بين الحلم والقدر

البارت الأول

بين الحلم والقدر

للكاتبه أنو أنو

عندما يكبر الإنسان يكتب بالحبر بدلا من الرصاص

حتى يتعلم ان محو اخطاءه لم يعد سهلا .

كرار : يله غياث ابويه يصيحك راح نروح خلصنا شغل

غياث: اي اي اجيت

_رحت اركض على اخوية احنه عدنه بستان وهاي الگاع حلالنا شغلنا بيها ابويه وعمامي واخواني

فهمه من يرحون للشغل والحصاد اني اروح وياهم اللعب

ذيچ الفتره چان عمري صغير فاروح وياهم اباوع عليهم لو اظل اللعب لو احفر بالگاع لو اظل اجمع حجار وابني بيهن المهم الهي روحي

واذا اجوي جهال وياي مرات ولد عمي نگعد نلعب لبين ما يخلصون همه شغل ونرجع

ابويه جبير اخوانه وكلمته مسموعه والكل تهابه فمن يخلصون شغل يتجمعون كلهم للصلاه ابويه يصلي بيهم لان الجامع بعيد علينا اللي يريد يروح لازم يتعنه فبالمناسبات والاعياد يرحون للجامع هناك يؤدون الصلاه وراها الكل يتفرق ويروح لبيته

بيوتهم قريبه على بيتنه بنفس البستان الگاع الهم كلهم فقريبين ناس على ناس كلهم عمامي ماكو احد غريب

وياخذون من عندهم وبيهم قليل ما يدخل غريب بيناتهم ونادرا ما ينطون بناتهم للغريب فهيج تلاحظ هذا ماخذ بنت عم هذا وهذا ماخذ بنت عم هذا

و احنا الجهال نكعد نلعب اكو من ولد عمي بعمري عندي اخوان تلاثه واني الرابع وعندي خوات تلاثه واني اصغر واحد بالعائله

ابويه رجال اله هيبته وكلمته مسموعه من قبل الكل ومعروف بالمنطقه الناس تحترمه وتحسبله احساب واحنا كذلك ولده

رغم العلاقه اللي بيننا بس الاحترام موجود انا اكثر واحد مدلل بس چنت اخاف منه اسمع كلامه وبي طبيعه اذا قرر شيء او كال شيء بعد هذا هو ما يتغير

من جنت صغير جنت وكح احب اللعب جنت اذا نلعب شرطي وحرامي لازم انا اخذ دور الشرطي اذا ما انطونياه ما اللعب يضطرون ينطوني حتى نصير مجموعه

احب العب طوبه چنت بالمدرسه شاطر من انجح ابوي يكلي شنو تريد هديه اكول أريد مسدس لو رشاشه ومن اكبر اصير ضابط ابويه يضرب على جتفي يكول اي عفية بالسبع هاي كاعك ووطنك انت تحميها

وهيج تمر ايامنا نجحت من الاول والثاني والثالث جنت بالرابع ابتدائي اخويه الجبير جراح اتزوج اخذ بنت عمي سارة

جنه ساكنين بنفس المنطقه هو بستانه والكل كاعدين بيه العمام كل واحد بانيله بيت حالتنا جانت ميسوره وكاعنا خير من الله شنزرع بيها اطلع خير الكل يشتغل بيها وشطلع خير يتقسم على الكل

كلمن اله حصه بعدها بفتره اخوي الثاني بتار هم اتزوج وأخذ بت خالي ايات

البيت جبير والكل كاعد بيه حتى بعد زواج اخواني امي مره طيبه وحنينه وانا اكثر طفل مدلل وقريب من عدها جنت اذا اضوج افرح انقهر اجي يمها اسولف وياها قريبين من بعض هوايه حتى ابويه بس امي اكثر يجوز بحكم اني اصغر طفل بالعائله