- أنا داخله انام
- مش هتتعشي ؟!
- لا مش جعانه اتعشوا انتم، لما أحس انى جعانه هقوم اكل
- براحتك
دخلت الأوضة قفلت الباب حتي مفكرتش أشغل النور ، روحت فتحت الشباك ، أبص على السما وحاسه انى مخنوقة افتكرت مقابلتنا الصبح ، كنت فى مشوار واتقابلنا فى كافية، كنت سبقته ومردتش اطلب لغايه ما يجي هو، وصل وطلب شاي وطلب ليا معاه من غير ما يسألني لانه عارف بحب الشاي وأكد أنه يكون بنعناع ، لسه هنتكلم موبيله رن وخرج يرد برا لان المكان كان دوشة، رجع وقعد:
- اخبارك ايه ؟
- مش احسن حاجة
- كان باين من صوتك .. ليه كده ؟
- خناقة البيت امبارح
- عادي يعني هى اول مره
- لا مش اول مره بس فى كل مره بس انى فى البيت لوحدي
بص ع موبيله : متكبريش الحكاية كل بيت فيه مشاكل
- انت شايف كده
- دا الطبيعي .
- تمام .
رن موبيله وخرج تاني وطول، كان مشغول لدرجة معرفناش نتكلم كلمتين ع بعض والخنقه إللى كنت حساها زادت، رجع وطلبت امشي وقومنا وصلني وطول الطريق ساكتين وقبل ما انزل من العربية قالي :
- انتى مضايقة مني فى حاجة ؟
كنت هسكت لكن اتكلمت وقولت :
- أنا يمكن مستغربة بس مش اكتر
- مستغربة ايه ؟
- قبل كده اتفه مشاكلي كنت بتتنبه ليها لأنك الوحيد إللى بقدر اتكلم واحكيله، معرفش ليه حسيت ان لازم يكون فى مشكله كبيرة علشان احس ب انتباهك ليا .. عموما هو ممكن يكون الغلط عندي مش عندك .. تصبح ع خير
نزلت من العربية ومستنتش يتكلم وطلعت شقتنا ..
واقفه فى الشباك بفكر هو احنا اتغيرنا بعد الخطوبة ولا فعلًا مشاكلي تافهه متستهلش انتباهه ولا دا ملل الخطوبة و لا هو مبقاش يحس بخنقتي زى الاول ، حاجات كتير دخلت فى بعض فى تفكيري فاتنهدت و قفلت الشباك وروحت ع السرير مسكت الموبيل لاقيته باعتلي شات :
- نمتي
- لا لسه
- بتعملي ايه ؟
- ولا حاجة كنت هنام
- طيب عاوز اقولك حاجة قبل ما تنامي
- قول ..
- أنا مش هعرف انام وانتى نايمه زعلانة
- لا مش زعلانه
- لا زعلانة.. انا بحبك و عمري ما استهيفت مشاكلك، ولا هيحصل .. ممكن إنهاردة كنت مشغول اكتر من العادي ولما كلمتك وكنتي برا لاقيتها فرصة اشوفك لاني حسيت من صوتك انك مضايقة من حاجة ولأنك وحشاني انتهزتها فرصة، لو مكنتيش مهمة عندي مكنتش اهتميت اقابلك ولا انى اشوفك رغم اني مشغول جدًا .
- ع اساس انك كنت معايا مش طول الوقت ماسك التليفون ومتكلمناش جملتين ع بعض..
- حقك عليا اوعدك مش هتتكرر تاني
- ولو اتكررت عادي بقي
- خلاص حقك عليا متزعليش
- ماشي خلاص
- صافي يا لبن
- حليب يا قشطة
- هتنامي
- لا هتعشي الأول وبعدين انام
- الف هنا يا حبيبي ..ابعتيلي نتكلم شويا قبل ما تنامي انا مش هنام هستناكي
- تمام ..
اتعشيت ورجعت اتكلمنا والخنقه الل عندي اختفت :
- هتنامي
- ايوه
- يلا تصبحي ع خير
- وانت من اهله .. سلام
- بقولك ايه صحيح ؟
- ها
- بحبك
ونمت وانا بحمد ربنا انه فى حياتي ، أن قابلت شخص انا غالية عنده ومبيحبش انام وانا زعلانه منه او من غيره دايما بيراضيني ... 🤎
مشهد من مشاهد بقلمي #يارا_سمير رأيكم 🤎
