နတ်ဘုရားကမ္ဘာက ဟန်ဆန်း ( အတွဲ ၁) ( Ch 1 - 960)(ခွင့်ပြုချက်ရပြီး)

841 - 845

Super God Gene (841)
နတ်ဘုရားကမ္ဘာက ဟန်ဆန်း
ဆောင်းသစ်(သံတွဲ) ဘာသာပြန်သည်။
-------- --------- -------- ------- --------
အခန်း (၈၄၁)
-------- --------- -------- ------- --------
ဒေါင်းလင်ဟာ နည်းဗျူ ဟာကို ကောင်းကောင်း တွက်ချက်ပြီး ဖြစ်တယ်။ သူတို့ရဲ့ ထွတ်မြတ်သွေးအိမ်မွေးသားရဲဝိညာဉ် သင်းခွေချပ်ဟာ အလွန် သန်မာတယ်။ သူ့ရဲ့ တခုတည်းသော အမှားက မှားယွင်းတဲ့ ပြိုင်ဘက်ကို ရွေးချယ်ခဲ့မိတာပဲ ဖြစ်တယ်။

ဒေါင်းလင်ကုမ္ပဏီဟာ စီးပွားရေးကိစ္စတွေကို ဟန်ဆန်း နဲ့ တရားဝင်ဆွေးနွေးခဲ့ရင် ဟန်ဆန်းက သူတို့ကို ဆန့်ကျင်မှာ မဟုတ်ဘဲ ဆေးကြော်ငြာတာမှာတောင် အကူအညီ ပေးအုံးမယ်။ အပြန်အလှန်အားဖြင့် ဟန်ဆန်းရဲ့ အိတ်ကပ်ထဲကိုလဲ ငွေတွေစီးဝင်လာမှာ ဖြစ်တဲ့အတွက် နှစ်ဦးနှစ်ဖက်လဲ အကျိုးရှိလိမ့်မယ်။

ဒါပေမဲ့ ဒေါင်းလင်က ညစ်ပတ်ပြီး ဟန်ဆန်းကို ထိန်းချုပ်ခြယ်လှယ်ဖို့ ကြိုးစားခဲ့တယ်။ ဒါကြောင့် ဟန်ဆန်းကလဲ ပြန်ညစ်ပတ်ဖို့ ပြင်ဆင်ခဲ့တော့တယ်။
-------- --------- -------- ------- --------
ဟန်ဆန်းဟာ စောင့်ကြည့်ခန်းထဲမှာ အေးအေးဆေးဆေး ထိုင်နေတယ်။ သူဟာ တော်ဝင်နတ်မိမယ်ကို ဆင့်ခေါ်ထားတယ်။ ဒါပေမဲ့ စင်ပေါ်ကို ချက်ချင်း မပို့သေးဘဲ အခြားသားရဲဝိညာဉ်တခုကို ထပ်မံဆင့်ခေါ်လိုက်တယ်။

အစိမ်းရောင်အရိပ်တရိပ်ဟာ  ဟန်ဆန်းရှေ့မှာ ဘွားခနဲ ပေါ်လာတယ်။ တစ္ဆေဆန်တဲ့ သားရဲဝိညာဉ်ပါပဲ။ အဲ့ဒီတစ္ဆေဆန်တဲ့ သားရဲဝိညာဉ်ဟာ တော်ဝင်နတ်မိမယ်ရဲ့ ခန္ဓာကိုယ်ထဲဝင်သွားပြီး တော်ဝင်နတ်မိမယ်နဲ့ ပေါင်းစပ်သွားတယ်။

သားရဲဝိညာဉ်ဝင်ရောက်သွားပြီးနောက် တော်ဝင်နတ်မိမယ်ရဲ့ ခန္ဓာကိုယ်ဟာ အများကြီး ပြောင်းမသွားပါဘူး။ ဒါပေမဲ့ တော်ဝင်နတ်မိမယ်ရဲ့ မျက်လုံးတွေကတော့ အစိမ်းရောင်မီးတောက်ငယ်တခုစီနဲ့ မသိမသာ လင်းတောက်နေတယ်။

ဟန်ဆန်းဟာ အဲ့ဒီသားရဲဝိညာဉ်ကို စတီးချပ်ဝတ်သားရဲဆီကနေ ရရှိခဲ့တယ်။ အမျိုးအစားက အိမ်မွေးသားရဲဝိညာဉ်သုံး ချပ်ဝတ်တန်ဆာဖြစ်တယ်။ (ဤသားရဲဝိညာဉ်ကို အခန်း ၈၁၈ တွင် ရရှိခဲ့သည်။)