حبيبه من نوع اخر

ال15

ال15 والاخير

(حاول ماجد انه ما يركزش في موضوع انه فضل ست ساعات بيقرا الجواب ومستغرب من الموضوع ده لكن قال فى عقل باله ان اكيد ده من فعل فيروز دخل خد دش وغير هدومه ونزل على طول.

عز: ايه يا ولدي كل ده علشان تنزل تجعد معانا شويه على اكده بجى اللي عاوز يشوفك لازم يجيب تصريح

ماجد: معلش يا عمى راحت عليا نومه بس كنت مرهق والله

شرف: ولا يهمك يا حبيبي المهم احنا المفروض ننزل مصر كفايه بقى قعدتنا هنا

صفيه: اخص عليك يا حاج شرف هو احنا شايلينك فوق روسنا ده انتم منوريننا ومالين علينا الدار والله وبعدين تنزل كيف ما تجوله حاجه يا عز.

عز: انا مش عارف هو ناسي ولا عاوز يغيظني منه وخلاص

شرف: ناسي ايه مش واخد بالي

نجمه: فرحى يا عمي هو مش فرحي الجمعه الجايه ولا انت مش ناوي تحضر ان شاء الله... على فكره لو مشيتوا دلوك انا مش هتجوز

مؤمن: لا والنبي ده انا ما صدقت انا ما ليش دعوه بالكلام ده هما يعملوا اللي هما عاوزينه المهم انا اتجوز

نجمه: وانا جلت كلمه وهى كلمه وخلصنا وانا دماغى جفل صعيدى مسوجر.. لو مشيوا مش هتجوز

مؤمن: انقذوا مستقبلي يا عم علشان خاطري خليك

فاديه: احنا قاعدين

شرف: الله..!!! هو مش انتى اللي قلتيلي الصبح احنا قعدتنا هنا طولت المفروض نرجع غيرتى رايك ولا ايه

فاديه: ما غيرتش رايي ولا حاجه بس انا لازم ابقى جنب بنتي وهي بتتجوز بعد ما اطمن عليها نرجع انا وهي وجوزها مصر انما دلوقتي هفضل معاها لحد ما اطمن عليها

شرف: والله يا حاج عز انا كنت بتكلم بناء على كلامها بس انت عارف الحريم كل شويه بكلمه

عز: ولا يهمك يا اخوي المهم البت بتك والواد ولدك يبجى الفرح الجمعه الجايه.

ماجد: وانا عاوز بردو اخذ رايكم في حاجه او بمعنى الاصح ابلغكم قراري بشيء

شرف: ربنا يستر من قراراتك يا ابني ما بتفائلش لما بتقول عاوز ابلغكم قرار

ماجد: يبقى ابشر يا بابا اعتقد انك هتبقى اول معارض بس لو عاوز تخليني مبسوط وافق على الكلام اللي انا بقوله

عز: مش لما تجول الاول يا ابني ونشوف الكلام ينفع يتوافج عليه ولا لاه.

مؤمن: انا حاسس اني عارف هو عايز يقول ايه

نجمه: لو ود كانت اهنه دلوك كانت جالت انا عارفه انت هتجول ايه وكانت جالتلنا اللي هو رايد يجوله جبل ما ينطج بيه.

ماجد: هههههه عندك حق هي فعلا كانت بتعرف كل حاجه بس انا ما كنتش مقتنع... ما علينا انا هسافر