خلصت شغلي واتغديت ونزلت بالعربية
وشغلت الابلكيشن جالي ريكوست وقبلته
روحت ع المكان كان فى واحده مستنياني
ركبت العربية وسألتها :
- ع فين ؟
- محطة الرمل انا محدده فى اللوكيشن
- تمام ..
طول الطريق ساكته مبتتكلمش،
ولا ماسكة الموبيل باصه لشباك وسرحانه،
وبتتنهد حسيت ان عندها مشكلة او فى أزمة،
كنت عاوز اسألها لو فى حاجة اقدر اعملها
لكن قلقت لتفتكر بعاكس ..
طول الطريق ساكتين .. وصلنا ونزلت وانا مشيت ..
الغريب أن بعد ما سبتها فكرت فيها
ودا أول مره تحصل معايا ..
كتير بيركبوا معايا لكن المرادي غير ..
بصيت ع الريكويست عرفت اسمها- أميرة -
لكن الرقم لحفاظ ع خصوصية العميل متخفي ..
استغربت نفسي اكتر ان تاني يوم روحت نفس المكان الل ركبت منه واستنيت ع أمل اشوفها لكن محصلش ..
قولت ايه العبط دا .. ف مشيت وكملت يومي عادي واعتبرتها شخص عابر صادفته..
بعد فترة سافرت القاهرة عند أختي ..
نزلت بالعربية اتمشي ومعرفش ايه جه فى بالي اشغل الابلكيشن واقبل ريكويست يبقي شغل وتمشيه..
حصل فعلًا قبلت ٣ ريكويست وانا راجع لأختي جه ريكويست وقولت اخر واحد وقبلته ..
طلع اسم العميل - أميرة -
معرفش ليه قلبي اتخطف، وجت فى بالي لكن قولت استحالة بعد ٥ شهور وفى محافظة تانية تكون هي ..فى غيرها نفس الاسم كتير ..
روحت ع المكان وانتظرت العميلة تظهر ..
ظهرت والمفاجأه انها هي ..
ركبت العربية وزى ما هي ساكته وباصه للشباك
المرادي قولت مش هفوت الفرصة :
- هو حضرتك من القاهرة ؟
- لا .. من الاسكندرية
- انتى زيارة ولا شغل هنا ؟
- شغل .. فى حاجة ولا ايه؟
حسيت تضايقني:
- اسف لو ازعجتك .. بس انا كنت عاوز اقولك يعني لو محتاجة عربية انا موجود معاكي فى اى مشوار
- بجد وبكام ..؟
- الل تحسبيه مش هيفرق كتير ..
- مش عارفه بصراحة.. عمومًا شكرًا ع العرض ..
لاقيتها بتقفل الكلام وقولت لو فعلًا محتاجة عربية هتجيبك ازاي ، من غير تفكير طلعت الموبيل التاني :
- ممكن تسجلي رقمي عندك لو احتاجتي يعني عربية
- تمام ..
- سجلت رقمي معاها وانا كنت بتمني اخد رقمها لكن مكنتش عارف اطلبه منها لتفهمني غلط ..
وصلتها المكان ونزلت وانا مشيت ..
٣ ايام ببص للموبيل مستني اتصال منها ..
حاسس انها هتكلمني لكن مش متأكد
وبنسبه ١% أمل تتصل بيا كنت مستني ..
وطولت أجازتي وقعدت عند أختي ..
اليوم ال ٦ قررت ارجع القاهرة علشان اجازتي خلصت ، رقم رن ورديت وكانت هي:
- مساء الخير واسفة ع الازعاج
- مساء الخير .. لا ولا يهمك معاكي
المكالمة كانت قصيرة ومختصرها انها كانت محتاجة عربية ليومين معاها لأنها هتلف ع كذا مكان ومن غير ما اعرف تفاصيل وافقت واتفقنا ان الدفع هيكون اخر يوم لما نقدر المشاوير ..
