جوري بلعات ريقها بتوتر كاتشوف فعينيه مباشرة .. قلبها نبض بسرعة على إثر هضرتو لي ما فهمات منها إلا " inferno " لي عرفات انها كاتعني جحيم .. هضرتو رغم انه ما مفهومش بالنسبة ليها الا انه خلق رعب كبير فداخلها .. هو براسو ولا كايخلعها .. كل مرة كايبين ليها وجه فشكل و شخصية مختالفة .. ديما صادمها بافعالو و ردود فعلو و تصرفاتو .. للحظة شكات أنو عندو انفصام فالشخصية بسبب هاد التغيير لي كايتبدل بين ثانية و اخرى .. ستجمعات كل شجاعتها و طاقتها و نطقات ..
جوري : كاتهضر بالإيطالية باش ما نفهمش اش كاتقول ياك !
آرون [ ببرود ] : هادشي ماكايعنيكش و ما خصكش تفهمي و عمرك أتفهمي شي حاجة ..
جوري [ رفعات حجبانها فيه بغضب ] : مالك كاتسحابني مكلخة ؟؟
آرون [ طلعها و نزلها و نطق بنبرة مستفزة ] : بحال داكشي !
جوري : ما عنديش خاطر نتعاطا معاك .. خاصنا ندويو على المهمة لي سيفطتيني ليها !! واش تعمددتي تدير ليا داكشي !!
آرون : ما سحابليش كاتبغي الخدمة تا لهاد الدرجة ! ماغاديش ندوي معاك على الخدمة مادام انني خارج أسوار المعسكر .. لي نقدر نقوليك هو أنه تعطاتك مهمة و ما كنتيش قدها .. [ شاف فيها باستفزاز و نطق و هو مورك على الكلمات ] فشلتي المشة !
جوري [ تحركو عينيها بعدم تصديق ] : نت..نتا لي عيشتيني داك الكاابوس نتاا ! غاندوويووو أ آروون غاندويوو ما عندك فين تهرب مني .. خصناا نهضروو ماكايهمنيش فين حنا ..
آرون [ شاف فيها مطول و نطق ببرود ] : استمتعي بعطلتك المشة ! تانرجعو للمعسكر را ما ناسيكش و مازال ما سالينا [ غمزها بخفة ]
رما عليها كلماتو و تمشا مبعد عليها و هي غير كاتشوف فيه .. رجليها فشلو عليها و طاحت على الارض ما متيقاش هادشي لي كاتعيشو .. عمرها تخيلات انها غاتتوحش لطيفة و حياتها معاها .. بغات ترجع لحياتها السابقة و ما عارفاش كيفاش ، ملات من هادشي لي كايوقع ليها .. قوتها ما تقدرش تستحمل هادشي كلو و موحال تصمد تا لآخر المعركة معاه هو بالخصوص ..
سمعات صوت شي حد جاي باتجاهها بالزربة و ناضت من بلاصتها كاتطل براسها .. لقات سمية حالتها حالة بالبكاا و ماكياجها خسر ليها و ساح على وجهها .. تقدمات هي بدون شعور عندها شداتها من ذراعها كاتتفحصها بقلق ..
جوري : عمتي مالكي أش واقع ؟؟ علاش كاتبكي !!
سمية [ كاتبكي من قلبها ] : عتقي ريماس أبنتي عتقي ريماس ..
جوري [ اللون مشا ليها من وجهها و غوتات ] : مااال ريماااس !! اش وقع ليها ؟؟
سمية : ما عرفتش اشنو بينها و بين سيف و لكن را هو من الصبح كايتحلف عليها و كايقول ما دارتش بهضرتي .. داها ابنتي داها .. ضرب ادهم لي كان معاها و جرها من شعرها موراه .. عتقي أبنتي عتقي ..
VOUS LISEZ
جحيم وجدك بلاء
Action•••••••《 Exclusively 》•••••• #قصة_العيد 💕 بأنامل✍️ : إيمانويلا & نهيلة النوري ( دودو & نونا ) .. ♡ جــحــيــم وجـــدك بــلاء ♡ .. ~~ 𝐑𝐎𝐔𝐒𝐒𝐎𝐔 𝐅𝐀𝐌𝐈𝐋𝐘 ~~ صدق من قال : " حين نعشق لا...