موبيلها رن وكانت رساله منه :
- فينك كده انتي كويسه؟!
سكت لحظة وكتبت :
= بص
- معاكي ..
سكتت للحظه وابتدت تكتب :
= انا مش كويسه خالص ومش عارفه اوصف حالى ولا عارفه اقول ايه، عندي كذا سبب للزعل، ومعنديش سبب يخليني طايره م الفرحه، مش فاهماني ، انا محدش حاسس بيا ولا فاهمنى مجرد ما بقول انا مش مرتاحه محدش بيفهم لأن دا حاجه مش معترف بيها ، نفسي يفهموا انى واحدة كل حاجه عندها مرتبطه ب إحساسي بالراحه، كل يوم بنام مستنيه فرحة رغم أنها مجتش لكن عمري ما بطلت استني، قالولي دوري ع المشكلة ايه ؟ المشكلة قلبي ، قلبي ساعات بيحطني ف مواقف بايخه جدا، وبرجع اقول ايه اللي خلاني اعمل ف نفسي كده، انا ضعيفه جدا قدامك وقدام الناس اللي بحبهم وقدام مشاعري وعمري ما عرفت ارميكم ورا ضهري ، قريبة جدا من اصحابى وبحس بيهم وبفهمهم بس ملقتش اللى يفهمنى فيهم،ببساطة بينسوا سنين وأيام من حياتي وعايشين، نفسي اعمل زيهم وامشي، عارف ..بستغرب جدا م الناس اللي بتعرف تنسي، ومن الناس اللي بتعرف تمسح الصور والارقام من دماغهم قبل موبايلاتهم بيبقي نفسي اسألهم عملتوا كده ازاي، ازاي بتعرفوا تبدأو من جديد، ازاي بتعرفوا تضحكوا عشان تدارو، وازاي بتعرفوا تدارو عشان تعيشوا، وازاي بتعرفوا تعيشوا بعد ما تخسروا كل حاجه .. انا تعبانه جدًا رغم مش باين او قاصدة مبينش، حاسه اني بواجه كل حاجه لوحدي، وقبضه القلب اللي ف اول كل يوم، والتفكير اللي بالساعات قبل النوم،دايما حاسه انى فى المكان الغلط فى الزمن الغلط، بواجه كل ده لوحدي ومش عارفه اسند علي حد ولا عندي طاقه اتكلم إحساس الوحده زاد اوى ومبقتش قادرة بجد ...
( بدل ما تضغط ع إرسال مسحت كل الكلام اللى كتبته )
- سكتي ليه ..
- مفيش ..
- طيب انتي كويسه؟!
= اه الحمدلله وأنت عامل ايه ..؟
مشاهد بقلمي #يارا_سمير
رايكم ❤
