حبيبه من نوع اخر

ال14

ال14

(خلص ماجد اجراءات المستشفى وخد نجمه ومؤمن ورجعوا بسرعه على البيت عند عمه لقى ابوه قاعد وحاطط دماغه بين ايديه وقلقان وكلهم قاعدين متوترين.

عز: حمد لله على السلامه يا ولدي مالها نجمه

نجمه: انا كويسه يا ابوي شويه توتر بس وتعب علشان يعني ان الفرح كان النهارده

عز: فرح ايه اللي النهارده هو احنا مش جلنا ان الفرح كمان سبوع

مؤمن:اصلا..!!! اه هو واضح ان في حاجات كتير اتلخبطت واخد بالك يا ماجد

ماجد: واخد بالي من اول ما الاسم ما اتذكرش

صفيه: انتوا بتتودودوا في ايه وسايبيننا محتاسين اكده

عز: احنا مش عارفين امك راحت فين وخايف ابوك يجراله حاجه من الجلج.

( راح ماجد قعد جنب ابوه وحط ايده على كتفه

ماجد: مالك يا بابا انت كويس يا حبيبي؟؟؟

شرف: هبقى كويس ازاي وانا مش لاقي امك احنا قلبنا عليها البيت كله ومش لاقيينها حتى تليفونها سايباه فوق ومش عارف اوصل لها

مؤمن: ان شاء الله هنلاقيها يا عمي هتكون راحت فين يعني

نجمه: طيب هو ايه السبب اصلا في انها تخاف الخوف ده كله.

شرف: ما اعرفش لما ما لقيتش ماجد في اوضته وانتم كمان مش موجودين فضلت تصرخ وتقول لا مش هخسر ابني كمان وعايزه اشوفه لحد ما وقعت من طولها طلعتها فوق ولسه هكلم الدكتور عشان يجي طلعنا ما لقيناهاش

ماجد: طيب هدي نفسك يا حبيبي واحنا هنعرف هي فين

عز: هنعرف كيف بس يا ولدي هو انت تعرف حاجه

ماجد: لا ما اعرفش انا بس بحاول اطمنه واكيد هنعرف مكانها انا قلقان زيي زيكم بالظبط

( غمض ماجد عينيه بتوتر وبعدين فتح عينيه مره واحده ووقف.

ماجد: انا عرفت هي فين هروح اجيبها وهرجع على طول

شرف: رجلي على رجلك مطرح ما تروح هروح معاك

ماجد: يا بابا اطمن يا حبيبي بقول لك هجيبها وهاجي على طول

عز: عرفت منين مطرحها امال وانت جاعد وسطينا

ماجد: ولا حاجه يا عمي انا بس بخمن انها ممكن تبقى في المكان ده

عز: يبجى رجلنا على رجلك كلنا هنروح هناك ونجيبها ونيجي يا اما اكده يا اما هروح لحالي بعد ما تجولي هي فين

ماجد: لا وعلى ايه يلا بينا يا جماعه.

(خرج ماجد مع ابوه وعمه ومؤمن وسابوا صفيه ونجمه في البيت وركبوا عربيه وطلعوا ومعاهم الغفر ووصلوا مطرح ما ماجد قال لهم ودخلوا كانت فاديه قاعده في المقابر جنب قبر ود وسانده عليه ماجد قرب منها وحط ايده على كتفها.