- أحلي كوباية شاي
- شكرًا يا حبيبي .
- ها احكيلي عملتي ايه إنهاردة؟
- كنت بزور صاحبتي زى ما انت عارف
- جميل، يومك كان عادي يعني ؟
- لا
- ليه ؟
- عملت حاجة مكنتش اتخيل اني اعملها
- عملتي ايه ؟
- وأنا خارجه كان الشقه إللى فى الدور الأرضي عيادة دكتورة نفسية، لقيت بنوته ندهتلي وقالتلي ان فى سيشن فري لو حابه وبصراحة قولت انا مش ورايا حاجة ودخلت .
- ايه حصل ؟
- قاعدنا فى شكل دائره والدكتور قعدت عرفتها بنفسها وعرفنا نفسنا وكنا ٥، أعمارنا مختلفة وبعد كام سؤال اعتيادي سألتنا .. ايه هو الحب من وجهه نظركم ؟ كانت الردود معروفه انه الأمان والاستقرار والطيران..
- طيران ؟!
- ايوه مش بيقولك لما تحب بتطير من ع الأرض
- انتى قولتي ايه ؟
- اتكلمت عن علاقتنا
بضحك: يا ساتر أستر قولتي ايه بقي ؟!
- عن أول مشاعر حستها معاك، عن أول فرحة عشتها لما قولتلي بحبك ومعرفتش انام ، عن أول خروجة مع بعض وجوايا كلام كتير عاوزة اقوله ومش عارفة من اللغبطة، عن أول مشاعر احسها ومش قادره اوصفها لأن حسيت مهما اقول هيبقي مش صح، عن أول ضحكة من قلبي معاك بعد يوم طويل عياط مجهول السبب، عن أول تمشية واحنا ماسكين ايد بعض من غير ما نتكلم لكن قلوبنا كانت بتقول كل حاجة ، عن أول أزمة أمر بيها ومحسش انى لوحدي بوجودك معايا ، عن أول مرة أتعصب واللى قدامي يسكت ويستحملني ودا كان أنت وبعدها لما لقتني متكلمتش مأجربتنيش انى اتكلم ، عن أول مرة أعمل غلطة وبدل ما تعاقبني وتشيلني مسؤوليتها اتكلمت معايا وهونتها عليا ، عن أول أحساس بالونس مع حد بعد ما كنت طول عمري عايشة وسط ناس لكن كنت لوحدي، عن أول كوباية شاي عملتها لينا فى بيتنا، عن أول مساعده منك ليا فى البيت وطول الوقت بتحاول متحملنيش فوق طاقتي، عن أول مرة احس اني محتاجة اتحضن ومن غير ما اطلب لاقيتك حضنتني ونمت فى حضنك ، عن أول مره زعلتني ومرضتش انام زعلانه ورضيتني، عن أول مره نتخانق ومحاولات تهندل الموضوع علشان ميكبرش مننا ، عن أول مره اتكلمت عن اكلي انه احلي حاجة علشان متحرجش قدام اهلك واهلي رغم انه اترمي وطلبنا جاهز، عن أول مره معاك احس بوجود بابا فى مواقف بعد أحساس الافتقاد إللى عشت به بعد وفاة بابا، ووجود صاحبي فى مواقف ووجود جوزي طول الوقت معايا، عن أول مره احس اني مش خايفة بعد ما كان الخوف رفيق عمري ، عن أول مره انام وانا بشكر ربنا انه عوضني بشخص لمدة ٤ سنين رغم عدم وجود أطفال لسه محسستنيش بفرق وكنت رفيقي وصديقي وابني وحبيبي وزوجي ❤
مشهد من مشاهد بقلمي #يارا_سمير لاف و رأيكم 🤎
