في مهب الريح

12

*#في~مهب~الريح《12》*
*#الجزء~الاول♡*
*#بقلم~مها~حولي~الزاكي*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
*من ناحيه تانيه :*
لين مشت مكتب المديره و هي زعلانه شديد ، المديره أول ما شافتها قالت ليها خير يا لين عصام !!؟
قالت ليها فيها مشكله لو في كل إختبار أو إمتحان كل وحده تمسك ورقتها و تصححها بدل المعلمين ، قالت ليها كيف يعني !؟ الفايده شنو تمتحن و تصحح لنفسك براك ! معناها كل وحده ح تكتب الدرجه العايزاها لنفسها !! قالت ليها افضل من كونو انو تجي طالبه و تصحح لينا ورقنا ، قالت ليها قولي لي من الآخر في شنو ؟؟
قالت ليها أستاذ أحمد نادى طالبه و خلاها تصحح معاهو الورق و هي مديانا درجات زي الزفت و خاصة أنا عشان عندها مشكله معاي ، يعني أنا الإختبار دا قاريه ليهو ليل و نهار في النهايه تجي و تكتب لي 35 من 50 ؟؟
منو هي عشان تصحح الورق !, لو على الشطاره فصلنا مليان بنات أشطر منها اشمعنى يناديها هي عشان تصحح معاهو ؟؟
قالت ليها خلاص أرجعي فصلك و أنا بتكلم مع أستاذ أحمد ، فعلاً أول ما لين مشت المديره رسلت لأستاذ أحمد لمن جا قالت ليهو صح انك خليت وحده من بنات الفصل "أ" تصحح معاك الورق ؟؟
قال ليها ايوه ، قالت ليهو لكن كدا ما صح يا أستاذ أحمد ،، كان ممكن تخلي اي أستاذ يصحح معاك ، في استاذ فيزياء غيرك في المدرسه دي ، قال ليها طيب المشكله وين ؟؟
قالت ليهو في طالبه جات شكت و قالت إنو البت الصححت معاك كاتبه ليها درجه ما درجتها و بعدين دي منو الصححت معاك ؟؟
لمن عرفت إنو دي أنا الصححت معاهو سكتت و ما قالت حاجه لأنها عارفه كويس أنا شنو و عارفه كويس اني كنت مشاركه في المسابقات الأكاديميه و بسببي فزنا مرات كتيره ، قال ليها دي منو الجات شكت ليك دي و قالت الدرجه ما درجتها ؟؟
قالت ليهو أنا البهمني انو تصرف زي دا ما يتعاد يا أستاذ أحمد ، قال ليها شوفي لا أنا لا مها الصححت معاي ظلمنا زول و أنا ذاتي لو ما كنت عارف هي شنو و واثق من صدقها و أمانتها صدقيني ما كنت ح أخليها تصحصح معاي ، البت دي لو أديتيها ورقة عدوها اللدود بتصححها بكل أمانه و من دون ما تظلمو ، و أنا بهمني شديد أعرف دي منو البت الإنظلمت دي !!
قالت ليهو لين عصام و انت براك عارف أبوها و نقتو الكتيره و عارف كويس انو من مأسسين المدرسه دي و هو المتبرع الأول بكل حاجه بتتعلق بالمدرسه ، قال ليها دا ما ليهو علاقه بدرجات بتو أو تعاملنا معاها ، هي بالنسبه لي طالبه زيها و زي باقي الطالبات و البميزهم عندي هو الجد و الإجتهاد غير كدا ما مهم و هسي خليها تجي و تجيب معاها ورقتها و كمان نادي أستاذ مأمون بتاع الفيزياء البدرس تالته خليهو يجي و يراجع معاي ورقتها و يشوفني ظلمتها ولا لا و على فكره أنا الصححت ورقتها ف كلامها مفروض يكون معاي أنا....
المهم المديره نادت أستاذ مأمون و نادت لين ، قعدوا الإتنين و قدام المديره راجعوا معاها ورقتها من أول سؤال لحد آخر سؤال ، أستاذ مأمون قال ليها على فكره أستاذ أحمد دا متساهل معاك شديد ، أنا لو صححت الورقه دي ما اظن أديك أكتر من 28 ، إتلفت على أستاذ أحمد و قال ليهو المسألة دي هي كاتبه بدايتها صح بس نهايتها غلط و أنا مديها درجة السؤال ، لو مكانك كنت ح اديها درجه على قدر الكتبتو ، أستاذ أحمد قال ليهو فعلاً مراجعة الورقه نبهتني على حاجات كتيره كنت متساهل فيها معاها و طوالي طلع قلمو و حسب ليها الدرجات تاني من البدايه و شطب ليها ال 35 و كتب ليها 29 ، زعلت و جاطت شديد و قالت ليهو حرام عليك ياخ ، قال ليها تاني ما عندي كلام معاك و كل المحتاجه نعملوا ليك عملناهو ليك و قدام المديره ، بعدها استأذن و طلع.....
في الفصل لين جات داخله و هي عايزا تطق من الزعل ، عاينت لي جوه عيوني بحده و قعدت في مكانها ، سامعه شيماء قالت ليها الحصل شنو ؟؟ قالت ليها بقول ليكم بعدين ، المهم في نهاية اليوم أستاذ أحمد ناداني ، لمن مشيت ليهو قال لي لين دي سألتك أو اتكلمت معاك ؟؟
قلت ليهو بس لمن كانت قايله اني أنا الصححت ورقتها ، هز لي راسو بس و قال لي لو فتحت خشمها معاك تاني طوالي تعالي كلميني لأنو أنا الخليتك تصححي معاي ، قلت ليهو طيب ، طبعاً ما قدرت أقول ليهو المديره قالت ليك شنو ، بنات من فصلنا كان واقفين جنب مكتب المديره و جوا قالوا إنو المديره نادت أستاذ أحمد و لين و معاهم أستاذ تاني....
المهم طلعت من المدرسه و أنا مبسوطه شديد بسبب كلام أستاذ أحمد ...
من ناحيه تانيه لين و صحباتها كانوا قاعدين براهم في الفصل و هي بتحكي ليهم الحصل ، إيلاف قالت ليها واااي كدا أستاذ أحمد بكون شماك يا لين ، قالت ليها دا كلو بسبب الحيوانه ديك ، شيماء طلعت و جات راجعه و قالت ليها شفت أستاذ أحمد واقف بتكلم مع الإسمها مها ديك ، إيلاف قالت ليهم ما ملاحظين انها بقت لاصقه فيهو كيف ، شيماء قالت ليها النصيحه هو البحسو مديها وش و بعاملها معامله خاصه ، عاد كيف ما يعاملها معامله تانيه و هي الوحيده البتقفل ليهو الفيزياء ، إيلاف قالت ليها بحسو بحبها ...لمن قالت كدا لين حمرت ليها ف طوالي سكتت ، لين بقت ساكته ساي و جواها نار ....خلتهم قاعدين و طلعت من الفصل ، لقت الوضايه قدامها شالت نقاط مويه و عملتهم في وشها و مشت مكتب المعلمين ، لقيت أستاذ أحمد بلم في حاجات عشان يطلع ، عملت نفسها بتبكي و مشت عليهو و قالت ليهو أستاذ أحمد 😭
عاين ليها بس ما رد عليها ، قالت ليهو أنا والله ما قصدي اشتكيك انت للمديره ، كنت قايله البت ديك هي الصححت ورقتي لأنها لمن جات الفصل قالت انك ناديتها عشان تصحح معاها و عشان هي ما بتطيقني قلت يمكن كتبت لي الدرجه دي هي ...
إتلفت عليها و قال ليها أولا البت دي عندها اسم و بعدين أنا العملت الإختبار دا و أنا حر انادي مين ما عايز عشان يصحح معاي ، لو كان عندك شك في درجتك كان مفروض تجيني أنا لكن انتي عندك فهم في راسك و كنت عايزا توصليهو للمديره ، قالت ليهو ابدا والله ، قال ليها انتي متين راجعتي ورقتك عشان تقولي انك إنظلمتي !!؟ قال ليك الدرجات دي نحنا بنختها ساي كدا على حسب مكانة أو سماحة الزول ؟؟
قالت ليهو آسفه يا أستاذ ما تزعل مني ...
قال ليها و آخر حاجه ، مها الكنت مشككه في نواياها لا بتعرف تحقد على زول لا بتعرف تأذي زول و أنا عشان وااااثق فيها خليتها تصحح معاي و ورقتك أنا الصححتها....
قالت ليهو طيب أنا آسفه يا أستاذ أحمد بوعدك ما تتكرر تاني 😭
قال ليها انتي عايزاني اسامحك ؟؟
قالت ليهو أيوه
قال ليها معناها لازم تعتذري من مها و قدام الفصل كلو ، قالت ليهو شنووو ؟؟
قال ليها دا شرطي....قال كدا و طوالي مشى خلاها...
المهم عدت الأيام و لين كل يوم بتعمل لي حركاتها و أنا بطنشها رغم إنو أستاذ أحمد قال لي ما تسكتي ليها و مره سألني إذا هي جات و إعتذرت مني فقلت ليهو لا ما جات و ليه تعتذر ؟؟ قال لي كنت عارفها بتكذب ، طبعاً فهمت إنو طلب منها تعتذر مني ، إنبسطت شديد و جاني إحساس حلو كدا ، المهم لمن الإمتحانات النهائيه قربت معظم الأساتذه الإنتهوا من موادهم بقوا يعملوا لينا مراجعات ، يوم كان مفروض يكون عندنا مراجعه مع أستاذ أحمد بس هو ما جا ، والله قربت أبكي و كل حاجه مسخت لي و كمان يومين بعد اليوم دا و هو ما جا المدرسه ، اليوم من دون ما اشوفو بقى لي طويل ، بالشده كنت ماسكه دموعي في المدرسه بس لمن رجعت البيت بكيت قدرتي ...المهم لحد ما الإمتحانات بدت و أنا ما شفتو تاني ، كل مره بمشي المدرسه على أمل إني أشوفو بس ما كان بجي ، في الإمتحان القبل الأخير كنا ممتحنين إنجليزي ، كانت مراقبانا أستاذه هناء و أستاذ الحاسوب ، حليت البعرفو و الما بعرفو خليتو ، تكلت راسي في الكنبه و بقيت أفكر في أستاذ أحمد لحد ما فجأه كدا في زول ضرب لي الكنبه ، لمن رفعت راسي لقيتو أستاذ أحمد!!
حسيت نفسي زي البحلم ، إبتسمت ابتسامه عريضه و قربت أصرخ و اقول ليهو استااااذ أحمد بس مسكت نفسي ، قال لي ما تنومي في الإمتحان يا طالبه ، قعدت أتبسم ساي و خليت إمتحاني و بقيت بعاين ليهو و أول ما أحسو ح يتلفت علي بعاين في ورقتي ، أستاذ الحاسوب مشى يراقب في فصل تاني و هو جا هنا بدلو ، لمن مضى نصف الزمن الأغلبيه العظمى سلمت ورقها ، إلا أنا و كم بت كدا بنتعد بالأصابع ، لمن حسيت خلاص انو الزمن ضاع بقيت أعاين في ورقتي و ما عارفه أعمل شنو ، طبعاً كنت قاعده ورا آخر وحده ، أستاذه هناء تلفونها رن ف طلعت طوالي ، أستاذ أحمد طوالي جاني و شال مني قلم رصاص و رقم لي الكلمات و مشى ، طبعاً جنبي ما كان في زول و الكلمات دي مفروض انزلها في الفراغات عشان اكمل بيها الجمل ، الكلمه الأولى كان كاتب لي عليها رقم 5 فطوالي كتبتها في الجمله رقم 5 و عملت كدا مع باقي الكلمات و أنا فرحانه شديد و ما مصدقه إنو ساعدني ، لمن الزمن انتهى قال لينا يلا يا شباب سلموا ورقكم بعد ، في الوقت داك في حاجات ما كنت حالاها و في حاجات حالاها بس ما متأكده منها ، عشان كدا ما مشيت جمعت ، كل البنات المعاي مشوا سلموا ورقهم و طلعوا ، أستاذه هناء قالت لي يلا يا مها جيبي ورقتك ، عيوني إتملت دموع ، قلت ليها بس في حاجات أنا ما حالاها قالت لي ما مشكله عوضي في الإمتحان البعدو ، أستاذ أحمد قعد يعاين لي بس ، جات شالت مني الورقه و دخلتها جوه الظرف و طلعت مع أستاذ أحمد ، رجعت البيت و أنا زعلانه شديد ، لمن حكيت ل رغد و خالتو خنساء قالوا لي الإنجليزي دا كمان بزعلوا عليهو ؟!😂
خالتو خنساء قالت لي الإنجليزي و الرياضيات ديل معظم الطلبه ما بقروا ليهم و مع ذلك بنجحوا ، رغد قالت ليها مها عشان ما عايزا كلمة نجاح و خلاص دي عايزا تقفلوا عديل ، قالت لي ما مشكله قدامك لسه كتير ، المهم قعدت اقرا ل آخر إمتحانين يلي هم فيزياء و تاريخ...
أول جلسه كانت تاريخ ، جا ساهل شديد بالنسبه لي و كل المقالات كنت حافظاها ، طلعنا فطرنا و جينا للجلسه البعدها يلي هي فيزياء ، كنت بعاين ساي في الباب و منتظره استاذ أحمد يجي داخل ، لحد ما وزعوا لينا الورق هو لسه ما جا ، بعد مرور 5 دقايق كدا هو جا داخل ، سلم على المراقبين و قال لينا هاااا يا أولى في أي سؤال ؟؟
لمن قال كدا عاين لي طوالي ، قالوا ليهو لا الإمتحان واضح ، لين قالت ليهو انت عندي سؤال في المسأله رقم 2 في السؤال التالت ، شال ليهو ورقه و شافه قال ليها ما فيها حاجه !! المسأله واضحه ، قالت ليهو شكلها غريب ما قادره افهمها ، قرا ليها المسأله و قال ليها الغريب شنو ما فهمت ؟؟! اقري المسأله كويس و طلعي المعطيات و اختاري القانون المناسب و أبدي طبقي ، طبعاً لوت خشمها بعد ما هو طلع ، أنا بعاين ليها ساي و بضحك في سري ، قلت ليها ذاتو ما تستاهلي يرد عليك ، المهم طول الإمتحان كنت بضحك ساي و مبسوطه على الآخر ، انتهيت بدري شديد و بقيت بفكر في أستاذ أحمد ، كنت شايله قلم في يدي و قالبه الورقه ، و أنا مبسوطه كدا كتبت اسمي و اسم أستاذ أحمد و ختيت بيناتهم قلب ، و تاني كتبت "أستاذ أحمد و كتبت قدامو love 💜"
كنت كاتباهم بالرصاص و قلت بعد شويه ح أمسحهم بس سرحت بخيالي بعيد و نسيت الكتبتو ، لحد ما جا نصف الزمن و سلمت ورقتي و أنا لسه ناسيه الكلام الكتبتو !!
أول ما طلعت من الإمتحان لاقيت أستاذ أحمد ، قال لي هااا اشتغلتي كيف طمنيني مع إنو ما بنخاف عليك ، قلت ليهو الحمدلله الإمتحان كان حلو شديد ، قال لي طيب و التاريخ ، قلت ليهو دا كان أحلى من الفيزياء ، قال ح أغير بعد دا لأنو مادتي ماف أجمل منها ، ضحكت على كلامو ، استأذن و مشى و أنا عشان هو قاعد ما طلعت مشيت البيت ، بقيت طول ما هو قاعد في المدرسه أنا ما بمشي البيت بدري و بما إنو دا آخر يوم حبيت اشوفو أطول فتره و زعلت عشان ما ح أشوفو تاني في الإجازة....
طبعاً كان مفروض يعملوا لينا رحلتين فأجلوهم و قالوا ح يعملوها رحله وحده بعد الإمتحانات النهائيه يلي هي الأسبوع الجاي ، مشيت قعدت تحت الشجره الدائما بقعد فيها ، ريما جات طالعه مع شروق جوني و قالوا لي ها اشتغلتي كيف ؟؟ قلت ليهم تمام الحمدلله ، قعدوا شويه و مشوا ، بعدها الجرس رن و المديره نادت الناس عشان تقيف طابور ، أول ما كل الناس إتجمعت إتكلمت عن الرحله و قالت حتكون بعد 3 أيام و ورتهم مكان الرحله و سعرها و زمن التحرك و الرجوع و قالت ممكن تلبسوا ملون ، البنات قالوا ليها انتي حتمشي معانا ؟؟
قالت ليهم لا والله ، ح يمشوا معاكم المعلمين الشباب ديل زي ناس هناء و صفاء و أفنان و أستاذ عثمان و أستاذ أحمد و الباقين ، أستاذ أحمد قال ليها أنا ما بقدر والله ، البنات قالوا ليهو لاااااا عليك الله امشي معانا يا أستاذ كدا الرحله ما حتكون حلوه ، في سري قلت إن شاء الله ما يمشي لأني ما ماشه ، قال ليهم آسف شديد بس ما بقدر ...
فرحت لأنو ما ح يمشي ، طبعاً ما طلعت من المدرسه إلا لمن هو طلع ، قالوا لينا تعالوا بعد اسبوع عشان تاخدوا ورقكم و النتيجه بعدها بإسبوعين...
المهم رجعت البيت و أنا شايفه الأسبوع دا طويل ، من هسي مليت و ما عارفه ح أقضي الإجازه دي كيف !! طبعاً بعد ما وصلت البيت حتى اتذكرت الكلام الكتبتو في ورقة الفيزياء !! ختيت يدي على خشمي و قلت وااااي دا شنو دا العملتو ! يارب أستاذ أحمد ما يشوف الكتبو ، طمنت نفسي و قلت أصلا الكلام مكتوب ورا الورقه و ما اظنو يقلبها و أصلا الكلام مكتوب بالرصاص و يمكن يتمسح ، بقيت أدعي إنو ما يشوف الكتبتو....
طبعاً ناس رغد نتايجهم طلعت ، هي و براءه تقديرهم كان ممتاز و ياسر جاب جيد ، نهاي ما كنا متوقعنها منو ، خالتو خنساء قالت لي عاد انتي ما قصرتي معاهو أيام الإمتحانات و بالغصب قريتيهو ، بتقري لنفسك و ليهو ، المهم أبوي قال لينا المره دي ح تسافروا البلد ل حبوبتكم و ح أرجعكم قبل رمضان ، طبعاً نحنا طولنا ما سافرنا بسبب ظروفنا الصعبه ، المهم بعد أسبوع مشينا استلمنا ورقنا و الحمدلله جايبه درجات كبيره شديد في كل المواد و الإنجليزي الكنت خايفه منو جبت 80 من 100 و الفيزياء و كم ماده كدا كنت مقفلاهم ، عرفت من ريما إنو أستاذ أحمد مشى معاهم الرحله ! زعلت شديد والله ! طبعاً ورق الفيزياء ما جا وزعو لينا هو أداهو لبت و هي الجابتو لينا ، بقيت قاعده قصاد المكتب و منتظراهو يطلع عشان أشوفو بس نهاي ما طلع ، مشيت مكتبهم بحجة اني عايزا أستاذ بكري ، من دخلت عاينت ليهو طوالي ، كان مشغول بتلفونو ، الأساتذه المعاهو قالوا لي أستاذ بكري دا طلع ....كنت عايز أستاذ أحمد يتلفت علي !! معقوله ما سامع صوتي !!؟
تاني ما قدرت أقول حاجه ، طلعت طوالي من المكتب بس كنت مبسوطه لأني شفتو...
نهاية اليوم قلت ما أمشي إلا أشوفو ، انتظرتو كدا بس خالص ما طلع و معظم البنات طلعوا و المدرسه بقت شبه فاضيه ، بعد ربع ساعه كدا كل الناس مشت و بقى في كم نفر من المعلمين ، واحده من المعلمات جات طالعه و لقتني لسه قاعده ، قالت لي في شنو يا طالبه ليه قاعده و ما مشيتي بيتكم ؟؟
ما عرفت اقول ليها شنو فطوالي شلت شنطتي و قلت ليها طالعه ، مشيت البيت و أنا متمنيه لو كان شفتو تاني و اتكلمت معاهو قلت ما مشكله ح ألقاهو يوم النتيجه ، المهم بعد الضهر كدا جاتنا عمتي آمنه و جابت معاها بتها وعد و ولدها عدي ، طبعاً في كل مره بتجينا بتاخدني على جنبي كدا و بتقول لي ما يكون جبتوا سيره لأبوكم ، بقول ليها لا ف تقول لي كدا أحسن و الأفضل ننسى الموضوع دا .....المهم خالتو خنساء لمن عرفت إنو عمتي جات ، جابت ليها سكر و بن و جات عشان تشرب معاها الجبنه ، عمتي قالت ليها نحنا ناس جبنة الكانون ، خالتو خنساء قالت ليها كلنا بنفضل جبنة الكانون ، أنا قليت البن و عهد هي العملتها ، طلعنا برا الحوش و شربناها معاهم بمزاااج ، عمتي قالت لينا تاني ما تتعودوا و المره الجايه م ح تشربوها معانا خالص....
شويه كدا جا أمجد و قال لخالتو خنساء إنو أواب جا من الداخليه ، قالت ليهو خلاص النقوم امشي ليهو ، عمتي آمنه قالت ليها لا خليهو يجي هنا و يشرب ليهو جبنه ، فعلاً ياسر و أمجد مشوا كلموهو عشان يجي ، قمت طوالي دخلت جوه لبست لي طرحه و عبايه و جيت راجعه ، بعد شويه جا قال السلام عليكم ، سلم علينا و قعد ، عمتي قالت لينا جيبوا ليهو مويه ، مشت براءه جابتها ليهو ، قال ليها شكراً ليك يا برو العسل ، خالتو خنساء قالت ليهو فاطر ؟؟
قال ليها اي عايز جبنه بس ، قالت ليهو تمام و طوالي كبت ليهو ، المهم عمتي و خالتو خنساء بقوا يتونسوا مع بعض و أنا و رغد و براءه و عهد بنتونس برانا ، فجأه اتذكرت أستاذ أحمد ف بقيت مبتسمه و أنا بتذكر في مواقفو معاي ، لمن ركزت و عاينت حوليني لقيتهم كلهم ما مركزين معاي إلا أواب !! كان بعاين لي ساي ، قلت أكيد قال البت دي مجنونه ، المهم بعد شويه عمتي قالت لي امشي نادي ياسر اخوك دا من قبيل ما أكل ، طوالي مشيت ليهو في الشارع بس ما لقيتو ، لمن مشيت بيت ناس خالتو خنساء لقيتو قاعد مع أمجد ، قلت ليهم زعيط و معيط ، أمجد قال لي ياسر دا بقى زولي ، قلت ليهو عشان الإتنين زي بعض 😂😂 قلت ل ياسر عمتي قالت ليك تعال ، قال لي كويس بجي بعد شويه ، المهم مشيت خليتهم و أول ما فتحت الباب عشان أطلع لقيت أواب في وشي ، إبتسمت ليهو و كنت ح أمشي بس وقفت لمن قال لي بالجد انتي شافعه !
إتلفت عليهو و قلت ليهو شنووو ؟؟
ضحك و قال لي شاااافعه لأنو الموضوع ما بستاهل الزعل دا كلو ، هسي بسببك خليت محاضراتي و جيتك ، قلت ليهو بإستغراب : كيف يعني ما فاهمه شي انا !!
قبل ما يقول حاجه ياسر جا طالع و قال لي أرح ! مشيت معاهو البيت و أنا مستغربه في الكلام القالو أواب ، قلت دا شارب شنو !!؟
المهم تاني ما إتلاقيت معاهو خالص و بعد أسبوع مشينا المدرسه للنتيجه ، من جيت بقيت أفتش على أستاذ أحمد بس لحد ما ذاعوا النتيجه هو ما ظهر و مسخ علي فرحتي 💔 كنت الأولى مشترك مع رهام بس ما حسيت بطعم الفرحه دي ، طبعاً رغد و براءه مشوا معاي المدرسه و إتعرفوا على ناس ريما و شروق و استاذه تيسير كنت متمنيه أعرفهم على أستاذ أحمد و أقول ليهو ديل أخواتي بس هو ما جا 💔
لمن رجعت البيت كملت البكى كلو و باقي اليوم بقى لي باهت و حسيت قلبي دا انفطر من شدة الوجعه ، بعد تلاته يوم من الكلام دا أبوي سفرنا البلد ، قعد معانا أسبوع و رجع الخرطوم ، قعدنا في بيت عمي لأنو حبوبه ساكنه معاهو هناك و أبو أبوي متوفي ، و بعد تمينا اسبوع خالتي جات تسلم علينا ، هي معرسه و ساكنه في قريه بعيده عن قرية ناس حبوبه ، هي أخت أمي الوحيده و ما عندهم أي أخ و أمهم و أبوهم متوفين من زمان ، عندهم عم واحد و ياهو العرس لأمي لمن إتطلقت من أبوي و قالت عايزا تعرس واحد تاني ، المهم خالتي قعدت معانا 3 أيام و رجعت بيتها ، المهم قعدنا شهر مع ناس حبوبه ، رغم انو مرة عمي ما كانت بتتعامل معانا كويس و طالعه و داخله بتتأفف و بتقول ناقصين نحنا لمن يجيبوا لينا زياده كمان ! حبوبه كانت بتقول لينا ما تشتغلوا بيها ، عمي كان مسافر بس جا قريب رمضان ، عمتي آمنه و ناس خالتو خنساء كانوا بتصلوا علينا على طول ، قريب ل رمضان أبوي جا و رجعنا معاهو و كان عايز يجيب حبوبه لكن هي رفضت و قالت أحسن ليها هناك ، ناس خالتو خنساء بتدوا يجهزوا ل رمضان و نحنا كل يوم بنكون معاهم ، طبعاً أنا لي دا رمضان التالت و رغد دا رمضان التاني ليها تصومو ، طبعاً أواب رجع من الداخليه عشان أجزو ليهم لكن ما إتلاقيت معاهو إلا لمن جا و تاني ما شفتو ، يوم و نحنا في بيتهم بعد ما فطرنا ، حبوبه سعاد قالت ماشه صلاة التراويح ، في اليوم داك كان في أخوات خالتو خنساء و بناتهم ، ف مشينا نحنا و بنات أخوات خالتو خنساء مع حبوبه سعاد للجامع ، بعد جينا راجعين من الصلاة ، نحنا كنا ح ندخل البيت بس حبوبه سعاد قالت لي تعالي معاي في حاجات عايزاك تشيليها ، لمن دخلت معاها أدتني عمود مليان أكل و قالت لي تعالي شيلي العصاير بعد تودي دا ، و أنا طالعه كدا أواب جا داخل ، عاين لي بغيظ كدا و مشى !!
صراحة استغربت زياده !! ما عارفاهو مالو معاي !
المهم مشيت البيت و رسلت براءه تمشي تشيل العصاير من ناس خالتو خنساء لأني حسيت انو أواب دا ما بطيقني مع إني ما عملت ليهو حاجه ، أنا بتعامل مع ناس بيتهم كلهم إلا هو و أساساً هو ما بقعد كتير في بيتهم عشان كدا ما حصل اتعاملت معاهو كتير ف ما عارفه ليه هو عاين لي كدا !!؟
لمن دخلت لقيت أبوي بحضر ساي ، و رغد في الغرفه التانيه و كالعاده ماسكه التلفون و مندمجه فيهو ، قلت ليها رغد عليك الله خلي التلفون دا و قومي غسلي العده دي !!
قالت لي ثواني بس ..
المهم رمضان عدا و جا العيد و طبعاً أول ناس مشينا ليهم هم ناس خالتو خنساء ، بعد صلاة العيد أمجد و أواب و أبوي و عمو سليمان جوا داخلين و هم لابسين الجلاليب و عيدوا علينا نفر نفر و أدونا العيديه ، أواب دا ما عارفاهو مالو بس لمن جا و سلم علي كان صار وشو ، حتى انو ما قال حاجه مد لي يدو بس !!.
رغد كانت جنبي ف قلت ليها دا مالو كمان !!؟ قالت لي منو ؟! قلت ليها الإسمو أواب دا ما عارفاهو مالو معاي ، بحسو شاميني شديد عشان كدا خلينا نمشي البيت ، يمكن ما عايزنا في بيتهم ، قالت لي خلاص خلينا نطلع مع أبوي ، أنا ما قدرت أنتظرو ف طوالي طلعت و مشيت البيت...