في مهب الريح

11

*#في~مهب~الريح《11》*
*#الجزء~الاول♡*
*#بقلم~مها~حولي~الزاكي*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
بعد يومين من الكلام دا مشينا و إتنافسنا مع مدرسه تانيه و برضو فزنا عليها و بعدها بأيام اتنافسنا مع آخر مدرسه و ب كدا فزنا على مستوى محلية الأزهري ، الوقت داك بدت إمتحانات الفتره الأولى و خالتو خنساء كل يوم بتسأل ابوي ناوي يوديني الدكتور متين ، في آخر مره كذب عليها و قال ليها وديتها و برضو الفحوصات طلعت نضيفه ، قالت ليهو والله دي حاجه بتحير!!
المهم يوم جا لقاني خاته كتبي و بقرا ، قال لي القرايه الكتيره و عدم الراحه هم البصدعوا بيك عشان كدا حاولي تريحي نفسك شويه يا بتي عشان ما نتعب الناس ديل معانا و نحملهم مسؤوليتنا ، كفايه العملوهو لينا ، قلت ليهو حاضر يا أبوي ، هو طلع كدا رغد جاتني و قالت لي انتي أبوك وداك المستشفى متين ؟؟
قلت ليها شنو !؟ ما وداني ولا حاجه ! منو القال ليك كدا ؟؟
قالت لي هسي و أنا جايه من الدكان لقيت خالتو خنساء و هي القالت لي كدا و كانت عايزا تستفسر أكتر ، قلت ليها أبوي كذب عليها ساي عشان ما تسألو كل مره ، قالت لي أبوي ليه ما عايز يوديك الدكتور !!؟
قلت ليها براك عارفه وضعنا كيف ! و شغل أبوي رغم إنو أحسن من القبليهو بس برضو قروشو ما بتكفي ، قلت ليها كدي جيبي لي شنطة ياسر دا ، لمن جابت لي شنطتو فتشتها كراساتو ، في نص واحد من الكراسات لقيت ورقه و لمن فتحتها كانت بخصوص اجتماع مفروض يجوا فيهو أولياء الأمور للمدرسه بعد بكرا ، لمن ياسر جا قلت ليهو ليه ما اتكلمت ؟؟
قال لي الح يمشي منو يعني ؟؟
قلت ليهو أبوي ، رغد قالت لي مستحيل أبوي يرضى يمشي عشان كدا ما تتعبي نفسك ساي ، فعلاً خليت الموضوع و ما كلمت أبوي لأني عارفاهو ما حيمشي ، زمان كانت أمي مرات مرات بتمشي لكن هي كانت زيو ما بتحب تمشي لأنها كانت بتقول اننا ما بنشبه الناس و ما زيهم و انو أمهات الطلاب البجوا كلهن فاهمات و قاريات و متعلمات إلا هي عشان كدا كانت بتتحسس و ما بتمشي إلا للشديد القوي ، أما أبوي ف مشى مره وحده و أنا ذاتي مشيت معاهو لمن كنت في تالته اساس ، بتذكر إنو ختوا ليهو الكراس قدامو و قالوا ليهو اكتب لينا اسمك و اسمك بتك ، أنا لحد اللحظه ما ناسيه نظرة الإنكسار الكانت في عيونو لمن اضطر يقول قدامهم كلهم إنو ما متعلم و ما بيعرف يكتب ....أنا كل ما اتذكر اليوم داك قلبي بيوجعني 💔
في اليوم البعدو بعد ما جيت راجعه من الإمتحان لقيت أواب واقف جنب بابهم و بتكلم بالتلفون ، كنت ح أخش بس أشر لي عشان اقيف ، وقفت و انتظرتو لحد ما خلص مكالمتو ، قال لي مها كيفك تمام ، قلت ليهو تمام قال لي اها كلمتي ابوك بخصوص الإجتماع ؟؟
طبعاً استغربت !!
هو عرف من وين ؟؟
قال لي عشان لو قال ما ح يقدر يمشي ممكن أنا أمشي بدلو لو ما عندو مانع! قلت ليهو لكن انت....قبل ما أتم كلامي بابنا انفتح و رغد طلعت و قالت لي أخيراً جيتي تعالي شوفي ياسر بعمل في شنو ؟؟
قلت ليها بعمل في شنو و طوالي دخلت ، لقيت البيت جايط و المخدات مجدعات على الأرض و الكتب و الكراسات برضو مرميه على الأرض !!
قلت ليهو بنهره ياسر دا شنو العملتو دا مجنون انت ؟؟
براءه قالت لي عمل كدا عشان رغد شاكلتو لأنها لقتو بشرب سيجاره في الشارع !!
ختيت يدي على خشمي و قلت وااااي يا ياسر الكلام دا صح ؟؟
قال لي ما عارف و طوالي طلع من الهول ، بقيت ماشه وراهو و بتكلم معاهو لحد ما طلعنا الحوش ، ياسر كان ماشي على الباب ، رغد كانت لسه واقفه جنب الباب قلت ليها رغد اقفلي الباب ما تخليهو يطلع ، قبل ما هي تتلفت علي هو وصل و لزاها و طلع ، لمن لحقتو و طلعنا الشارع لقيت أواب ماسكو و ياسر بصارع فيهو ، رغد قالت ليهو عيب يا ياسر البتعمل فيهو دا ! أواب قال ليهو أهدى يا بطل ، كدي تعال معاي عايز اتكلم معاك ، ياسر قال ليهو فكني ياخ ، قال ليهو تمام بس بعد ما أتكلم معاك ، ركبو في عربيتو و قال لينا انتوا خشوا جوه ، بعد شويه بجيبو راجع ، دخلنا البيت و أنا شغاله ل رغد واي ما قادره أصدق! أبوي لو عرف ح يكتلو!
قالت لي الأحسن نكلم أبوي ، قلت ليها اي ما ح نكلمو لكن منو الح يوقف ياسر عند حدو ، قالت لي أواب ح يتكلم معاهو هسي لأني وريتو ، دخلت جوه و أنا ما قادره استوعب إنو ياسر كان بشرب سيجاره !!
المهم بعد مسافه أواب جا راجع مع ياسر ، دخلو البيت لكن هو ما دخل معاهو ، اشترى ليهو كوره و إسبورت و نحنا جاب لينا معاهو شيبس و شوكلاتات ، قلت ليهو حقو الزول يكلم ليك ابوي يا ياسر بس والله لو ما خليت السجاير دي ح اضطر أكلمو ، رغد قالت ليهو بتشربها من متين و منو الجابها ليك ؟؟
قال ليها دي أول مره و اصحابي في المدرسه كانوا بشربوها كل يوم ، شاكلناهو قدرتنا و خليناهو يحس بالذنب و إنو العملو ما شي هين و قال ما ح يعيدها تاني بس قال ما نكلم ليهو أبوي و على كدا سكتنا ...
المهم الإمتحانات عدت على خير و جيت الرابعه رغم اني كنت متوقعه أكون الأولى بس للأسف رهام كانت الأولى ، بعدها وشاح و بعدها ريما حتى أنا ، لين كانت ال13 زعلت زعل و قعدت تبكي لمن دخلنا الفصل ، المعلمات جوا حنسوها و قالوا ليها ما بطاله و ما مشكله قدامك إمتحانات كتيره ، شويه كدا جوا بنات و قالوا ليها المديره عايزاك فطوالي مشت ليها ، عرفتها نادتها عشان تحنسها ، أنا ذاتي كنت زعلانه و عايزا أطق ما معقوله بعد قرايتي دي كلها أكون الرابعه !!
بعد ما لين جات دخل علينا أستاذ أحمد ، قعد يشكر في رهام و قال ليها خليك محافظه على مستواك دا و حالياً كل المعلمين مبسوطين شديد منك....
حسيت بنار جواي ، على زعلي زعلت زياده ، لين قالت ليهو دي حاجه عاديه و دا ما معناهو إنو باقي الفصل مهمل أو ما بقدر يجي الأول ، قال ليها أنا ما قلت كدا بس برضو ما تنكري إنو في ناس مهمله في الفصل دا و لو الوحده بتقدر تجي الأولى ف شنو المانعها ؟؟
حسيت كلامو دا موجه لي أنا !
لين قالت ليهو ما معقوله كل الفصل يكون الأول مشترك ، قال ليها بس معقوله كل الفصل أو على الأقل نصو يكون جايب نسب كبيره ! انتي عارفه انو الفصل دا كلو فيهو بس 17 بت جايبين نسب كويسه و حدها 75 و باقي الفصل جايبين كم و خمسين ؟!!.... عموماً دا ما موضوعنا ، طلع كتابو و بدا لينا درس جديد و أنا لسه كنت زعلانه و عملت نفسي ما مركزه معاهو ، تكلت راسي على الدرج و غمضت عيوني ، بعد شويه قال الناس النايمه تصحى....أبيت أرفع راسي ، ريما لكزتني و قالت لي الأستاذ بتكلم معاك ، غمضت عيوني شديد و ما رديت عليها ، تاني ما سألني ، حصتو كلها كنت منزله فيها راسي ، بعد ما خلص قال حلوا التمرين و أجمعوا الكراسات ، ريما قالت لي يا مها مالك انتي ؟؟
قلت ليها ماف شي ، المهم في فسحة الصلاة جات بت و قالت لي أستاذ أحمد قال ليك تعالي ، لمن مشيت ليهو في المكتب لقيت معاهو أستاذين ، كان في قدامو كراسات بصحح فيها ، قال لي وين كراسك! ليه ما جمعتي ؟؟
قلت ليهو لأني ما كتبت !
قال لي و السبب ؟؟ مزاج برضو ؟؟
سكته ما رديت ، قال لي كدا انتي ح تضري نفسك ! يعني أنا ما فاهم الحاصل معاك شنو فجأه كدا بقيتي مهمله و ما بتركزي و كمان بتنومي في الحصه!!
قلت ليهو بكتبو في البيت و بجيبو ليك بكرا ، قال لي لا ما تجيبيهو لي خالص ، ما ح أصححو ليك عشان كدا ما تتعبي نفسك .... طبعاً زعلت زعل ، طلعت من المكتب و أنا ماسكه دموعي ، مع طلعتي دي لقيت لين في وشي شايله ليها كراسات ، عاينت لي بغيظ كدا و دخلت....
المهم بعد اليوم دا بقيت ما بتكلم مع أستاذ أحمد خالص و هو قاصد بقى يتجاهلني في الحصه رغم انو زمان كان دائماً بعاين لي عشان يشوفني مركزه معاهو ولا لا ، في الوقت داك كنا بنجهز نفسنا عشان نشارك في المسابقه النهائيه العلى مستوي ولاية الخرطوم ، المهم يوم المسابقه مشى معانا أستاذ أحمد و المديره و أستاذه تيسير ، لمن وصلنا مكان المسابقه أستاذ أحمد بقى يتكلم معانا و يشجعنا ، أنا عامله نفسي ما شغاله بيهو ، بعاين في كل الإتجاهات إلا إتجاهو ، رهام قالت ليهو أنا متأكده اننا ح نفوز ، قال ليها و أنا واثق فيكم....
المهم عملوا المسابقه و بالجد المنافسه كانت قويه بس مع ذلك فزنا و أخدنا الكأس مع ميداليه لكل وحده مننا ، المديره جات ضمتنا وحده وحده و قالت لينا ح نعمل رحلتين ، وحده للمدرسه كلها و وحده خاصه ليكم انتوا بس ، المهم تاني يوم طوالي المديره عملت احتفال في المدرسه و كرمونا قدام المدرسه كلها ، في نهاية الإحتفال البنات بقوا يغنوا و يرقصوا و حصلت فوضى ، حتى انهم كانوا بغنوا للمعلمين المن ضمنهم أستاذ أحمد و هو كان بضحك ساي و مبسوط منهم !
طبعاً شغالين يغنوا و يقولوا : الليله وين انا البالعصر مرورو 👏👏أحمد جافاني جافاني مشى وتاني ما جاني
الماقدر عشاني الما راعى احساني
تعال عود ليا تاني و الناس ما ريحاني
👏👏👏
طبعاً كان متكيف شديد و أنا الإحتفال دا بقى لي زي الحنظل ، لين قالت غيتو جنس خفه و بعد دا كلو هو ما شغال بيكم ، وحده قالت ليها و انتي زعلانه مالك التقول ناضم فيك أو عاقد عليك ، قالت ليها شفتي أحسن ليك تحترمي نفسك ، قالت ليها سووووري شكلي نسيت انك لين عصام 😏
أنا لمن زهجت خليت الإحتفال شغال و طلعت من الصيوان ، كنت ماشه الفصل ، لمن جيت ماره بجنب المكتب لقيت أستاذ أحمد واقف جنبو ، قلت هسي هو مش كان واقف هناك !!
مشيت عليهو و أنا قلبي شغال دق دق و حاسه نفسي ما قادره اجي ماره بجنبو ! أخدت نفس عميق و جيت ماره بجنبو من دون ما أعاين ليهو ، قال لي شكلك محارباني ، إتلفت عليهو و قلت ليهو انت معاي أنا ؟؟
قال لي في زول غيرك هنا يا مها !؟؟
قلت ليهو لا ، قال لي طيب ممكن أفهم طالبتي المميزه زعلانه مني في شنو ؟
طبعاً لمن قال لي كدا قلبي رفرف من الفرح و الشي دا كان واضح علي لأني ما قدرت اتحكم في نفسي فطوالي زي الهبله إبتسمت و قلت ليهو ماف شي ، قال لي انتي زعلتي من يوم قلت ليك ما تجيبي لي كراسك تاني صح ؟؟
قلت ليهو لا ، قال لي طيب !!؟
قلت ليهو ماف شي ، قال لي معاي حق لمن قلت ليك ما تجيبي لي كراسك تاني لأني لاحظت انك بقيتي مهمله و ما بتعملي البقولوا ليكم !
قلت ليهو طيب ما ح تتعاد تاني ، قال لي انا بتمنى انو مستواك ما يقل و زي ما قلت ليك ما تخلي مشاكلك و ظروفك تأثر عليك ، أول ما تدخلي المدرسه كل همومك و مشاكلك خليها جنب الباب ، قلت ليهو حاضر يا أستاذ ، قال لي و لو احتجتي مساعده أنا و باقي الأساتذه موجودين و صراحة أنا عايز أعرف انتي مالك و مصر على نقطة الفضفضه دي.....سكت مسافه بعدها قال لي لو ما لي أنا ف ممكن تحكي للمعلمات زي ما قلت ليك.....ابتسم و قال لي و أنا ما عندي مانع لو جيتي و حكيتي لي....هنا سكته و ما عرفت أقول ليهو شنو ! قال لي ما ضروري هسي بس متى ما حسيتي انك عايز تحكي ح تلقيني قدامك ، قلت ليهو طيب و أنا مبتسمه ، إتحركت كدا بس تاني إتلفت عليهو و قلت ليهو شكراً ليك يا أستاذ أحمد ، قال لي عفواً ....و ممكن تعتبريني زيك أبوك ...لا لا أنا كمان ما كبير للدرجه دي ،ممكن تعتبريني زي أخوك ، ضحكت على كلامو ، قال لي بس جوا الفصل أنا أستاذ و انتي طالبه ، قلت ليهو طيب ، المهم مشيت الفصل و أنا حاسه نفسي طايره في الجو ، قعدت براي و بديت اضحك زي المجنونه و قلبي كان برفرف من شدة السعاده حتى لمن رجعت البيت كنت بضحك ساي و عايشه في عالم تاني ، مع العصريه كدا مشينا بيت ناس خالتو خنساء أصلا اتعودنا عليهم و بيتهم بقى زي بيتنا ، لقيناها جايطه شديد مع أمجد ولدها عشان ما بقرا ، قالت ليهو دي آخر سنه لي أحسن تجتهد عشان تخش الجامعه ، أنا جنيه واحد ما بدفعو لجامعه خاصه ، رغد قالت ليها امجد دا عامل زي ياسر أخوي ، كل يوم بنحنسوا تحانيس عشان يقرا مع ذلك ما شغال بينا و 24 ساعه في الشارع ، غيتو الأولاد ديل ما بحبوا القرايه خالص ، قال ليها مع ذلك بننجح زي الما حصل حاجه ، ضحك و قالت ليهو دا المحيرني ! خالتو خنساء قالت لينا لو أواب قاعد كان قدر عليهو ، طبعاً أواب جامعتو فتحت و مشى الداخليه عشان مسافتو بعيده ، المهم خالتو خنساء بقت تونسنا و أمجد ذاتو كان قاعد معانا ، طبعاً كانت مقعده براءه في رجلينها ، بتحب براءه دي حب ما عادي ، قالت لينا لو كان عندي بت كانت حتكون حلوه زي برو دي ، طبعاً خالتو خنساء قبل كدا هي و أمها سألونا عن أمي و اليوم داك كانت معانا عمتي ف طوالي حكت ليهم انو أبوي مطلق أمي و هي حالياً معرسه راجل تاني و بقت تتكلم ليهم عن أمي و تقول عنها كلام ما كويس ...
أمجد قال لينا أنا عندي كوره رايكم شنو نلعب بيها في الحوش الخلفي ، خالتو خنساء قالت ليهو بري بتعوق لي بناتي يا أمجد ، رغد قالت ليها والله انا عايزا ألعب ، طولنا من اللعب ، قلت ليها أنا ذاتي 😅
قالت لينا خلاص أمشوا ألعبوا بس اعملوا حسابكم من أمجد لأنو لعبو شين و بشوت الكوره شديد ، المهم مشينا لعبنا مع أمجد و كنا مبسوطين و أصواتنا ماليه المكان ، لمن تعبت قلت ليهم أنا داخله جوه ، لمن دخلت لقيت خالتو خنساء بتحضر و بتقطع في البطاطس ، قالت لي تعبتي ولا أمجد خسركم ، قلت ليها تعبت ، مشيت شربت مويه و جيت قعدت معاها ، قلت ليها نعست ، قالت لي نومي جنبي هنا ، قلت ليها لا ما عايزا أنوم ، قالت لي الصداع الكان بجيك خفه ؟؟
قلت ليها بجيني مرات مرات ، دائماً بحس نفسي تعبانه ، قالت لي ربنا يديك العافيه ، المهم حلفت إلا نتغدا معاهم ، اتغدينا و مشينا البيت ، بعد ما أبوي جا راجع ، ما تم ربع ساعه كدا خالتو خنساء جات و قالت ليهو عايزا مها دقايق ، لبست عبايتي و مشيت معاها بيتها لقيت أمها يلي هي حبوبه سعاد قاعده ، طبعاً بقينا نقول ليها حبوبه سعاد ، كان معاها مره غريبه كدا ، كانت بتعاين لي ساي ، سلمت عليهم و قعدت ، حبوبه سعاد قالت ليها دي البت ، خالتو خنساء قالت ليها غيتو أنا ما كلمت أبوها ، حبوبه سعاد قالت ليها الراجل ما بقتنعوا بحاجات زي دي بالسهوله ، المهم نحنا عايزين نتأكد ....
طبعاً أنا خفت و بقيت أتلفت ، المره قعدت على الأرض و قالت لي تعالي اقعدي قصادي ، طبعاً خفت و بقيت أعاين لخالتو خنساء ، حبوبه سعاد قالت لي ما تخافي اقعدي يا بتي ، بتردد قعدت قصادها ، عملت ليها بخور و طلعت حاجات غريبه كدا من شنطتها و غمضت عيونها و بقت تقول في كلام ما مفهوم و انا جسمي كلو برجف من الخوف....
بعد مسافه فتحت عيونها و قالت لي الكديس الأسود....
خالتو خنساء قالت ليها مالو ؟
أشرت عليها عشان تسكت ، كلنا سكتنا ، غمضت عيونها تاني و فتحتهم و قالت لي الكديس دا كان جن ، البحصل معاك دا كلو لأنو جا ناطي بفوقك بس ، يعني لو كان هبشك ساي كان جنيتي ، حبوبه سعاد قالت لا حول ولا قوة إلا بالله ، و نحنا قاعدين كدا فجأه عمو سليمان جا داخل ، عاين للمره و للبخور و للحاجات البتعمل فيها دي !!
قال لخالتو خنساء المره دي بتعمل في شنو ؟؟
خالتو خنساء قالت ليهو بعدين بفهمك يا سليمان هسي.....قاطعها و قال للمره لو سمحتي قومي و أمشي من هنا ، حبوبه سعاد قالت ليهو سليمان يا ولدي....قال ليها معليش يا عمتي بس انا مية مره نبهتكم و قلت ليكم ما تجيبوا لي ناس زي ديل في البيت ، لمي حاجاتك و أمشي من هنا ، المره براحه شالت حاجاتها و طلعت ، حبوبه سعاد كان شايله قروش قالت ليهو خلاص ماشه أديها قروشها و فعلاً مشت لحقت المره و أدتها قروشها و في الأثناء دي خالتو خنساء حكت لعمو سليمان الحصل ، قالت ليهو هسي ما خليتها تدينا علاج ، قال ليها علاجها رقيه شرعيه و أنا البعملها ليها ، فعلاً عمو سليمان بقى يرقي لي بعد ما مشى جاب أبوي و كلمو بالحصل كلو ، إستمرينا كدا و مرات أبوي هو البرقي لي و بقينا مشغلين سورة البقره على طول ، في خلال أسبوع الصداع خفه شويه و بقيت أحسن من زمان ، من ناحيه تانيه علاقتي بأستاذ أحمد بقت قويه شديد سواء في الفصل أو خارج الفصل و كل الناس لاحظت الحاجه دي ، يوم كنت معاهو في المكتب بسألو عن مسأله و رغم اني شايفاهو مشغول شديد حلفت ما أخليهو و هو ما قادر يقول لي أنا مشغول أمشي من هنا عشان ما أقوم أزعل تاني 😂
كان بصحح في ورق الإختبار الأدانا ليهو و أنا هنا بزن ليهو في راسو كان معانا أستاذ الحاسوب بس كان نايم و بشخر ساي ، في الآخر قال لي رايك شنو تساعديني و تصححي معاي ، قلت ليهو طوالي ، فتح درجو و اداني قلم أحمر في بقيت بصحح معاهو و بكتب الدرجات لحد ما لاقتني ورقة لين ، هنا وقفت تصحيح و بقيت أعاين في ورقتها ، هو انتبه لي لأني كنت بتكلم عن كل ورقه ببدا أصححها ، عاين في الورقه لقى اسم لين ، قال لي ورقة عدوتك بين يديك ، ح تعملي فيها شنو ؟؟
قلت ليهو ح أصححها عادي و هي ما عدوتي ، قال لي من أول يوم جيتوا فيهو المدرسه و انتوا بتتشاكلوا و لحد الآن في حساسيه بيناتكم ، قلت ليهو أنا ما عندي معاها مشكله هي الما بتطيقني رغم اني والله ما حصل مره عملت ليها حاجه أو غلطت عليها ، قال لي انتي مسكينه و واضح انك ما بتغلطي على زول ، قلت ليهو مع ذلك الناس ما مريحاني و أي زول بحسو عايز يعاديني و خالص ، نص الفصل بحسهم ما بطيقوني زيها رغم اني ما عملت ليهم حاجه ....لمن قلت ليهو كدا عيوني دموعو ، عاين لي مسافه و قال لي أنا ذاتي ملاحظ الحاجه دي ، يعني حتى لمن تقيفي تجاوبي في ناس بشوفهم صارين وشهم ، عارف انو الموضوع دا مضايقك و زاعجك بس ما تشتغلي بيهم و خليك عارفه انو كره الناس ليك دا ما معناهو إنو فيك عيب أو أنك انسانه ما مقبوله ، في ناس كدا عادي بتكرهك بسبب طيبتك أو لأنك شاطر أو لأنك مركز مع نفسك و ما شغال بزول و انتي كل الصفات دي فيك و دا الواجعهم ، ديل ناس قلوبهم مريضه و مليانه حقد و نجاحك و تفوقك بيوجعهم لأنهم فاشلين و ما قادرين يصلوا ل الوصلتي ليهم ، خليك واثقه من نفسك و ما تخلي كلامهم أو أفعالهم تهز ثقتك ، الفصل دا كلو في كوم و انتي في كوم تاني و مهما حاولوا يكونوا بنفس براءتك و طيبتك و صدقك و أمانتك و إحترامك للمعلمين ح يفشلوا ، قلت ليهو بس أنا نهاي ما حصل غلطت عليهم حتى لمن يطاعنوني بكلامها ، قال لي عارف لأني شايف ، قلت ليهو أنا الفيني مكفيني ما ناقصه عداوه من زول لأني ما بقدر أكرهم زي ما هم بكرهوني ، قال لي دي صفة الناس النقيه ، ما بتقدر تعادي زول أو تكرهوا و دائماً بتعدي كل شي بالتجاوز بس في حاجات ما ينفع انك تتجاوزيها ، ما بنفع انك تسكتي و تعديها ، زي ما هم عندهم ألسنه انتي كمان عندك لسان ، و زي ما هم عندهم يدين انتي كمان عندك ، لازم توريهم انو السكوت ما معناهو خوف أو جبن ، ما معناهو انك ما قادره تاخدي حقك ، الصبر ذاتو عندو حد ، قلت ليهو لكن دي الحقيقه ، أنا ما بقدر آخد حقي من زول ، قلبي بيوجعني والله بمجرد ما افكر أمد يدي على زول و لو مديتها عليهو إحساس الذنب ما بخليني ، بقول هسي لو ضربتو و حصلت ليهو حاجه بسببي ، ما بقدر أسامح نفسي والله ، حتى في الكلام ما بعرف اقول كلمه جارحه لزول ، ضميري بأنبني و بقول في نفسي هسي يمكن بسبب كلمه قاسيه مني يحصل ليهو أو يمكن يبكي بسببي ، قال لي الشي دا واضح عليك بس صدقيني لو استمريتي كدا ح تتأذي كتير لأنو الحياة دي ما حتكون في المدرسه دي ، لأنو ح يجي يوم و تمشي من المدرسه دي و تضطري تواجهي ناس اسوأ من ديل و مواقف حتكون محتاجه منك وقفه جاده ، قلت ليهو ما عارفه بس الحاجه دي صعبه علي ، قال لي في ناس أسهل حاجه أنهم يصرخوا و ياخدوا حقهم ، زي لين مثلاً ، قلت ليهو لين أبوها بقيف معاها و ما شاء الله كل المعلمين بحبوها و مستعدين يدافعوا عنها و يطلعوها صح ، قال لي بمعنى انو أبوك أو أمك ما بقيفوا معاك  !!
سكته ما رديت عليهو
قال لي عموماً ما كل المعلمين ، صح لين عندها أبوها و هو زول معروف و ليهو يد في تأسيس المدرسه دي بس انتي كمان عندك حاجه قيمه أهم من العند لين و هي ذكائك و دا سلاحك البميزك عنها و دا الخلى نفس المعلمين البدافعوا عن لين يحترموك و يمدحوك ، انتي ما عارفه بس صدقيني في المكتب دا اسمك اتذكر مرات كتيره و كل المعلمين متكيفين منك  ، قلت ليهو ما براي كمان في وشاح و ريما و رهااااام 😏
طبعاً اسم رهام دا جريتو طويل عشان اتذكرت انو مدحها قبل كدا و في الحصه بهظر معاها ، قال لي فعلاً ديل كلهم كويسين ، قلت ليهو آي 😊
قال لي آي طيب مالك !؟
قلت ليهو ولا شي ، هاك ورقة لين صححها ليها انت ، المهم صححت ليهو كم ورقه بعدها قال لي مفروض تمشي بعد دا عشان الحصه ما تفوتك ، قلت ليهو أنا بكره الحصه الآخيره و أصلا هي هندسيه و أنا ما بحبها ، قال لي و لمن اقول عنك بقيتي مهمله و بتتهربي من الحصص بتزعلي ، قلت ليهو طيييب ، المهم مشيت الفصل لقيت الحصه بدت ، ضربت الباب و دخلت ، ريما قالت لي كنتي وين ، قلت ليها كنت بصحح مع أستاذ أحمد في الورق ، قالت لي بالجد !!؟
شروق و البتين المعاها سمعوني و قالوا لي ما شفتي درجاتنا ! عليك الله جبنا كم ، الأستاذه كانت متلفته على السبوره ، لمن سمعت صوت نقه اتلفتت و قالت البتكلموا ديل منو ؟؟
لين قالت ليها ديل ناس الكنبه دي كلهم و بسببهم ما قادرين نسمع كويس ، قالت لينا لو اتكلمتوا تاني كلكم ح تطلعوا برا
المهم في اليوم البعدو كان عندنا حصه مع أستاذ أحمد ، أول ما جا داخل عاين لي و أنا الغبيه طوالي قعدت اضحك من دون ما انتبه للناس القاعدين جنبي عشان كدا هو ضحك علي ! وحده قالت ليهو درجاتنا سمحه للدرجه دي ، قال ليها هسي ح تعرفي و طوالي طلع الورق ، اول وحده أنا كان عندي غلطتين بعديني ريما و رهام و وشاح كانوا جايبين نفس الدرجه ، بعد ما وزع الورق أدانا حصتو و قال لينا دي آخر حصه لأننا خلاص انتهينا تاني ح نبدا مراجعات بس ، بعد ما طلع لين جات ضربت لي الكنبه ، قالت لي بنبره حاده دي شنو زفت الدرجه الكاتباها لي دي !!؟
قلت ليها دي ما أنا ، قالت لي عايني ما تقعدي تكذبي لي ، الفصل دا كلو عارفك لاصقه كيف في استاذ أحمد و عارفين انك صححتي معاهو الورق ، قلت ليها لكن ما أنا الصححت ورقتك لو عندك كلام أمشي قوليهو لأستاذ أحمد ، قالت لي تمام أنا بعرف اتصرف....
شالت ورقتها و طلعت بيها و شيماء و إيلاف شغالين يقولوا الليله كتمت و هم بضحكوا ساي....