حبيبه من نوع اخر

ال8

الفصل8

(كلهم كانوا قلقانين جدا وبيطمنوا على صحه فيروز والغفر اكدوا لهم ان الحريقه اتطفت رغم صعوبتها وانهم ما كانوش شايفين النار من الدخان قعدوا شويه يرتاحوا لحد ما وقفت فيروز فجاه.

فيروز: ود...!! لازم نطمن على ود احسن يكون حصل لها حاجه من الدخان احنا ازاي لسه قاعدين لحد دلوقتي من غير ما نطمن عليها.

ماجد: فعلا ازاي نسينا حاجه زي دي انا حالا هطلع لها.

فاديه: كلنا هنطلع لها.. يلا يا شرف نشوف بنتك حصل لها ايه يا حبيبتي يا بنتي نسناكي في وسط الزحمه.

(كلهم طلعوا يجروا ناحيه اوضه واول ما اقتحموا الاوضه لقوها نايمه على سريرها راحت فيروز طلعت تجري قعدت جنبها تهزها بقوه.

فيروز: ود.. ردى عليا عشان خاطري قولي انك لسه عايشه ما متيش انتى ما قلتيش ان الوقت هيجي بسرعه كده ردى عليا بقى.

نجمه: ايه الكلام اللي بتجوليه ده عاد.... فال الله ولا فالك بعدي عنها انا هشوفها.... ود جومي يا حبيبتي جومي فوجي جوليلي ان انتى مليحه.. يا ود فتحي عيونك طمنيني عليكى... ما بتصحاش يا مرت عمي.

(قربت فاديه بسرعه من بنتها لما لقيتها ما بتصحاش وقعدت جنبها

فاديه: ود حبيبة ماما ردى عليا يا قلبي انتى نايمه زي عادتك صح.... ما تردي عليا يا ود انتى اكيد هتقومي دلوقتي وتردى عليا زي كل مره.

( اتقدم ماجد عشان يحاول يصحى اخته ولسه هيحط ايده عليها فتحت عينيها بصعوبه وبصت لهم.

ود: ايه اللمه دي يا ماما هو انا كل ما انام شويه تعملوا اللمه دي حواليا هو المؤتمر بتاعكم ده ما ينفعش ينعقد غير في اوضتي بجد انتم ما فيش عندكم اي حس للخصوصيه في البيت ده.

فاديه: حرام عليكى يا بنتي نشفتى دمة هو انتى كده تبقي نايمه.. اخص عليكى يا ود كل مره تعمليها فيا واصدقك.

ماجد: كده خضتيني عليكى ينفع كده يعني ما تقومي بقى يا بت ده اخوكى هيتجوز ويبقى عريس ولا انتى مش عاوزه تنقي معايا البدله وتنقي الفستان مع فيروز لا بقولك ايه انا مش هعمل حاجه من غيرك

ود: الف مبروك يا حبيبي.. ماجد بقولك ايه خرجهم كلهم بره وخليك انت ونجمه وفيروز ومؤمن عايزاكم في كلمتين على انفرا لازم اقولهم... معلش يا جماعه هاخدهم منكم شويه وما تاخلوش الفضول يغلبكم اكيد يعني هما هيقولولكم انا قلتلهم ايه

( كلهم قلقوا من طلب ود الانفراد بالاربعه دول بس لكن ما حدش فيهم علق على كلامها وخرجوا وقفلوا الباب وراهم اتعدلت ود في قعدتها على السرير بس كانت لسه ممدده زي ما هي.

ود: قبل ما اتكلم عايزاكم تعرفوا اني مبسوطه قوي انكم كلكم كنتوا ناس مهمه في حياتي ومهمين جدا كمان ويا رب اكون كان عندي حق في اللي قلته ليك يا مؤمن عن نصك الثاني لما قلت لك انه بعيد لكن هيبقى اقرب الناس ليك وانك لو صبرت هتلاقي اللي بتتمناه.