- اليوم كان طويل اوي
- وحر اووي اوي
- صعبتي عليا حرانه وانتى قاعده فى البيت
- أنت مش متخيل لما يجتمع الحر مع الفراغ بيعمل ايه ؟
- فرهده ممنهجة ..
ضحكت: ايوه، اعزمني ع حاجة بقي
- أنا سمعت الجملة دى فين قبل كده
ضحكت : يلا بقي .
اتجهو ع كافيه :
- تقعدي جوه فى التكييف ولا برا ؟
- الشمس بتغيب يلا نقعد برا ع البحر كده
- يلا بينا ..
قرب الويتر :
- لو سمحت اتنين ليمون نعناع متلج
- تمام
- مش تسأليني الاول انا كنت عاوز قهوة ؟
- لا اشرب الليمون بالنعناع الاول وبعدين القهوة رطب ع معدتك احنا فى حر ..
- ماشي يا دكتور..
- سبحان مغير الأحوال الجو اتغير خالص
- ما خلاص بقي الصيف بيودع شهر وخلاص
قامت وقفت :
- الله ع نسمة الهوا ..
- فعلًا الجو بقي جميل
- يعني اعتقد مفيش اجمل من كده فى حياتك
- الل هو ايه ؟
- الماء (شاورت ع البحر ) والخضرة ( شاورت ع عود نعناع ) والوجه الحسن ( إبتسمت وهي بتشاور ع وشها)
ضحكوا وسكتوا شويا بيستمتعوا بالجو وهما بيشربو الليمون بالنعناع .. هي بتستمتع بالغروب وهو باصص عليها ومبتسم :
- تعرفي الساعة الل بشوفك فيها بتهون كتير عليا
- والله وانت كمان .. ببقي عاوزة اليوم يخلص علشان اشوفك ومش عارفه لما تسافر يومي هيبقي ناقص بس انت وعدتني انك هتكلمني فيديو كل يوم
- علشان كده انا قررت قرار مهم جدًا
- ايه مش هتسافر ؟
- لا طبعًا هسافر وانتى عارفه انه مينفعش مسافرش
تنهدت : عارفة
- لذلك قررت أأجل السفر اسبوع كده
- ليه؟
- انتى مش مبسوطة ولا ايه ؟
- لا طبعًا مبسوطة لكن النتيجة واحدة هتسافر فى الاخر
- ماهو انا أجلت السفر علشان نسافر مع بعض
اتفأجأت:
- بتقول ايه ؟
- زى ما سمعتي ، اتكلمت مع باباكي أننا هنكتب الكتاب ونسافر..
- بتتكلم بجد ؟
- بس هو قالي اسألك الاول اصل معني كده مفيش فرح
- بس هنبقي مع بعض .. دا المهم
- يعني بجد مش فارق حوار الفرح معاكي ؟
- أنا مكنتش متحمسة للفكرة اوي، والتكلفة احنا أولي بيها وبعدين الفرح فرحتنا مع بعض واللي بيحبونا هيفرحو لفرحتنا مهما كانت ..
- علشان كده قررت ان كتب الكتاب هيكون فى مكان دا
بصت حواليها:
- دا ايه ؟
- هنا .. على البحر هنا، اتفقت مع ويدنج بلانر هتظبط المكان ونكتب الكتاب هنا ..
- قول والله ..
بص فى الساعة :
- معادنا معاها كمان ساعة ونص هتكون هنا وانتى قوليلها عاوزة ايه وهى تظبطهولك ..
- والشقة؟
- هتتوضب ع راحتها بقي وهناك كانت اصحابي وشافولي سكن صغير ليا انا وانتي
بسعادة :
- خططت ورتبت كل دا لوحدك؟
- بصراحة بمساعدة باباكي واخويا رتبنا الدنيا حبيت افاجئك
- عارف كل حاجة تكون وأننا هنكتب الكتاب هنا، أكيد عارف أنا مبسوطة ليه ؟
- لأن دا كان اول مكان اتقابلنا فيه وكانت خناقة محترمة
- أنت الل غلطان مش انا ؟
- طبعًا طبعًا يافندم .. علشان كده بدفع تمن غلطتي اهو
- يا رخم ..
- كان فى اماكن كتير لكن انا قولت مكان ما الحكاية بدأت لازم تستمر ايه رأيك؟
بسعادة : انا مش عارفه اقولك ايه ؟
- المهم انك مبسوطة
- أنا بحب المكان دا اوي وبجد مكنتش اتخيل انه هكتب كتابي فيه ..
- وأنا بحبك انتي وأى حاجة ممكن تخليكي سعيدة والابتسامة دي متختفيش هعملها من غير تفكير
بكسوف:
- ايوه انا عارفه انك بتحبني بس مكنتش اتخيل اوي كده
- لا بحبك اوي واوي اوي اوي كمان
بصت قدامها مكسوفة و سعيدة وهو باصص عليها سعيد لسعادتها وفى الخلفية تامر عاشور بيقول :
أنا مكسب عمري إني قابلتك
غيرت في عيني الأيام
طمنتني ع الباقي في عمري
حققت لي كل الأحلام
أول ما عيونك دي بشوفها
مش بعرف أشوف غيرها خلاص
إنت هدية ربنا ليّ
إنت حبيبي وأغلى الناس
مشهد من مشاهد بقلمي #يارا_سمير
رأيكم ❤🥀
