قبل ما أتحرك من بعيد شوفتا أيهاب جاي علينا وملامح وشو ما بتبشر بالخير خالص ،، مها أول ما لاحظت ليهو جاي طوالي سكتت ،،، أيهاب لمن وصلنا أتجاوزني ومشى وقف قدام وليد ،،، وقال ليهو بعصبية ونبرة حادة: في شنو يا حبينا؟ مشكلتك شنو أنت يعني؟ ما بتفهم العربي الواضح؟ مش المرة الفاتت حذرتك وأنذرتك وقلت ليك تاني ما أشوفك معاها! وقلت ليك ما أشوف خيالك ساي حايم حولينها؟ جاي هسي وبكل جراءة واقف معاها وكأنك بتتحداني مثلاً؟ ،،، مؤيد قال ليهو يا دكتور دقيقة أنت فاهم غلط هي الوقفت معانا برااها .. أيهاب عاين ليهو بي أستهزاء وقال ليهو هئه داير تكذب في مرتي عينك عينك كدا؟ ،، طيب حتى ولو هي وقفت معاكم من تلقاء نفسها مع أنها حاجه مستحيلة ، أنتو ديل وقفتو معاها ليه؟مش مفروض تتجاوزوها؟ ،،، وأنت ،،، أشر علي وليد بي أصبعو ،، وقال ليهو طالما أنا محذرك قبل كدا تاني أستحمل البيجيك ولا عذر لمن أنذر ،، في اللحظه دي سارة جات ماشة علينا ،،، أيهاب على طول مسكني من يدي وساقني على أتجاهها ولمن جينا جنبها ،، قال ليها وإنتي ما كل ما تحصل حاجه تجي تنقلي لي الكلام ، يعني متوقعة كدا بتخربي علاقتي بي نون؟؟ متوقعة بكلامك البتقولي لي ح أكرهها؟ وحاتك غلطانة ما عاش البخرب علاقتي بيها وتصدقي وتامني بالله! أنا لو كان شوفتها بعيوني بكذب عيوني وبصدق نون ،،، وقبل ما هي تتكلم وترد ليهو أتحركنا علي جهة المكتب وهو لسه ماسك يدي وكان ماسكها بقوة ،، أول ما وصلنا ودخلنا ،، قفل الباب وقال لي بصوت عالي، سبب واحد بيخليك تقيفي معاهم يا هانم مافي!! وبعدين ما بمعنى إني سكتا وما شاكلتك قدامهم يعني أنا راضي على المهزله الحصلت دي وراضي وقفتك معاهو ، أبدا يا نوون ، بس ما شاكلتك قدامهم لانو ما بقبل تنحرجي أو أقلل من قيمتك قدام زول ومشاكلنا أحسن تكون خاصه بينا نحنا الاتنين ،،، ،مع كلامو دا أنا بكيت زيادة ،،، أخد نفس عميق وقال لي اللهم طولك يا روح هسي إنتي بتبكي ليه؟؟ ،،، قلت ليهو لانو.... وحكيت ليهو الحصل كلو ،، قال لي وكمان مسك يديك؟ لااااا الموضوع زاد عن حدو شديد ! ، وكدي دقيقة يعني إنتي جاية هسي عايزه تفهميني إنك حاسه بالذنب أتجاهو؟ جادة يا نووون!! ،، قلت ليهو أيهاب،،، قاطعني وقال لي لااا خلاص فهمتك يا نون أرح نطلع ،،قلت ليهو أيهاب أسمعني ،،، قال لي بصوت عالي: نوووون!!! أرح بدون كلام كتتير ،،، ومسك يدي تاني بنفسي القوة القبيل وطلعنا .. المرة دي شوفتا مها ومؤيد مع بعض، ، ما قدرت أأشر لي مها إني طالعه ،، لاني حسيت لو أشرتا ليها أيهاب ح يفهمني غلط ،، ركبنا العربيه ،، وهو ساااكت وأنا ساكته ، ،، لحدي ما وصلنا نحنا على الحالة دي .. الحاجه الاكتشفتها في أيهاب أنو لمن يزعل زعلو كعب ،، فتح الباب ودخلنا ،، رما مفاتيح العربيه في أقرب طربيزة لقاها قدامو ودخل الغرفه ،،، وقفت في الصاله وأنا محتارة ومترددة ما عارفه أعمل شنو ولا الغلطان منو ،،، في وقفتي ديك تلفوني أتصل كانت دي مها .. رديت عليها وقلت ليها ايوا يا مها ،، قالت لي شايفاك طلعتي! .. قلت ليها أي ما قدرت أناديك لانك واقفة مع مؤيد ،، قالت لي ها أسكتي سااي مؤيد طلع ما عارف أي حاجه أتخيلي؟ ومفتكر إنك خليتي وليد عشان القروش أو عشان هو ما جاهز ،، قلت ليها وليد حسسني بالذنب يا مها ،، قالت لي يا بت ولا تشتغلي بيهو إنتي ما غلطتي في حقو هو براهو عملها في نفسو كفايه أنو سمع سارة ومشى ورا كلامها ،، وصحي بي سيرة سارة طبعا بعد ما أنتو طلعتو أتشاكلتا معاها شكله لي رب السماء ووالله ما فضل لي إلا أديها كفين ،، قلت ليها يا مها أنا ما عارفه سارة دي مشكلتها معاي شنو! دة غير أيهاب الزعلان مني .. قالت لي ليهو حق يابتي أتخيلي أيهاب ده كان مرتبط زمان وإنتي جيتي شوفتيهو بيتكلم مع حبيبتو القديمة بعد ما عرسك ح تكوني راضيه؟؟ ،قلت ليها أكيد لاااااا ،، قالت لي طيبب أها مالك؟ ،، دا غير إنك زوديتيها يا نون ولمن أتصل عليك ما رديتي ... طبعا ياداب أتذكرتا موضوع الاتصالات دا ،، قالت لي خلاص أنا هسي طالعه على البيت لبعدين ،،، قلت ليها طيب .. قفلت منها وشلت نفس طويل بعدها دخلت الغرفه ،،، أيهاب يادوب كان طالع من الحمام ولا عاين لي زااتو ،، جيت وقفت قدامو أتجاوزني ولااا كمان طلع من الغرفه عديل ،،، قدر ما حاولتا أتكلم معاهو أبى يديني فرصة .. وأستمرينا باقي اليوم كلو كدا ،،، بالمساء حسيت الموضوع كبر شددييد ومفروض ما يكبر لي الدرجة دي ،،، وأثناء ما هو قاعد في السرير ومتكل على ظهرو وشغال بي تلفونو .. قلت ليهو أيهاب ما عايز تاكل؟ ،، ما رد علي .. جيت قعدتا جنبو ولفتو وشو علي ،،، عاين لي بنظرة كدا ما قدرت أفسرها .. قلت ليهو أيهاب أنا عارفه أنو ليك حق تزعل بس كمان والله العظيم أنا بحبك أنت وما عايزه غيرك ووالله يا أيهاب أنا لمن وافقتا على وليد وافقتا ضعف شخصية مني وما كنت عايزاهو بس هو ضغط علي شديد ولا أقتنعتا بيهو شفقة مني علي الولد وافقت ولمن جيت أنت وقتها أنا يا دوب حبيييت بالجد وعرفتا يعني شنو إنك تحب ويعني شنو حب ،، حبيتك لدرجة بعيدة ولسه بحبك بنفس المقدار ويمكن أكتر كمان ،، ايي عارفة نفسي غلطتا لمن ما رديت عليك بس يا أيهاب البت الكانت بتتكلم معاك في المحاضرة غاظتني شديد و ما عرفت أتصرف كيف ف أتحمقت ،، كنت بتكلم وببكي في نفسي الوقت ،، مسكني من خصري وضمني عليهو شددديد .. وبعد مسافه قال لي حبيببتي خلاص أهدي أهدي والله ما زعلان منك ولا بقدر أزعل حتى ، لكن كنت عايز أوريك إنك غلطتي لمن وقفتي مع وليد ، بس يلا صدقيني كل الأمور دي بحلها حتى صحبتك بوقفها عند حدها ،، رفعت رأسي عاينت ليهو بي أستغراب .. قال لي إنتي حاليا ركزي مع أمتحاناتك وخلي الباقي علي ، وبالنسبه لي أعترافك ده ف ممكن أقول عليهو أنو أكبر الانتصارت اللقيتها في حياتي .. عاينت ليهو بخجل ونزلت رأسي لي تحت .. خت يدو على حكني ورفع لي رأسي وقال لي خجلتي؟ .. ما رديت عليهو وأبتسمتا بس .. وتاني ما لقيتو إلا وهو بقرب على وشي شوية شوية وبعدها عينكم ما تشوف إلا النور❤.......
