انا العذباء

الفصل 29

‏رحلوا وما أبقى الرّحيلُ متاعا
تركوا الحنينَ مع الأنينِ مشاعا

ياليتهم قبل الرّحيلِ تريّثوا
حتى نُعانِقَ أو نقولَ وداعا

رباهُ ما أقسى الفراقَ... وإنني
من يوم غابوا ماطرِبتُ سماعا

لحنُ الرحيلِ من الأنينِ مواجِعٌ
عُزِفتْ بتذكارٍ يجىءُ سُواعا

بقلمي شذرة العدوان

flash back فلاش باك

دموع :جاي العب حبل بالحديقة
وسبع گبالي راكب الفرس وابويه والمدرب يمه يعلمون بي
امي واگفه بالباب وادحگ علينه بحب
لگحتلي بوسه بالهوى وبادلتها واني اضحك ومكيفه

جان دلال ابويه مغرگنه بحيث ما يخلينه نحس نفسنه بسجن خاصة امي دللها جثير شتطلب يگول تم ويجيب الضعف
حت بيوم طلبت منه عصافير ثنين
راح جابلها قفص جبير مليان اشكال العصافير
وجابلها ببغا عبنها تحب الحيوانات وخاصة الطيور
ما يكمش عليها شي
الفلوس كلها گدامها وعدها نسخه من مفتاح القاصة تفوت تاخذ فلوس ودز لأمها ما يسولف وياهه ابد

جانت تلعب ويانه عبالك جاهل مثلنه ما فد يوم تعصبت ولا علت صوتها علينه رغم اني وسبع مجلوبين ما نگعد النهار كله مكاون ونگلب البيت

جنت اشوف امي اسعد انسانه وما ناقصها شي
ولا سمعتها يوم تشكي وتطلب من ابويه تا تطلع گاعده وساكته والحال مستمر لا نشوف ولا ننشاف حدنه المدرسة نروح بالبوگه ونرجع بالبوگه وليش محد يعرف

حت اذا صار صدفه واجه واحد من عمامي الي ما اشوفهم بس بالصور يجي الحارس يخبرنه ويگومن امي وجده نجمه يلمن شكو لعبه النه
وشكو غرض ويطلعنه من الباب الوراني نفوت ابيت هوه هم للنه بس فارغ نظل بي ليما عمامي يروحون

جنت احب ابويه جثير وذا اسمع حسه من يجي
اروح ركض اتلگا گبل سبع وهوه يحبني ويفضلني بكلشي ما فد يوم يجي اذا مو جايبلي شي ويا

بس بيوم ضجت منه وحسيت تجاهه بالكره
بسبب الي سواه جان متعصب
يكسر بالبيت ويحجي على امي ما خله وهيه ساكته وتبجي اخر شي كمشها من رگبتها ورفعها عن الگاع
لوما اصيح ويشوفني جان موتها وكل هاذ عبن امي حبله ومخفيه عنه

ظل مجفيها لحد ما ولدت عمار
فات ابويه وشاله من گفه خشمه واذن بأذنه تحمد لأمي بالسلامه وطلع وظل نفس طبعه هاجر امي ما يسولف وياهه وهيه ساكته وما تحجي تكمت بداخلها

لحد بيوم طلعت تا اروح عالحمام بالليل وسمعت امي تسولف وتصيح استغربت رحت على حجرتها
جان الباب مفتوح عالنص كمشت حافة الباب وادحگ جانت منهاره تحجي ويه ابويه بعصبيه وعيونها بعيونه وهوه جاتف ادينه وراه ومركز بيها
اول مره اشوفها تعلي حسها گدامه ومنفعله