طيفك ماف

5

اتخلعت وقبل م اقول ليها شي طوالي قفلت الخط.. لقيت عبايه سوداء في وشي لبستها مفتوحه ولا شلت طرحه ولا شي بس بي حالتي ولبست سفنجه ومرقت مخلوعه.. م اشتغلت بناس مواهب وهم بسالوني مالي.. انا م بعرف كيف ولا متين وصلت بيت اسراء المهم وصلتو مع انو المسافه شبه بعيدة وعادة بمشيها بركشه.. لقيت ريان زاتها هناك.. قالت لينا انا طلبتكم انتو الاتنين لانكم اكتر اتنين قريبين لي في الموقع الجغرافي يعني الاتنين في الرياض.. ريان قالت ليها يا زفت اخلصي.. بقت تبكي تاني حضنتها قلت ليها في شنو يا قلبي؟! قالت لي طبعا زي م عارفه امي بتحب الونسه مع نسوان الجيران واليوم كلو ي مع جاراتها ويا هم معاها ودايما بعملو قعدات جنبة.. واساسا الموضوع م عاجبني لانو غيبة ونميمة وحذرت امي اكتر من مرة كوركت فيني.. لكن كلو م زي لما بقو يرمو الودع.. ويشوفو الفنجان.. كلمت امي وكلمتهم كلهم وعظتهم قلت ليهم د شرك بالله شاكلوني.. امي قالت لي العوارة حقتك انت واسلام اختك د مش كفايه اني متحملاها كمان تجي ترميها فينا وتعدمينا العيشه.. اسراء بقت تبكي شديد قالت اتخيلو قالت على نقابنا عيشه.. قالت اننا م بنات ولا شبههم انا واسلام لانو احنا الاتنين منقبات و م بنصافح والحفلات م بنحضرها.. قالت ياريت لو كنا زي اخواتنا الباقيات الطبيعيات.. و م بس د الحصل في اليوم دا.. علا اختي كانت جايه من الجامعه تلفونها اتسرق وضربوها في يدها لما اتلوت ودوها المستشفى.. وبعدين كانت بتبكي قايلنو عشان تلفونها لكن اتضح عشان حبيبها خانها واساسا انا م كنت عارفه انها مرتبطه والا م كان خليتها.. بقيت اوعظ فيها واقول ليها د جزائها عشان عصت الله وارتبطت.. كوركت فيني وقالت لي اسكتي ياخ وطردتنا كلنا من الغرفه ورزعت الباب.. طبعا كنا انا واخواتي معاها في الغرفه بدون امي.. بعدها امي قالت انو م معقوله د كلو يكون زعل على التلفون ويدها الملويه.. دخلت تشوفها وشالت ليها اكل وقهوة عشان بتحبها لكن لما خشت الغرفه وبقت تصرخ البيت كلو اتلمى لقينا فيها منظرين مفجعين بطريقتين سيئتين.. الاول يدينها طالع منها دم فظيع وواضح انها قطعت شرايينها.. والتاني انو جمبها صبغه وخشمها فيهو وواضح انها شربتها.. طبعا البيت كلو بقى يصرخ وابوي برجف شغال لا اله الا الله ضرب للاسعاف وبعد شويه جو ساقوها مشينا معاها المستشفى كلنا.. الدكتور قال ادعو ليها بس لانو هي حاولت تنتحر بطريقتين في وقت واحد يعني ولا حتى طريقة واحدة.. وامي شغاله تبكي وتتمردغ ولمت خالاتي والاهل كلهم.. وصحبات علا زاتهم جو وكانو كتار.. المهم في قبيلة كامله متلمة في المستشفى.. انا بقيت اتذكر اليوم د كلو وببكي وبدون م احس طلعت من المستشفى.. جا ابوي لاحقني قال لي ح اسوقك البيت.. م كنت عاوزه ارجع لكن غصبني وقال لي عشان بكره المدرسه! قلت ليهو مدرسه؟!! بعد كل الحاصل د متوقعني امشي.. سكت ووداني البيت قال لي عشان انتِ صغيرة ماف شي بقعدك في المستشفى كتير ونادي صحباتك ولا بنات الجيران يقعدو معاك لحدي م في زول فينا يجيك.. وفعلا د الحصل ناديتكم انتو وعشان كدا اسه البيت فاضي.. طبعا احنا قعدنا نبكي معاها ونواسي فيها المهم شلنا ليلنا داك كلو بكى.. بعدها شغلنا ليها قران عشان تقدر تنوم.. انا لما القران اشتغل قلبي اكلني واتذكرت انا عملت شنو قبيل وكيف عصيت ربي.. لكن عملت نفسي رايحه (استغفرالله).. ريان قالت لي بعد د مف طريقه نرجع بيوتنا الساعه 12.. قلت ليها 12 متين جات!! الليله واي االليله جنازتي حتتقري.. قالت لي م كلمتيهم انك مارقه انتِ؟ قلت ليها بري مرقت مخلوعه بس انتِ كلمتيهم؟ قالت لي آي يبت لازم.. المهم بتنا مع اسراء والصباح غصبناها تلبس لبس المدرسه وشربناها الشاي واشترينا ليها بسكويت رويال عشان بتحبو وهي حالفه م تاكل الا دخلنا ليها بالاسلام قلنا ليها ربنا م امر بالهلاك وكدا.. المهم بعدها مرقنا كلنا ريان مشت بيتهم تجيب هدومها حقت المدرسه وانا عملت نفس الشي وسقت اسراء معاي.. خشيت البيت لقيت ابوي قاعد في الصاله وقافله معاهو قفلة صح.. قال لي وين طرتي امبارح؟! جابت ليها بيتة برا البيت كمان! وعيونو كانت زي الشرار.. قلت ليهو كنت مع اسراء.. قال لي البت دي م تعلقيها شماعه لعفنك وعمايلك.. اسراء قالت ليهو بحلف ليك بالله العظيم يا عمو انا طلبتها هي وريان بت احمد بتعرفو صح؟ كان لازم يقعدو معاي عشان م ابيت براي اهلي كلهم في المستشفى.. شكلو زي الما صدقها كدا لكن قال ليها كفارة ياخ منو العيان؟ قالت ليهو اختي وسكتت على كدا.. انا مشيت استحميت ولبست سرعه،،،.. جينا مارقين ابوي كان لسه ف نفس حتتو قال لي ارفعي الزفت د في شعرك.. استغربت فيهو لكن رفعتها واول م طلعنا نزلتها تاني اسراء رفعتها لي❤ قلت ليها اوووففففف.. اسراء قالت لي معليش عملت ليك مشاكل.. قلت ليها م تعتذري مني عشان بنختلف وبعدين المشاكل اساسا كدا كدا قايمه اسكتي ساي بس بحكي ليكم يوم تاني.. لقينا ريان في نص الطريق واصلنا سوا وصلنا المدرسه حكينا لباقي البنات وكلنا عملنا لاسراء موضوع عشان ننسيها.. كمان كلنا لبسنا طرحنا ولفيناها حجاب نون قالت ليها بقينا محجبات عشانك ي جميل.. اسراء قالت ليها اسسسسسسسسسستغفر الله يخوانا اتقو الله دا كلام شنو،، مفروض دا لي الله م لي انا وبعدين انا بقول الكلام د لمصلحتكم في النهايه انتو الحتستفيدو م انا.. قلت ليها خلاص يا قلبي اهدي عايني عيونك محمرة كيف.. قالت لي م تحمر كيف ولحدي اسه اهلي كلهم في المستشفى الليل كلو ماف زول جا راجع.. نادين قالت ليها بيبي خلاص روقي وقعدنا نتونس عادي لحد م الطابور ج.. بعدها الحصه الاولى كانت جغرافيا جانا الاستاذ هو استاذ لذييذ كدا اسمو محمد ادانا الحصه ومرق.. طبعا الجغرافيا مادة جميلة.. الحصه التانية كانت عربي جانا استاذ العربي ادانا ومرق واستمرت الحصص كدا.. نهاية اليوم ناس نون مشو مع اسراء وانا مشيت البيت.. لقيت ابوي قال لي بزهج بس الليله عشان صحبتك لكن من بكرا تمشي بالترحيل فاهمه؟ قلت ليهو كويس.. اداني كف قال لي كويس د م تقوليها قولي حاضر.. طبعا عادي يديني كف ساي.. المهم عاينت ليهو ومشيت.. لقيت مواهب قالت لي حسابك معاي بعدين على الشردة د اسه تعالي نظبطك.. قلت ليها م عايزه.. قالت لي زفته! قلت ليها جمالي الطبيعي م مالي عينك؟ اختها قالت لي البت لازم تتجيه خصوصا لو دايرين يخطبوها.. دايره تطفشيهو من اسه؟ قلت ليها خليني امشي لاسراء طيب.. قالت لي هي صحي اسراء مالها.. قلت ليها م بخصك ومشيت لبست مشيت ليهم.. اول م دخلت قعدنا شويه فجاة تلفون اسراء ضرب.. ردت وفتحت السبيكر نون قالت الو.. طلع صوت اسلام اخت اسراء قالت اسمعو روان كانت سايقه عربيتها عملت حادث واسه في غيبوبة.. كلنا بصوت واحد قلنا شششششششنو!! م عدا اسراء غمرت بس.. بقينا نصحي فيها والوقت كلو نهديها وهي شغاله تبكي بهستيريا مبالغه.. قالت علا وروان كانو دايما قريبين لبعض.. وانا واسلام قريبين لبعض.. مع انو انا م كنت عايزه التقسيم د لانو في النهايه كلنا قريبين لبعض واخوات.. لكن هم بقولو لينا عشان انتو منقبات خليكم سوا م بتفهمو في امور البنات (على اساس المتنقبات م بنات؟!💔).. وانا عارفه عصبية روان وطيشها لكن م اتوقعت د يحصل.. ودوني ليهم اسه.. قلت ليها اسراء.. قالت لي ولا كلمة.. فعلا لبسنا ومشينا المستشفى لقينا علا عملو ليها اجراءات كتيرة وغسلو ليها معدتها على الاقل تلاته مرات ويدينها كلها مربطة.. واحدة ملويه التانيه الشريان اتقطع.. وروان في العناية وحالتها حرجة.. مواهب شغاله تضرب لي وانا بقفل في وشها اخر مرة رديت قلت ليها بزهج في شنو يخ! م تزهجينا معاك الزول براهو نفسياتو ف الارض! طبعا هي لما سمعت كدا كوركت وانا بقيت اكورك وبقينا نتشاكل الاتنين في النهاية اختها شالت التلفون قالت لي قلة ادبك د نناقشها بعدين اسه تعالي ناس العريس قالو اتحركو.. مشيت نص المسافه بترحال والباقيه بكرعيني.. وصلت مبعرف متين ظبطوني وسرحوني وادوني فستان لبستو وبعدين الجرس رن جو نسوان بزغردو وناس مواهب بزغردو وقعدو وادوهم عصاير وتحليات طبعا بعد مسافه نادوني جيتهم مارقه عيونهم بقت قلوب قلوب.. في مرة شكلها ام العريس بقت تقول ماشاءالله ماشاءالله والعريس لما وقف على حيلو وابتسم.. وانا وشي بارد.. مواهب حمرت لي قالت ابتسمي.. عاينت ليها بحدة و م اشتغلت بيها.. طبعا العريس شكلو زول عفوي وطيب كدا حتى اهلو.. وواضح من وشو انو نقي حتى شكلو زي الاطفال كدا لكن في نفس الوقت ملامحو جميلة.. حلبي ولابس نظارات وكيوت كدا.. اتمنيت لو كان اخوي.. قلت الناس ديل م بستاهلو تعاملي الزفت لكن لازم عشان نحسم الموضوع.. ابوي كان قاعد ومبسوط التقول م صدق حيخلص مني.. كنت بس قاعده ببرود كدا وخالفه رجلي،، ابوي حمر لي نزلتهم.. اختو همست لي اختو التانيه حاجه امهم حمرت ليهم قالت ليهم عيب قالو ليها معليش ونزلو راسهم وعاينو لي وابتسمو.. المهم لما قالو انهم طالبني مواهب وابوي حمرو لي نظام م ترفضي م اشتغلت بيهم ابوي قال ابششر احنا م بنلقى احسن منكم والله اديناكم.. ابو الولد قال نسمع راي البت.. قلت ليهم لا وقمت غرفتي.. شفت نظرة الانكسار في عيون الولد داك لكن م اشتغلت بالموضوع.. م عارفه اسمو زاتو شنو..
عدت 3 شهور علا طلعت وروان فاقت من الغيبوبه وكان عندها مشكله في رجلها لكن رجعت طبيعية الحمدلله،،... واسراء كنا دايما بنلازمها لحد م حالتها اتحسنت.. وعلاقتي بمواهب ساءت لانو بطفش كل عريس تجيبو لي.. ابوي شركني في الترحيل معاي بت في تالته ابتدائي وبت في تالت ثانوي وبت في اولى ثانوي وبت في تانيه زيي.. وامين علاقتنا كويسه بقى يعزمني شقتو وبمشي عادي دون م يحصل شي بيننا.. وعلمني شراب الشيشه والسجاير.. طبعا كلو بالدس.. امتحاناتنا النهائية بدت واجتهدنا فيها والحمدلله طلعت درجاتنا كويسه.. في يوم كدا اتلمينا كلنا حنين قالت لينا طبعا رجعت لي احمد.. قلنا ليها ويوسف؟ قالت مييييه يخ د واحد باطل ساي.. اسراء قالت استغفرالله.. نادين قالت ليها سرو الغلو في الدين د خليهو التشدد م حبابو.. اسراء قالت د الصح م تشدد.. لو متشددة من بيتي م بطلع.. المهم عدينا قعدتنا عادي تاني يوم ضربت لي ريان وهي بتكورك قالت لي الحقو تعالو في بيتنا م بعرف لبست شنو ولا مرقت كيف المهم وصلت لقيت البيت فيهو الشله كلها حتى رتاج وكلهم ببكو وبكوركو بصوت واحد.. المشكله انهم تامين يعني مف واحده فيهم ماتت! طيب في شنو؟! طبعا كلهم شغالين يبكو ويسكلبو مبالغه.. قلت لريان وين اهلك خالينكم كدا؟ قالت لي امي مسافره واخواني كل واحد في اتجاه واخواتي ياهو شوف عينك قاعدين ببكو معانا هم زاتهم وابوي فوق نايم.. قلت ليها م حرام عليكم البتعملوهو د؟ ابوك بصحى.. مزن بنرفزة قالت لي افهمي السبب اول يمكن بستحق القبيله كلها تصحى.. قلت ليهم م عايزه اعرف شبعت الم ومشاكل انا.. وقعدت ابكي انا زاتي.. اقرب زول لي كان نادين حضنتها وبقينا نبكي.. انا ببكي وهم ببكو لكن انا م عارفه في شنو المهم ببكي واساسا كنت عايزه سبب اتفشى.. شويه جات حنين بقت تولول وتبكي فيني قلت ليها مالك ي بت انفصلتي من احمد؟ لما قلت كدا زادو في البكا! قلت مالكم ي جماعه!! د كلو انفصال؟ ومالكم كلكم بتبكو؟ مش كنا بنضحك عليهم وعلى عوارتهم؟! ماف زول برد علي بس شغالين بكى.. بعد مساافه ريان قالت لي احمد اغتصب حنين يا سندس..
..يتبع..

بقلم/ مريم (مبتغى)

.

.

.

٢١ هُوَ ٱللَّهُ ٱلَّذِى لَآ إِلَـٰهَ إِلَّا هُوَ ۖ عَـٰلِمُ ٱلْغَيْبِ وَٱلشَّهَـٰدَةِ ۖ هُوَ ٱلرَّحْمَـٰنُ ٱلرَّحِيمُ ٢٢ هُوَ ٱللَّهُ ٱلَّذِى لَآ إِلَـٰهَ إِلَّا هُوَ ٱلْمَلِكُ ٱلْقُدُّوسُ ٱلسَّلَـٰمُ ٱلْمُؤْمِنُ ٱلْمُهَيْمِنُ ٱلْعَزِيزُ ٱلْجَبَّارُ ٱلْمُتَكَبِّرُ ۚ سُبْحَـٰنَ ٱللَّهِ عَمَّا يُشْرِكُونَ ٢٣ هُوَ ٱللَّهُ ٱلْخَـٰلِقُ ٱلْبَارِئُ ٱلْمُصَوِّرُ ۖ لَهُ ٱلْأَسْمَآءُ ٱلْحُسْنَىٰ ۚ يُسَبِّحُ لَهُۥ مَا فِى ٱلسَّمَـٰوَٰتِ وَٱلْأَرْضِ ۖ وَهُوَ ٱلْعَزِيزُ ٱلْحَكِيمُ ٢٤