حبيبه من نوع اخر

ال4

الفصل ال4

(فعلا ماجد ساب البيت ومشي وما سمعش من اي حد اترجاه انه ما يخرجش في وقت متاخر زي ده خصوصا ان الساعه كانت 2 بعد نص الليل كل واحد فيهم راح اوضته وساب ود ترجع تنام تاني ولما صحت نزلت قعدت تحت هي ونجمه مستنيين ماجد.

نجمه: انا مش خابره والله يا ود اللي حصل ده حصل كيف كل الكلام كان غريب ومش مترتب مع بعضه وما حدش فاهم مين اللي غلطان... بس ان جيتى للحج عمى شرف زودها جوي في الكلام مع ماجد جدامنا ما كانش يصح ابدا وبعدين كلامك وانتى نايمه كان يطير العجل.

ود: ما هوش ده اللي قالقني خالص يا نجمه انا بس عايزه اطمن عليه انتى بتقولي انه خرج من وقتها ومجاش يا ترى راح فين.

نجمه:ما خبراش والله بس هو ليه حج يضايج عموما الغايب حجته معاه..

( في الوقت ده كان ماجد ماشي بيتمشى في البلد غضبان لحد ما وقف على صوت عياط بنت وقف يبص حواليه شمال ويمين لحد ما وقع نظره على البنت الجميله دي اللي قاعده تحت الشجره جنب الطريق بتعيط قرب منها وهي رجعت لورا بخوف.

ماجد: خايفه من ايه تعالي ما تخافيش انا بس عايز اساعدك صدقيني انا مش انسان مؤذي ومستحيل اعملك حاجه وحشه.

فيروز: سيبني في حالي يا جدع انت هو في حد بيساعد حد في الزمن ده ما تجربليش احسن لك ارجع لورا وشوف طريجك وما لكش دعوه بيا عاد.

ماجد: وهو في حد بيقعد في الشارع في ساعه زي دى في الزمن ده مش تعقلي كلامك الاول قبل ما تقولي كده... ينفع قعدتك في الشارع في وقت زي ده لوحدك  وباللبس ده..

فيروز: هو يعني كان بمزاجي جوز امي هو اللى طردنى عشان..... مش مهم تعرف عشان ايه المهم ان هو طردني وخلاص و ده اللى خلانى فى ساعه زى دى عالطريج.

ماجد: خلاص ما تكمليش انا فهمت لا حول ولاقوة الابالله.... طيب انتى هتعملي ايه دلوقتي عندك مكان تروحيه او حته تباتي فيها عالاقل للصبح...

فيروز: مش عارفه والله انا ما عنديش مكان اروحه وكمان الوجت اتاخر جوي ومش هعرف اكلم حد من جرايبي يجيلي دلوك خالص.

ماجد: طيب قومي تعالي معايا وباتي عندي للصبح وبعدين ابقي شوفي انتى عاوزه تعملي ايه او تروحي فين وانا هوديك بنفسي مطرح ما تحبى يا ستى.

فيروز: نعم نعم ابات معاك فين يا اخ انت اتجننت ولا ايه هو انت عشان لجيتني يعني جاعده لوحدي هتجول عليا لجمه سهله هو ما فيش حد عنده ضمير اليومين دول.

( ضحك ماجد على كلامها وفهم انها فاكره ان عاوز يستغلها..

ماجد: ايه الكلام ده حيلك حيلك هو انتى فكرتي ايه... انا في البلد دي ضيف يا ستي اصلا عند عمي هنا... و ده بيت مليان ناس يعني اهلي واختي وامي ومرات عمي وبنتها مش هتباتي معايا لوحدي يا انسه ها تحبي تيجي معايا بدل ما تنامي في الشارع ولا اخد بعضى وامشي وخلاص.