( Unicode + Zawgyi )
Unicode
" ကောင်းကင်ဘုံဧကရာဇ်က နတ်ဆိုးဘုရင်ကို
အဆုံးသတ်ပစ်လိုက်ပြီတဲ့ "
သုံးလောကတစ်ခွင် ဟိုးလေးတကျော်ကျော်ဖြစ်နေသော ထိုသတင်းက လီဟွားနယ်မြေသကဲ့သို့
အစွန်အဖျားနေရာအထိပါ ပျံ့နှံလာလေသည်။
ဟုတ်ပေသည်။
နှစ်ပေါင်းထောင်ချီကြာမြင့်ခဲ့သည့် နတ်ဆိုးလောကနှင့်နတ်ဘုရားကြားမှ တိုက်ပွဲများသည် နောက်ဆုံးမှာတော့ အဆုံးသတ်သွားပြီဖြစ်၏။ လူသားအပေါင်းတို့လည်း ဝမ်းသာပီတိဖြစ်ရကာ နတ်ဘုရားတို့လည်း
စိတ်အေးသွားကြလေပြီ။
တစ်ဦးကိုတစ်ဦး သတင်းစကားပါးလျက် လူ့ဘုံလောကတွင် နတ်ဆိုးဘုရင်ကိုအောင်နိုင်ခြင်းအထိမ်းအမှတ်အဖြစ် တောင်ပေါ်မြေပြန့်မကျန်ပျော်ပွဲရွှင်ပွဲများကျင်းပနေကြကာ အလွန်ကို စိတ်ချမ်းမြေ့သာယာဖွယ်ပင်ဖြစ်နေတော့သည်။
သို့ရာတွင် ပျော်ရွှင်ဝမ်းသာခြင်း၊ထိတ်လန့်စိုးရွံခြင်း
အလျဉ်းကင်းမဲ့သည့် တစ်နေရာတော့ကျန်ရှိနေသေးသည်။
ယင်းမှာ လီဟွားတောင်ထွဋ်ဖြစ်၏။
လီဟွားမြို့၏ ရတနာကိုးသွယ်မြစ်ကိုဖြတ်ကျော်၍
မြောက်ဘက်သို့ ဆန်တက်သွားလိုက်ပါလျှင် လီဟွားတောင်သို့ရောက်မည်ဖြစ်သည်။ ဒဏ္ဍာရီအဆိုအရ အဆိုပါ တောင်ထွဋ်သည် နတ်ဘုံနတ်နန်းအလားခမ်းနားလှပကာ အမတနတ်ဘုရားတစ်ပါး
နေထိုင်စံမြန်းသည်ဟူ၍။
ပါးစပ်ရာဇဝင်ပင်ဖြစ်သော်ငြားလည်း လီဟွားမြို့သူ
မြို့သားများကတော့ ထိုတောင်ဘက်သို့ ခြေဦးတောင်
မလှည့်ကြပါပေ။
နတ်ဘုရားများကို အနှောင့်အယှက်ပေးမိလျှင်
သူတို့ တစ်ဘဝလုံးကံဆိုးသွားရမည်ကို စိုးရိမ်ကြသည်လေ။
.....
သိမ်မွေ့သောလေပြည်ညင်းကလေးသည်
လီဟွားပင်များကြားသို့ ဖြတ်သန်းသွေးဆော်နေရာ
ပန်းရနံ့ဖျော့ဖျော့သည်လည်း လေထုအတွင်း
ဆွတ်ပျံ့နေသည်။ သစ်ခက်အချင်းချင်းပွတ်တိုက်
သံများမှာ ဆူညံခြင်းမရှိသည့် သည်နေရာအား
အသက်ဝင်အောင် ပံ့ပိုးဆောင်ရွက်ပေးနေသကဲ့သို့
ရှိပြီး တေးသွားချိုချိုပမာ နားထောင်ကောင်းလှသည်။
