حبيبه من نوع اخر

ال2

الفصل ال2

(مين اللي قال ان القدر ما عندوش تدابير خاصه بيه وانه لما يحب يجمع ما بين قلبين هيعمل كده حتى لو بعدت المسافات في الوقت ده كان ماجد وعيلته ومؤمن وصلوا لمنزل عمه عز الدين في الصعيد نزلت وقتها ود وجريت بسرعه خدت نجمه في حضنها ووشوشتها في ودنها.

ود: كل واحد في الدنيا ليه نص ثاني وانا جبت لك نصك التاني وانا جايه يا ريت بقى ما نضيعهوش من ايدينا ها.

نجمه: كيف يعني يا ود تجصدي ايه بحديدك ده..ونص ايه اللى بتكلمى عنه.

ود: بعدين هتفهمي كلنا هنفهم كل حاجه بعدين مش لازم كل حاجه يعني تعرفيها في وقتها.

نجمه: ما انا ما بحبش حد يعلجني اما تجولي حاجه جوليها كامله ما تخلينيش افضل جاعده مستنيه اعرف.. ما تطلعيش روحى وتحلونى بدنى.

ود: خلي عندك صبر كل حاجه هتعرفيها في وقتها يا عسل.

(كلام ود خلي عقل نجمه ما بطلش تفكير ولكن ما بينتش عدى الترحيب على خير وكلهم دخلوا جوه وقعدوا عشان يتغدوا وبيتكلموا مع بعض براحه.

عز: يا مرحب يا مرحب والله بعوده يا جماعه بجالنا كتير ما تجمعناش إكده على طبليه واحده ما تعاودش الغيبه دي تاني واصل يا شرف والله اتوحشناكم وبعدين احنا اخوات لو ما ودناش بعضينا نود  مين امال.

شرف: والله يا اخويا انت على بالي على طول بس بيبقى غصب عني الشغل ما بيخليناش نعرف نرفع راسنا وفين وفين لما ناخد اجازه وبنروح جايين لك على طول يعني هنروح فين يعني هو فيه احلى من جو البلد طب احنا حتى ما بنرتاحش الا هنا.

ماجد: بابا عنده حق يا عمي ده احنا حتى عشان نيجي النهارده كل واحد فينا وزع الشغل اللي ماسكه على موظفين ثانيين وكل ده علشان ما تزعلش بس هو احنا يعني لو ما عملناش علشان خاطرك هنعمل عشان خاطر مين ده انت غالي علينا قوي يا عمى وانت عارف.

صفيه: طول عمرك ولد حلال يا ماجد وكلامك كيف العسل ربنا يخليهولك يا فاديه معلهش بجى يا ولدي ان احنا جبناك على ملا وشك اصل عمك ما بيأمنش لجنس بني ادم غير اهله واهي فرصه عشان نتونس بيكم شويه بعد الوجت ده كله غياب.

ود: ما تقلقوش يا مرات عمي بعد كده هنشوف بعض اغلب الوقت وكمان كويس ان النهايه هتبقى هنا بين اهلي كلهم انا والله مش هلاقي احسن من كده نهايه ولا انسب من كده مكان اختم فيه.

شرف: نهايه ايه يا بنتي انا نص كلامك ما بفهموش ومش عارف انتى كل كلامك بقى الغاز ليه كده تقصدي ايه بكلامك يا حبيبتي.

صفيه: وانا كمان رايده افهم يا بنتي جصدك ايه بالحديت ده.

فاديه: مش فاهمه يا صفيه البنت دي هتجنني والله ده حتى النهارده قبل ما شرف يكلمني اصلا ويبلغني ان انا هنسافر لقيتها بتقول لي اننا لازم نقوم نجهز شنطتنا علشان هنسافر البلد وهنقعد كثير مش عارفه عرفت ازاي ولا جابت الكلام ده منين لكن انا اتخضيت لما لقيت شرف بيكلمني وبيقول لي نفس الكلام اللي هي قالته وما بقتش عارفه اقول لها ايه.