- مساء الخير
- مساء الخير .. مين حضرتك ؟
- نعم ..؟!
- مين حضرتك ..؟!
- باين انا اتلغبطت بينك وبين حد اعرفه ..
- لا ولا يهمك .. انا كمان مستنيه حد اتأخر عليا
- ازاي يسيبك لوحدك ع البحر كده لا لا غلطان ..
- حضرتك عاوز ايه ؟!
- تسمحيلي اقعد هنا ..
- البحر كبير وفاضي ليه هنا ..
- نسبه هوا البحر هنا أرق واحلي من اى مكان تاني
إبتسمت وقعد :
- متتأخريش.. ودي الولاد عند امك..وجهزي نفسك لمفأجاه و معرفش ايه .. وتتأخر أنت ..
- أنا فاشل فى التخطيط والمواعيد، لو حلفتلك اني مخلص شغلي من بدري و اول ما قولت يا خلعون لقيتهم زنقوني فى شغل رغم أن الخميس الشغل بيكون قليل معرفش انا ايه دا ..
-ع حظي بقي .. المهم ايه المفأجاه ولا اتبخرت
- أي نعم plan a فشلت لكن فى plan B
- ما انت لسه قايل انك فاشل فى التخطيط
- لا متقلقيش كله تحت السيطره.. وحشتيني
- فى ايه ؟
- مش فاهم ؟
- أنت عملت حاجه وخايف اقفشك .. انت بتخوني ؟
- ايه الل بتقوليه دا ..لا طبعًا
- متأكد
- قوليلي بس انهارده ايه ؟
- الخميس ؟
- كام يعني
- الخميس الكام فى الشهر ؟
- يا الله .. التاريخ يا حبيببتي ؟
- مش عارفه اعتقد ٤ او ٥ هو احنا موصلناش ليوم ١٠ من الشهر
- متاكده يعني ؟
- أصل هقبض الجمعيه يوم ١٠ ف انا مستنيه اليوم دا ولا عيد بالنسبالي ف متأكده
- اها .. طيب انهارده ٤/٥
- طيب .. ها
- التاريخ دا مبيفكركيش بحاجة ؟
- مناسبة يعني ؟
- ايوه ..
- اممم لا تاريخ ميلادك ولا ميلادي ولا العيال ولا جوازنا - فكري كويس .. بصي باديلك فرصه اهو ..؟!
- لا معرفش .. تاريخ ايه .. عيد ميلاد مامتك هى فى شهر ٥ صحيح ..يالهوووي كده متقوليش يلا بسرعه نجيب تورته ونروحلها يلا ..
مسكها من ايديها وقعدها ..
- استني رايحه فين لا مش عيد ميلاد ماما هى أخر الشهر لسه ..
- طيب ايه؟!. بص انا دماغي ما رايقه والله قول.
- إنهارده تاريخ أول يوم اتقابلنا هنا ع البحر فاكره ؟!
- لا بجد ؟!
- اه والله ..
- أنت مش بتخوني ولا هتخوني قول مش هعمل حاجة؟
- ايه الل بتقوليه دا هو فى راجل حتي لو هيخون هيقول ..
- يبقي خونتني صح ..؟!
- مالك يا بنتي فى ايه ؟
- دا أنت بتنسي تاريخ ميلادي ودايما تفتكره بعده بيومين ، تقوم تفتكر اول يوم اتقابلنا.. اليوم والمكان كمان ..
- الساعه كمان كان العصر وبعدين يالهوي عليكي مبتنسيش قولتلك انا فى التواريخ فى الضياع
- اهو انت بتعترف ع نفسك اهو .. مين هى عرفتهاا فين وحصل امتي قول يلا ؟
- بشويش فى ايه ..انا ازاي اعرف غيرك وهو الل يعرفك يا حبيببتي يعرف غيرك انتى مش سايبه المجال لحد انتى لوحاني معاكي ..
- غلوش غلوش .. لينا بيت نتكلم فيه يلا بينا ..
- استني هنا .. ممكن تهدي وتسمعيني
- هتعترف يلا سامعاك
- والله لاسعه بس بحبك
- لا مش هتثبت انا ..
- فاكره تفاصيل اليوم دا طيب ؟
- ايوه قعدنا ع البحر واكلنا وبعدها اتمشينا شويا
- ماشاء الله عليكي فى التفاصيل
- لا انا فى التفاصيل مقولكش
- عارف عارف ..
- قولي كنت فين اول امبارح بعد الشغل؟
- مين بيودي فين انا بتكلم فى ايه وانتى راحه تسأليني كنت فين أول إمبارح ؟
- قول كنت فين؟
- قولتلك روحت لعمتي كانت تعبانه وكلمتك من عندها وانتى كلمتيها
- متأكد انها عمتك ؟
- لا يجوز عمتي ..فى ايه؟
- طيب خلاص كمل ..
- بصي بتروحي فين .. بتدوري ع اى حاجه
- مش مرتاحه، قولي بس الأول خونتني علشان أطمن
رن الموبيل : .
- مش مسجل رقمها ب اسم ولا ايه؟
- ثواني وجاي استني
- ايه هتجيبها اتعرف عليها ؟
٥ دقايق ورجع ومعاه شنطه وعلبتين بيتزا :
- ايه دا ؟
- فى نفس المكان قعدنا اكلنا بيتزا وشربنا بيبسي فى ازازه صح
- ايوه صح ..
- وبعد الاكل هنتمشي وعازمك ع سينما الساعه ١٢ يلا
- قولي اسمها ايه علشان خاطري ؟
- مين دى ؟
- الل خونتني معاها ..
- انتى مصممه ع فكره هتخليني اعملها كده بجد بدل ما مشكوك فيا ع الفاضي ..
- ماهو تصرفاتك غريبة ، من امتي بتهتم بتواريخ ومناسبات انا الل بفكرك اصلًا وبالزن كمان ، لا وفاكر بالتفاصيل حتي نوع البيتزا وبيبسي الازاز
- اقولك الصراحة ؟
- ياريت ؟
- أنا بقالي فتره لا بقعد معاكي ولا مع الولاد وبرجع متأخر من الشغل وبنام ع طول فحسيت انى مقصر فى حقكم وحبيت اعوضكم واصالحكم ، بس كل واحد فيكم لوحده ، وملقتش أحلي من ذكري مقابلتنا نحتفل بيها مع بعض لوحدنا والولاد بكره هنخرج طول اليوم مع بعض بس حبيت اصالحك انتى الأول يا حبيبي ..
ابتسمت:
- انت عارف انا عايشه معاك ١٠ سنين ومكمله ليه ؟
- ليه ؟
-علشان الحته دى منك، رغم ما بتنشغل عننا لكن بتفكر فينا وفى اقرب فرصه بتستغلها وتعوضنا وتراضينا ع تقصيرك معانا، بتروق علينا يعني ، رغم أوقات غيابك لكن دايما موجود لينا ومعانا لما بنحتاجك كل مره بتثبتلي ان انا عرفت اختار حبيب وزوج وأب ، عرفت أختار صح
- وانتى ياما بتستحمليني ومبتشتكيش رغم خناقنا لكن عمرك ما وصلتي اى مشكله انها تكبر عن يوم ولا حد يعرف عنا حاجة، وأهتمامك ب الولاد وأهلي ودايما متفهماني رغم لسعانك كتير بس قلبك ولا أطيب قلب ..انا بشكرك انك اختارتيني ..
- يلا عد جميل أصلًا كنت هتقابل زى فين؟
- مكنتش هقابل أكيد، يلا نأكل بقي
- يلا .. بس ايه كانت الplan a ?
- هى نفسها ال plan B بس كانت هتبقي بدري
ضحكوا : بس قولي انت مخونتنيش صح
ضحك : هفكر وهبقي اقولك
- أتفقنا ومتقلقش البحر كبير مش هتبان فيه
- يا ساتر ..
- من حبي يا حبيبي ..
- حبيب قلبي الحنين ..مشهد من مشاهد بقلمي #يارا_سمير
رأيكم❤