حبيبه من نوع اخر

ال3

الفصل ال3

(وفي بيت عز الدين كانت القاعده في الصالون كامله لما كانت صفيه وفاديه مع نجمه وشرف الدين وود كمان بيتكلموا بس ود ما كانتش مرتاحه وبتتحرك بشكل هستيري وفاديه خدت بالها.

فاديه: ما تقعدي يا بنتي هتفضلي رايحه جايه كده كتير خيلتيني والله هو انتى مستنيه حد جاي ولا حاجه.

ود: عايزه اطمن يا ماما طلع ولا اتشبك قلبي مش مرتاح وعاوزة اشوفه قدامى عشان احدد حصله ايه..

شرف: هو مين ده يا بنتي اللي طلع ولا اتشبك وطلع منين انتى كلامك بقى غريب يا ود وبقيت بقلق عليكى.

ود: ماجد يا بابا المفروض يجي بعد دقيقتين بالظبط بس انا مش قادره اصبر عاوزه اطمن عليه واعرف ايه اللي حصل قبل ما اطلع انام..ومش قادره اصبر.

صفيه: والله يا بتي انتى امرك غريب محيرني بتتكلمي كأن في حاجه عفشه حصلت وانتى عارفاها طيب ما تطمنينا معاكي.

ود: اطمنكم ازاي بس وانا قلقانه اما اطمن هطمنكم.

نجمه: طيب وانتى ايه اللي عرفك ان ماجد راجع كمان دجيجتين بالظبط انتوا اتكلمتوا ولا حاجه ولا انتى بتجولي إكده وخلاص.

( ما كانش الكلام خلص ما بينهم لما دخل ماجد ومؤمن ومعاهم عز واول ما كلهم شافوا منظر ماجد ومظهره الغريب استغربوا جدا وبصوا لود اللي طلعت تجري ناحيه اخوها تطمن عليه.

ود: الحمد لله انك بخير بصلي يا ماجد.. ماجد بقولك بصلي في عيني عاوزه اطمن عليك واعرف حصلك ايه.

ماجد: اهو يا ود بصيت في عينيكي اهو عايزه ايه ما انا كويس وزي القرد قدامك يا ستي مفيش غير الريحه المعفنه اللى لزقت فيا دى..

( بصت ود بتمعن في عنين ماجد وبعدين رجعت لورا شويه وهي قلقانه وباين على وشها الخوف.

ود: العقل بس اللي كويس كل شيء نصيب ومحدش بيهرب من قدره مكتوبه ليك يا حبيبي وانت جيت مخصوص عشان قدرك ده ما فيش حد بيغير نصيبه يا ماجد ولازم ترضى بيه للاسف.

( كان كلام ود غريب جدا لدرجه ان كلهم بصولها وهما مش فاهمين حاجه ماجد بصلها بقلق.

ماجد: مالك يا ود انتى تعبانه ولا حاجه ايه الكلام الغريب اللي انتى بتقوليه ده انتى شكلك لسه مخضوضه عليا ما تقلقيش انا كويس والله اخد دش بس وافوق على طول واقعد ارغي معاكي للصبح يا ستي انما لو فاكرة انى حصلى حاجه متقلقيش انا تمام اوى والله.

ود: اكيد هتاخد دش واكيد هترغي معايا بس مش هتفوق يا حبيبي انا هطلع انا بقى علشان لازم انام شويه يا ماجد وياريت محدش يصحينى سبونى اقوم لوحدى..

(طلعت ود لاوضتها وكلهم مستغربين وبيبصوا لها ومش فاهمين الكلام اللي هي قالته

ماجد: انا مش فاهم ايه حكايه لازم انام دي كل شويه وليه الكلام الغريب اللي كل شويه تقولهولي وتقلقني بيه البنت دي فيها حاجه غريبه وانا لازم اعرفها يا بابا مش هينفع الوضع ده.