انا عندي بدايتنا ؟ بداية عمرك وعمري

الـبــارت٢٩

لولو:اذا مو مشغولة مريني نروح ناخذ حلا او شي اذا رحنا لبيت جدي اليوم
اسرار انصدمت:تستهبلين لويلو انتي مو فـ كوريا ؟؟شلون اجي
لولو:ههههههههه لا حبيبي مو في كوريا انا ف القصيم
اسرار:تستهبلين متى رجعتو
لولو:امس واصلين
اسرار:كلـ**وماعلمتيني
لولو:معليش بس قلت اخليها مفاجاة اذا جو اهلنا بس ما توقعت يجون بدري كذا
اسرار:حتى انا ما توقعت اجل اسمعي اخلص دوامي وامرك انتي ونشوف ميسم اذا صاحيه نمرها هي واختها
لولو:الله فكرة حلوهه الصراحة ، اجل انا بشوف عن ميسم وانتي علمين اذا خلصتي دوامك
اسرار :👍🏻تمام
سكرت جوالها اسرار وراحت تكمل شغلها

اما عند ميسم الي رجعت من جمعة صديقات ليال وانبسطت مرره بجمعتهم واول ما رجعت كان الوقت متأخر الساعة ٢ونامت علطول وصحت تصلي الفجر واخذت لها غفوة وما قامت الا الساعة ٩الصباح قامت تغسل وجهها ونزلت تحت تشرب مويه وجلست ف الصاله تقلب ف جوالها ومشغله لها فلم تتسلى فيه شافت فيه رسائل كثير وطنشت بعضهم وفتحت رسالة لولو الي كانت قبل دقيقتين:صباح النور هلا ف العروس
لولو:هلا فيتس
:اسمعي عندتس شي ولا فاضيه
ميسم:لا فاضيه شعندتس
لولو:بعد ساعة يمكن او اقل بطلع انا واسرار تجين معانا
ميسم:خيرر متى جيتو انتو مو كنتو بشهر العسل
لولو:هههههههههه انا امس واصله وطفشت الصراحة ف البيت لحالي
ميسم:هو وين رجلتس
لولو:رجلي مايستحي تاركني ورايح دوامه وما بيرجع الا يمكن ٢الظهر
ميسم:هههههههه فيه احد توه راحع من شهر العسل ويداوم
لولو:أيه آدم
ميسم:اجل قدام معكم انا
لولو:تمم اجل بلغي ليال اذا بتروح معانا
ميسم:توها نايمه انا قمت وهي نامت
لولو:حبيبة النوم ذي اجل انتي قومي تجهزي وانتظري لين ارسل لك
ميسم:تمم ،يالله بايي
لولو :باي
سكرت ميسم وهي مبتسمه وقامت لغرفتها تبدل ملابسها ولبست سبورت واخذت عباتها وشنطتها ونزلت تحت وكملت فلمها وما شافت رسالة فهد وبعد تقريبا نص ساعة اتصلت عليها لولو تقولها تطلع لبست عباتها وطلعت لهم وركبت:سلام يا عرايس
اسرار:هلا والله ب ميسم
لولو:اوهه صار عندك بطن
ميسم:شفتي بس صغير ما كاني حامل
اسرار:بأي شهر انتي الحين
ميسم:بنص السابع
لولو:يوههه يعني قربتي تولدين
ميسم:لا ما توقع توي
قامو يسولفون لين وصلو مطعم افطرو وبعدها طلعو يدورون ف المحلات يشرون حلا واشيا ل جمعه الليل وراحو لستاربكس ..في محل الحلا كانو يتذوقون الحلا الي يعجبهم ياخذونه اسرار:ميسم بتجين صح اليوم
ميسم شربت قهوتها من ستاربكس :ما اعرف الصراحة
اسرار:تكفين تعالي والله من زمان عن الجمعه
لولو:ما جاء فهد
ميسم:لا ما اتوقع هو قالي بيجي بعد سبوع
اسرار:ماعلينا منه تعالي اليوم تغيرين جو وننبسط
طلعو من المحل بعد ما حاسبو وركبو السياره بيرجعون ميسم:ما تتخيلون بنات نفسيتي قد ايش كانت شينه الفترة الي راحت
لولو:كل هاذي هرمونات
ميسم :كانت ازفت من الزفت ما اطلع من غرفتي وما اشتهي اكل صرت ما اطلع من غرفتي علشان ما اعصب على احد
اسرار:يوهه الله يعينك ياعمري على ليال شكلها هي الي تاكلها
ضحكت ميسم:اي ياروحي عليها انفس عليها وهي تحاول تغير جوي بس الحين الحمدلله تغيرت شوي بديت اطلع اروح السوق و ارفهه شوي واشتري اغراض للبيبي
لولو:كشفتي عن جنس الجنين
ميسم هزت براسها ايه لولو بحماس :الله وش طلع ولد ولا بنت
اسرار:انشاءالله بنت
ميسم:ما بقول بتعرفون لا ولدت انشاءالله
لولو :اتخيل بنت وتشبه لتس بملامحك البريئة وعيونك الكحيلة اخخخ مقدر مقدر باكلها
ميسم ضحكت على تخيلي لولو اسرار :ولا ولد وياخذ ملامح ابوه اوففف مع ملامح ميسم الله يا المكس الفخم
ميسم:ماشاءالله اشوفكم تخيلتو من الحين
اسرار:حددتو اسم
ميسم:ايي اذا ولد اسر على قولت فهد بس اذا بنت ما اخترت اسم
لولو :أساسا معرف فهد من قبل انه يحب اسم اسر
وقفت اسرار عند بيت ميسم :اي من يوم هو صغير يحبه ومزعجنا فيه
ميسم قبل تنزل:وانا اقول ليش مصرر قوه على ذا الاسم
لولو:اقول بس اذا جتكم بنت سمي علي وابشري ف السماوه
ضحكت ميسم:اي يصير خير ،يالله مع السلامة
كلهم:مع السلامة
مشت اسرار ترجع لولو وترجع بيتها تريح وتجهز نفسها ل الليل اما ميسم بعد ما دخلت البيت راحت لغرفتها تنام وكانت متردده تروح لبيت الجد او لا تمددت على السرير واخذت جوالها وفتحت الواتس وشافت من ضمن الرسايل رسالة من فهد وكانت من امس واستغربت انها ما شافتها يوم تفتح الجوال ف الصباح دخلت على المحادثة وشافته مرسل ردت عليه:هلا حبيبي ،بعدها حطت علامة استفهام على"اجي اخذك" وارسلت
:من وين تجي تاخذني ؟؟
سكرت جوالها جت بتحطه على الكوميدينه ووصلها اشعار من فهد فتحته:من بيتكم
ميسم:انت جيت؟
فهد:اي امس وصلت وارسلت لك علشان اجي اخذك بس ما رديتي علي
ميسم انبسطت:قول والله انك جيت
فهد:ليش مو مصدقتني تبين اجي علشان تصدقين
ميسم:مادري احس احلم
ضحك :😂😂لا لزم اجيك علشان تصدقين
ما ردت ميسم وفهد سكر الجوال يطلع من بيته متجه لبيت ابو سعود ومسافة الطريق وهو واصل  واتصل عليها يقول لها تطلع وميسم ماصدقت علطول نزلت ركض وشافتها ام سعود:شوي شوي لا تطيحين
ركضت وفتحت باب الحوش وشافته داخل ومعاه سعود ووقفت شوي تستوعب وكانت ب بجامتها التفتو لها سعود وفهد وضحكو عليها فتح يدينه لها فهد :ماودتس تجين نطفي الشوق
هي دمعت عيونها وركضت له تحضنه مشتاق له كثيرررررر ضحك فهد وهو يقول :شوي شوي على عمرتس
سعود:مهبولة تركضين وانتي فبطنس مخلوق
لف على الصوت الي ينادي:ميسم ميسم
طلعت ام سعود وهي تنادي بنتها خايفه عليها لا تطيح ووقفت يوم شافتها واقفه وحاضنه احد وعرفت مين هو من زوله ابتسم سعود من شاف امه وراح لها يسلم عليها ويحضنها بما انه ماشافها اول ما جا من السفر:هلا بشمعة البيت هلا بجنتي
ام سعود :هلا ب وليدي الحمد لله على السلامة
مسك يدها يدخل ويخلي ميسم وفهد على راحتهم
اما عند فهد الي شاد على حضنها وهو يمسح على راسها ويبوسه:اخخ اشتقت ل هالريحة الطيبة
ابتعدت عنه شوي ولا زالت يدينه محاوطه خصرها :الحمدلله على سلامتك اشتقت لك
ابتسم وقرب منها يبوسها وابتعد :ماهو كثر شوقي لتس ، باس راسها :اسمعيني عاد دامني جيت يالله جيبي اغراضتس نرجع لبيتنا
لازالت متمسكة ف يدينه وتتأمل وجهه:زين دقايق واجيك
تركها ومشت تبي تدخل وهو لا زال ف مكانه لفت له:تعال داخل عند سعود وامي
فهد:لا خليني هنا احسن
ميسم :احسن لك تدخل لان الشمس بتصقعك ،مدت ايدها له وهو بدوره راح لها ومسك يدها ودخلو ف المجلس عند سعود كان لحاله جالس شافه فهد مركز على جواله وقال:السلام عليكم
رفع راسه سعود بعد ما انتبه و رد السلام ولف لـ ميسم:قولي لـ نورس تجيب موية (نورس الخدامة)
ميسم راحت تسلم عليه:قبل لا اروح ترا ما سلمت عليك تعال، فتحت يدينها تحضنه وتتحمد له على السلامة تنحنح فهد وهو يقول:ميسم يالله يا امي انتي جيبي اغراضك الحضن تلقينه بعدين
لف له سعود وهو لا زال حاضن ميسم:لو سمحت اختي لا تجلس تسوي حركات الغيور
فهد قام وبعدهم عن بعض وسحب ميسم عنده:ولو سمحت هاذي زوجتي ومابخليك تحضنها على كيفك حتى لو انت اخوها
سعود ناظره 😏وكاتم ضحكته على غيره فهد وميسم من شافتهم كذا قالت:انا بروح اسلم على امي واخليهم ينزلون اغراضي
سعود:بتروحين اليوم وبذا الوقت ؟
ميسم:اي ليه
ما رد سعود وجلس وهي طلعت من عندهم للمطبخ تشوف امها اذا فيه وعقبها طلعت بعد ما قالت للخدامة تجيب لسعود موية صعدت فوق وراحت غرفة امها وشافتها جالسه تقرا قران ابتسمت ودخلت تجلس بجنبها على السرير وباست راسها ام سعود خلصت قرائه وسكرت المصحف وحطته فوق الطاولة الي قدامها ونزلت نظراتها الطبية ابتسمت ميسم:تقبل الله منتس
ام سعود بادلتها الابتسامة:آمين ،ليش جايه ومخليه زوجتس لحاله
ميسم:جيت اسلم عليتس علشان برجع معه
ام سعود ابتسمت ومسكت يدين بنتها:ما بتجلسين اليوم عندنا علشان بتجي زوجة سعود
ميسم نزلت راسها:ودي اشوفها بس تعرفين
ابتسمت ام سعود من عرفت ان ميسم ما بتقدر تقاوم شوقها لزوجها وقالت بضحكة طفيفة:روحي لبيتس مع زوجتس وكحلي عيونتس فيه لاحقه على ورد تشوفينها مرةٍ ثانيه
ابتسمت بحب على تفهم امها وقامت تبوس راسها مره ثانيه ويدها وطلعت لغرفتها تاخذ عباتها ونادت الخدامه تنزل شناطها بما انها ما تقدر تشيلهم ونزلت بحذ على الدرج وشافت ابوها قدامها وتقدمت له وسلمت عليه وباست راسه ابو سعود:تحبين الكعبه يابنيتي
ابتسمت ميسم:توك جاي يبه
هز راسه:ايه، وين رايحة لابسه عباتتس
ابتسمت ونزلت راسها:رايحه لبيتي فهد جاء
ابو سعود:ماشاءالله متى وصل
دخل يدها بيد ابوها مشت معه للمجلس وهي تقول له:على الي قال لي انه واصل امس الليل
دخلو المجلس على سعود وفهد ابو سعد:السلام عليكم والحمد لله على سلامتكم كلكم
تقدم سعود يسلم على ابوه ويبوس راسه:الله يسلمك ابوي شلونك وشخبارك
تقدم فهد بعد ما ابتعد سعود وباس راسه :شلونك يا عمي عساك بخير
ابو سعود حط يده اليمنى على يد ميسم الي متمسكة بيده اليسار:الحمدلله بخير ،الا انت شلونك فهد واوضاع الشركه كيف
فهد مس يده يجلسه على الكنب وهو جلس يمينه ف الكرسي :ابشرك بخير والشركة زانت اوضاعها
هز راسه ونطق:جزاك الله خير انت ومنصور على الي سويتوه
هز راسه ب لا فهد:لا شدعوة هاذا واجبنا ماسوينا شي انت وجدي الي تعبتو عليها
سعود:الا على طاري منصور ليه ما رجع
فهد :يقول ان عنده شغل يخلصه ويرجع وما بيطول
خذتهم السواليف شوي وبعد مده قام فهد :يالله استاذنكم باخذ بنتكم وارجع بيتنا
ابو سعود:تغد معنا
فهد باس راسه:خيرك سابق يا عمي اعذرني
ابو سعود ما حب يصر عليه والتفت لبنته الي هي بدورها قامت وباست راس ابوها :مع السلامة يا بنيتي انتبهي لنفسك لا اوصيك فهيد
فهد ابتسم ومسك يمين ميسم :لا توصي حريص
ميسم:مع السلامة سعود سلم لي على ورد
سعود ابتسم:يوصل مع السلامة
طلعو واخذ فهد شنطة ميسم وطلع يركبها السيارة وهي لبست نقابها وطلعت وراه وركبت وركب هو بعدها وحرك كان ماسك الطارة ب اليسار ويده اليمين ماسكه يد ميسم ميسم رفعت يده تبوسها ورجعتها مكانها وهو ابتسم وشوي بدت ميسم تسولف له وش يصير معاها ف الحمل وكذا اخر شي ضحكت:احمد ربك انك مو موجود ولا كان نفست عليك انت بعد
ضحك فهد:الحمدلله اني مو موجود ربي رحمني
ضربت كتفه :فهيد خيرر المفروض انت الي تتحملني مو اهلي
مسك يدها يبوسها:هم حضرو النص وانا النص الثاني والله يعينني
اخذت يدها تبعدها بزعل وهو عاندها وسحب يدها لحضنه :تونا على الزعل حبيبي توني ما شبعت منتس
ماردت عليه وهو سكت وكل شوي يبوس يدها وهي تبتسم تحت نقابها هي ما زعلت بس تبغى تشوف وش راح يسوي ومسافة الطريق ووصلو بيتهم دخل سيارته ف الحوش وسكر الباب ونزل من السياره ينزل شنطتها وبعدها راح يفتح الباب وهي كانت وراه دخلو داخل وكان البيت نضيف استغربت ميسم:ماشاءالله البيت يلق من منضفه
دخل فهد الصاله وجلس على الكنب :زوجتي الثانية الله يجزها خير
انصدمت ووقفت مكانها فسخت نقابها ورمته ف الارض وقالت بصدمه:من جدك تتكلم فهد
فهد خبى ضحكته :اي ليه انصدمتي
نزلت دمعه من عينها وكان فهد يتامل ملامحها واول ما نزلت دمعتها قام لها يضمها:لا تنزل دمعتك والله امزح امززحح
هي استوعبت وصارت تضربه وهو مسكها يشدها لحضنه:فهد تستهبل ايش ذا المزح الثقيل
ناظرها ومسك وجهها بيدينه وباسها :أسف كنت ابيك تتكلمين مسويه زعلانة وما تبين تكلميني ف السياره فا جت ذي ببالي
ميسم:يشينككك
فهد ابتسم:قصدتس يا حلويي صح
مشت تبتعد عنه :لاا
هو ابتسم واخذ شنطتها ولحقها لغرفتهم فوق دخلت الغرفة وهو وراها وجلست على السرير وفتحت جوالها وشافت البنات مرسلين وتذكرت:صحح فهد اليوم فيه جمعة فبيت جدك
فهد:مادري
ميسم:ما سألتك اقولك انه فيه
فهد:اييي توني ادري
ميسم:بتروح طيب
تمدد جنبها على السرير وسحبها لحضنه وقال وهو ميت نوم:مادري بس احتمال اروح
ميسم:ترا بروح معك
همهم لها وغمض عيونه ينام وهي عدلت نومتها ونامت بحضنه