خالتي غاده قعدت معاي مسافه تاني قلت لي امشي بعد كدا وفكري في كلامي كويس ،،، لو المركب كدا كدا حيغرق ما تخليهو يابتي يغرق بالخراب ،،، هزيت ليها راسي وطلعت ،،، قفلت الباب وراها،، المشكله كلامها ده جاء في وقت غلط ،، شويه سمعت صوت الباب ،،،فتحت الباب كان اشوف مروان قدامي، ،، عاينت ليهو بزعل ودخلت ،، قفل الباب جاء وراي ،،قال لي عارفك ما دايره تسمعي لي وعارف اني ظلمتك معاي ،، لكن انتي وقت ما دايره الطلاق انا ما عندي مشكله ،، بس اتاكدي اني ما كنت عايز اصل معاك للمرحله دي اي نعم ما بحبك بس والله اتخلق جواي ليك احترام ،، عمري ما بلقي زيك ،،، بس معليش الحب ما بيدنا يمكن لو شوفتك قبل بثينه احبك او علي الاكيد ح احبك لكن انتي جيتي لقيتي قلبي مع واحده تانيه ،،، في الاول اتصدمت مع اني الكنتا طالبه الطلاق بس انا ما دايره الطلاق ،،، حسيت حلقي نشف و ما قادره اتكلم ،،،قال لي حددي اليوم وانا معاك فيهو ،،، وافقت بتي علي ،، حاولت ابين اني قويه قلت ليهو حلو طيببب بالمرة اقدر زاتي اشوف حب حياتي و منو العارف القي زول يحبني ،، ونعرس عن حب زيكم ،،، لمن قلت كدا قلتها احساس اني ما ح اقيف عليك ،،لكن هو اقرب مزهريه رماها في الارض ،،اتخلعت لمن نطيت،،قال لي ايوااا قولي كدااا ،،مفتكره اني مثلا ح اخليك تعرسي غيرري!!! وانا اقول لي عايزه تطلق ،،، اتاريها الهانم بتفكر تحب وتتتحب لاا و الكبيره تعرس ،،،، هههه لو مفتكره اني كدا ح اخليك تبقي بتحلمي ،،، وافهميها زي ما عايزه تفهميها طلاق ما بطلاق ،،، اي قولي ما راجل و اتراجعت عن كلامي ،،، و اناني كمان ،،، ما رديت علي كلامو ،،، طلع ،،،في قلبي قلت بركه الجات منك ،،بس بالجد فيها شنو لو حبيت وعرفت زول تاني غيرو ما هو ما بيحبني ،،معناها شنو ؟ بِحِبنا الاتنين؟ لااااا ،،، اكيد في حاجه غلط ....
مرت حياتنا عادي ،،، وعمتي تاني ما سالتي ولا انا سألتها، ،،مروان مرات بجي يقعد معانا ومرات كتيرره لاااا ،،،، في يوم من الصباح بسمه محمومه ،، اديتها بندول و لسه الحُمه م نزلت طوالي سريع سريع، ، وانا اقرب عبايه وطلعت وانا مقلقه عليها لاقاني زول طالع من بيت بثينه ،،، لاحظ لي مقلقه، ،، قال لي بسم الله مالك ،،؟ عاينت ليهو ما رديت ،،، جريت علي الزلط اشوف لي اي ركشه،، جاء نفس الزول قال لي يا زوله بسم الله مالك ؟ ،، اركبي اركبي بتك شكلها تعبانه،، وقفت مسافه تاني ركبت خفت يحصل ليها حاجه،،،،وصلنا،، جريت بيها جري الحوادث ،،، اثناء الكشف جاء الولد داك قال لي مالا؟ ان شاء الله خير قلت ليهو لسه !،، وقفنا مسافه الدكتوره قالت لي ما تخافي التهاب ،،، هسي الحمه بتنزل ،،، بكتب ليها علاجات التزمي بيها، ،، قلت ليها طيببب ،، وانا اعصابي انهارت خلاص ،،،الولد الوصلني قال لي عافيه ان شاء الله، ،قلت ليهو ان شاء الله، ،، وقفنا تاني مسافه ،،، لحدي ما خلصنا وجيت راجعه قال لي اوصلك، ،،قلت ليهو لحدي هنا ما قصرت معانا وشكرا ليك ،،،قال لي عادي عادي في طريقي انتي ،،قلت ليهو اتوكل انت انا لو ما بتي زاتي ما كنت ركبت معاك ،، وقف يعاين لي ،،، اذكرت اني ما شايله قروش من الجري ،،، تاني قلت ما مشكله توصلني اي بتاع ركشه بحاسبو لمن اصل ،،، جاني الولد تاني بالعربيه اركبي ،،، عاينت يمين شمال، ،تاني ركبت ورا ،،، ما اتكلم معاي لحدي ما وصلنا، ،، قلت ليهو شكرا قال لي العفو ده اقل واجب ،، دخلت البييت وقفلت الباب ضحكت باستهتار يعني انا و بتي لو موتنا مافي زول بجيب خبرنا، ،، الغريب شفق علي حالنا ،، الحمد الله بسس،،، مروان يومين ما جاء بسمه بقت كويسه و هو ما عارف انها اصلا كانت عيانه ،،،بس جاني يوم و هو بينادي بصوت عالي ،،طلعت من الغرفه ،،،قال لي انتي قبل كم يوم طلعتي ،، قلت ليهو يادوب تفتكرني! قال لي سالتك جاوبي طلعتي ،،،قلت ليهو اي طلعت ،،،قال لي وصلك ود عم بثينه ،،، قالت ليهو هو ود عمها بالله ! اس وصلني، ،،قال لي اولا ما كلمتيني ثانيا ركبتي مع زول غريييب ،،عشان خليتك كم يوم بقيتي تلفي براك، ،، ،، المرة دي بالذات ما بررت ليهو، ،قلت ليهو اي انا كعبه و بلف و بحوم علي كيفي عندك معاي مشكله، ،،، مع كلامي ده حسيت بكف نزل علي خدي ،،،،، معقوله مروان كفتني ،،مسافه وقفت استوعبت ،، ،جاء علي بالهفه ومسكني من خدي قال لي ما عارف والله ما عارف كفتك كيف ،، زحيت يدينو عني بقوة قلت ليهو اطلع برا قال لي فاطمه قلت ليهو أطلع بسسس ،،، والله يا مروان ما تطلع بطلع انا وبتي ونخلي ليك البييت ده ،،قال لي تمام انتي اهدي وبعدين نتفاهم، ،، وطلع ،،، وقفت في مكاني وانا بحاول استوعب ،،، لااا بالجد ،،، الكف ده زكرني ب ابوي ،،لو ابوي بالجد كان ابوي ما كان قدر يكفتني،،،لو كان وراي رجال ما كان قدر الليله يرفع يدو علي ولا انا كان خليتو يرفعها ...
