راح هيوك الاوضه عشان يرتاح من الصداع بس للاسف مش راضى يروح منه .. وفى النهاية قرر يدور على مسكن .. بدا يدور فى الادراج فى الاوضه .. وفى ادراج سينا كمان بس ملقاش خالص .. خرج يشوف اي بنت من اللي بيبقو واقفين ف الممر .. فجاه الممر قلب صحراء جرداء مفيهوش اي بنت زي ما يكونو متفقين عليه
هيوك ف سره : الفقرى فقرى .. يعنى الممر دايما بيبقى مليان بنات .. انتم بتختفو ف اوقات غلط
قرر هيوك انه يروح يشتري من الصيدليه اسهل من انه يستني اي حد .. نزل وراح ف طريق الصيدليه
الصيدليه ف نفس طريق الجامعه بس في الاتجاه المعاكس ليها .. لسه هيدخل الصيدليه لقي كيونا طالع من باب الجامعه وراح ناحيه محطه الباص اللي جانب الجامعه
هيوك بيكلم نفسه : كيونا .. هو لسه ماشى دلوقتى .. ده المحاضرات خلصت من بدرى .. انا هشغل نفسى بيه ليه .. هو كان من بقيت اهلى
وقبل ما يلف عشان يدخل الصيدلية .. لقي سينا خارجه ورا كيونا وباصه عليه وهي ماشيه وراه .. وقف كيونا عند الموقف وهي وقفت بعيد عنه شويه وعماله تبص عليه وهي منشكحه قوي .. وكيونا ولا هو هنا اصلا مش واخد باله من البت خاااالص .. لحد ما جه الباص ركب كيونا و مشي الباص .. بصت سينا عليه شويه و بعدها مشيت هي كمان وهي باصه علي الارض
هيوك وهو بيراقب الموقف ده : هي البت دى بتراقب الواد ولا ايه ؟.. احييييه هي وصلت بيها انها تمشي وراه ف كل حته حتي وهو مروح .. اهاااااااااااا علشان كده بتتاخر ومش بترجع الاوضة بسرعة ..شكلها مش بتمشي غير لما هو بيمشي الاول .. البت دي مجنونه ازاي تعمل كده هي فاكره انه كده هياخد باله منها .. اااااااه دماغي صدعت اكتر منك لله يا شيخه .. يقطع الحب و سنينه .. قال الجمله الاخيره بصوت هيون وبعدها دخل الصيدليه يشتري المسكن
رجع هيوك الاوضة لاقى سينا قعدة قعدتها المفضلة وسط كتبها .. بصلها وابتسم ابتسامة جانبية بتريقة وراح غير هدومه واخد المكسن .. وقعد ع سريرة وبصلها
هيوك بصوت هيون : قوليلى يا سينا يا اختشى
انتبهتله سينا وبصتله : نعم
هيوك : احنا بنخلص محاضراتنا مع بعض .. ايه اللى بياخرك .. ده انا حتى بعد ما بخلص المحاضرات بتاخر شوية .. وبرجع الاقيكى مش موجودة .. بتروحى فين كل ده ؟
سينا بتوتر : بـ .. ببـ .. بروح الـ .. المكتبة
هيوك : اااااااااها قولتيلى .. المكتبة .. مكتبة ايه اللى هتفضل فاتحه طول الوقت ده
سينا بلجلجة : انتى بتسالى كتير ليه .. من امتى الاهتمام ده ؟
هيوك بسخافة : مجرد فضول .. حبيت اتطمن عليكى بس .. مش احنا اصحاب بردو
سينا : اه اصحاب
هيوك : عموما ابقى حاولى متتاخريش .. ممكن يكون فى حد ماشى وراكى او بيتربصلك .. متضمنيش الدنيا فيها ايه .. والناس كمان مش مضمونة .. ممكن تلاقى حد بيتصرف بطريقة متتوقعيهاش
بلعت سينا ريقها : قصدك ايه بالكلام ده ؟
اتعدل هيوك وحط راسه على المخدة : ولا حاجة .. انا بس بنصحك عشان خايفة عليكى
سينا : انتى هتنامى من دلوقتى ؟
هيوك : اه اصلى مصدعة وهنام شوية .. مش عايزة دوشة
سينا : ومن امتى وانا بعمل دوشة .. مانتى دايما نايمة
هيوك : اقعدى ارغى بقى وخليني معرفش انام
أنت تقرأ
oh boy oh girl
Hài hướcعالم البنات مختلف تماما عن عالم الشباب كل واحد منهم بيفكر بطريقة وعايش بطريقة تانية مختلفة .. محدش يعرف سر العالمين دول حتى الاخوات نفسهم ملحووووظه: القصه b×g يعني مش كابل يا جدعااااااان.. استمتعو ^_^
