طيفك ماف

1

ماما.. مامااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااا..

صحيت من كابوسي بكف.. كانت مواهب مرة ابوي قالت لي اتزفتي اتلبسي سريع ولا ناسية الليلة شنو.. الساعه 7 جات..
طبعا الليله حنه اختها وبكره العرس طوالي.. مشيت من غير نفس لبست الفستان البني المحروق والطرحة و م اتمكيجت وجيت مارقه.. طبعا جاطت فيني وكوركت وقعدتني مكيجتني بالغصب وفكت لي شعري عملتو لي كيرلي..
اساسا لينا اسابيع وشهور متمرطين في بيت امها واخواتها وبيت اهلها.. كل اليوم معاهم عشان بيت عرس وكدا.. مع اني م عندي رغبة امشي لكن مجبورة.. المهم ظبطتني تمام وانا كنت صاره وشي مشينا الحنه في صالة كنت قاعده ف التربيزة وصاره.. جابو الاكل م اكلت بس شلت بارد بقيت اشربو.. فجاة كدا سمعت صوت م بغباني..
((فكي الصرة ي جميل)) .
بخلعة قمت من مكاني وقلت مزززززززززززززززززززززن وجريت ليها حضنتها.. قالو لي احنا ماف لينا حضن.. حضنتهم واحدة واحدة قلت ليهم اسراء كالعادة م جات..
حنين قالت لي براك عارفه افكارها ف لو ضبحتيها م بتجي حفلة.. قلت ليهم انتو عرفتو الموقع كيف.. نون قالت لي كان م هبله قلتي لينا اسم الصاله وبرانا عارفين اليوم وباقي التفاصيل واساسا عارفين خلقتك حتكون مزفتنة كدا ف قلنا نجي نفرق عليك لاننا عارفنك م بتقدري بدوننا 😂.
قلت ليها كدا يادوب مزاجي اتخرب🤣.. المهم قعدنا نتونس كدا وزهجتي فكت وبقيت بضحك.. فجأة جات "منية" قالت انا لييي ماف زول بفك لي زهجتي لمن ازهج.. وقعدت تضحك.. صحباتي بقو يهاظرو ويضحكو معاها.. انا عاينت ليها من فوق لتحت ورجعت اشرب باردي.. هي اتضايقت واختصرت كلامها مع البنات وفاتت..
طبعا كالعادة لاموني ودخلو معاي في دوامة نقاشات وقالو لي مالك مع البت وهي طيبة وبتحبك وعايزه تصاحبك و و و.. قلت ليهم اي زول بقرب لمواهب د انا م دايره معاهو شي.. نادين قالت لي بالمنطق كدا ي سندس مواهب د زاتها م زوله كعبه للدرجة د.. يعني م زي نسوان الاباء الكعبات ديل.. قلت ليها هئه د كان زمان لما كنت شافعه كانت بتعاملني ببرود لا بتحبني لا بتكرهني بس بتهتم بي اداء واجب.. اسه ورت وشها التاني.. نادين قالت لي سندس م تبقي شرانية وحـ.. ريان قاطعتها قالت لينا ورح يبنات نرقص عشان لو نادين وسندس ديل بدو م بنتهو نهائي.. فعلا مشينا عملنا دائرة وبقينا رابنها وانا بنطط عديل.. الكاميرا وجهوها علينا والناس بقت مركزة علينا لانو صراحة ماشاءالله صحباتي جمالهم عالي شديد وتلقائيا عندهم قبول.. ورقيصنا زاتو زابط زنقناها.. مواهب بقت تعاين بغيييظ كدا جاتني وهي مبتسمة بالغصب عشان تظهر في الكاميرا مبتسمة وقبلت جاي حمرت لي وقالت لي اسه م كنتِ زهجانه ووشك حيقع منك مالك ان شاء الله فجأة وكمان سارقه الاضواء قايله نفسك مهمه كدا انتِ والحايمات معاك في كل مكان ديل!! بارك الله في المنقبة الما بتجي معاهم هي الوحيدة النافعة فيكم.. اول م مشت كلنا اتفقعنا ضحك فيها ومزن بقت تحاكي فيها وتردح ليها.. قلت ليها اسه لو اسراء كان قاعده كان قالت ليك ي مزن م تحاكيها حرام.. لين قالت هو فعلا حرام مشحوار والبتعملو فيهو د اسمو سخرية ومؤذي شديد.. قلت ليهم مواهب تستاهل البلاء كلو.. نادين قالت لي بيبي روقي واستغفري العدوانية لزومها شنو اسه..
عدت حفلة الحنة ورجعنا بيت اهل مواهب بالغصب طبعا وصحباتي اتفرتقو واليوم التاني برضو كانو معاي م عارفه لي المهم كانو معاي وكان العرس.. حنسنا اسراء تجي ورفضت طبعا.. قالت لو العرس م فيهو اختلاط ولا تبرج ولا غنى ممكن تجي.. نون قالت ليها بقى م عرس كدا.. اسراء قالت ليها كدا يادوب الصاح.. المهم لبسنا وانا لبست فستان رمادي.. طول الوقت في العرس كنت مضايقة ف ضربت لاسراء وقعدت ابكي ليها.. قالت لي عايني نفسك لابسه شنو ومتبرجه وفاكه شعرك وسط الاولاد وفي كامل زينتك وفي اختلاط وغنى شغاله متوقعه تكوني مبسوطة؟.. مشيت حمامات الصاله عاينت لنفسي مسااافه واخدت نفس صلحت مكياجي وجيت مارقه لاقوني البنات حكيت ليهم وبعدها طوالي جو العرسان ورقصو سلو وبعدها بدا العشاء.. طبعا احنا همنا الطقه ف طوالي بقينا نكابس.. وبقينا ندافر عديل المهم نضمن اكلنا وباردنا.. مواهب حمرت لينا وهي ماشه وقالت شوفو الفجعانات ديل بالله.. ضحكنا فيها وواصلنا مشينا وانا بحلم بالسفن اب وبتمطق ولسه ماشين وبنضحك كدا ضحكة الصحبات الما قادرين يوقفو ديك (والله ظابطة).. المهم انا ماشه وشبه مدنقرة ومشتتة وبضحك فجاة اتطقشت بحاجه.. رفعت راسي لقيت نفسي اتطقشت مع ولد قولة سمح بسيطة عليهو وطويل شديد ( اي حنك كل الروايات تكون شعرها كاري بالواطه وبيضاء وغنية ويجي واحد طويل اسمر ملتحي يطقشها ويشمو بعض بعدين يحبو بعض ويعرسو ويجيبو بت يسموها وتين بعدين يخونها ويرجعو لبعض.. خلاص بهظر والله مكدا 😂.. م علينا نرجع..)
طبعا كلنا بقينا فاتحين خشومنا وعيوننا عامله قلوب ونسينا العشاء ونسينا نفسنا زاتو وبقينا مبحلقين فيهو كلنا اتخيلو.. وهم شغالين يهمسو وينبرشو ويقولو واي احي والمهم انبراشات البنات د.. وانا الطقشت فيهو م عايزة ازح من حتتي زاتي.. وهو حسيتو زي السرح كدا فيني لكن فجاة فكا السرحه وكورك قال لي م بتشوفي وكمان م محترمه بتضحكي بصوت عالي ناسيه انك بت يعني.. عاين لي من فوق لتحت ومشى.. ريان قالت بعد سماحتو د مفتري؟ نون قالت ليها يبت د حال الاولاد السمحين والله لو عندي نص جمالو بفتري واكتر.. قلت ليها بزهج نونا حبيبتي انت عندك اضعاف جمالو د واحد عفن ساي.. كلهم شهقو وقالو لي مبنسمح ليك.. نادين قالت لي انت زاتك منبرشه م تنكري.. قلت ليها وانت زاتك.. قالت لي لكن م ناكره هو سمح.. قلت ليها خلاص اهوداك امشي ربطي معاهو يلا اتفضلي.. قالت لي روقي طيب مالك اسه.. لين قالت ليها خلاص بقى كراشها م بترضى فيهو.. نون قالت ليها م كراشها براها كراشنا كلنا لكن هي شكلها حبتو عديل شكلو الطقشه دخلت ليها ف راسها لما بقت بتغير عليهو.. طبعا زهجت وقعدت ابكي.. صحباتي متعودين على حركاتي د المهم خلوني ابكي وهدوني وضحكوني مشينا الحمام مكيجوني تاني ومرقنا.. مزن قالت لي الليله وشك د عدتيهو ٢٣ مرة واي بعد د بتشق خلاص.. المهم مشينا شلنا العشاء و م لقينا سفن اب زاتو بس بيبسي ف شلناهو وشلنا العشاء مشينا قعدنا ف تربيزة احنا ال٧ وجو بنات عمي وبنات خالتي وبرضو جزء من بنات خالي وبنات عمتي المهم لمة كدا كبيرة بتاعة بنات وكلنا تقريبا بين اعمار ١٤-١٨ (خالتي وخالي اخوان امي الولدتني م مواهب).. قلت لبنات خالتي وخالي الجابكم شنو عرس اهل الحيوانه د.. حنين قالت لي اسه مالك عليها مشتماها.. ريل بت خالتي قالت لي نسيتي العريس من بلد ناس ماما.. لويت ليها خشمي بس.. شايفه منية دايره تجي تقعد لكن اتراجعت.. نون قالت لي اها عقدتي البت مبسوطه؟ قلت ليها اي وانا بشرب في البارد.. قالت لي الله يرزقنا برودك قلت ليها امين.. جا ماري الولد داك حمر لي ومشى.. طبعا لفتهم عاينو ليهو وبقو ينبرشو كلهم واتجننو عديل.. قلت ليهم هيي م للدرجة د.. نون طبعا جنها انبراشات (الشله كلها جنها عدا انا واسراء حتى انا مرات بنبرش بس اسراء بتقول حرام لكن نون مكثفة شدديدد) المهم قالت احي واي اريتني لحيتو ولا ساعتو بس م دايره شي تاني في الدنيا د.. م للدرجة د؟؟ هوي ي دنو والله للدرجة د و اكتر (مرات بقولو لي دنو عشان سندس).. المهم جات منية مارة تاني حنين ونادين ابتسمو ليها وقالو ليها اقعدي.. جابت كرسي وقعدت بتردد كدا.. اول م قعدت انا قلبت عيوني وقمت وشايفه منية دايره تقوم وراي باحراج كدا لكن البنات حنكوها قعدوها وونسوها.. انا مشيت قعدت برا وانا حاسه بضيق بس نزلت راسي وبقيت مغمضه شميت ريحة سجاير لكن نهائي م اتضايقت ولا فرقت معاي لحد م سمعت صوت الولد القبيل بحدة بقول لي تعالي اشربي معاي عليك الله.. ناسيه انك بت ولا شنو ؟ قلت في نفسي د مالو د اي شي انت بت انت بت.. م اشتغلت بيهو وقمت.. قال لي عامله طرشه يعني؟؟ برضو م رديت وكنت ماشه.. فجاة كدا لفتني عليهو ومسكني من معصمي بقوة وقال لي لما اتكلم تردي فاهمه ولالا؟ جوا نفسي قلت بعرفك من وين لما ارد عليك وتاني قلت اسه لو ابوي ولا مواهب شافوني مع ولد بتضبح ومواهب حتالف قصة طوييلة عريضة وتحكيها لابوي.. المهم بس بقيت ارجف ودموعي ف طرف عيوني.. فجاة الولد قلع تلفوني من يدي قلت كمان قليل ادب وذكوري وحرامي؟ شالو وفتحو مبعرفو عمل شنو بس سمعت جوالو رن ف استنتجت.. قلت د شنو التافه د وطوالي دموعي نزلت.. اداني جوالي ومشى.. المهم رجعت التربيزة اول م رجعت منية قامت طبعا شاكلوني عشان حركاتي معاها بايخه دموعي نزلت.. قالو لي اسه بتبكي عشان د؟ قلت ليهم لا وحكيت ليهم.. نون قالت لي احي اديني تلفونك اشم ريحتو.. قلت ليها يع.. حنين قالت لي بعرف النوع د من الاولاد انا.. ريان قالت ليها اي والله ربنا يستر بس.. نادين قالت ليهم يجماعه مالكم.. مزن قالت لي بخختك جاك حبيب سمح.. قلت ليها حبيب شنو يبت لو ضرب لي ببلكو.. حنين قالت لي مبتقدري والله صوتو الكسار براهو بضعفك اساليني انا.. لين قالت لي شكلو نهايتك زي الروايات تتطقشو وتعرسو.. قلت ليها م للدرجة د.. نون شالت تلفوني شمتو مسافه وكلهم بقو يشمشمو فيهو قلت ديل مالهم اعوذ بالله جنو بالسرعه د.. وشغالين يقولو احي من عطرو.. نون فتحت التلفون لقت في رقم في السجل سجلتو بالولد الكسار قلت ليها لا ي هبله.. قالت لي لما تعرفي اسمو غيريهو لاسمو وختي قلب ظابط؟ م استنتني ارد بقت تقرا الرقم بصوت عالي وبقو يسجلو كلهم فيهو.. لين قالت ولد زي د م بفوتو والله بشلبو من سندس عديل.. قلت ليها هو م حقي اصلا.. وبعدين زهجت انا غيرو الموضوع د يخ شنو م صدقتو شفتو ولد سمح.. فجاة جا ماري وغمز لي.. قلت د شنو ابو النفسيات د.. كلهم بقو يقولو اووووو ويشغلوها لي.. قلت ليهم اسكتو شكلو غمز لريل م لي زاتو اليغمز لي شنو وهو اسه متشاكل معاي.. ريل زغردت لما اتخلعنا قالت ي بختي لو غمز لي ويا بختي لو عاين لي اصلا الله يكتبو لي بس.. هند بت عمتي قالت ليها اجي ي ال الله يكتبو لي عرفة من متين ي ضوا؟ ريل قالت ليها انتِ اسكتي.. المهم عدا العرس والجرتق ومواهب قعدت ٤ يوم مع ناس امها ترتب البيت وانا غصب اقعد معاهم وابلع كلامها وكلام اهلها الجارح.. بعدها رجعنا البيت ومواهب فجاة قامت ليها بطن صغييرة كدا قلت معقوله تكون حامل؟ معرسه ابوي ليها ١٠ سنة م حملت لكن مف شي بعيد على ربنا.. فعلا مرة لمحتها بتستفرغ وبعدها فجاة ابوي بقى يهتم بيها زيادة.. اصلا عرفت لكن م كلموني ولا كلمتهم.. وياهو روتيني من المدرسه للبيت ومن البيت للمدرسه مرات بمشي لصحباتي القريبات واليوم اغلبو ف التلفون ومرات بساهر فيهو.. ف يوم الساعه ٤ صباحا قاعده ف امان الله فجاة ابوي جا داخل وقال لي جيبي التلفون د.. عملت ليهو ايقاف تشغيل وقلعو من يدي ومشى.. استغفرت شوية لحد م الفجر اذن صليتو ونمت شويه بعدها صحيت جهزت للمدرسه.. كان يوم احد.. طبعا بمشي كداري مع انو ابوي عندو مقدرة ياجر لي عربية.. مشيت وفي الطريق قابلت صحباتي وصلنا سوا دخلنا ياهو حضرنا الطابور وخشينا الحصة الاولى كانت اسرية.. الاستاذة علمتنا كيف نعمل سلطة فواكه.. حنين قالت شكلها خلاص قطعت موضوع قررت تدينا د اخر الزمن؟ نادين قالت ليها فعلا قطعت لانو اولة وتانيه نفس الكتاب واحنا متقسمنو لو نسيتي والكتاب اساسا صغير.. ج داخل استاذ الفيزياء.. كتب العنوان وبعصبية كدا ضرب على التربيزة.. (طبعا انا ونون ونادين واسراء في كنبة وريان وحنين ومزن ولين في كنبة قريبة مننا).. ضربها بقوة لدرجة انو الفصل كلو اتخلع.. وقال بعصبية انا م عارف انتو شفع متين لما تعملو الكلام د.. اجسامكم بتكبر لكن عقولكم لا.. م معقوله الفارغه د معاكم.. طبعا د كلو واحنا مخلوعين.. قعد يتكلم عن انو البنات بمرقو من المدرسه يلاقو اولاد ونينينيني.. المهم اتكلم الحصه كلها وطلع وهو زهجان.. الفصل اتقلب فوق تحت.. حنين ضحكت وقالت م اتحسست نهااااائي.. نادين قالت بس م يكون شافني مع محمد.. اسراء قالت ليهم ربنا يهديكم.. انا قلت القرف دا زاتو المخليهو مركز مع اجسامنا شنو!! نون قالت لي انتِ م المفروض طرف السوط يهبشك اصلا لانو جسمك وحجمك صغييير ولا حجم الشفع زاتو😂💔... جات الحصه التالته جغرافيا اخدناها ومرقنا فطور.. لقينا البنات بجرو وبطاقشو.. قالو في البوفيه جابو ميرندا برتقاليه.. لين قالت بمشي اجيب ليكم .. اديناها القروش وحنين مشت تجيب الطعميه واحنا قعدنا منتظرنهم.. وجابوهو فعلا وكان ظابط سندوتشات طعميه مع ميرندا باردة.. مزن قالت احا وقلبي زحا د بتحصل ف القرن مرة.. ريان قالت محسسني انها برقر كان م الطعميه البناكلها كل يوم.. اسراء قالت ليها استغفري و م تعيبي النعمة.. الطعمية د زاتها ف ناس م لاقنها وممكن تطلعي الشارع تشوفيهم براك.. فجاة حنين جوالها رن قلت ليها هربتيهو تاني ي حنين؟ قالت لي تعالي معاي د احمد قال لي الاقيهو برا.. قلت ليها بري سوقي ريان البتمشي معاك كل يوم ولا خليهو نهاية اليوم خلاص.. ريان قالت لي برررري عبدو م بخليني اقيف مع غيرو🙈.. قلت ليها ولما بتمشي معاها د كان شنو؟ قالت لي كان عبدو زاتو بكون واقف اسه ماف.. لويت خشمي وقلت لحنين يلا انقلعي طيب.. اسراء قالت لينا الله يهديكم يبنات الكلام د م صح.. قلت ليها سرو م تزعلي مني معليش ومشيت مع حنين.. المهم مرقنا وهي وقفت مع حبيبها وبقت قريبة منو شديد وشغالين يتكلمو وهو مد ليها رصيد وهي شغاله تتبسم وفجأة ج الولد حق اليومداك ماري انا قلبي اشتغل دمبلق دمبلق.. ج داخل الشارع وانا قلت والليله واي علينا..
..يتبع..

بقلم/ مريم (مبتغى) 

سبحان الله وبحمده سبحان الله العظيم🧡