- هتفضل ساكت كتير ؟!
- أنا مش مصدق اصلًا
- مش مصدق ايه ؟!
- مش مصدق أنك قدامي بجد .
- لا صدق .
- متعرفيش انا كنت مستني اللحظة دى اد ايه، وكنت عاوزاها قبل كده وانتى الل أخرتيها.
- عقبال ما رتبت ظروفي .
- ماانا قولتلك اجيلك انا لكن انتى إللى صممتي تيجي
- المهم اتقابلنا
- صح .. انتى مش متخيلة انتى وحشاني ازاي
- أنت أخبارك ايه وايه الجديد ؟
- الحمد الله زى ما انا والجديد انى شوفتك
- تمام ..
- انتى شايفة ايه اتغيرت ولا زى ماانا؟
- مفيش إنسان مبيتغيرش .
- ازاي ؟
- يعني السنين دى كلها ومتغيرتش مستحيل
- أكيد اتغيرت فيا حاجات وعرفت حاجات لكن فى حاجات مبتتغيرش زي مكانك متغيرش .
- بجد .
- مكنتش فضلت أحاول اكلمك واصمم اقابلك
- امممم.. ممكن؟
- انتى مش مصدقاني ؟!
- صدقني مش هتفرق سواء صدقت او لا
- لا هتفرق معايا
- تمام
- فى ايه؟! حاسس ان فى حاجة.. لو فى حاجة قولي !
- لا مفيش .. أنت طلبت تقابلني علشان أسمعك وانا اهو بسمعك .
- بس .. وافقتي تقابليني علشان كده بس ؟!
- وهو فى حاجة تانية ؟
- هو انا موحشتكيش ؟!
- لا وحشتني جدا .
- مش باين .
- اقوم اخدك بالحضن يعني علشان تصدق
- ثانية .. فى حاجة مضايقاكي ؟!
- لا ..
- حاسس انك متغيره.. ليه كده ؟
- دا الطبيعي ..
- الطبيعي ؟!
- ايوة الطبيعي بعد فراق سنين عشت لوحدي، عشت مواقف لوحدي، قرارات واختيارات اتحملت مسؤليتهم لوحدي، انت قولت حاجات اتغيرت وحاجات عرفتها ف دا حصلي وانا مكنتش حاسة ولا مرتبة دا يحصل . ف طبيعي اكون حد تاني شخصية جديدة عليك .
- التغيير دا فى الحياة العملية كنت اقصده
- بيحصل فى الحياة الشخصية قبل العملية
- يعني افهم من كده انك حد تاني غير إللى حبيتها ؟
- إللى حبيتها مش عارفه راحت فين بس إللى اقدر ااكدهولك ان إللى قدامك دى حد تاني انت متعرفوش
- ابقي ساذج لو بعد السنين دى ومتغيرتيش لكن مكنتش اتخيل كده ؟
- ولا انا أتخيل كده بس حصل لأنه بيحصل لا أرادي
- أنا معرفش عيشتي ايه ولا شوفتي ايه لكن انا قابلتلك علشان اقولك تعالي نبدأ صفحة جديدة ..انا محتاجك فى حياتي انا بحبك
- وأنا كمان بحبك .
- طيب فى ايه ؟
- فى انى مش علشان بحبك يبقي نبدأ صفحة جديدة،
- مش فاهم
- انا بحبك ايوه لكن مش عاوزة اكون معاك
- نعم ..
- انت عارف أنا قابلتك ليه وليه صممت اسافر و اجيلك
- ليه؟
- علشان اول مره أشوفك كان هنا .. وحشني إحساس اول لحظة بينا ، وحشني لهفتي وفرحتي انى هشوفك.. حبيت اتاكد هل لسه موجود ولا الإحساس دا اتبخر..حبيت اجدد أول لقاء بينا واشوف هل السنين قدرت تشوه اللحظة دى ولا لا
- وايه حصل ؟!
- قبل ما اكلمك كانت النسبة قليلة لكن دلواقتي اكتسحت بشدة .
- أنا مش هبرر اى حاجة لان واضح انك عيشتي حاجات وانا كمان عشت حاجات ، لكن اوعدك واحنا مع بعض مش هسمح لحاجة تحصل تاني
- عارف فى مره قعدت مع نفسي كنت مفتقداك جدًا فكرت فى حاجة وقولت لو كنت موجود كانت حاجات كتير محصلتش او لو حصلت كنت هقدر اواجهها لأنك معايا .. كنت بستنجد بك وانت مكنتش موجود .. كنت لوحدي ومكنتش أعرف هعمل ايه فى إللى بيحصلي .
- أنا..
- أنت رجعت ليه، ليه كلمتني.. ليه كنت عاوز تشوفنى؟
- وحشتيني .. أنا عارف وبعترف اني كنت غبي فى قرار بعدي عنك، ايوه فكرت فى نفسي على حسابك وسيبتك من غير اوضحلك الأسباب، لكن لما بعدت اكتشفت مع الوقت مهما عملت ومهما عرفت ومهما عدي وقت انتى الوحيدة إللى ملكيش بديل .. انا حبيتك بجد .. انا مكنتش بفكر فى الارتباط ومكنتش متخيل ان مشاعري هتكون حقيقية ليكي فخوفت ان حبي ليكي يضعفني ويوقفني فى مكاني ، كنت فاكر ان انا هقدر أتاقلم على عدم وجودك لكن بين وقت والتاني بتوحشيني اكتر.. انا غلطت ويعترف بغلطتي وراجع اقولك انا بحبك و مش هسيبك تاني .
- وأنا.. مفكرتش بعد السنين دى هبقي ازاي ؟
- أنا لو مكنتش متأكد من حبك ليا مكنتش رجعت
- فعلًا انا محبتش حد زيك او بمعني اصح محبتش غيرك.. ولسه جوايا مشاعر لك .. مشاعر أول مره لما قابلتك ، الشخص إللى حبيته بكل مشاعري وكنت مستعدة اروح معاه اخر الدنيا ، مشاعري وقتها احتفظت بيها واتحفرت جوايا
- يعني لسه ليا مكان فى قلبك ؟
- ايوة لك .. بس مكانك من كام سنه عدت مش دلواقتي
- مش فاهم ؟
- الست بتقولك ايه عاوزنا نرجع زى زمان قول للزمان ارجع يا زمان .. إللى عشناه زمان خلاص عشناه وانهارده اتاكدت ان إللى فى الماضي مكانه الماضي مينفعش يكون معايا الحاضر ولا المستقبل .
- ليه ؟
- لأن انا مش انا بتاعه زمان .. انا اتغيرت وأولولياتي اتغيرت، إللى مريت به وعيشته غيرلي حسباتي وأولولياتي .. قابلتك علشان اتاكد ان الماضي ماضي ومكانه محفوظ فى ركن الذكريات .. مش هنساه لكن مش هعيش به ، كان فتره من احلي فترات حياتي لكن مش كل حياتي ، أنت كمل حياتك زى ما أنت وانا هكمل حياتي زى ما مكتوبلي ،كل واحد فى طريق إللى القدر مقدره له ..
- فرصة .. اسمحي ليا بفرصة
- مش هينفع وهيبقي تضيع وقت
-ليه بتقولي كده ؟!
- لأن إللى محتاجاه مش معاك .
مشهد من مشاهد بقلمي #يارا_سمير
لأف و رأيكم ✨❤
