انا عندي بدايتنا ؟ بداية عمرك وعمري

النهاية

دخل داخل البيت بعد ما خلص مكالمة وهو متوقع انها ما بيلقاها وعلطول صعد فوق لغرفتهم ودخل وشافها نايمه أبتسم وراح للحمام "تكرمون"ودقايق وطلع لابس شورت بس وقرب يدخل السرير باس راسها ولحفها زين وتمدد بجانبها وعلطول دخل ب نومه وعالم احلامه
"بيت خالد "
بعد ما رجعو من العزيمة راحت تبدل وهو جلس ف الصاله وشغل فلم وجهز شبسات ودخل المطبخ يسوي بابكورن جت فاتن وشافته يحط البابكورن ف الصحن اخذت منه تاكل وهي تهز راسها ب لذاذه:لذيذ ،ليش مسويه
كان يجهز الصوصات الي اشتراهم لـ الشبسات حط يدينه على الطاولة ولف لها ويشوفها مستمتعة ب الاكل وسرق منها قبله وابتعد ياخذ الصوصات :بنتابع فلم يا حلوة، طلع من المطبخ ل الصاله وطلعت وراه وجلس على الكنب واشر على حضنه وناظرت فيه ب استغراب وقال:تعالي لحضني
فاتن قربت وجلست بجانبه ولف لها :قلت حضني ما قلت بجانبي ،مسكها من خاصرتها وقربها لحضنه ،وحمرت خدودها بخجل وبدا الفلم والبابكورن بحضنها وياكلون ويتابعون ومر الوقت وغلبها النوم ونامت بحضنه حس بنفسها المنتظم وطالع فيها وشافها نايمه ابتسم :طفله ،شالها وصعد غرفتهم وسدحها على السرير وغطاها ونزل يلم الحوسه الي عقبهم ورجع لها الغرفه ونزع تيشيرته وبقى ب الشورت وتمدد جنبها وقربها لصدره يحضنها وماهي الا ثواني ودخل ب عالم احلامه معها
"صباح يوم الاثنين "
عند أسرار جالسه تحت مع بنتها وامها وابوها حولها تنهدت بتعب وحطت بنتها ب سريرها واخذت علاجاتها تاكلهم هبة ام منصور:اسرار خالاتك بيجون اليوم على العصرية كذا تجهزي
اسرار تنهدت بتعب:زين
هبة:تحسين انك تعبانه ؟ اقولهم لا يجون
ابو منصور طالع ب اسرار وقال:اجليها البنت توها طالعه من المستشفى خلي يصير لها اسبوع على الاقل والي يبي يجي بعد هالاسبوع
ناظرت اسرار ابوها وطالعت بنتها الي صاحت وقالت هبة:زين اجل ب ابلغهم انا، طلعت من عندهم وبقت اسرار مع ابوها
ابو منصور:تحسين انتس بخير؟اذا حسيتي بتعب بلغيني انا اوديتس للمستشفى
ابتسمت وقربت تبوس يد ابوها:ما تقصر بابا ،ولا تخاف بخير انا بس تعبانة شوي لاني ما انام زين من مرح
أبتسم ياخذ حفيدته لحضنه وهي تصيح وسكتت من صارت بحضن جدها ابتسمت اسرار. :حست بحنان حضنك بابا وسكتت وانا تصيح معاي
ضحك وهو يمسح على راس مرح:حضن جدها غير،نفسك يوم كنتي صغيره من اشيلك لحضني تسكتين وتنامين ،ابتسم بحنيه:وتبكين لما ارجعك سريرك
دخلت هبة وهي تسمعهم وضحكت:وانا ابتلش فيتس ما تنامين الا لما نشيلك وتصيرين فـ حضننا دلوعة
ابتسمت اسرار من تذكر امها وابوها لطفولتها :لازم اكون دلوعة لاني البنت الوحيدة ،ولا بابا
ضحك محمد وهو يهز راسه ب الإيجاب:تستحقين كل الدلع والحين بنتتس بتاخذ نصه
رفعت راسها من سمعت صوت منصور داخل وهو يقول :وين بنتنا الصغيرونه ،السلام عليكم
ردو السلام هبة:هذا هي نايمه بحضن جدها
دخلت لينا وراه وسلمت عليهم ومنصور بعد ما سلم عليهم جلس بجانب ابوه يشوف مرح ولينا جلست عند اسرار لينا:شلونتس اسرار
ابتسمت وعدلت جلستها:الحمدلله بخير ، انتي شلونتس
لينا بنفس الابتسامة:بخير الحمدلله
هبة:دامكم جيتو ترا ما بتروحون ،بتتعشون عندنا اليوم
منصور ناظر ب لينا:كثر الله خيرتس يمه انا عادي بس المدام وش تقولين
لينا ناظرته بمعنى ليش تورطني وهزت راسها:ما عندي شي وكثر الله خيرتس خالتي
أبتسم ابو منصور وقام يرجع مرح لسريرها :اجل قوم نروح ل الصلاة وبعدها لجدك نجلس شوي عندهم
قام منصور وهو يناظر ب لينا وابتسم وقف :زين بس قبل نروح بقولكم شي ، استغربو منه ولينا خجلت ونزلت راسها وضحك يناظرهم مستمعين له وقال:ابشركم انا حامل ااا اقصد لينا حامل
ضحكو كلهم عليه ولينا ضحكت من حماسه وقامت هبة تحضن ولدها وهي تضحك :مبروكك اجل انت حامل
اسرار :مبروكك لينا ومنصور الله يبلغكم فيه
ابو منصور ضحك وحط يده على كتف منصور يبارك له وحضنه:مبروك الله يسهل عليك ،التفت ل لينا:مبروك يا بنيتي
ضحكو من تعابير منصور من قاله ابوه "الله يسهل عليك " طلع ابو منصور ومنصور وجلسو مع بعض يسولفون لينا واسرار و ام منصور
"فبيت افنان"
العصر جالسه فصالتها وعلى الكنبه تقلب ف القنوات نزلت ميرا عند امها وجلست أفنان:زين جيتي
ميرا:يمه ارسل لي أيمن انه بيجينا اليوم
أفنان:حياه الله ،زين دامه بيجي قومي سوي القهوة والشاهي وترا بعد بيجي فهد مع عياله
ميرا هزت راسها ب الزين وقامت ودخلت المطبخ تسوي القهوة والشاهي وجا على بالها تسوي حلا فتحت جوالها وشغلت اغاني عشان يمشي وقتها وصارت ترقص وهي تسوي الحلا والقهوة وخلصت على أذان المغرب بعد ما دخلت حلاها الثلاجة وجهزت كل شي صعدت فوق تاخذ لها شور وتتزين قبل يجي خطيبها بعد ساعة من الشور طلعت عليها الروب طلعت لها لبس وجلست قدام مرايتها تحط كريماتها حقات الجسم وتتعطر بعدها قامت تسوي شعرها شعرها تنهدت:بسم الله يا رب ما احرق نفسي
اخذت خصلة ولوتها على الفير وهي مندمجة وتدندن مع راشد :أطالع جمالك وعيني تشوف ولا شفت مثلك في عيني محال،مندمجة وهي تغني ولا حست بدخول ميسم عليها ضحكت ميسم تشوف اندماجها وتكت على الباب:الله يسعد أيمن الي بيخليتس بذا الاندماج والسعادة وانتي تتجهزين له
اتخرشت وصرخت حطت يدها على قلبها وهي تتنفس بسرعه:الله يقلع بليستس ميسممم
ضحكت عليها وقربت تسلم وتقول :بسم الله عليتس
ميرا نزلت الفير وقالت:متى جيتي ؟
ميسم:توني ما صار لي كثير
ميرا خلصت من شعرها وقامت تاخذ الفستان وتوري ميسم:كيف حلو ؟تحسين مناسب
هزت راسها ميسم:اي حلو وناعم
ابتسمت وحطته على السرير ورجعت تكمل مكياجها وحطتهم قدامها وبدت تطبطب على وجهها بخفه وترسم وقامت ميسم تطلع علشان تلبس ميرا ونزلت تشوف اسر بحضن أفنان ورفعت جلالها تغطي نفسها من سمعت صوت أمير ومشت تجلس بجانب أفنان ودخل أمير ومعه فهد وافنان تلعب آسر:السلام عليكم ،اسيير عمي
فهد ابتسم يجلس قبال امه بعد ما سلم عليها:انتبه لا يرجع عليك،توه راضع
أمير:فداه فددااهه ،الله ويش ذا الشورت تتتكككففووننن
ميسم ابتسمت ،أفنان:صدق كيف لقيتو مقاس ذا النتفه
ميسم:جايبته لي ليال
فهد أبتسم وهو يشوف أمير يلعب آسر واسر متفاعل معه ولف لامه:الا يمه وين القعدة
أفنان ابتسمت واخذت فنجاله ترتشف منه:تتجهز فوق بيجي خطيبها اليوم
فهد قام :بروح اشوفها ، مشى يصعد لها وعلى صعوده دخلت بيلسان وبحضنها بنتها "قمر"دخلت وقالت من شافتهم ف الصاله:سلامم
التفت يشوفها أمير وبحضنها بنتها وقام يساعدها بعد ما ترك آسر على جلاسته وسلم عليها يشيل قمر من حضنها:يمه جات بنتتس قمرا
أفنان ابتسمت من سمعت صياحها دليل ان امير قومها من نومها :جيبها أمير لا تحسر فيها
ميسم:ما يكون أمير اذا ما قومها من نومها
جا امير ووراه بيلسان قامت تسلم ميسم عليها وبعدها توجهت بيلسان لامها تسلم على نزول ميرا وفهد ميسم اتجهت تشيل آسر الي بكى من بكاء قمر وقالت:سحب عليك عمك يا ولدي يوم شاف قمر
ضحك أمير يعطي قمر امه :ماش ما جازت لي اسر احسن منها ذي بس تبكي
بيلسان خزته:شقصدك هاه
قربت تاخذ اسر تحبه ضحك فهد وهو جاي:عاد الا قمورتي دلوعتنا هاذي
ميرا:ياربي والشورت اموت ولا ويش اسوي 🥺
ضحكت ميسم وبيلسان جلست بعد ما نزلت عباتها وبحضنها اسر وقمر مع فهد يلعبها وميرا اتجهت للمجلس من طلع أمير يفتح الباب لأيمن الي وصل
بيلسان:يمه حددو الزواج ولا للحين
أفنان بحضنها قمر تلعبها رفعت راسها:توهم ما قالت لي شي ميرا
بيلسان هزت راسها ب زين واخذت فنجالها ترتشف منه ميسم:ازين خليهم يطولون ب فتره الخطوبة علشان يتعرفون على بعض وما يستعجلون وتنكب بعدين
فهد ناظرها:ليه انتي انكبتي؟
بيلسان:صح ازين يطولون
هزت راسها:لا بس يعني انه حنا علطول تزوجنا وانا اقول تتعرف عليه اول لان بعدين اذا تزوجته بتتوهق شوي نفسنا حنا ب البدايات
هز راسه وهو يضحك:على بالي بعد ،بس تعرفين ان من شفتتس ذاك اليوم ب الملكه اخذتي قلبي
بيلسان:اوووههه اعترافات وين أمير يسمع
أفنان:فيه احد يشوف ميسم ولا تاخذ قلبه وعقله بعد،استحت ونزلت راسها شوي وهي تقول:بعد قلبي خالتي هاذا الكلام الحلو مو انت
فهد:وش قلت انا قلت انتس اخذتي قلبي
ضربته بيلسان:خلاص عاد احرجت البنت ،خذ ورعك لعبه شوي
اخذ اسر وهو يلعبه ويضحك وبعدها قررو يطلبون عشاء وكملو سواليفهم بين مناقر امير وميرا وميسم الي تدخل شوي معهم وبيلسان الي تضحك عليهم وفهد مع امه ناقدين عليهم وكملت جلستهم على هالوضع
__بعد مرور سنتين __
فيها الي تزوج والي ولد ومرت بسرعه على البعض والبعض لا تزوجو هيام وعزيز وجاتهم بنوته سموها "الين"وكانت ثمرت حبهم وصارت شبيهت امها ،اما عن ليال تزوجت هي ومهير وعاشو بحب مع بعض وجابو توئم ولد وبنت وسموهم"سلطان ،مهرة"وكبرت عايلتهم ،اما ميرا وأمير ،ميرا تزوجت وسوت زواج هي واخوها بنفس اليوم ميرا مع ايمن وامير مع تيا وطبعًا صار بيت أفنان خالي بعد ما طلعو عيالها وتزوجو بس مايخلونها كل يوم يجون عندها او هي تروح عندهم و آدم ولولو جاهم ولد بعد تعب لولو مع حملها "هتان " وكان فرحتهم وثالث حبهم ونست هالتعب كله من شافت ولدها وجابت بعد ما كمل هتان سنه مولودها الثاني "سطام"،اما اسرار وهمام مرح مسويه لهم جو ف البيت وصار همام يجلس ف البيت عشانها ومكتفين فيها
اما فهد وميسم ينتظرون مولودهم الثالث وهم بعد ما صار عمر أسر سنه عرفت ميسم انها حامل وجابت بنت كتكوته وخلو افنان تسميها وسمتها"وتين"وكل مالها تكبر عايلتهم وفهد يحب ميسم اكثر واكثر
وفاتن وخالد بعد سنه من زواجهم حملت فاتن وجابت بنوته وصارت دلوعة ابوها سمها "نغم"والجد فهد والجده نوره سوو لها اكبر استقبال وكانت البنت الوحيدة الي الكل مدلعها من يوم جت على الدنياء لنها بنت فاتن واصغر بنات الفهد
اما منصور جاه ولدين توأم ومكتفين فيهم حاليًا وابتلشت فيهم لينا وجابت خادمة تساعدها لانها تعب عليها وهي تشتغل وسموهم "ريان، يزن"
صار بيت الجد فهد يمتلي ب احفاده واولاد احفاده
-يوم الجمعة ٢/١٦-
بعد صلاة الجمعة تجمعوا العيال ببيت جدهم على الغداء وسواليف وضحك بين الجد والجده نوره وبعد الغداء تفرقو كل واحد لبيته
بيت فاتن وخالد
كانت تغسل الصحون وبعد ما خلصت نومت نغم على اذان العصر وهي راحت تاخذ شور تستعد لجمعه اهلها اليوم المغرب طلعت وهي عليها الروب وطلت على نغم وشافتها نايمه أنحنت تبوسها وبعدها اتجهت لتسريحتها تحط كريماتها وتتعطر وبذا الوقت وصل خالد وصعد فوق علشان بيرتاح بعد الدوام وقبل يدخل شم ويحت عطرها وفتح الباب وهو يتنهد:آخخخ
ابتسمت من شافته قرب منها وحضنها وباس راسها :ايش الحلاوة دي
ابتسمت وابتعدت تكمل الي تسويه:تسلم حبيبي
خالد عبس وجهه وحضنها وصار ظهرها ملاصق لصدره:من سمح لتس تبعدين؟،بعدين وين نغمي مالها حس
فاتن:نغمك نايمه لا تصحيها لين اخلص
باس كتفها وابتعد يروح يبدل طلع من الحمام لابس شورت بس واتجه لسرير نغم ياخذها لحضنه والتفتت له فاتن:خالدد ،لا تصحى توني نومتها
خالد ما رد واتجه ل السرير يتمدد عليه وبحضنه نغم ونام وهي بحضنه وبعد دقايق خلصت فاتن وراحت تشيل نغم من حضن ابوها وترجعها سريرها وهي نزلت تكمل شغلها
-بيت آدم ولولو-
رجع آدم من بيت جده وعلطول نام ولولو كانت تتجهز وتكوي ملابس سطام وتكوي ملابسها وجلست تسوي شعرها و روشت سطام وبعد الشور داخ ونام وحطته بجانب آدم ف السرير وهي كملت شغلها وبعد ساعه دخلت الغرفة تسمع سواليف سطام قربت منه وهي مبتسمه:سطومي صحيت ،حبيب الماما ،رفعت راسها تشوف آدم للحينه نايم قربت سطام منه وكان يحرك يدينه ورجرلينه ويسولف:سطومي قوم بابا ازعجه لين يقوم زين حبيبي
ابتسمت وباست سطام وراحت تتمكيج  وتسولف على سطام شوي ،اما ادم كان نايم وحس بحركه جنبه ولف يعدل جسمه وهو مغمض ويسمع سواليف وايدين تضربه فتح عيونه ويفركهم شوي وشاف سطام بجنبه ويضحك ابتسم وباس راسه:ابوي وراك مزعجني الله يهديك ،ضحك سطام من نزل يدينه ادم على بطنه يدغدغه تكلمت وهي ترسم الكحل:كفو وليدي ،زين صحيت تدري كم الساعة
لف لها وشافها تتمكيج:مخليته يصحيني وانا قايل لتس لاتصحيني الا الساعة ٦
لفت عليه:تدري كم الساعة الحين ؟،هتان ماما تعال
هز راسه ب لا ورفع يده يشوف كم الساعة وتأفف يمسح وجهه بايده وقام بعد ما باس سطام :بتصير ٦وانا نايم
دخل الحمام ياخذ شور سريع وبعد دقايق طلع ب المنشفة الي على خصره وفتح الدولاب يطلع ملابس له ودخل يلبس وقامت لولو تلبس سطام وتعطره وبعدها لبست هتان دخلت تتلبس هي بعد ما خرج آدم
-بيت اول مره نجيه،هيام وعزيز-
الساعة ٦المغرب خلصت متلبسه وجاهزه وجهزت بنتها ووقفت قدام المرايه تتعطر وطلع عزيز توه مخلص لبس ووقف:اوفف هيامي ايش ذا الكشخة
ابتسمت وقرب يحاوط خصرها وباسها بكل حب وصاحت الين ابتعد وهو يقول:مخربة اللحظات السعيدة انتيي،شالها وهو يلعبها ابتسمت تشوفهم :عزيز انا جاهزه نمشي
قرب وهو بحضنه الين وقبلها ومسك يدها :مشينا
طلعو من البيت وراحو لبيت الجد الي بيجمعهم كلهم بعد لحظات
-بيت الجد فهد-
تمارة:امي نوره تبغين بخور
زهرة:ما تسمعك تسولف مع محمد
ميلا جت ورفعت فستانها:انا ابي بحول"بخور"
ضحكت تمارة:انتي اول انطقيه زين بعدين قولي ابي
زهرة راحت وهي تضحك وتماره نزلت لمستوى ميلا وبخرتها وبعدها راحت لجدتها علشان تبخرها دخلت وهي تحط كسرة بخور جديده:امي نوره حطيت كسرت بخور جديدة علشان تتبخرين وابـ...،سكتت من سمعت صوت والصوت هاذا تعرفه رفعت راسها وشافت محمد جالس بجانب جدتها وكلهم يطالعون فيها حطت البخور وركظت تطلع ،محمد كان يسولف مع جدته ورفع راسه من حس ب احد يدخل وصوت بنت تتكلم شافها قدامه بفستانها الابيض تنح فيها ومن طلعت علطول تركض هو ما شال نظره وظربته جدته وضحك يرجع يسلف معها علشان ما تشك فيه وماهي دقايق الا الكل وصل دخل فهد معه اسر وشايل وتين فحضنه اقبل على جده وجدته يسلم عليهم :اسر سلم على امي نوره يالله
تقدم اسر يمد يده الصغيرة وسلم وباسته الجده نوره والجد بعدها وجلس فهد واخذ محمد وتين يلعبها
عند الحريم دخلت وسلمت عليهم ميسم:للحين ما وصلو
يمامة:هذا وهم قايلين بيجون قبل صلاة المغرب
ميسم مشت تنزل عبايتها وتجلس :فاتن الي مزعجتنا تقول العصر مجي وينها
زهرة:هي تقول بس ما تنفذ ،تلقينها ما بعد طلعت من بيتها
دخلت اسرار وهي مستعجلة وحطت مرح وسلمت يمامة:وش فيتس انتي بعد
اسرار:ما فيني شي بس دخلت بسرعه تعبت وانا شايله مرح والاغراض كلهم مع بعض
ميسم:كان خليتي مرح مع ابوها وجيتي ب الاغرض
اسرار تنهدت وهي تجلس وتزين شعرها الي احتاس:عيت بس تصيح واخذتها
زهرة:يمكن فيها نوم جربي نوميها واذا ما فاد عطيها فيفادول يمكن في شي يوجعها
هز راسها اسرار وقالت زهرة:بنات قومو نجهز القهوة والحلا على بال ما يوصلون
طلعو واسرار جلست عند بنتها وبدو يوصلون ورا بعض وجلسو يتقهوون ويسلفون مع بعض
عند الرجال هتان جا يركض عند ابوه وجلس بجانبه البراء:هتان وراك ماسلمت علينا وانا جدك
آدم:ماسلمت على عمانك وجدانك،هتان هز راسه بمعنى اي وقام علطول يركض لجده يسلم عليه البراء:سلمت على جدي فهد وعمانك
سلطان:الا رجل هو سلم علينا
اسر همس لفهد:انا بعد رجال صح بابا
هز راسه فهد:انت شيخ الرجاجيل
سعود:أسير تعال وانا خالك تعال
فهد:قوم لخالك وسولف عليه وعلمه وش شريت لـ ديمة (بنت سعود)
ابتسم اسر وقام يركض لخاله وشاله سعود لحضنه:حي حبيب خاله
عند مهير اخذ الدله يقهويهم ومعه محمد وأمير، قرب امير من محمد من شافه ساهي وصفر:يا هووو ،وين رحت
انتبه محمد وعدل وقفته:معك معك
أمير ضحك بسخرية:وينن معيي وش تفكر فيه
محمد نزل الدلة وتنهد :مافيني شي بس ،يمكن فيني نوم
أمير ناظره😏:نوم أجل ، اقول امش امش نجلس ،راحو يجلسون بجنب العيال وبدو يدخلون ب السواليف
-مجلس الحريم-
فاتن تاففت وجلست بجانب بيلسان:الامومة صعبه
ضحكت بخفة بيلسان عليها :عاد نغم صغيره توها ما كملت سنه اهون من ميمي (قمر)تروح مدري وين تطس وترجع لي بمصيبة يا ضاربه احد ولا عاضته
فاتن ضحكت من شافت قمر جايه لهم وواضح انها متهاوشه مع احد البزران:الطيب عند ذكره شوفيها جات
قربت قمر عند بيلسان وواضح انها زعلانه ومعبسه وجهها  ابتسمت بيلسان وهي تمسكها وتشيلها لحضنه:شفيها قمراتي ،من متهاوشه معاه المره هاذي ؟
قمر كتفت يدينه ومنزله راسها :ديمة تاخذ أشيائي ،انتي ماما مو قلتي لنا ماي صلح ناخذ اشياء غيرنا
هزت راسها بيلسان:صح
فاتن:عادي تاخذهم شوي وترجعهم لتس
هزت راسها ب لا وجت جلست ميسم معها وتين:شفيها ميمي زعلانه؟
بيلسان:زعلانه علشان ديمة تاخذ اشيائها(قلدت نبرت قمر وهي تقول)
قمر قامت من حضن امها وهي تتكلم على ميسم :لا تخلينها تاخذ اسر مني هاذا حقي انا
كلهم ناظروها بصدمه وضحكو من فهمو عليها انو اسر من اشيائها وبذا اللحظة جا اسر ومعه ديمة وجلس عند امه وديمة اتجهت عند امها ناظرت فيهم ميسم :اسر حبيبي ،انت مزعل ميمي
اسر هز راسه:لا ماما ما زعلتها وبعدين ليه ازعلها
قمر صدت عنه تخبي نفسها بحضن بيلسان فاتن كان بحضنها نغم وشالتها تحطها ف الارض:ما عليك منها شوي وترضى وانت ما سويت لها شي
اسر:عمه بيسو والله ما زعلتها كنا نلعب مع بعض ومن جت ديمة راحت
بيلسان:عادي حبيبي عارفه انك ما سويت لها شي
ابتسم وجلس عند ميسم ويلعب وتين ونغم الي ف الأرض وشوي وجات جلست بجنبه قمر وابتسم لها ورجع يسولف عند امه عن الرجال ووش صار
فـ الجهه الثانيه
هيام:ليال ابعدي بنتتس عن بنتي كفخو بعض
ليال:خليهم يتعرفون على بعض شعرفتس انتي
يمامة:بنات طلبت سيارة ايسكريم امشو نطلع لها
هيام:الله الله يبرد عليتس
تيا:نلبس عبياتنا ونطلع لها صح
هزت راسها يمامة:يالله الي يبي يقوم ويشتري لنفسه
قامو البنات ويمامة قالت للحريم والباقين وراحت تلبس عباتها وتطلع مع البنات تمارة:لولو وين هتان يشتري
لولو:خليه لا يدري الحين يوسخ ملابسه
اسرار:حرام عليتس خليه ينبسط
لولو:مالي خلق ابدل ملابسه
ميسم نزلت لمستوى اسر:وش تبغى اسر فروله ولا تشوكلت
اسر :ابغى فروله مع بسكوت
ميرا ضحكت تقبص خدوده:ياربي اصيرك فروله عادي
اسر:لا أبغى الفراولة هاذي(ياشر على الايسكريم)
ميسم:روح قول لبابا اول عطني خمسة ريال،مسكت يده ترفعاها وتفتحيده تعد اصابعه:قوله ابغى كذا خمسة
اسر هز راسه:خمثه كذا،ركض لمجلس الرجال
هيام:ياربيي بسم الله عليه يجنن هالولد
ميرا:شكلي بتوحم عليه علشان يطلع ولدي نفسه
ميسم:مايجي من ولدي ثنين لو سمحتي
تيا صرخت:اما حامل ميرا بعد
التفتو لها البنات وهي هزت راسه وهي تبتسم وقربو يحضنونها ويباركون لها بيلسان:هالو***ما علمتني ليه توتس تقولين
ميرا:حبيت اشوف ردت فعلكم جميع
هيام:لحظة لحظة تيا وش قصدك انتي بعد
تيا نزلت راسها وبدت تطقطق اصابعها:يعنيي...انا نفسها حامل
صرخو البنات مره ثانيه وحضنوها وباركو لها
ميسم:مبروك الله يتمم عليكم
اسرار:ماني متخيلة ميرا تصير ام
بيلسان ضحكت:صدق مدري وشلون احسها نتفه ما تصلح
-مجلس الرجال-
دخل اسر وهو يركض واتجه لفهد :بابا بابا
فهد:سم ابوي ،مسك يدينه اسر وناظر هتان الي جالس عند آدم ولف لابوه يرفع يده نفس ما سوت له ميسم:ماما تقول ابغى خمثه كذا
ضحك آدم:وشوله هالخمثه على قولتك
اسر ناظر فيه:عثان أثري اثكريم من السيارة الي برا
هتان ناظر ابوه:بابا حتى انا ابي
مرح جايه تركض:اسر امك تدول تعال قبل تروح سيارة الايسكريم
اسر لف لابوه ومد يده:ابي فلوث(فلوس)
طلع فهد بوكه وقام :امش نروح نشري لك اثكريم
قام وقام معه ادم علشان هتان وطلعو شافو العيال واقين ويسلفون منصور:على وين
آدم:فيه سيارة ايسكريم وبنروح نشري لورعاننا
مرح مسكت يدين خالها:خالو تعال انت ماما هناك وخاله لينا بعد
محمد:اذا خلصو البنات خلونا نروح علشان نشري حنى بعد
فهد :امشو نشوف وينه واتوقع البنات عليهم عبياتهم
مشو كلهم لقسم الحريم ودخلو وهم يقولون يا ولد ونطقت فاتن:تعالو علينا عبياتنا
ميسم شافت اسر جاي يركض لها وتنهدت:قلت له يجيب فلوس وجاب ابوه والعيال معه
ضحكو البنات لولو:كنت ما ابيه يدري ودرى من ورعتس
ميسم:خليه يستانس يوم مهو ضار
فهد:ليش كلكم واقفين هنا
فاتن:ننتظر حضرتك تشرف علشان نشتري ،ضحكو البنات بخفوت ناظر فيهم فهد وهو يهز راسه:توي اعرف ان فاتن تعرف تنكت ماشاءالله ،صفق بيدينه وضحكو العيال والبنات
ميرا تنحنت وهي تأشر براسها لجهة سيارة الايسكريم :واقفين ننتظر الايسكريم يجهز علشان نشتري
فهد :اي ليش كلكم طلعتو كان طلعو ثنتين يكفن
ميسم:وينن هي تشوف البزران ولا حنا
فاتن:صح كل وحده تطلع وتشري لنفسه ولبزرها
خالد:انتي وين بنتتس
فاتن:عند زهرة
منصور:عميمه بنتتس ولا بنت عمه زهرة
عزيز:اقول بس وين هيامي واليني
تمارة:الحين وش تبون جايين كلكم
آدم تقدم يسأل الي يبيع اذا جهز او لا ولف لهم :عطوني وش تبون
مرح قربت منه بسرعه:عمي انا ابي اسكريم
هتان قرب وهو يناقز:وانا وانا بعد ابي نفسهم،تجمعو حوله الاطفال وضحك وهو يقول :والله البلشه ،انقلعو لامهاتكم يالله
ضحكو عليه لولو:حرام عليك ادمم
همام قرب وشال مرح:وش تبين ابوي اطلبي الي تبين
هيام:اذا خلصتو من الأطفال علموني اجي ،بروح لبنتي
نوره:محد معلمك ،وبيروح دورك
هيام:عادي اصلن ما ابي
عزيز:هيامي اذا اليني صاحيه هاتيها لي
هزت راسها ب الايجاب:تمام
-
-داخل مجلس الحريم-
دخلو البنات بعد ما خلصو من برا وتجمعو مع بعض يجلسون على الأرض فـ الصاله الثانيه بيلسان :بنات تبون شاهي ؟اسوي؟
لينا:اي تكفين ونعناع اذا فيه
بيلسان:قومي معي أجل نسوي ، قامو يرحون للمطبخ يسوون شاهي
هيام دخلت وجلست:متى يجي الشتاء ،حر مو طبيعي
يمامة:والله ياحلو الصيف ماودي يروح
هيام كشرت:عاد انتي حاله خاصة تموتين ب الصيف
نوره ابتسمت:مولودة فـ الصيف اكيد تعشقه
زفرت هيام بنرفزة من الحر ،ميسم تاففت وهي تهز وتين الي بجلاستها وتبكي:ليه ماتنامين يا امي وتريحيني
تيا:ليه تبكي ؟تعبانه؟
ميسم تنهدت وهي تناظر بـ وتين :اتوقع تسنين ولا مأخذه برد
فاتن:يا عمري ، ما تحسين توها على التسنين ؟
ميسم:مدري اذكر اسر طلع له بعمر سنه وست شهور و وتين الحين بتكمل السنه ب شهر ثمانية الي يدخل
تيا ابتسمت تمسك يد وتين الي تعلقت بها وتسولف عليها:ليه البكاء ياوتيني ،وتين بدت تسولف وتضحك مع تيا ،واخذتهم السوالف لين جا وقت العشاء 12:15وتعشو وبعدها راحو بعضهم وطلعو البنات الي فيه للحوش يجلسون ونادو العيال معاهم وجلسو البنات بصف والعيال مقابلينهم ب الصف الثاني همام:الله من زمان عن هالجلسة ،اوفف اشتقت لها
أمير:يبيلها براد شاهي و عود وتكمل صدق
بيلسان:جلسة ما فيها نفس ثقيلة
جت فاتن وميسم وتيا وهم عليهم كل وحده شالها علشان العيال متغططات عنهم ومنومين بزارينهم بغرفه جميع علشان لو احد صاح او شي يسمعونهم من الجهاز الي مع فاتن ،جلسو وقالت فاتن:فهيد تكفى مشتهين الشاهي حقك
فهد ابتسم ابتسامة جانبية:وليه يفرق شاهيي عن شاهيكم
ميسم:ماشاءالله من متى يسوي شاهي ؟
ميرا ضحكت وظربت كتف ميسم :ياحليلتس ما تدرين فاتتس نص عمرتس
هيام:يضبط احلا شاهي يقند الراس
ناظرت فيه ميسم وهو طالع فيها وابتسم ينزل راسه وقوم اسر من حضنه:قوم آسر روح عند امك
قام آسر بدون ما يقول شي وجلس بين امه وميرا وبدت تحارشه ميرا وهو يحارشها ،جا ادم ومعه العود ووقف :أتمنى عزيز وحمود يطربوننا الليلة
عزيز ابتسم:ودي يا ابوهتان بس خبرك الشيبان نايمين فـ المجلس واخاف يطلعون علينا ونلقم
خالد:انا اقول لك من الحين ماهم فيه راحو مع ابوي للمزرعة
محمد:غريبه ما قالو لنا
مهير:يبون الفكة منك وشولة يقولون لك
خالد ضحك:صادق ،خلهم يأخذون راحتهم
اخذ عزيز العود وبدا يدندن فيه يحاول يطلع شي
-
المطبخ فهد اخذ بريق كبير وحط فيه الموية وحطه على النار يطبخ من غلى الماء حط سكر بس ما كثر و حط الشاهي وتركه يطبخ بذا اللحظة كان يطقطق ب جواله ودخلت ميسم وهي تنحنح:ما خلص
ناظرها وابتسم من قربت وحضنها:باقي شوي ويخلص
ابتسمت وباست كتفه تبتعد شوي:فهد يمديك تروح الصيدلية ،وتين فيها حرارة ولا لقين خافض حرارة هنا
خاف شوي واعتدل بوقفته :بسم الله عليها ،وينها الحين
ميسم تركت يدينه ورجعت شعرها لورى:عند أمك فـ المجلس ،قالت لي روحي لفهد وخليها عندي ،مسك يدها وسكر على الشاهي وطلع من المطبخ واتجه للمجلس ودخل وشاف امه وبحضنها وتين تقرأ عليها ابتسم يتقدم يبوس راس امه:تعبناتس يالغاليه
هزت راسها ب الرفض أفنان:تعبكم راحه يا وليدي ،بس روح الصيدلية الحين او ارسل أمير يجيب تحاميل لبنتك عشان تنزل حرارتها ،لان ضنتي انها ماخذه برد
ميسم تنهدت تمسح على راس وتين :عطيني اياها عنك خالتي لاتتعبك ،اخذتها من حضن افنان تحطها بحضنها وأفنان مواصلة تقرا عليها واما فهد طلع علطول للعيال واخذ مفاتيحه ووقفه آدم:على وين
فهد:ل الصيدلية
آدم عقد حواجبه ب استغراب:عسى ما شر ،فيكم شي
فهد:ما فينا الا كل خير ،بس وتيني حرارتها مرتفعة وبروح الصيدلية اجيب لها تحاميل اطفال امي تقول تنزل الحرارة
هز راسه :انتبه لنفسك ،انشاءالله ما به الا العافية
لف فهد بيمشي وقبل يتعداهم قال:الشاهي على النار روحو له
فاتن ناظرته ب استغراب:وش فيه ذا مستعجل
أدم جلس يتربع:بيروح الصيدلية عشان بنته
بيلسان:وشفيها وتين؟
أدم:يقول فيها حرارة ،التفت للعيال:حمود انقز ل الشاهي لا يخرب علينا
قام محمد و وراه مهير للمطبخ ،وبيلسان قامت والبنات وراها راحو يشوفون ميسم وقالت لهم افنان يرجعون لجلستهم ورجعو وجلست فاتن عندها لين جا فهد
فاتن: لا تخلينها قدام المكيف ولا تغطينها لين تنزل الحرارة
ميسم هزت راسها وهي تعطي افنان العلاج علشان تعطيه وتين وطلعت فاتن لعند البنات وتسمعهم يغنون
اسرار:عزيز تكفى نبغى العباة الرهيفة
عزيز:انتي غنيها صوتك حلو
اسرار:تم ما اقول لا
همام ناظر فيهم ورص على اسنانه:وشرايك تكمل تغني عزيز
عزيز:اسرار تبي تغني بعدها اكمل انا
فاتن:همام مو وقت غيرتك وانا عمتك خلها تغني
ليال بهمس لنوره وتماره الي بجنبها:الرجال الشرقي الغيور ،ينطبق عليه
نوره:ههههههههه كل عيالنا كذا
ليال:لا مهير ما يسوي كذا غيور ب زيادة
تمارة لفت عليهم وهي تهمس:بنات بعترف لكم بشي بس لا تفضحوني
لفو لها ليال ونوره:وش قولي
تمارة فركت يدينها بتوتر وقالت:المغرب كنت ابخر وكنت بروح لامي نوره ابخرها و..،قطعت كلامها ليال الي همست بفرحة:شافك محمد صح
تمارة ضربتها:قصري صوتتس ،بعدين كيف عرفتي بسم الله
نوره:الله احسكم لايقين على بعض
تمارة:ماشاءالله وكيف عرفتي؟؟
نوره رفعت اكتافها:أحساس
انتبهو من بدت اسرار تغني وبدو يغنون معها لانها طلبت يشاركونها وعزيز يعزف ب العود وبذي اللحظة خرج فهد و وراه ميسم وكانت بحضن فهد وتين وجلسو بجانب بعض على يمينه ميسم ويساره منصور وبجانب ميسم كانت بيلسان وبحضنها اسر الي يصفق معهم وارتفعت اصواتهم شوي وهم يغنون "العباة الرهيفة فوق ذيك الردايف ، خلت القلب يرجف غصب ماهو بكيفه
من ردى الحظ قلبي طول الأيام خايف ،. خايفٍ والليالي ماتجي له بكيفه
ماتجي له بكيفه مثل ما كان شايف ، غايب الأيام جاله بالحياة الكسيفة "
صفقو وكملت تغني ومعها عزيز وبعدها خلصت الاغنية
فهد صفق وهو يقول :ماشاءالله يالاصوات باقي منصور ليه منت مثلهم
رفع اكتافه:شدراني وبعدين يكفون ويووفون اسرار وعزيزان
نوره:بنات احس كبرنا بسرعه
ضحكت فاتن:يا عمري ودك تبتلين صغيره ؟
نوره:لا عميمه ما اقصد كذا بس يعني كف قبل كنا نجلس كلنا مع بعض والحين نجلس مع ازواجنا وعيالنا واحس كبرنا بسرعه
ضمتها فاتن وميرا وليال ولينا وهم جالسين ،منصور ناظرهم وضحك بسخرية:البكايات ذولي قلنا ما نبي نفس ثقيلة تبون تبكون انقلعو داخل
فاتن ناظرت فيه بحده:منصوررر وجعع وبعدين ما بكينا بس تذكرنا ايام قبل
فهد:وراك تحارشهم انت خلهم يبكون لين يفطسون
نوره:ليتك ساكت ابرك
محمد:نايف وأيمن و وليد يبون زوجاتهم
فهد لف له وكان الوقت حول الفجر وقام بعد ما أعطى وتين لحضن ميسم وقامو وراه العيال يطلعون لهم يسلمون عليهم
بيلسان:ماشاءالله ما يصبر
ميسم:من جد بتروحون مو قلنا بنفطر سوا
قامت بيلسان تبعد اسر الي نام بحظنها:توقعت انه يجي لانه بكرا يبدا دوامه وانا ما جبت سيارتي
ميسم لفت لنوره وميرا الي قامو وقالت فاتن:خير تروحون غش
ميرا زفرت بغصب :اصبري بروح اتهاوش معه واجيتس ،قايله لا تجي بنام عند امي ويعاند
ضحكو عليها من جديتها انها ترح تتهاوش معه وطلع صوت ضحكهم وقال فهد بصوت عالي:بنت انتي وياه قصرو اصاواتكم
هيام:جانا الرجل الشرقي الغيور الثاني
ضحكت ليال :اخخ الله يقلعتس
-
عند أيمن دخل بعد ما كلمته ميرا وشافها وقرب :المزيونه ما ودها ترجع معاي
ميرا تخصرت:مو من جدك أيمن مو قلت لك لا تجي بنام عند امي اليوم
تأمل فيها شوي وقرب يحاوط خصرها ويبوس راسها :حبيبي كنت بخليك بس ما قدرت اقوم شوقي وجيت لك
ميرا:امداك تشتاق ؟!،ما اقول ما اشتقت لك بس تعرف من زمان عن امي ف بجلس عندها
هز راسه:لا امشي معاي البيت وبكرا لو بغيتني اوديك الساعة وحده الظهر عادي بس اهم شي تجين معاي الحين
تنهدت بقله حيلة وهي تحرر خصرها من يدينه وتمشي :قهر بيفوتني فطورهم
ضحك على حلطمتها وطلع وراها يتجه لسيارته ينتظرها بما ان العيال رجعو لجلستهم ،بعد مرور الوقت وافطرو مع بعض كل واحد راح بيته الا فاتن نامت ببيت ابوها مع تمارة ويمامة ومعهم جلست هيام الي مستحيل تفوت النومة وجلسو يسولفون مع بعض بغرفه فاتن وكل وحده ب فراشها لين غفو حول الساعة ٩الصباح
-
بمنتهى السعادة كملوا ابطالنا حياتهم الي كل واحد ختمها بكل حب و سعادة ومرت سنينهم كلها مثل النسيم جميله ولا عليها غبار
بدايتةً من فهد و ميسم الي ما وقف حبهم الي كبر سنين معهم  وبيظل يكبر بوجود عيالهم آسر آول ضناهم ووتين الي صارو فعلًا غنى عن كل شي واول مسببات السعادة لـ فهد اولاً الي كان يعتبر المركز الأساسي لسعادة وجود وحب عمره ميسم الحب الي اغناه عن كل شي وصارت بدايتهم بداية عمرها وعمره فعلًا وصارت وطنه وملاذه الاول والاخير لميسم ومثل ما فهد اكتفى فيها ميسم اعتبرته كل مرجع وامان وكل لمسة سحر تغير حياتها وتملأها سعادة وحياة وحب
•••
من بعده فاتن الي ما كانت تتوقع بدايه حياتها تتوصل لهلمواصيل من السعادة والرضى والقناعة والحب ،كانت فعلًا راضية بالحياة والحب الي ما كان من بدايه حياتهم مع انهم يعرفون بعضهم من كانو صغار وعوضتها واحتوت حياتها ومثلها خالد الي ما عمره فكر ان سعادتة قدامه طول عمره وتوه يحصله من قابلها ذاك اليوم ب الصدفة واخذت كل تفكيره مع قلبه ويحمد ربه كل يوم انه اختارها مع انه كان متردد ب البداية
...
وهمام الي كان كل خوفه ما ياخذ حب حياته بس يسرها ربي له واخذ اسرار وكانت حياته راسية بهالسعادة ولا عنده شي يعكر صفوفها واسرار ب المثل كانو هادين ب حبهم وبزواجهم وبثمرت حبهم بنتهم مرح
...
وادم الي طاحت السعادة بين يدينه مثل الهدية من السماء على كثر ما هرب وتهرب من الحب من كان صغير بس ب الاخير رضخ لحب لولو وطلبها يدها من ابوها ،ومنيوم دخلت حياته دخلت معها السعادة والرضا وطبعن بحضور مولودهم التول "هتان"وبعده جاهم ثاني ثمار حبهم "سطام"
واما لولو الي ما توقعت أبدًا تاخذ احد من عيال اعمامه لاكنها من صادفته ذيك الليله صارت تفكر فيه وما توقعت انه يحبها وحاسها وكانت محتاره ماتدري وين توديه من غلاه لاكنها صارت تحبه وصار من اولوياتها وكل شي تسويه لعيون آدم  يصير وحاضر
...
اما بيلسان كانت تشبه اسرار بهدوءها كانت البنت الهادية المتزنة حتى بزواجها فرضت الشخصية الي تناسب نايف الهادي العملي الجاد الي كان زواجه ب بيلسان فرصة عظيمة و رضا عظيم
...
اما منصور الي ما كان احد بسعادته اول ما رجع من دبي علشان يخطب لينا الي طاحت عليه من السماء ودخلت حياته وحبها من كل قلبه ولينا ب المثل شافته الرجال الي تستند عليه لا ضاقت الدنياء عليها وكان كل سعادتها منصور وعياالهم
...
اما عزيز وهيام الي حبو بعض حب طاهر وتزوجو ب الاخير وعاشو ب سعادة
-
وأمير الي اخذ تيا وحبها وهي تغليه وتحبه والي جاهم ولد وسموه "أديب "وزاد الحب بينهم ما نقص
-
ومهير الي اخذ ليال وما توقع انه بيوم بيحب وبيتزوج وبيكون اسرة وبتكون ليال كل اهتمامه وحبه ودخلت حياته ومعاها السعادة والرضا
-
اما محمد بعد رفضه لـ الزواج وانها يحس نفسه للحين ما كون نفسه وبعد اصرار من ابوه وجده ققر يتزوج تمارة وفعلًا كانو زي الضايعين ولقو بعض وصار يناديها "صاحبة البخور "لان اول مره شافها وجذبته كانت معها مبخرة
-
ويمامة بعد ما خلصت جامعة خطبها اخو لينا "هادي"وماتوقعت ابد يجيها نصيبها ويجيب هادي الي ساكن بعيد عن اهله ويمعهم مع بعض وجاها فارس الاحلام الي تحلف فيه طول عمرها
...
والجد فهد وابو سعود وابوهادي هالصحبة الحلوة ظلت باقيه وقوت اكثر من زوجو عيالهم من احفاد فهد راغم الظروف الي مرت عليهم الا انها دايم تتجسد في اطهر انواع الصداقه
...
اخيراً ولايس اخراً
الجده نوره الي كانت مصدر امانهم وسعادتهم وقوتهم وافنان معاها الام العظيمة الي تمثل كل ام الطيبه الحنونة حتى على حريم عيالها وحتى حريم عيالها طلعو نفسها من طيبتها كانت مصدر سعادة للكل الي ما يضاهيها احد والي يجتمع لها وعندها كل الحب وكل المعاني والمشاعر اللي قبل كلها الي تذكرنا دايم ان الام هي نبع الحنان (الله يخلي لي ولكم امهاتكم وجداتكم🧡)
.............••••............
مسك الختام
لازم نعرف ان حب العائلة والإخوان شي عظيم ، ومهما حبوا الناس  وانحبوا محد يحب مثلهم  وهم جنة الدنياء الي بنعيمها نعيش والي لو فقدناها اقل الامها الحسرة والحزن
ولا م نـعرف ان الـحب النـقي الطـاهر ولو ما كان من النصـيب  يكـفي انـه نصـيب قلوبنا وعـوضنا فـيه بالـجنة
واذا وافقتنا الحظوظ وصار يوم من نصيبنا
وعشناه لازم ننتبه ولا نخليه للعواذل ترفعه وتنزله
...
وفي النهاية أتمنى تكون روايتي الاولى اول انطلاقاتي كا كاتبه واتمنى تكون حازت اعجابكم كلكم واستودعتها الله واودع فيها عائلة الجد فهد كلهم بحب وحزن
ونقول نلقاكم بإذن الله برواية قادمة ريماز تودعكم جميعاً نشوفكم على خير🧡🧡
..............................
انتهت الروايه ادعموني بنجمة وكومنت
تمت بحمد الله 🤍