حبيبه من نوع اخر

ال11

ال11

(عدى الموقف من غير ما حد يعلق عليه برغم استغرابهم لفكره وجودهم عند الترعه وما حدش فيهم فاكر هما راحوا هناك ازاي وفيروز اتاكدت ان الخدعه نجحت وهما نسوا ايه اللي وداهم هناك كانوا لسه في الطريق مروحين بعد ما اشتروا كل طلباتهم بس هناك كان بيدور الحوار ده.

صفيه: مالك يا عز سرحان إكده ليه بجالك كام يوم حالك متغير ومش خابرة فيك ايه بتفكر في حاجه اياك.

عز: مش عارف يا صفيه حاسس ان في حاجه كبيره انا عارفها وكل ما افكر فيها الاجيها تطير من عجلى وكأني عاوز افتكر حاجه بس ناسيها.

شرف: على فكره لو حاسس بكده فعلا كثر التفكير هيتعبك انا ساعات بيبقى في حاجات بفكر فيها وناسيها ولما بقعد افكر فيها كتير ضغطي بيعلى وبتعب.

فاديه: اعمل زي ما ود كانت دايما بتقول.

عز: وهي ود كانت بتجول ايه يا مرت اخوي.

فاديه بحزن: كانت دايما ود لما تلاقيني سرحانه وبفكر في حاجه تقولي التفكير في الحاجات اللي احنا ناسيينها ما بيجيبلناش غير العيه والتعب طالما احنا نسينا الحاجه دي يبقى ربنا مش عاوزنا نفتكرها.

صفيه: هو انا هنسى في يوم كنتم جايين اهنه وبعدين هي لجتني واجفه في المطبخ وسرحانه جالتلي الحاجه اللي انتى بتفكري فيها مش اهم من يدك اللي ممكن تجطعيها وانتى سرحانه وبتطبخي وجتها انتبهت اني فعلا هدخل على صوابعي وانا بجطع الخضار ومش منتبهه وعرفت ان عندها حج.

شرف: قبل كده جاتلي المكتب في الشركه وكنت وقتها بتكلم بشكل جدى و بعصبيه مع موظف من الموظفين قعدت جنبي وبصتله وضحكت وهو ضحك غصب عنه وبصتلي ثاني وقالتلي قبل ما تزعقله وقبل ما تقوله مخصوم منك اسبوع اساله ايه الظروف اللي خلته يتاخر مش يمكن تكون مراته كانت بتولد ولا حاجه.

عز: كيف ده طيب والموظف كانت ظروف تاخيره ايه في النهايه يا اخوي.

شرف: مش هتصدق اول ما هي قالت كده الموظف استغرب قوي وقالها حضرتك عرفتى منين وقتها انا بصتله باستغراب وقلتله عرفت ايه هي مراتك فعلا كانت بتولد قالي ايوه كانت بتولد علشان كده ما قدرتش اسيبها واجي وقتها هي بصتلي وضحكت الضحكه دى عمري ما هنساها وقالتلي المفروض بقى دلوقتي تديله خصم ولا تديله علاوه عشان النونو الجديد.

صفيه: وانت اتصرفت كيف.

شرف: اديته علاوه ورقيته ودلوقتي هو اللي شايل الشغل كله على كتافه ولما هي عرفت ان انا عملت معاه كده قالتلي ابني لنفسك كتف تتسند عليه وقت ما تحتاجه ما تحطش في طريقك مسامير لو جيت تمشي تعورك كانت بتقول حكم يا عز.

(كانوا لسه بيتكلموا وبيفتكروا كل حاجه تخص ود اللي ما حدش قادر ينساها لحد ما دخل عليهم ماجد ومؤمن ومعاهم نجمه وفيروز وهم جايبين كل اللي ناقصهم.