"ما هذا العالم الذي يستطيع أن يرسل آلات للمريخ ولا يستطيع أن يفعل أي شيء ليوقف قتل الإنسان."
-
يحيى قعد يقره عشان يعرف ده دواء شنو
لقا في الوصف انو دواء حق منع الحمل
يحيى استغرب شديد
رجع الدواء مكانو و طلع
نادر:اها.. نطلع؟عايز أمشى اشوف روعه وين
يحيى:تمام
يحيى طلع و معاهو نادر
يحيى:قاعد اشوف اللايفات حقتك.. ماشي كويس شديد و الله
نادر:قاعد احاول انى اوصل فكرتي للناس و انى اكون انسان احسن
يحيى:استمر..
يحيى ركب العربيه و اتحرك
بعد ربع ساعه وصل بيتو
كان بيت متواضع جداً
اول ما دخل لقا امو نايمه في الصاله
قعد جمبها و فضل يعاين ليها
بعد مسافه هيا صحت
وداد:يا ولدي.. رجعتا؟ ؟
يحيى:اي
وداد:شفتا اخوك.. ما عايز يجي يسلم علي، نادر زهج مني؟ حتى ما بجيب مرتو.. ليه؟
يحيى كان بعاين ليها بنظره حزينه شديد
يحيى:آسف..اكيد ح يجي يوم و يتونس معاك و انا كمان قاعد أنشغل كتير اعفى لي..
وداد:ما مشكله.. اخوك ياسر كل يوم بتونس معاي و كمان هديل اختك.. بس ابوك ماف
يحيى عيونو دمعت
يحيى:ربنا يرحمو يا أمي
وداد:تتذكر.. هِنا هو مات
وداد كانت بتأشر بأصبعها على الأرض
وداد:ليه.. تعب مننا صح؟
يحيى:مكتوب يا أمي
وداد:حسي ح يجيب العيش.. حسي حا يجي
يحيى حضن امو و هيا كانت لسه بتتكلم
وداد:حسي اعمل ليهو اكل شنو؟يا رب يجيب معاهو فول
يحيى كان ساكت و بسمع فيها
عدم تقبلك لموت إنسان عزيز
امكن دى اسوء حقيقه الناس بتعيشها
بنحاول نبقا كويسين
بس لا قلبنا و لا عقلنا كويس!!
يحيى دخل غرفتو و رقد
غمض عيونو و كان عايز ينوم شوية
...
#عنده_لونار :
