حبيبه من نوع اخر

ال12

ال12

(خرجت فيروز من اوضه نجمه بعد ما اطمنت عليها وعرفت انها بقت كويسه دخلت اوضتها وقفلت على نفسها الباب وفجاه لقيت الرخم ده قدامها.

فيروز: انا كنت واثقه انها ما تطلعش غير منك انت بس... احنا ما اتفقناش انك تلعب بالقذاره دي لانك لو عاوز تلعب بالطريقه دي المفروض كنت تعرفني علشان انا كمان اتعامل معاك بنفس الطريقه.

حارس: كل شيء مباح في الحب والحرب واحنا دلوقتي في الحالتين المفروض تبقى عارفه الكلام ده مش محتاجه ان انا اقولهولك وبعدين هو انا عملت ايه يعني عشان الهوليله اللي انتى عاملاها دي.

فيروز: انت عارف كويس انت عملت ايه ومش محتاج ان انا اوضح لك ولو انا ما كنتش اتدخلت انت عارف كان ممكن يحصل لها ايه خلي بالك انا لحد دلوقتي ساكته عليك ومش عاوزه اخذ اي حركه ضدك لكن انا لو صبري نفذ ما حدش يسالني على اللي هعمله.

حارس: واضح ان قلبك قوي من بعد ما اللي اسمها ود دي ماتت وبقيتي بتتكلمي ببجاحه قوي وبقلب جامد شكلك عاوزاني اوريكي الوش الثاني برغم ان انا قلت لك بلاش تعصبيني وتخليني احطك في دماغي انتى وكل اللي حواليكى.

فيروز: لا هو واضح انك ما فهمتش كلامي صح عشان كده هقولهولك من اول وجديد... الخادمه اللي انت بعتها من عندك لجسم نجمه دي لو شفتها تاني قربت منها هي او غيرها انا هبعتلك هديه هتخليك تفضل تلعن فيا العمر كله بعدها احسن لك التزم بقوانين التحدي اللي احنا حطيناها ما بينا والا ما تلومش غير نفسك.

حارس: انا هلتزم بيها صحيح مش علشان انت هددتيني او اتكلمتى كده ابدا لا علشان انا بس كنت بوريكي اعرف اعمل ايه وخلاص اعتبريني من دلوقتي بلعب بنظافه.

فيروز: ولو اني اشك لكن هصدقك المره دي لاخر مره امشي ومش عاوزه اشوفك ثاني غير اليوم الموعود.

( خرج حارس في نفس الوقت اللي كان فيه باب الاوضه بيتفتح ودخل ماجد.

ماجد: انتى كنتى بتكلمي مين يا فيروز انا سامع صوتك من بره.

فيروز بتوتر: لا ابدا يا حبيبي انا بس لما ببقى متضايقه بتكلم مع نفسي شويه علشان اهدى في حاجه ولا ايه.

ماجد: هو انا لازم عشان اجي اسال عنك يبقى في حاجه انا بس جيت اقولك ما تزعليش من اللى مؤمن قاله اصلك مش عارفه مؤمن كويس.

فيروز: لا عارفه... عارفه انه فضل كثير قوي بيدور على حبه وما اصلوش ارتبط بواحده وان مالوش تجارب خالص ودايما كان بيحافظ على قلبه للوحيده اللي هيقابلها ويحبها وانه كان طول الوقت وحيد ومالوش حد يبقى جنبه ما تقلقش انا عارفه كل حاجه وعذراه على اللي هو عمله.

ماجد بصدمه: ايه ده انتى عرفتي كل الكلام ده منين اذا كان ما فيش حد يعرف الكلام ده عن مؤمن غيري وما اصليش سمعته بيحكيه لحد لانه بيزعل جدا من الكلام في الموضوع ده.