- الشاي مش عاجبك ؟!
- ها .. لا انا ملمستوش لسه
- تحبي حاجة تانيه ؟
- لا انا عاوزة شاي
- بس لما بيبرد بيبقي طعمة غير محبب
- أنا نسيته ..
شاور لشخص من بعيد وقرب ومعاه كوبيتين شاي .
- هشرب الكوباية وهمشي لو مش هيضايقك بس زى ما انتى شايفة مفيش مكان فاضي
-اتفضل ..
- أنا مش قاصد اضايقك بس انا لاحظت شرودك من اول ما قعدتي وملمستيش الشاي لغاية ما بردت..
تنهدت : بفكر
- الموضوع كبير ..
- فى مشاعر بتهجم ع الإنسان بيبقي مش عارف يهرب فين .
- خايفة ؟!
- مش عارفة
- محتارة ؟!
- قلقانه.
- من بكره ؟
- من دلواقتي .. من أمبارح
- ليه سايبة باب أمبارح مفتوح ؟!
- لولا امبارح مكنش هيبقي فى إنهاردة
- ولولا إنهاردة مكنش هيبقي فى بكره.
- بالظبط ..
- جربتي تواربي الباب ؟
- مش شايفاه
- لأنك حاسة ان انهارده هو نفسه امبارح
- متأكدة مش حاسة
- جربي اعملي باب وافصلي بين امبارح وانهاردة وبكره، اعملي فواصل هتحسي ب إختلاف بينهم ، البيبان مبتتقفلش بسهولة لكن واربيه مع الوقت هتقفليه بنفسك .
سكتت وكمل كلامة :
- يمكن إنهاردة هياخد من أمبارح شويا وبكره هياخد من إنهاردة شويا لكن مش هيكونوا زى بعض .. الباب هيحسسك بإختلافهم وقتها خدي منهم الل يساعدك واقفلي الباب وكملي وانتى باصه لقدام ..
- لوحدي ؟
- طبيعي تكوني لوحدك ، امبارح كان يخصك وانهارده ليكي وبكره مستنيكي انتي.. انتى وبس ، لو الظروف مسمحتش لحد يشاركك خطواتك مش معناه تقفي مكانك، انتى معاكي نفسك واليوم كده كده بيمر ، خليه يمر وانتى معاه وممكن تقابلي فى طريقك إللى يستحق يكون معاكي ..
- الرحلة فردية فعلًا ..
- الرحلة الفردية فكري فيها ان المقصود بيها فردية القرارات والاختيارات الل انتى هتاخديها لنفسك وبنفسك، مهما كان حواليكي عدد ف الل هتعمليه راجع ليكي انتى ونتيجته انتى إللى هتتحمليها، فمتزعليش انك لوحدك ومفيش حد معاكي ومتنتظريش حد لأن الإنتظار فيه وجع أن مفيش حد جاي بيوجع ، امشي فى طريقك واستمتعتي برحلتك بكل حاجة فيها من لحظات سعادة وإنهيار ( قرب إليها كوب الشاي الساخن ) عيشي اليوم بيومه واستمتعي بلحظاته متضيعهوش بالتفكير فى امبارح الل خلص ولا بكره الل مش واثقين جاي ولا لا .. اقفلي الأبواب وانطلقي فى رحلتك وكوني مستعدة لتقلبات ومفأجات القدر دايما ..
سكتت لحظة :
- شكرًا على الشاي
- يا اهلا بيكي فى اى وقت
- أنت موجود هنا ع طول
- ممكن وممكن
- انا معرفش اسمك ايه ؟
-امممم عابر سبيل قابلتيه فى طريقك
- انا كنت ماشية ومش عارفة اروح فين لاقيت نفسي هنا ..
- أى وقت احتاجتي عابر سبيل هتلاقي دايما كوباية شاي فى إنتظارك ..
مشهد من مشاهد بقلمي #يارا_سمير
رأيكم
