في مهب الريح

20

*#في~مهب~الريح《20》*
*#♡الاخــــــــــــــــــــــــــــــــيرة♡*
*#الجزء~الاول♡*
*#بقلم~مها~حولي~الزاكي*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
عدم رد أواب على رسايلي زعلني شديد ، بقيت متضايقه و زهجانه على طول ، بعدها ب يومين كنت في المكتب بصحح في كراس الكيمياء ، شويه كدا جا أستاذ أحمد داخل لمن شفتو فرحت شديد لأني طولت منو ، الأساتذه وقفوا سلموا عليهو ، أستاذ بكري قال ليهو وين الغيبه ما شايفنك ! قال ليهم والله الوالده كانت مرقده في المستشفى و هسي بقت كويسه ، أستاذ بكري قال ليهو والله ما كنا عارفين ، معليش يا أحمد ! قال ليهو لا لا ماف مشكله أنا ذاتي ما كلمت زول و كنت قافل تلفوني ، قالوا ليهو طمنا عليها ، قال ليهم هسي الحمدلله بقت كويسه ، عاين لي و قعد مكانو ، صححت كراس الكيمياء و كنت ح أطلع بس أستاذ مأمون قال كراسك حق الفيزياء ما وصلني ! الفصل كلو جمع إلا انتي ! مع إنو المعلمين الدرسوك كلهم شكروك لي و كنت سامع بشطارتك و شايفك دائماً من العشره الأوائل ، أستاذ بكري قال ليهو مها شاطره والله ، لكن بتكون خايفه من تالته ، قلت ليهو فيزياء تالته دي صعبه ، أستاذ أحمد قال لي نفس الأخدتوا في أولى و تانيه ياهو في تالته ماف أي شي صعب ، انتي لو واجهتك مشكله اسألي أستاذ مأمون عادي ، قلت ليهو طيب و طوالي طلعت ، ساعة الفطور كنت واقفه في البوفيه منتظره دوري و في نفس الوقت كنت بتونس مع ريما و شروق ، فجأه جاني صوت أستاذ أحمد و هو بقول اهااا يا فيصل لسه ؟؟
قال ليهو جاهز ، و طوالي فيصل أدى البنات كيس فيهو سندوتشات عشان يمرروهو لأستاذ أحمد ، قلت ليهو هيييي ليه يعني تشاركونا في فطورنا ، ضحك و قال لي جيت قبليكم ، ريما قالت ليهو خلاص تاني ح نبيت هنا عديل ، قال ليها برضو ح أشيل قبليكم ، شروق قالت ليهو هييي ما عندنا مانع والله حتى لو شلت البوفيه كلو ، انت أستاذنا و ما قصرت معانا ، أنا و ريما عاينا ليها في نفس الوقت ، استاذ أحمد ضحك و قال ليها انتي الوحيده الما بتنكري حطب ، قلت ليهو كنت بهظر والله ، قال لي عارفك أنا ، المهم هو مشى و أنا شلت قبل ناس ريما و عشان ماشه أحل تمرين و أجمع قلت ليهم أنا ح أسبقكم ، لمن قربت من الفصل كدا أستاذ أحمد طلع في وشي ، قال لي المدرسه دي ما فيها غيري و غيرك ولا شنو ؟؟ ضحكت و قلت ليهو شكلو كدا و كنت ح أمشي بس وقفني و قال لي لا بتسألي عن زول لا بتتفقدي أحوال الناس ، قلت ليهو أنا والله انشغلت مع تالته و ما كنت جايبه خبر للدنيا ، قال لي ايوه واضح شديد ، قلت ليهو قبيل سمعتك قلت أمك كانت عيانه ف الحمدلله على سلامتها ، قال لي الله يسلمك ، أول ما إتحركت من جنبو كدا قال لي ثواني ، لمن إتلفت عليهو قال لي أنا جد كدا عايزا أعرف في شنو ؟
قلت ليهو كيف يعني ؟😂 ماف شي ليه السؤال ؟
قال لي ما عارف بس حاسك بقيتي في عالم تاني و مركزه مع حاجه تانيه ....لمن قال لي كدا اتذكرت أواب و كيف انو تفكيري في الفتره الآخيره كلو بقى عباره عنو ، غصب عني إبتسمت و قلت ليهو لا لا ماف شي ، ح أركز مع شنو غير تالته 😅
قال لي اتمنى يكون دا الحاصل لأنك بت ممتازه زي ما سبق و قلت ليك و أنا ما عايزك تتلهي و تضيعي مستقبلك ، قلت ليهو اتطمن يا أستاذ ، المهم مشيت الفصل قعدت أفطر و أحل في التمرين لحد ما ريما و شروق جوا و حلينا الباقي سوا و مشينا صححنا.....
المهم بعد تلات يوم ما قدرت أمنع نفسي ، رسلت تاني لأواب و قلت ليهو أنا ما عارفه ليه لقيت ما بترد علي لكن لو أنا غلطت عليك من دون ما أنتبه ف أنا آسفه ، بعد دقيقتين رد علي و قال لي لا ما غلطي علي و ماف شي ، قلت ليهو طيب ليه ما كنت بترد علي ؟؟
قال لي أنسي الموضوع ، اهااا كيف عامله مع المدرسه ، قلت ليهو تمام الحمدلله ، قال لي ها امتحنتي كيف في إمتحان الفيزياء ؟؟
قلت ليهو نص نص ، قال لي عشان تاني ما تحبي ماده على أساس الأستاذ البدرسها 😏
قلت ليهو اعمل شنو استاذ أحمد دا الأفضل والله ، قال لي ممكن نقفل السيره دي !؟
هنا حسيت انو اتضايق لأني جبت سيرة أستاذ أحمد !!
ياداااب فهمت هو ليه زعل مني و بقى ما برد علي !! يعني كان زعلان لأني قعدت أحكي ليهو عن أستاذ أحمد !! اتفاجأت و في نفس الوقت إنبسطت و حسيت بإحساس ما عادي ، قربت أطير من الفرح !
دا معناهو إنو أواب بحبني !!!
قلت ليهو انت اتضايقت لأني جبت سيرة أستاذ أحمد ؟؟
قال لي ليه فكرتي كدا ؟؟
قلت ليهو لأنو واضح ، قال لي تمام مدام واضح ليه بتجيب سيرتو و بتخليني اتضايق ؟؟
ضحكت مع نفسي و قلت ليهو طيب انت بتضايق ليه ؟؟
قال لي عشان انتي تسألي 😏
قلت ليهو اهاا سألت
قال لي اهاا ماف جواب ، قلت ليهو أصلك غياظ ، قال لي انتي تتوقعي جوابي يكون شنو ؟؟ قلت ليهو ما بحب التوقعات أنا ، قال لي خمني ساي ، قلت ليهو امممم يمكن ما بتحب زول يمدح زول قدامك ، قال لي بالظبط كدا بس ما أي زول ، إلا الناس المقربين مني ، طبعاً لمن قال لي كدا قلبي اشتغل دق دق ، قلت ليهو اهااا ، قال لي ممكن تاني ما تتكلمي عن أحمد دا ؟؟
قلت ليهو طيب.....بعدها بقى يرسل لي عادي و بقيت ما بجيب ليهو سيرة أستاذ أحمد إلا لمن أكون عايزا أغيظو ، طبعاً نتيجة الإمتحانات التجريبيه طلعت و الحمدلله نسبتي كبيره ، أول زول عرف بالنتيجه هو أواب ، انبسط مني شديد و قال لي خليك كدا على طول ، يوم جات رغد و لقتني ماسكه التلفون و بضحك ساي ، قالت لي بتتكلمي مع منو انتي ؟؟
انخلعت و بتردد قلت ليها مع صحباتي حيكون مع منو مثلاً ، قالت لي طيب إنخلعتي كدا ليه ؟؟ قلت ليها لأنك طلعتي في وشي فجأه كدا....
المهم في اليوم البعدو أول ما جينا داخلين المدرسه سوا لقينا المديره فايزا جنب الباب كانت بتتكلم مع البواب ، قلنا ليهم السلام عليكم ، ردوا لينا السلام و المديره قالت لي دي أختك يا مها ؟؟
قلت ليها ايوه ، قالت لي بتشبهك شديد ، اسمها منو ؟؟ رغد قالت ليها اسمي رغد ، قالت ليها كويس ان شاء الله تبقي لينا زي أختك دي ، المهم لمن مشينا منهم ، رغد قالت لي يعني معقوله المدرسه دي كلها ماف وحده اشطر منك عشان كدا كل الأساتذه بشكروك حتى المديره !! قلت ليها في بس انا مميزه أكتر ، قالت لي معناها الطلاب بليدين بس ، و نحنا ماشين و بنتكلم فجأه رغد اصطدمت ببت لمن انتبهنا لقيناها لين ،قالت ليها ما بتشوفي ياخ ، رغد قالت ليها قولي أنا ما بشوفك انتي مالك حوصه ؟
لين قالت ليها حوصه براك أحسن ليك تحترمي نفسك ، رغد ربعت يدينها و قالت ليها الحمدلله محترمه نفسي بس ما مجبوره أحترمك انتي ،لين قالت لي أحسن ليك تلمي أختك دي عليك ، رغد قالت ليها يلمك و يحرقك ، قالت ليها هييي شفتي أحسن ليك و من هنا بدت شكلتهم و أنا ما كنت عارفه اقول شنو لأنو كل وحده ردها أصعب من التانيه ! فجأة جا أستاذ أحمد و قال بتتشاكلوا ليه !!؟
لين قالت ليهو دي البت الما محترمه دي عم.....ما خلاها تتم كلامها ، قال ليها معليش بس انتي كيف عرفتي إنها ما محترمه ؟؟
لين قالت ليهو واضح عليها ، أستاذ أحمد قال ل رغد الحصل شنو ف طوالي هي حكت ليهو القصه كلها ، إتلفت على لين و قال ليها انتي غلطانه ، زعلت شديد و مشت من جنبنا و هي عايزا تطق من الزعل ، أستاذ أحمد قال لي لو زمان كنتي زي أختك دي ما كان في زول بقدر يغلط عليك ، رغد قالت ليهو مها دي مسكينه ساي لكن أنا أي زول بغلط علي ما بسكت ليهو حتى لو كنا في المدرسه ، ضحك و قال ليها دي حاجه كويسه بس أبعدي من المشاكل ، بعد ما مشى رغد قالت لي أستاذ أحمد دا عسل ليك حق تتكلمي عنو الزمن كلو ، قلت ليها هسي ي خساره ما مسكنا في تالته....
المهم في ساعة الفطور أنا و ريما و شروق كنا قاعدين ورا الفصول و شايلين كتاب عشان نقرا منو بس لمن زهجنا قعدنا نتونس ساي ، شروق كانت بتحكي لينا عن ولد خالتها الجاي يتقدم ليها و بدت تحكي في قصتهم و نحنا بنتكشم ساي ، ريما قالت ليها واااي بختك يا شروق عقبالنا نحنا ديل ، أنا ليه ما بتحب و بحبوني!😭😭
قلت ليها ما براك يختي كلنا في الهوا سوا ، شروق قالت لي هييي ما تكذبي ، انتي بتحبي من ورانا ، قلت ليها شنووو أنا ؟ قالت لي آي و كمان كاتبه حرفو في كتابك و قبل يوم شفتك كاتبه حرف ال A في يدك بالحبر ، ريما قالت لي وااااي ما تكوني قاصده أستاذ أحمد!!
قلت ليها لا لا مجنونه انتي ؟؟
شروق قالت لي الشمار حرقني ، سرعه أحكي لينا دا منو ، قلت ليهم ياخي ياخي ماف شي ، ريما قالت لي بطلي غتاته ياخ و أحكي لينا ، بعد تردد حكيت ليهم عن أواب و عن تلميحاتو لي ، شروق قالت لي واااي مبالغه ارح نتبادل ، ريما قالت وووبعلي يعني إلا أنا بس الما عندي زول فجأه جانا صوت أستاذ أحمد و هو بقول لينا بنهره قوموا أمشوا من هنا ، اتخلعنا طبعاً لمن رفعنا راسنا لقيناهو مطلع راسو بشباك فصل تانيه ، قمنا زي الضاربانا كهربه ، قال لينا بتعملوا شنو هنا ؟؟ شروق رفعت ليهو الكتاب و قالت ليهو كنا بنقرا ، قال لي انتوا ما الناس الدرستهم يعني هسي خلاص عاملين فيها بقيتوا كبار و شاربين المواد دي عصير عشان تجوا و تتونسوا هنا ولا كأنكم ممتحنين شهادة!!
ريما قالت ليهو آسفين آسفين ، أداني نظره شككتني في نفسي ، بإستعجال مشينا من المكان الكنا قاعدين فيهو ، ريما قالت أستاذ أحمد دا لو عليهو نقرا حتى في أحلامنا ، شروق قالت ليها مركز مع مستقبلنا و إمتحاناتنا أكتر مننا ، قلت ليهم أنا مستغربه من النبره الإتكلم بيها معانا ! يعني كلامو دا لو كان قالوا لينا بهدوء برضو كنا ح نستوعبوا! ريما قالت لي شكلو زهجان عشان كدا إتفشى فينا....
المهم بعد أسبوع عرفنا إنو أستاذ مأمون حاصل عليهو ظرف عشان كدا ح يضطر يغيب ، طبعاً الأسبوع كلو ما أخدنا فيهو حصة فيزياء ، المديره قالت لينا ممكن أجيب ليكم استاذ شاطر من بكرا لأنو انتوا تالته و حاله خاصه....
المهم يوم بعد حصة الرياضيات ، فجأه كدا أستاذ أحمد جانا داخل !!
البنات فرحوا و قالوا ليهو ح تدرسنا أنت يا أستاذ؟؟
قال ليهم لحد ما يجي أستاذ مأمون ، وحده قالت ليهو أن شاء الله ما يجي ذاتو ، لمن عاين ليها سكتت ، قال لينا وقفتوا وين ؟؟ وريناهو آخر حاجه أخدناها و طوالي بدا لينا الدرس البعدو ، كان بشرح و لمن يعاين لي بعاين لي بنظره حاده ، قلت أستاذ أحمد دا مالو بعاين لي كدا ؟! قلت بكون زهجان كالعاده ، كنت ماسكه قلم و بشخبط بيهو في الكراس القدامي ، طبعاً الحصه كانت طويله عشان كدا زهجت و انشغلت عنها ف بقيت برسم في قلوب ساي و جواهم حرف الA و "أواب "، كنت ببتسم كل ما أتذكر أواب ، فجأه سمعت أستاذ أحمد قال يا مها ، لمن انتبهت لقيتو هو و كل الفصل بعاينوا لي ، قال لي بتعملي في شنو انتي ؟؟ لمن جا علي طوالي قفلت الكراس و ختيت القلم ، قال لي وريني الكنتي بتكتبي فيهو دا ، قلت ليهو لا لا ما كنت بكتب في حاجه بشخبط ساي 😅
فتح الكراس و بقى يقلب في الصفحات لحد ما لقى القلوب و الحروف الA و اسم أواب الكنت كاتباهم ورا الكراس ، شال الكراس و مشى وقف في مكانو و ختاهو على التربيزه القدامو ، قال لي بعد الحصه دي تلحقيني في المكتب ، طبعاً خفت خوف شديد ، أو مره تحصل معاي حاجه زي دي ، بعد ما هو طلع جرس الفطور رن ، ريما و شروق قالوا لي عملتي شنو انتي ؟؟ حكيت ليهم الكتبتو ، قالوا لي الليله سجمك ح يضبحك ، قلت ليهم ما ح أمشي ليهو ، ريما قالت لي لو ما مشيتي ليهو ح يعمل ليك موضوع ، أحسن تمشي و تتفاهمي معاهو و تقولي ليهو انك ما ح تعيديها تاني ، فعلاً مشيت المكتب بس لقيتهم بفطروا و على بال ما امشي اقيف و اشتري فطوري و الجرس رن فطوالي دخلنا الفصول ، ريما قالت لي خلاص أمشي ليهو في فسحة الصلاة ، قلت ليها إلا كدا ، لمن جات فسحة الصلاة و مشيت ليهو في المكتب ما لقيتو ، أستاذ بكري قال لي طلع قريب ح يجي بعد شويه ، لحد ما الحرس رن هو ما جا ، ف للمره التانيه دخلنا الفصول من دون ما أقابلو ، شروق قالت لي كدا أحسن عشان ما يشاكلك و يفضحك قدام الأساتذه امشي ليهو نهاية اليوم بس و اتفاهمي معاهو ، فعلاً في نهاية اليوم و لمن مشيت المكتب ما لقيت فيهو زول و قدامي كان في كراسات في تربيزة أستاذ أحمد ف طوالي بديت أفتش على كراسي عشان أشيلو ، فجأه حسيت بزول جا داخل ، لمن إتلفت لقيتو أستاذ أحمد ، ما عاين لي ، قعد في مكانو و قال لي كراسك ما هنا لو جايه تشيليهو ، قلت ليهو لا لا ما جايه اشيلو 😅
معالم وشو و نبرتو كانت جاده شديد ! خت كراسي قدامي و فتح لي الصفحه و قال لي ممكن أفهم دا شنو ؟؟
إبتسمت إبتسامه هبله كدا و قلت ليهو دي شخابيط ساي ، قال لي شخابيط أسمها أواب ؟؟
سكته و ما قلت حاجه ، قال لي أنا ما عايز أعيد ليك كلام انك طالبه ممتازه و بتاع لأنك عارفه نفسك كويس و لو تابعتي البتعملي فيهو دا ح تضيعي ، ما قلتي ليك انك ما بتصاحبي أولاد و ما مديه زول فرصه ! طيب أواب دا جا من وين ؟؟
سكته ساي ، نهرني و قال لي لمن اتكلم معاك ردي ، خلعني شديد ، قلت ليهو دا ولد جيرانا ، قال لي اهااا دا الكان جا و وصلك من جنب المدرسه ؟؟
هزيت ليهو راسي ، قال لي و قدري ياكل عقلك و يخدعك و يوهمك !! ما رديت عليهو...
قال لي يعني انتي مصدقه الكلام البقولو ليك و الأوهام المعيشك فيها ! القالو ليك دا أكيد قالو ل مليون بت غيرك لو ما عارفه ف أعرفي مني انو البونسك ما بعرسك و الولد دا بلعب بيك ساي و بقضي بيك زمن ! ياخ معقوله عشانو تتوهي و تخلي قرايتك و تشغلي عقلك بيهو!! نسيتي أبوك ؟! نسيتي تعبو و شقاهو عشانكم ! لسه عايزا تعينيهو و تردي ليهو جميلو ولا اتنازلتي ؟؟
كلامو مساني شديد ، قلت ليهو ما نسيت حاجه أنا و مستواي كويس ما نقص و ما قاعده أهمل دروسي لأنو أواب ذاتو ما بسمح لي بالحاجه دي و هو دائما بشجعني و بدعمني ....لمن قلت ليهو كدا كنت منزله راسي لأني بقول الكلام دا قدام أستاذ و حقيقة لو كان أستاذ تاني غير أستاذ أحمد ما كنت ح اقول القلتو بس عشان تعامل أستاذ أحمد معاي مختلف شويه عن باقي الطالبات شبه خلاني اكون جريئه شويه في كلامي معاهو ، سكت مسافه بعدها قال لي أواب دا عاقد عليك ولا خاطبك ولا ناضم فيك ولا العلاقه بينكم شنو فهميني ؟؟
هنا ما قدرت أقول حاجه...
قال لي طبيعي تسكتي لأنو ولا واحد من ديل ، ف شنو البخليك تشغلي عقلك بيهو و ما تركزي مع الحصه بسببو و تملي الورقه كلها بإسمو و حرفو !!
قال لي مها صدقيني أنا ما عايزك تضيعي و بقول ليك كدا لأنو الأولاد ديل كلهم زي بعض و بأكد ليك إنو بلعب بيك ، عاينت للباب و قعدت في الكرسي و قلت ليهو يا أستاذ صراحة أواب دا ما زي باقي الأولاد و قعدت أحكي ليهو عنو ، كان بعاين لي بس بنفس النظرات ، لمن خلصت قلت ليهو أنا عارفه انو ما مفروض اقول ليك كلام زي دا بس عشان انت أكتر استاذ أنا متعوده عليهو و بتكلم معاهو و بحكي ليهو ، قال لي تمام معنى كلامك دا كلو إنو بحبك؟؟ مصدقه يعني ؟؟
زي ما قلت ليك يا مها دي كلها حركات أولاد ساي و بكرا لمن يقنع منك ح يشوف غيرك و انتي الح تضرري في الآخر ....إترددت شديد و بقيت أهز في رجلي في الآخر شربكت أصابعي و قلت ليهو أنا بحبو يا أستاذ أحمد ..
ما قال حاجه
بقيت ساكته و هو ساكت و بس كنت بعاين ليهو و هو خالص ما عاين لي ، كسر الصمت و قال لي شيلي كراسك و أمشي من هنا ، قلت ليهو انت ما ح تفهمني غلط صح ؟؟
قال لي بهمك ؟
قلت ليهو أنا حكيت ليك لأنك دائماً بتفهمني و بتوجهني ، قال لي و انتي رفضتي توجيهي و ما عندي حاجه تانيه عشان أقولها ، قلت ليهو أنا ما رفضت كلامك لكن أواب ما كدا والله ، قال لي تمام شيلي كراسك و أمشي ، قلت ليهو استاذ أحمد عليك ما تفهمني غل.....قاطعني و قال لي بنبره حاده قلت ليك أمشي من هنا ....شلت كراسي و أنا قلبي واجعني شديد و كنت بلوم في نفسي و بقول يا ريتني ما حكيت ليهو ، لو وصلت جنب الباب قال لي إنتي آخر طالبه ممكن اتوقع منها تصرف زي دا ، آخر
طالبه شنو أنا أساساً ما كنت متخيل انك ممكن تعملي كدا و تنجرفي ورا الفارغه زي باقي البنات ! الحاجات دي أبدا ما شبهك ، كنت مفتكرك بريئه و بحس انك طفله بس ماف طفله أو انسانه محترمه بتعمل كدا ، خيبتي ظني فيك شديد 💔
كلامو وقع على قلبي زي السكين ، حسيت نفسي أذنبت أو اني إنسانه سيئه شديد ، لمن إتلفت عليهو عيوني كانت مليانه دموع ، كان لسه بعاين لي بنفس النظره الحاده ، قلت ليهو أنا ما كدا يا.....قاطعني و قال لي إذا ما ح تسمعي كلامي ف الأحسن انك تمشي من هنا و أنا العندي قلتو ليك ، زعلت شديد لأنو أستاذ أحمد بقى يشوفني بطريقه ما كويسه و المشكله انو على غير عادتو ما ناوي يفهمني ، أول ما طلعت من المكتب كدا دموعي جات جاريه ، مشيت الفصل بكيت مسافه بعدها دخلت كراسي و شلت شنطتي و رجعت البيت و أنا متضايقه على الآخر ، جدعت شنطتي بس و رميت نفسي على السرير و غمضت عيوني لحد ما نمت.....

*لم أكن أتوقع أن أجلس يوماً لأكتبَ لكِ النهاية*
*لقد أردتكِ للعمر كله ولكنها الحياة لها ظروفها*
*قاتلتُ بشرفٍ لتكوني لي*
*ولكن الشرفاء أيضاً يخسرون معاركهم..!!*
*أترككِ الآن وأمضي كجيشٍ مهزوم*
*لم يعد لديه شيء يقاتل من أجله*
*وها أنا اليوم جئتُ لأفلت*
*لا تحسبي أني بهذا أربح المعركة*
*ماذا سأفعل بنصرٍ لستِ فيه ...*
*كل نصرٍ لستِ فيه هزيمة*
*مهما حاولتُ أن أقنع نفسي أنه ليس كذلك*
*بعضُ الانتصارات لها طعم الهزائم يا حلوة*
*هكذا هي معارك الحب !*
*نهـــــــــــــــــ❤ـــــاية~الجزء~الاول*
*☆يتبــــــــــــــــــــــــــــــــــــــع~قريبا~باذن الله~الجزء~الثاني☆☆*

____________________________

ملاحظه، نشرنا الجزء الثاني في حسابنا
{في مهب الريح الجزء الثاني}