الأخضر

القفطة

من وصلنا الفندق و انا ماني عارفة الى اي درجة بتكون طلعة ياسر. الى اي درجة اكشخ؟ وين بنروح؟ هل بنطلع مع بعض ولا نطلع منفصلين و نتقابل في مكان بعيد عشان ما يشوفنا احد؟

وصلنا الفندق الساعة ٤ العصر على ما شلنا اغراضنا و جمعنا اللاعبين المحتفلين و الطريق للفندق. اتفقنا انا و ياسر نطلع على الساعة ٧ في الليل.

دخلت اتروش عالسريع. طلعت و لبست و جلست على الكنبة و طالعت شنطتي المنكوشة على الطاولة قدامي. تنهدت و حاولت القى لبس مناسب لطلعتنا. طلعت جوالي و سألت ياسر.

"وين بنروح؟" ارسلت له و رد علي في لحظتها.

"سر"

"اقول اخلص علي. ماني عارفة البس ايش" رديت انا و بدا ياسر يكتب.

"لبسي شي مريح" رد علي و استغربت. لبس مريح؟ لا يكون بنلعب بليستيشن بغرفته.

"طيب 🤨" رديت و سكرت جوالي.

وقفت و طلعت لي جينز فاتح. احترت البس بلوزة خفيفة ولا شي ثقيل. مشيت للبلكونة و طلعت اتحسس الجو. شمس العصر دافية دفى حلو. و الهوا عادل حرارتها و خلى الجو معتدل. غمضت عيوني و رفعت راسي للشمس و ابتسمت.

لفيت يميني و شفت بلكونة عبدالاله فاضية و ستاير غرفته مسكرة. شكله نايم. مين يلومه؟ مستحيل اقولها بوجهه، بس مرة فخورة فيه اليوم. حارب حرب في خط الدفاع. يستاهل نومة قوية.

ضحكت لنفسي و دخلت لغرفتي المتجمدة من التكييف. بدال جينز و بلوزة، طلعت لي فستان صيفي ابيض لنص الساق و جاكيت جينزعشان لو برد الجو. ابتسمت لالبس و انسدحت على السرير انتظر الليل على احر من جمر.

لما قرب وقت طلعتنا، رفعت نص شعري ببكلة. طلعت خصلتين قدام على وجهي، حطيت ماسكرا، بلش خفيف، و مرطب شفايف. لبست جزمتي الرياضية الي اروح فيها كل مكان.

انتظرت ياسر يعطيني الخطة. للحين ما قال لي كيف بنطلع بدون محد يصيدنا طالعين مع بعض.

"ندى" فتحت جوالي بسرعة لما وصلتني رسالته.

"هلا؟"

"انا في البقالة الي مقابلة الفندق. تعالي و نطلع من الباب الثاني" ارسل لي و ضحكت على خطته. حطيت جوالي بشنطتي و طلعت.

نزلت بالمصاعد للاستقبال و حاولت امشي بسرعة عشان ما يطلع لي احد.

"بنت!" صرخ علي اول ما طلعت من الابواب الزجاجية للشارع. لفيت بسرعة و شفته واقف عند مكان خدمة صف السيارات جنب الباب الي طلعت منه. مشى لي و طالعني من فوق لتحت.