في مهب الريح

17

*#في~مهب~الريح《17》*
*#الجزء~الاول♡*
*#بقلم~مها~حولي~الزاكي*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
في اليوم البعدو أثناء ما حصة التاريخ شغاله أستاذ أحمد جا داخل و قال ل أستاذ التاريخ معليش على المقاطعه يا أستاذ ، قال ليهو لا عادي ما عندك مشكله ، قال ليهو عايز لين و سجود و تقوى ضروري ، طوالي وقفوا على حيلهم و طلعوا ليهو ، قبل ما يطلع عاين لي و مشى ، طبعاً ما استغربت عايزهم ليه لأنو التلاته ديل مشاركين في الدوره المدرسيه بعد شويه كدا جا راجع تاني و قال لي تعالي يا مها ، لمن مشيت ليهو ما إتكلم معاي خالص لحد ما وصلنا مكتب المعلمين ، كان معاهم أستاذه صفاء و كانوا بتكلموا عن الدوره المدرسيه ، أستاذه صفاء قالت لي يا مها انتي قرارك حق انك ما عايزا تشاركي في أي حاجه دا قرار نهائي ؟؟
قلت ليها ايوه ، أستاذه أفنان قالت لي لا أوعك يا مها انتي بت موهوبه و عندك مواهب كتيره لازم تبرزيها للناس و رسمك رهيب والله و أنا ما عايزا موهبه زي دي تضيع ، شنو السبب الخلاك تنسحبي من المشاركه ؟؟
قلت ليها ساي بس ، قالت لي لا ماف حاجه اسمها ساي ، إنتي في البدايه ما كان عندك مانع و كنت حاسه بيك مبسوطه بس بعد ما غبتي و جيتي راجعه غيرتي رايك ليه !!؟
قلت ليها ماف شي
أستاذه صفاء قالت ل لين و كل بنات الدوره المدرسيه انتوا أمشوا و خلونا برانا ، فعلاً كلهم طلعوا من المكتب و بقينا بس انا و أستاذه صفاء و أفنان و أستاذ أحمد ، قالت لي نحنا ما عارفين تفاصيل كتيره عنك و ما عارفين ظروفك شنو ، كل العارفنوا إنو أمك ما معاكم في البيت ، ما عارفه هل دا سبب كل الجهجه الإنتي فيها دي ولا في حاجات تانيه بس على كل الأحوال أنا ما عايزاك تتأثري بالحاجات دي كلها و تضيعي نفسك ، انتي بت ممتازه و موهوبه و مأدبه و محترمه و ما شفنا منك تصرف غير أخلاقي و شاطره في كل المواد فأرجوك حافظي على مستواك يا مها و ختي كل همومك و مشاكلك على جنب ، عارفه انو الحاجه دي صعبه عليك بس حاولي و نحنا معاك و ح ندعمك على طول ما تنظري لينا على أساس إننا معلمين و بس ، نحنا كمان أمهات و أخوات و خالات و عماتي و بشر في النهايه و برضو بنواجه مشاكل و ظروف كتيره بس الواحد أول ما يجي و يقيف قدامكم بكون خلى همومي جنب الباب عشان ما يحصل تقصير منو بسبب ظروفو دي و إنتي كمان لازم تعملي كدا عشان ما تقصري في قرايتك و الأداء في الإمتحان و المسابقات.....
طبعاً هي بتتكلم و أنا منزله راسي عشان عيوني دمعت ، أستاذه أفنان قالت لي احكي لينا الحاصل معاك و كل الكلام الح تقوليهو ما ح يطلع من جدران المكتب دا ، مسحت دموعي و قلت ليها ماف شي ، أستاذه صفاء كانت ح تتكلم بس استاذ أحمد قال ليهم خلوها على راحتها ، المهم في الآخر طلعت من المكتب و مشيت ورا الفصول و قعدت هناك لحد نهاية اليوم ، بعدها شلت شنطتي و مشيت البيت ، أول ما جيت داخله كدا لقيت ياسر مضروب في جبينو و الدم سايل و براءه شايله قطعة قماش و بتمسح ليهو في الدم و هي خايفه ، لأنو منظر الدم بخوفها شديد ، إتخلعت طبعاً ، مشيت عليهو و قلت ليهو الضربك شنو يا ياسر !!؟
رغد جات داخله و هي شايله بن في يدها ، مسحت ليهو الدم و ختت ليهو البن على الجرح ، قالت لي فلقوهو أخوان علا و جروا ، براءه قالت لي لمن كلمنا ليهم أمهم قالت لينا أنا ما عندي بيهم شغله....قلبي وجعني شديد ، طلعت برا و قعدت مع نفسي و قلت تااااني رجعنا للمشاكل و وجع القلب !؟💔 أسكت ليهم المره دي برضو ولا آخد حق أخوي !!
من مكاني داك و ب لبسي حق المدرسه طلعت من بيتنا و مشيت بيت ناس علا و ضربت الباب ، بعد مسافه فتحت لي علا و قالت لي خيييير !!؟
قلت ليها أخوانك وين ، قالت لي ما عارفه ، قلت ليها كويس قولي ليهم الليله إلا ما يطلعوا الشارع ، فجأه أمها جات و قالت لي الشارع دا مشتريهو أبوك !؟ دقيقه بس خليك واقفه مدام عامله فيها ، دخلت جوه و جاتني و هي سايقه اولادها الإتنين ، طلعتهم لي برا و قالت لي ياهم قدامك ، الله يقدرك تمدي يدك على واحد منهم ، قلت ليهم ضاربين ياسر ليه ؟؟ عاينوا لأمهم و قالوا لي اي بنضربوا ، قلت ليهم أنا لو دقيتكم ما غلطانه ، أمهم قالت لي منتظره شنو انتي ياهم قدامك دقيهم و شيلي حق أخوك الإنفلق...
قلت ليها يا خالتو ليلى انتي زوله كبيره و عاقله فما تتصرفي زي الشفع و خليك زولة حق ، قالت لي يخلخل ضروسك ضرس ضرس ، مش قلت ليك مية مره كلمة خالتو دي ما تقوليها لي ! تكتلوا الكتيل و تمشوا في جنازتو ، قلت ليها نحنا ما عملنا ليك حاجه لكن ، قالت لي مش براااكم جيتوا راجعين تاني معناها استحملوا البجيكم و أنا أولادي ما بمنعهم يمدوا يدهم على زول ، شفتي لو لمحتهم بكتلوا زول عديل ما بوقفهم ، قلت ليها حسبي الله و نعم الوكيل فيك ، قالت لي يا بت هييي ما تخليني أكشطك كف ، فجأه جاني صوت حبوبه سعاد و هي بتقول ليها لو ماااا كشطيها كف ما مره والله ، لمن إتلفت لقيت معاها خالتو خنساء و وراهم ناس رغد ، المره قالت ليها منو انتي ؟ قالت ليها أنا الجن الكلكي ، ياها قدامك أكشطيها ، خالتو خنساء قالت ل ياسر منو الفلقك من الإتنين ديل ؟؟
قال ليها دا و أشر على واحد من أولاد ليلى ، طوالي خالتو خنساء خمشتو من قميصو و لزتو ل ياسر و قالت ليهو إتسدى حقك ، خالتو ليلى طلعت و قالت ليها هيييي هيييي انتي حيوانه ولا شنو ، طوالي حبوبه سعاد ضربتها كف و رغد و ياسر إتلموا في ولدها و دقوهو دق العيش و هي كانت بتتصارع مع خالتو خنساء و حبوبه سعاد ، علا طوالي جرت من بيتهم و مشت بيت خالتها و هنا ياسر و رغد ما قصروا من الولد ، أنا ما عجبتني الطريقه الإنضرب بيها الولد لكن هو يستاهل ، بعد شويه كدا لمحت اتنين من خالات علا جايات طالعات بإستعجال حتى تيابهم ما لبسوها كويس إلا لمن وصلونا ، من دون ما يسألوا عن حاجه دخلوا في الشكله طوالي و بقوا يدافعوا عن أختهم و علا كانت ح تضرب رغد من ورا بس أنا مسكتها و لويت ليها يدها و ضربتها كف أصلا من زمان قلبي واجعني منها و هسي بسبب خالتو خنساء و حبوبه سعاد إتشجعت و ضربتها على كل مره أذونا فيها هي و أمها على كل مره رجعونا فيها البيت و نحنا بنبكي ، على كل مره غلطوا في حقنا و ظلمونا ، الشكله كانت كبيره و الناس إتلمت و الرجال هم الحجزونا من بعض لأنو النسوان كانوا واقفين بتفرجوا ساي ، خالتو ليلى و أخواتها قالوا لناس حبوبه سعاد والله ما نخليكم و طوالي ح نفتح فيكم بلاغ ، حبوبه قالت ليهم ما تترددوا ثاااانيه ، قال ليكم بنخاف نحنا !!؟ خالتو خنساء قالت ليها نحنا الشرطه و الجيش و أسياد البلد دي ، أرح ورونا شطارتكم يا معفنات👏👏
خالتو ليلى إتبهدلت بهدلة السواد ، شعرها كان منكش و توبها واقع على الأرض ، خالتو خنساء و حبوبه سعاد رجعوا بينا البيت بس قبل ما نمشي قالوا ل ليلى و أخواتها نحنا قاعدين في البيت داك ، لمن تجيبوا على البوليس خلوهم يجونا هناك ، طبعاً مشينا البيت و نحنا حاسين بالنصر ، دي أول مره ندخل البيت و نحنا ماخدين حقنا ، رغد و براءه و ياسر كانوا متكيفين شديد و ياسر شغال يضحك و يقول ل رغد شفتي دقيناهو كيف لمن رعف ، خالتو خنساء قالت لينا أوووعكم تخافوا من العواليق ديل ، حبوبه سعاد قالت ليها ننتظرهم نشوووفهم عايزين يعملوا لينا شنو الكلاب ديل 👏 خالتو خنساء قالت ليها ديل يقدروا يعملوا حاجه ! اقسم بالله أنا لو ختيتهم في راسي إلا أوديهم ورا الشمس ، طبعاً ناس خالتو خنساء عارفين المره دي مشكلتها معانا شنو ، عارفين إنو أمي معرسه راجلها ، المهم ناس خالتو خنساء قعدوا معانا لحد العصر و ناس ليلى ما عملوا أي شي ، قبل ما يمشوا خالتو خنساء قالت لينا لو جوكم راجعين إتصلوا علي طوالي ، رغد قالت ليها تلفوني خسران ، قالت ليها بجيب ليكم واحد ، هسي لو ما أبوكم كنت ح أسوقكم معاي ، حبوبه سعاد قالت ليها تاني ما ح يقدروا يعملوا ليهم حاجه ، خالتو خنساء قالت لينا مش التلفون دا بجيبوا ليكم ، قلت ليها لا ماف داعي يا خالتو ما عايزنوا.....
المهم هم مشوا و لمن أبوي جا راجع ماف زول قال ليهو حاجه لأنو ح يلومنا و هو ذاتو لمن جا كان مهموم و تعبان شديد ، قال لينا الليله مشيت شفت عمكم سليمان ، قلنا ليهو بقى كيف ، قال لينا لسه في الغيبوبه ، رغد قالت ليهو انت يا أبوي خليت الشغل في المصنع ؟؟؟
قال ليها اي ، قالت ليهو أكيد دا بسبب أخو عم سليمان ، خالتو خنساء و أولادها لو عرفوا ما ح يخلوهو يطردك ، قال ليها أنا قلت ليهم براي خليت الشغل ، ماف داعي تحصل مشاكل بينهم بسببنا و أنا ما عايز زول يتحمل مسؤولية أولادي أكلهم و شرابهم...
المهم عدت فتره كدا ظروفنا بقت صعبه شديد و أبوي كل يوم راجع مهموم و أنا أهملت قرايتي و بقيت شايله هم مع أبوي ، ما كنت قادره اقرا لنفسي بس كنت بجاهد عشان أقري أخواني لأنو امتحاناتهم قربت و رغد ممتحنه السنه دي ، كنت بطلع من الإمتحان و أنا لأول مره ما اكون عارفه نفسي حاله صح ولا غلط ، في الفتره ديك خالتو خنساء لا جاتنا لا نحنا قدرنا نمشي ليهم , أبوي قال لينا في آخر مره مشيت ليهم قالوا  عايزين يسفروا عم سليمان برا السودان و قال لينا هسي بكونوا سافروا ، خالتو خنساء هي الوحيده الكانت بتطمني بكلامها و أفعالها ، هي الوحيده الكانت قادره تحتوينا فلمن سافرت حسيت نفسي براي و ماف زول واقف معاي ، المهم في آخر يوم من الإمتحانات بعد ما طلعت من حجرة الإمتحان لقيت أستاذ أحمد في وشي ، قال لي ها إمتحنتي كيف ؟؟
قلت ليهو تمام و طوالي إتحركت من قدامو ، لمن رجعت البيت سألت أخواني عن إمتحاناتهم و قالوا كانت كويسه شديد ، قلت ليهم طمنتوني والله ، رغد قالت لي انتي اشتغلتي كيف ؟؟
قلت ليها ما عارفه والله ، أول مره أحس الإمتحانات صعبه ، قالت لي لأنك ما قريتي ، أنا كلمتك و قلت ليك خلي قراية ياسر و براءه مره علي و مره عليك بس براك مسكتيهم الإتنين و قريتيهم و نسيتي نفسك ، قلت ليها المهم درجاتهم تكون كويسه ، في نفس اليوم دا أبوي جا تعبان شديد و قال إنو مصدع ، مشيت الدكان جبت ليهو حبوب و أديتو بلعها ، تاني يوم لمن صحيت لقيتو من سريرو ما قام ، مشيت ليهو و قلت ليهو أبوي انت كويس ؟؟
قال لي حاسي جسمي مكسر ، طبعاً قلبي وجعني والله ، عيونو كانت واقعه و حالتو بطاله شديد ، قلت ليهو خلاص قوم أدخل جوه لحد ما اعمل ليك الشاي ، فعلاً دخل جوه الأوضه و رغد دخلت معاي السراير ، بعدها عملت الشاي و قلت ليهم انتوا أمشوا المدرسه و أنا بقعد مع أبوي ، فعلاً هم مشوا و أنا بقيت قاعده معاهو و شايله همو و خايفه و كل ما يغمض عيونو بقول خلاص مات 💔 عيشني في خوف و رعب طول اليوم ، عملت ليهو كمادات و بقيت بعصر ليهو في رجلينو لأنو قال واجعاتنو ، لمن طلعت من الأوضه دخلت الحمام و قعدت أبكي هناك ، 3 أيام و أنا ما مشيت المدرسه ، بس في اليوم الرابع مشيت و أنا باهته من الداخل و الخارج ، قلبي حسيتو ح ينفطر من شدة الألم ، ريما قالت لي وزعوا لينا جزو من الأوراق و أدتني أوراقي لقيت درجاتي كعبه شديد و ما بتشبه مستواي و دا الزاد علي ، مشيت ورا الفصول و بكيت كدا لمن دموعي خلصت و حسيت قلبي دا ح يطلع من مكانو في نفس اليوم دا المديره استدعتني لمن مشيت لقيها لقيت معاها أستاذه صفاء و تيسير و أستاذ بكري ، قعدت تسألني الحاصل معاك شنو و ليه مستواك نزل للدرجه دي و و و كلام كتير بس ما حكيت ليهم حاجه ، في الآخر نصحتني و قالت لي عبارات كتيره عشان تشجعني و تحفزني بيها ، لمن رجعت الفصل لين قالت ماااالك يا بخيته ما قلتي عاااامله فيها شاطره ، شيماء قالت ليها ابقى شاطره كيف و أنا الناس البتشاطر عشاااانهم بقوا يسفوهني ، قالوا كدا و قعدوا يضحكوا ضحك شماته ، ما رديت عليهم قعدت مكاني بس و ريما و شروق حاول يتكلموا معاي و يعرفوا الحاصل علي ، ريما قالت لي شغلتي الناس ، الأساتذه كلهم بقوا محتارين فيك و بسألوا عن الحاصل معاك حتى انهم نادونا أنا و شروق و سألونا إذا عارفين حاجه عنك ، قلنا ليهم ما عارفين شي ، كنت ساكته بس و بسمع كلامهم ، ساعة الفطور ما طلعت أفطر ، قعدت براي في الفصل ، حسيت أحمد جا ماري بالفصل و لمن شافني بالشباك جاني بالباب ، إتنهد و قال لي بغض النظر عن الحصل و بغض النظر عن الكلام الكتبتيهو في ورقة الفيزياء و بغض النظر عن طريقة معاملتي ليك في الفتره الآخيره أنا دائماً معاك و مصلحتك بتهمني و لحد اللحظه انتي من الطالبات المفضلات عندي و 28 الجبتيها في الفيزياء دي ما مقياس ليك لأنك عندك ظروف و مشاكل حاصله معاك بس المشكله هي كيف انك تتكلمي و توري الناس الحاصل عليك....ما رديت عليهو
قال لي أنا و أستاذه صفاء مشينا ليكم في البيت عشان على الأقل نقابل أبوك أو أي زول من أفراد أسرتك بس اكتشفنا إنكم رحلتوا و جيرانكم الجبنبكم ما كانوا موجودين ، انتي طالبتي المميزه و أكيد ح أزعل شديد و اتضايق لمن أشوف مستواك بتدنى كدا و لمن أشوفك مهمومه و متضايقه....
لمن قال لي كدا دموعي نزلت ، اتكلم معاي كلام كتير و في الآخر قال لي أنا موجود دائماً متى ما حسيتي نفسك عايزا تحكي و تفضفضي تعالي بغض النظر عن الحصل بيناتنا...
حسيت نفسي شويه كدا و أحكي ليهو ، باقي اليوم كلو عيوني كانت مليانه دموع ، حسيت نفسي ما قادره اتحمل أكتر ، ما قادره أكتم أكتر ، في نهاية اليوم لقيت رجليني بتسوقني لحد مكتب أستاذ أحمد ، أول ما دخلت لقيت المكتب فاضي ، أول ما إتلفت كدا عشان أرجع لقيتو جاي داخل ، قال لي كنت طالع لمن وصلت الباب شفتك دخلتي المكتب و حسيت انك جايه لي ، دخل و ختى شنطتو ، قال لي تعالي يا مها ، مشيت قعدت قصادو و أنا ما قادره أخت عيوني في عيونو ، قال لي أحكي سامعك أنا ، شيلي فكرة إني أستاذك و إتكلمي عادي...
قلت ليهو ما قادره 💔
_ طيب إعتبري نفسك قاعده براك ، عايني للكرسي الجنبك دا و إتكلمي ...
ما رديت
قال لي شكلك ما عندك ثقه في زول ، قلت ليهو أنا ما بحب أحكي لزول مشاكلي لأني ما بحب الإستعطاف و الشفقه من الناس الحوليني...
قال لي إذا ظروفك هي الوضع المادي ؟؟
ما رديت عليهو
ضحك و قال لي كلنا مفلسين ، أنا القدامك دا مرات بشحد حق المواصلات من أستاذ بكري 😂😂
"طبعاً في الوقت داك أنا صدقت كلامو دا و ما فهمت إنو قال كدا عشان يحسسني انو دي حاجه عاديه و الوضع واحد"
لمن عاينت ليهو قال لي جد يا زوله الناس دي كلها مفلسه عينها طالعه بس ماشين رجاله ، ما تشوفي اللبس و الفشخره دي كلها و تقولي الناس دي مقرشه و وضعها تمام ، كلها مظاهر بس ، يعني ما معقوله نكون مفلسين و مبهدلين ولا شنو !؟😂😂
لمن قال كدا بالجد ضحك و حسيت انو الحاجه دي عاديه و معظم الناس وضعها الإقتصادي كعب حتى أستاذ أحمد ، قال لي الحاله دي عامه بس براك مكبره الموضوع و شايله هم و منفسنه و خاربه مستواك ، قلت ليهو ما عارفه لكن بالجد الموضوع كان خطير بالنسبه لي و كل ما اشوف تعب أبوي و شقاهو قلبي بيوجعني عليهو و بتمنى أساعدو...
عاين لي مسافه و قال لي في الزمن دا صعب إنو الواحد يلقى ولد أو بنت شايلين هم أهلهم و مقدرين تعب آباءهم و ساعين عشان يساعدوهم و يساندوهم ، للسبب دا انتي لازم تجتهدي أكتر و تتحدي ظروفك و ترجعي أحسن من الأول عشان أبوك ، قلت ليهو ان شاء الله..
قال لي شفتي الموضوع بسيط كيف ؟؟
حسيت ليهو راسي بس ، قال لي دي كلها إبتلاءات و إمتحانات من ربنا و ح تعدي أن شاء الله و خليك عارفه انو بعد العسر يسر ، قلت ليهو فعلاً ، قال لي في حاجه تانيه ؟؟
قلت ليهو لا ، قال لي دا كل المبشتنك و المضايقك ؟!
قلت ليهو أيوه ...
قال لي بسيطه و فتره و بتعدي ، حالياً ما بس أبوك المنتظر يشوفك خريجه و زوله ناجحه في حياتها أنا كمان منتظر أشوفك خريجه و انسانه ناجحه قدرت تضع ليها بصمه و تصنع مجدها...قلت ليهو أن شاء الله يا أستاذ...
قال لي هديتي صح ؟؟ قلت ليهو أيوه
قال لي خلعتيني و قلقتي بي قلت البت حاصل معاها شنو و اتخيلت القصه أخطر من كدا ، قلت ليهو في تفاصيل في أيامنا العاديه دي بتزعل و بتبكي ، قال لي فعلاً في و كلنا بنمر بيها بس زي ما قلت ليك اول ما نصل المدرسه بنخلي كل الهموم دي في الباب....
هزيت ليهو راسي بس ، قال لي أنا قلت البت حبت و دا الحب المشتتها 😂😂
طبعاً نططت عيوني لمن قال لي كدا ، قلت ليهو لا لا ماف كلام زي دي ، قال لي ايوه انتي غير أستاذ أحمد ما بتحبي زول...
هنا بالجد إتوترت و قلبي عمل شحححح ، قعدت يضحك و قال لي لا لا ما تتوتري يا زوله ، ما انتي براك معظم الطالبات بكرشو أو بعجبو ب أساتذتهم ، حاجات زي دي طبيعي تحصل في المرحله دي ، بس لازم الوحده تكون عارفه انو دي مجرد مرحله و ح تنتهي أول ما هي تمتحن و تمشي من المدرسه 😂
يعني الموضوع عادي و كلها كم سنه كدا و تنسيني و تنسي أي مشاعر كنتي بتحسيها تجاهي ..
أنا ليه بقول ليك الكلام دا !
بقول ليك عشان الحصل ما يبني حاجز بيناتنا و عشان لا انتي تلومي نفسك لا أنا أعمل حساب ل تعاملي معاك ، كدا بقينا واضحين و متفقين انو دي فتره و ح تعدي و كل المشاعر دي ح تندفن في المدرسه دي صح ؟؟
صراحة ما عرفت اقول ليهو شنو ف سكته !
ضحك و قال لي ولا انتي عايزا تحبيني حتى لمن تمشي الجامعه !؟
قلت ليهو و أنا منزله راسي لا لا ، قال لي حلو من اليوم ح نرجع نتعامل مع بعض زي زمان طيب ؟؟
قلت ليهو طيب ، قال لي بالمناسبه ختك شييين في الفيزياء خاصة في الكلام الكان ورا الورقه....هنا خجلت شديد ، قال لي دي ماف زول سبقك عليها ، في بنات كانوا بكتبوا لي في السبوره و بنات بخلوا لي ورقه في كتابي و بنات بختوها لي هنا في التربيزه بس ماف وحده كتبت لي كلام في ورقة الإمتحان 😂😂🤣
قلت ليهو ما ح تتعاد تاني
قال لي ماف مشكله بس الأهم انك تكوني مدركه انو دي فتره و ح تعدي و انو دي تغيرات طبيعيه و مشاعر مزيفه بكرا ح تنتهي و لمن تكبري و تتزكري العملتيهو ح تضحكي على نفسك و تقولي كيف أنا عملت كدا 😂
سكته ساي و أنا خجلانه منو ، قال لي ما عايزك تغيبي تاني و ما عايزك تهملي دروسك و قرايتك بالمناسبه يعني في تمارين كتيره فايتك لازم تشتغليها و تجيبي لي كراسك أصححو ليك ، قلت ليهو ما كنت حاضره عشان كدا ما ح أقدر أحل ، قال لي يا زوووله قولي عايزا تتهربي بس ، خلي أي زول يشرح ليك و ممكن تجيني في أوقات فراغي بشرح ليك ما عندي مانع ، قلت ليهو طيب ، وقف على حيلي و شلت شنطتي و قلت ليهو شكراً ليك ، قال لي العفو ، أول ما إتحركت من جنبو قال لي حاجه أخيره.....لمن إتلفت عليهو قال لي أبعدي من صحبة الأولاد لأنو الحاجات دي ما شبهك ، قلت ليهو بإستغراب أولاااااد !! أصلاً أنا ما حصل صاحبت ولد ولا عندي وقعت للحاجات دي كلها و أساساً ما بحب صحبتهم لأني عارفه الصح من الغلط ، قال لي ايوه انتي انسانه مهذبه و بريئه و يمكن دا يخلي الناس تفكر تستغلك و تلعب بيك ، قلت ليهو لا لا لأني ما قاعده أدي زول فرصه فيني ، قال لي و الكان ركبتي معاهو داك أخوك ولا منو ، قلت ليهو لا لا ما أخوي دا ولد جيرانا ، قال لي اهااا برضو أعملي حسابك و أنا ك أستاذك من واجبي أنبهك و أحذرك لأنو مصلحتك بتهمني ، قلت ليهو طيب شكراً ليك ، لمن طلعت من المكتب طلعت و أنا حاسه نفسي خفيفه زي الريشه ، الشفافيه و البساطه الإتكلم لي بيها أستاذ أحمد خففت عني شديد و ريحت قلبي ، لمن وصلت البيت كنت مبسوطه و مبتسمه لقيت أبوي واقف في المطبخ و بعمل في ملاح ، قلت ليهو ابوووي انت مش عيان ليه واقف هنا و رغد مشت وين ، قال لي بقيت أحسن شويه و قلت اعمل ليكم اكل طولت ما وقفت في المطبخ ، براءه جات و قالت ليهو انت الليله يا أبوي بقيت أمنا التانيه ، ضحكنا شديد على كلامها ، أبوي قال لي عمتكم الليله قالت جاياكم ، قلت ليهو كويس ، المهم بعد مسافه كدا سمعنا صوت الباب ، قلت أكيد دي عمتي آمنه ، براءه جرت و فتحت الباب ، بعد شويه جات جاريه و قالت لأبوي دا أواب الجا ، أبوي مشى و استقبلو و دخلو جو ، سلم علينا و قعد و بقى يتكلم مع أبوي و يسألو عن أحوالو و أبوي سألو من أبوهو و قال ليهو قايلك سافرت معاهم ، قال ليهو أنا عندي كم موضوع هنا عايز أحلو و بعدين ح أسافر ليهم ، مشيت عملت ليهم الشاي و جبتو ليهم ، أواب قعد يتونس مع أبوي و مره مره يعاين لي ، لمن قام ماشي عمتي جات داخله سلم عليها و وقفت سألتو عن أهلو قبل ما يمشي أدى أبوي كيس صغير و قال ليهو دي أمانه أمي قالت يدوها ل مها ، أبوي طوالي مدا لي الكيس ، بعد أواب مشى فتحت الكيس و الكرتونه الصغيره ف لقيتو تلفون كبير لمن إتخلعت !!
رغد قالت لي وااااي مبالغه ! ياسر قال لي ليه يدوك ليهو انتي بس دا حقنا كلنا ، براءه قالت لي مها أديني أشوفو ف طوالي خليتها تشوفو ، عمتي قالت لي عاد المره دي ما قصرت ، حاسباكن بناتها بالصح ، أبوي قال ليها اي والله خنساء دي أنا لو اتكلمت عنها للسنه الجايه ما بوفيها حقها والله ، ربنا يجزيها خير هي و راجلها سليمان و أولادها...
المهم باقي اليوم كلو قضيناهو بنشوف في التلفون ، ابوي قال اتصلوا عليها و أشكروهو و أسألوها عن عمكم سليمان ، قلنا ليهو رقمها في التلفون القديم و التلفون إتعطل ، قال لينا أنا معاي رقمها و فعلاً اتصلنا عليها و اتكلمنا معاها مسافه و سألناها عن عمو سليمان ، قالت ل رغد طبعاً أنا ما جبت ليك تلفون عشان ما تتلهي بيهو و تخلي قرايتك ، شايفاك في تلفونك داك ماسكاهو اليوم كلو بس أول ما تمتحني تامن بجيب ليك واحد تاني ، قالت ليها طيب ، قلت ليها لا يا خالتو ماف داعي دا كفايه ، قالت لي أنا ما قاعده اشتغل بكلامك ، براءه قالت ليها جايه متين انتي ؟ قالت ليها لما عمك دا يبقى كويس ح نرجع طوالي ، عمتي ذاتا اتكلمت معاها و شكرتها قدرتها ...المهم إتكلمنا مسافه و قفلنا منها ، رغد قالت لي ليه تقولي ليها ماف داعي و إنو التلفون دا كفايه !! قلت ليها رغد الناس ديل ما مسؤولين عننا عشان يقعدوا الوقت كلو يساعدونا و يلبوا لينا طلباتنا ، أبوي عاين لي مسافه و قال ل رغد صح كلام أختك ، خليك فاهمه و واعيه زيها و ما تعشمي في حق الناس و تفرضي عليهم نفسك و تخليهم يلبوا ليك طلباتك ...
زهجت طبعاً و قامت مشت مننا ، رجعت التلفون في كرتونتو و قلت ليهم التلفون دا لينا كلنا بس ما ح نستخدموا إلا للضروره زي لمن نحتاج نتكلم مع خالتو خنساء ، غير كدا لا إلا الإمتحانات دي تنتهي ، عمتي قالت لي كلام موزون ، قالت ليهم اسمعوا كلام أختكم لأنها عايزا مصلحتكم....
المهم بعد أسبوع كانت النتيجه و ذاعوا العشره الأوائل في الطابور و ما كنت منهم ، قربت أبكي و مشيت وقفت بالطرف في آخر صف عشان ماف زول يشوف عيوني المدمعه ، أستاذ أحمد جا وقف جنبي و قال لي حصل خير ، كلنا عارفين انتي شنو و واثقين من شطارتك و إمكانياتك ، دا ح يكون ليك دافع ل قدام و أنا متأكد إنو في نتيجة الإمتحانات النهائيه ، إسمك ح ينذكر هنا ، أمسحي دموعك دي و ما تكوني انسانه إنهزاميه ، مسحت دموعي و سكته ، قال لي خلال اليوم دا كراسك حق الفيزياء يصلني لأني شرحت ليك ، قلت ليهو طيب....

*أخبرتك حينها أن لا يمتلئ قلبك بي*
*و أن لا تضعيني نصب عينيك*
*و أن لا تكوني أسيرة مشاعرك*
*و ألا ترتبط روحك بي*
*علمتك كيف تتخلصين من حبك لي*
*و كيف تكملين الطريق وحدك*
*و كيف تمضين من دوني*
*فتحت لك باباً آخر فيه طريق لا يقودك إلي و نسيت أن أغلق* *الباب...*
*علميني الآن كيف أمحو ذكراك*
*كيف أطرد طيفك ليلاً و كيف* *أقنع عقلي أن السراب ليس* *حقيقة و أن هناك أشياء محال الحصول عليها*
*علميني كيف أنساك يا صغيرتي*

*#مها_حولي*