حبيبه من نوع اخر

ال6

الفصل6

(الموقف كان ما يتوصفش من كتر الزهول.. امتى فيروز شافت النجفه وامتى اتحركت من جنب عز وامتى بقت هي وماجد بعيد قوي كده عن موقعه على الترابيزه بص عز لماجد بقلق.

عز: لو كان في حد لابد انه يشوف النجفه بتجع كان لازم يبجى انى لاني جاعد على راس الترابيزه من جهه وانت جاعد على راس الترابيزه من الجهه الثانيه العجل بيجول ان ترابيزه طولها 5 م عليها 40 كرسي لو في حد جام من عليها بيجري من اولها لاخرها اكيد باجي اللي جاعدين هيتنفضوا جبله والاجرب ليك هو اللي كان هيلحجك ومؤمن اجرب حد ليك يبجى كيف هي وصلت لعندك ونجلتك لهنكه واحنا ما داريينش ولا شفناها اصلا بتتحرك من مطرحها ما تجول كلام يدخل العجل.

شرف: كلام عمك صحيح يا ماجد دي حاجه غريبه فعلا ما فيش ولا حد فينا شافها وهي بتتحرك من مكانها اساسا وحتى لو اتحركت مش هتلحق توصل لك نجفه بالحجم ده وبالتقل ده كانت هتقع قبل ما هي توصل لك بكثير.

فاديه: انا ما بقتش فاهمه حاجه الحاجات الغريبه اللي بتحصل معاك وتصرفات اختك اللي مش مفهومه كل الحاجات دي خليتني متوتره.

صفيه: ومين سمعك يا خيتي كل حاجه بجت غريبه.

ماجد: هو ايه اللي غريب في الموضوع انتم مالكم مستكترين ان يبقى في حد في حياتي بياخد باله مني ويراعيني ليه.

عز: مين اللي جال إكده يا ولدي بس.... ده احنا كلنا بنخاف عليك ونحميك برموش عينينا بس الموضوع كله مش مبلوع.

مؤمن: بصراحه عندهم حق يا ماجد الموضوع غريب جدا ده انا كنت قاعد جنبك وما اعتقدش ان انا كان ممكن الحقك في الوقت المناسب.

ود: هو فعلا الموضوع غريب والاغرب من ده كله بقى اني..!!

ماجد: انك ايه يا ود عايزه تقولي انك كنتى عارفه ان ده هيحصل قبلها صح وتدخلي في دماغي الكلام ده زي كل مره مش كده.

ود: ده حقيقي ومن غير تريقه انا كنت عارفه ان ده هيحصل بكل تفاصيله بس انت اللي مش عاوز تصدقني ومش عاوز تشوف غير تحت رجليك.

ماجد: ولما انتى عارفه ان ده هيحصل ليه ما منعتنيش اني اقعد على الكرسي ده النهارده بلاش.. ليه ما اتحركتيش ولحقتيني بسرعه قبل فيروز ولا انتى مستغنيه عني تقدري تردي على الكلام ده.

ود: لاني بردو زي ما كنت عارفه انك هيحصل لك كده كنت عارفه ان مش هيصيبك حاجه وهتخرج منها كويس هو انت ليه مش مقتنع بكلامي.

ماجد: ولا عمري هقتنع بيه وبس بقى بلاش كلام فارغ الحقيقه ان ما حدش فيكم اتحرك من مكانه لانى ما اهمش حد فيكم برغم انكم اقرب الناس ليا لكن ما عملتوش حاجه عشان تلحقوني انما الخير اللي عملته مع فيروز خلاها تنقذ حياتي انا هاخدها وماشي عشان انا زهقت بجد ده بدل ما تقولولي حمد الله على سلامتك واقفين تقولوا ازاي حصل الكلام ده وتلوموا فيا.