جحيم وجدك بلاء

الفصل الأول : في عرين الروسو

فإحدى شوارع العاصمة الاقتصادية للمغرب الدار البيضاء .. واقفة بنت فالعشرينات من عمرها قدام الشانطي و ملامحها مكتاسحهم الغضب .. كاتضور عينيها لي كاينافسو البحر فزرقتو على الطوموبيلات باغا تقشع شي طاكسي .. رجلها الطويلة لي كاتهزها كل مرة بسرعة ، و اصابع يديها الرقاق لي كل مرة كايرجعو شعرها القصير لي واخد لونو من ظلمة الليل لبلاصتو بعدما كايطيرو الريح .. كل هاد الافعال كايدلو على عصبيتها و قلة صبرها .. وقفات حركة رجليها بعدما سمعات صوت تلفونها كايصوني ، خرجاتو من صاكها و جاوبات بلا سلام و لا كلام !

..... : وي !

..... [ تسمع صوت انثوي مرتابك ] : جوري عافاك أبنتي جيبي ليا معاك الدوا د الضرسة را خوك كايموت بالحريق !!

جوري [ قلبات عينيها و بتاسمات بسخرية و هي كاتشوف فالبلوكاج ] : همم واخا !

كلمة وحدة كانت كافية باش تقطع .. من حركة عينيها تعرفها مكلفتاش نفسها تاخد المتصل على محمل الجد .. أو بعبارة صحيحة ما مهتاماش لهاد المكالمة ..
رجعات لنفس وضعيتها كاتدور عينيها بقلق .. ملامحها ناعمة خلقوا للتأمل ، كايبعثو راحة خاصة لأعين الناظرين .. و لكن عينيها كايقولو حكاية خرا ، ماشي ديك الأنثى الناعمة .. انطباع لي يخليوه فقط ملامحها يظهر ...

بعد عناء طويل قدرات توقف طاكسي و تقصد الوجهة لي باغا .. لي يشوفها كيف كانت مستريسيا غادي يفكر انها معطلة على خدمة ضرورية ، و لا شي غرض مهم .. ولكن وجهتها كانت غير البحر ! ..

جوري [ نازلة من الطاكسي و هي كل عينيها على لبحر ] : شحال عندي ؟!

خلصات الطاكسي مصوبة عينيها لوجهة وحدة ... تحركات جيت لاكوط لبحر بخطوات رزينة .. و ترسمات شبه ابتسامة طفيفة على ثغرها الوردي ..

دازو ساعات كتيرة و هي تما ، تمشات على رملة و خدات أنفاسها .. معرفاتش شحال داز دالوقت و محساتش امتا طاح الظلام .. هاد الاخير لي فيقها من سهوتها .. تلفتات عند الوليدات لي كانو كيلعبو كورة جنب البحر .. تا قشعات واحد فيهم لي قاصدها ..

: لخوادرية الله يحفظك شحال ساعة

جوري [ طولات فيه الشوفة و خشات يدها فالصاك جابدة التيلي ] : هادي لحداش لاروب ..

: الله يحفظك الخوادرية

تفكرات أنها تعطلات و داز الوقت لي خاصها ترجع فيه للدار .. تمشات بخطواتها باغا تاخد طاكسي من جديد لي حطها هاد المرة حدا للباب .. فحي شعبي من الأحياء العادية .. وقفات قدام دارهم كاتشوف فيها و كاتعبرها بنظرات باردة .. كيف وقفات ردات لبال لشي حد طل من الشرجم .. و كيما توقعات تحل لباب قبل ما تحلو هي ...

لطيفة ( الأم ) [ كاتمة غضبها ] : فيين كنتي حتال هاد الوقت ؟؟! ... عرفتييه مرييض ياك عرفتيه مريض !! فين الدوااا ؟!