أما عند ميانيس لي كانت متكية على ناموسيتها كاتقلب فتصاور إياد لي كايحطوهم ليفان ديالو فإنسطا .. حطات التيلي كاتفكر فالليلة لي دوزوها مع بعضياتهم ، هادشي خلاها تبتاسم لا إراديا و الفراشات يدغدغو معدتها .. حاجة اخرى كانت شاغلة بالها من غير لحظاتها الزوينين معاه هو صوتو الزوين فالغنا .. ما عرفاتش علاش و لكن حاسة بيه أنه هو المغني المقنع لي كايكون فنفس الكلوب لي كايعمر فيه إياد .. الشكوك بداو كايغزيو عقلها و الفضول كاياكل فيها باغا تتأكد من صحة شكوكها .. هزات تيليفونها مسولة احدى صحاباتها على داك المغني ، لي بالصدفة كانت عندو حفلة اخرى فالكلوب هاد النهار .. بتاسمات و هزات التيليفون مدوزة نمرتو كاتصوني عليه ..
أما هو لي كان مزال كايصوك متاجه للكلوب نيت و عقلو كايفكر غير فكاترين و علاقتو معاها ، من صغرو حاسبها غير صديقة ليه و لكن فاش كبرو و عتارفات ليه بحبها ما قدرش يجرحها و يرفض حبها .. خصوصا انو واليديها هوما لي رباوه و نقذوه من الشارع و كانت اخر وصية ليهم انه يتهلا فيها .. ماكايحس معاها بوالو من غير انها عزيزة عليه و صافي .. قاطع تفكيرو صوت تيليفونو كايصوني ، غير شاف سميتها فالشاشة بتاسم لا إراديا و نسا كاترين فمرة .. جاوب و دار هوطباغلوغ ..
إياد [ مبتاسم ] : وافييين السكايرية !
ميانيس [ قلبات عينيها على هاد اللقب ] : وا قلت ليك ما نكونش كتر منك ! فينك ؟؟
إياد : مازال ما تعلمتي تقولي السلام لاباس عليك ؟؟
ميانيس : على نتا قلتي ليا السلام باش نرد عليك انا و نسول على حالك !!
إياد : حيت وجهك ماشي دالسلام السكايرية .. أش بغيتي !!
ميانيس : غاتندمني حيت صونيت عليك !!
إياد [ ضحك بخفة ] : ما تقلقيش mi cariño ! قول ليا أش حب خاطرك نحضرو ليك !
ميانيس [ بتاسمات ] : عندك شي وقيتة فالليل نخرجو !
إياد [ ضورها فعقلو مزيان و نطق ] : واخا ايلا ما كانش نلقاه على قبلك mi cariño ! فين بغيتي نمشيو ..
ميانيس [ كاتلعب فشعرها ] : كاينة حفلة فالكلوب دواحد المغني كايعجبني غاتكون سامع بيه .. داك المغني المقنع ! نمشيو نحضرو !!
إياد [ خفف السرعة دالطوموبيل و هو عاقد حجبانو ] : قلتي مغني مقنع ياك !! كانشوفو تم مرة مرة .. اه نمشيو علاش لا !
ميانيس [ تخربقو شكوكها تاني من ردة فعلو و لكن ما بينات والو ] : صافي نتلاقاو تما .. تشاااو مياامور ..
ما خلاتش ليه الفرصة فين يرد و قطعات عليه مخلياه كايضحك عليها .. ناضت بالزربة للحمام دوشات بالخف .. و لبسات كسوة فالخزي لاصقة عليها حد فخاضها و بلا كمام .. دارت فوقها جاكيطة دالجلد كحلة و لبسات بروتكان عاليين .. وضعات آخر لمساتها على إطلالتها و خرجات من بيتها نازلة للتحت باغا تخرج .. يالاه كانت اتفوت العتبة دالباب وقفاتها راوية بصوتها ..
VOUS LISEZ
جحيم وجدك بلاء
Aksi•••••••《 Exclusively 》•••••• #قصة_العيد 💕 بأنامل✍️ : إيمانويلا & نهيلة النوري ( دودو & نونا ) .. ♡ جــحــيــم وجـــدك بــلاء ♡ .. ~~ 𝐑𝐎𝐔𝐒𝐒𝐎𝐔 𝐅𝐀𝐌𝐈𝐋𝐘 ~~ صدق من قال : " حين نعشق لا...