بقى كلو في المسأله و نسيت الفصل و ناس الفصل و بقيت شغاله فيها و أنا مندمجه شديد ، طلعت المعطيات و اخترت القانون المناسب و بديت أطبق ، جمعت و ضربت و طرحت و قسمت لحد ما وصلت للناتج ، أول ما ختيت القلم كدا و رفعت راسي لقيت أستاذ أحمد بعاين لي ، قال ليهم المسأله دي ما صعبه يا شباب ، ريما عاينت في كراسي و قالت لي تقريباً حلك صاح و دي زي المسأله الفاتت ، قلت ليها فعلاً زيها ...
المهم بعد ما الدقيقتين خلصوا ، البنات كتبوا أساميهم و رجعوا مكانهم ، أستاذ أحمد شال الورق و عاين فيهو مسافه بعدها ضحك ، قال لينا شباب انتوا ما لاحظتو حاجه ؟؟
ريما قالت ليهو دي زي المسأله رقم تلاته ، قال ليها بالظبط كدا ، المسأله الفاتت ماف زول حلاها صح غير 5 أنفار ، يلي هم رهام و وشاح و لين و شيماء و إيلاف و بما إنهم حلوا المسأله ديك فأكيد المسأله دي ما ح تغلبهم ولا شنو يا لين عصام ؟؟
قالت ليهو ما كنت مركزه يا أستاذ لأني حالياً مصدعه ، قال ليها صحباتك إيلاف و شيماء برضو مصدعات معاك ؟ ! رفع أوراقهم و قال ليها لأنو حلهم غلط !! بالجد حيرتوني ! انتوا المسأله الفاتت حليتوها صح فكيف غلبتكم المسأله دي ؟؟
لين قالت ليهو لأنو ديك حليناها بتركيز أما دي ف من دون تركيز و الوقت ذاتو قصير ، قال عمومًا صفقوا ل رهام و وشاح لأنو حلهم صح ، بعد ما صفقوا ليهم إتلفت على لين و قال ليها تعاليني في المكتب يا لين ، قالت ليهو حاضر يا أستاذ ، من جواي إنبسطت و قربت ابتسم بس مسكت نفسي و عملت رايحه ، بعد حصتو إنتهت لين طوالي مشت ليهو في المكتب ، ريما قالت لي بكون مالا ؟؟ قلت ليها ما عارفه ، قالت لي أنا الفهمتو من دا كلو إنو أستاذ أحمد شكى إنو لين ما هي الحلت المسائل ديك و فعلاً هي ما حلتهم لأنها اتشفت من كراساتنا و مسحت لينا إجاباتنا ! لكن هو عرف كيف أو أساساً شكى ليه ؟؟
قلت ليها ما عارفه ...
شويه كدا جانا أستاذ زياد ، أستاذ الحاسوب ، طبعاً مادة الحاسوب من أكثر المواد الأنا بحبها ، بستمتع بيها شديد ، المهم لحد ما بدا حصتو و وصل نصها لين ما جات ، طبعاً حصتو كانت فرده ، طلعنا بعدها فسحة صلاة ، ريما مشت معاي عشان نتوضا و نصلي ، طبعاً ريما دي شكلها متشاكله مع شروق عشان كدا ماشه معاي ، مع إنو ما هاميني شديد بس سألتها و قلت ليها مالك مع شروق ؟! متشكلين ولا شنو ؟؟ قالت لي ما تجيبي لي سيرتها أصلاً هي وحده بياعه ، قلت ليها ليه مالا ؟؟ قالت لي ما شايفاها عامله صحبه مع ناس تهليل ؟! فجأه جات بت و قالت لي أستاذ أحمد بناديك ، لمن مشيت ليهو قال لي حلي مسألة التمرين الفات و فعلاً حليتها و الحل كان صحيح ، قلت ليهو ما أنا بس كمان في ريما و شروق حلهم كان صح بس برضو إجاباتهم ممسوحه و مكتوبه ليهم إجابات غلط ، قال لي ناديهم لي ، فعلاً مشيت ناديتهم و وريتهم اني كلمت أستاذ أحمد بالحصل ، المهم جوا حلوا ليهو المسأله ، شروق قالت ليهو يا أستاذ ممكن تاني تخلينا نجي و نصحح كراساتنا برانا !؟
قال ليها عموماً أنا عرفت منو العمل كدا و ما ح تتعاد تاني ، طلعنا من المكتب مبسوطين و بنتبسم ساي ، ريما قالت هو تقريباً عرف انو دي لين بس الما فهمت كيف هو عرف؟!! يعني اذا ما حلت المسأله صح هل دا معناهو انو دي هي ؟!
ريما قالت ليها السبب الأول انو هي الجمعت الكراسات و هي المسؤوله عنهم ، تاني شي و حسب كلام الأستاذ ماف غير 5 حالين المسأله صح ، ف يمكن هو ختى احتمال انو المسحت اجاباتنا تكون من الخمسه ديل لأنها حتكون اتشفت اجاباتنا و مسحتهم لكن السبب الرئيسي الخلاهو يشك فيها هو إنو هي الجمعت الكراسات...
المهم لمن رجعنا الفصل ، البنات كانوا متلمين في لين ، شكلها كانت بتبكي ، شغالين يقولوا ليها في شنو يا لين مالك ؟؟ وحده قالت ليها أستاذ أحمد شاكلك ولا شنو ؟؟
ما ردت على زول فيهم ، فجأه جانا أستاذ التاريخ ، أدانا حصه فرده و بعدها أخدنا مادة الأسريه ، طول المده دي لين ما كانت على بعضها ، و عيونها وارمه من البكى ، قلت يا ربي أستاذ أحمد قال ليها شنو بالظبط ؟؟
لمن خلصنا بقينا منتظرين الجرس يضرب عشان نمشي بيوتنا ، لين كانت برا جنب الباب واقفه مع صحباتها لمن جات داخله عاينت لي جوه عيوني و قعدت في مكانها ، شيماء جات داخله و قالت ليها لينووو انتي ليه مكبره الموضوع ؟؟
يعني شنو إذا أستاذ أحمد زعل منك عشان ما حليتي المسأله صح ؟؟ صدقيني هو شاكلك و زعل منك لأنو ما اتوقع انو المسأله تغلبك لأنك شاطره شديد و كنتي جايبه أكبر درجه في الفصل كلو !!
وحده من البنات قالت ليها يعني أستاذ أحمد شاكلها عشان بس ما حلت المسأله ؟؟!
إيلاف قالت ليها تخيلي !!
يعني هسي لو دي وحده فينا حلت غلط ما كان اشتغل بيها بس لين عشان شاطره و ماف شي بغلبها هو زعل منها ، ههه محسسني كأنها خطيبتو .....
ريما قالت دا شنو البقولو فيهو دا !...أنا قلبت كلامها في عقلي و في النهايه صدقتو ، قلت أساساً لين دي ماف استاذ بحب يغلطها أو يزعلها ، قلت تاني كراسي براي ح أمشي أصححو و مستحيل أجمعو تاني ، قلت معناها هو ناداها عشان يشاكلها لأنها ما عرفت الحل ما ناداها عشان يسألها ليه عملت كدا في الحل حقنا أنا و ريما و شروق ، المهم لمن قالوا بيوت شلت شنطتي و طوالي إتجهت على الباب ، أول ما طلعت من المدرسه لقيت أستاذ أحمد في وشي ، كان واقف مع أستاذ بكري ، عاينت ليهو و أنا شاماهو شديد لأنو ما أنصفنا ، يعني حتى لمن شافني بعاين ليهو بالنظرات ديك ما حاولت أغير نظرتي ! يعني ما عارفه من وين جاتني الجراءة دي ! المهم إتحركت طوالي و مشيت لمن قربت من البيت لمحت ليلى واقفه جنب باب جارتها و بتتونس معاها ، لمن جيت ماره بجنبهم ، خالتو ليلى قالت ااااي والله نسوان الزمن دا طمعات و شلابات ، الوحده من دون خجله بتعاين ل راجل جارتها و عشان قروشو بتبيع أولادها ، غيتو عشنا و شفنا ، عملت نفسي ما سمعت حاجه ، المهم عدوا 4 أيام ، في يوم بعد ما جيت راجعه من المدرسه لقيت بتاع كارو واقف جنب بابنا و شايل سريرين و معاهم كم تربيزه كدا في الكارو حقو ، لمن دخلت البيت لقيت أبوي و رغد بطلعوا في الحاجات من جوه الأوضه و المطبخ ، قلت ليهم في شنو ؟؟
رغد قالت لي راحلين ...قلت ليها شنو ؟؟ وين ؟؟
طبعاً ياداب اتذكرت انو سيد البيت قال نطلع ليهو من بيتو ، أبوي قال لي ادخلي غيري ملابسك و افطري و تعالي انقلي معانا ، لمن دخلت الأوضه لقيتها فاضيه ما فيها شي غير دولابنا الصغير !! قلت شكلهم بنقلوا من قبيل !!
المهم غيرت ملابسي و صليت و أنا ما قادره أستوعب اننا راحلين ! ايوه بيتنا دا شين و ما بشبه بيوت الناس بس كل طفولتنا قضيناها هنا ، في كل ركن في البيت دا لينا ذكريات ، ما قادره أصدق اننا ح نخلي ذكرياتنا دي كلها هنا و نمشي !!
قلت لأبوي ماشين وين نحنا ؟؟
قال لي في بيت لقدام هناك ح نسكن فيهو لحد ما تتسهل ، المهم نقلنا حاجاتنا كلها بالكارو ، نحنا بس كنا بنطلع الحاجات لبتاع الكارو و هو بوديهم لحد ما البيت بقى فاضي و ما باقي فيهو شي غيرنا ، براءه قالت ليهو يعني ح نمشي خلاص يا أبوي ؟؟ قال ليها آي ، أبوي قفل باب الأوضه و المطبخه و اتأكد إننا ما نسينا حاجه ، بعدها جوا كم نفر كدا من الجيران و سألونا في شنو ، أبوي قال ليهم راحلين ، ودعونا و طلعوا و أصلاً علاقتنا بيهم ما قويه شديد ، المهم أبوي جاب لينا ركشه و ركبنا كلنا ، طبعاً كنا بنتلفت ساي و عايزين نشوف البيت الجديد دا و ابوي بوصف لبتاع الركشه لحد ما فجأه كدا وقف جنب بيت ! كلنا إتلفتنا على أبوي ، ما إتكلم معانا ، نزل و حاسب بتاع الركشه ، ياسر قال ليهو دا زي الخرابه الكنا ساكنين فيها  !! أبوي قال ليهو يلا شد حيلك عشان تطلعنا من الخرابه دي...
طبعاً أنا الكلام غلبني ! البيت كان اسوأ من البيت الكنا قاعدين فيهو !!
أول حاجه البيت في حته بعيده شويه عن باقي البيوت و ما جنبو ولا جار!! في دكان متلاصق معاهو بس شكلو مقفلو من فتره طويله و البيوت الفاتحه علينا في ميدان كبير فاصلنا عنهم ! يعني البيت دا في مساحه براهو و جنبو كوشه و وسخ و غيتو ما حبيتو خالص ، لمن دخلنا لقينا فيهو 3 أوض و في شجرة لالوب كبيره ، المهم دخلنا و رتبنا حاجاتنا في البيت الجديد ، المهم باقي اليوم قضيناهو كلو ترتيب في حاجاتنا لحد صلاة العشا حتى طلعنا سرايرنا و كل واحد إتجدع في سريرو و نام طوالي...