طيفك ماف

7

طبعا خفت وأي حاجه بس حاولت احافظ على برودي المعتاد.. وفعلا.. حافظت وقلت ليها ببرود طيب وخشيت.. قالت لي يعني معترفه؟ م رديت عليها مشيت غرفتي بقيت ابكي.. بكيت اليوم كلو اليوم التاني ضربت لاسراء قلت ليها تعاليني وهي جات شافت حالتي اتخلعت.. حكيت ليها كل شي طبعا زعلت مني شديد وبقت خاته يدها ف راسها وبتقول لا حول ولا قوة الا بالله.. ضربت للبنات كلهم ورتهم جوني وعرفو وكلهم بقو يشاركوها ردة الفعل.. انا بقيت ببكي بالم.. اكتر واحده فهمت المي حنين.. قالت لي احمدي ربك انو م تم الموضوع الحمدلله الحمدلله الحمدلله مرقتي سالمة.. وبقت تبكي.. المهم فتحناهو بيت بكا تاني وغبت اسبوع من المدرسة..... حذفت كل شي ليهو علاقه بامين وحظرتو مكالمات وكل شي.. بعد الاسبوع انتهى ابوي اساسا م بهمو غيابي بس ج شاكلني قال لي بكرا مشيتي مشيتي م مشيتي اول عريس بديهو ليك بدون تشاور.. فعلا اليوم التاني صحيت لبست.. وفي الاسبوع د كانو البنات م بفارقوني وبتناوبو علي.. جاني الترحيل ومشينا.. البنات شغالين يتهامسوو ويعاينو لي.. بعدها وصلنا المدرسه لقيت البنات منتظرني هناك دخلوني و م فارقوني لحظة يعني حسسوني جد م هنت عليهم.. نهاية اليوم واحنا مارقين شفت عربية بتشبه عربية امين واقفه بعيد مسكتني رجفه مبالغه بس اسراء مسكت يدي وضغطت عليها.. طبعا لقيتهم بدو المنهج ومشو فيهو شويه ولاحظت انو مقرر تالت مختلف عن اولى وتانيه لكن م هماني الموضوع ولا شلت هم قراية ولا اي شي.. بس مشيت البيت نمت صحيت بمغص مبالغه قعدت ابكي .. بالعافيه قمت متلفلفة عملت شاي اخضر.. مواهب شافتني لوت خشمها قالت غاايتو جنس دلع.. يومين م مشيت المدرسه.. البنات جوني اول م قدرو وشرحو لي كل الفات وفرقو عني.. تالت يوم م كنت عايزه امشي لاني لسه تعبانه بس حنسوني وكدا ف مشيت.. في الفسحه بلعت مسكن وشربت مويه وكنت حاسه بألم فظيع وشكلي عامل زي الارملة ج استاذ احمد ماشي عاين لي بقرف كدا ومشى.. اصلا دي نظراتو من زمان.. عدت الايام عادي بس انطفيت وتصرفاتي زادت حدة ومشاكلي مع مواهب ف زيادة وبقيت بتمرد على شغل البيت و م بعملو ودا زاد المشاكل بيننا شديد.. ايام مواهب قربت ف مشت قعدت ف بيت اهلها وانا مشيت معاها جبر لحدي م جا يومها وولدت جابت ولد سموهو احمد مع انو كانت دايره تسميهو مؤيد.. قعدت تبكي وقالت الا ابوي يعوضها بسد دهب.. وانا كنت شغاله خدامتهم طبعا البيت ماشاءالله مليان مبالغه و م بفضى ال40 يوم كلها سندس جيبي وسندس ودي.. اساسا القرايه م كان عندي ليها نفس وكنت مهملاها كاني م ف تالت وموضوع اهمالي دا م سبب لي اي احساس بالذنب بالعكس كان م فارق معاي.. واساسا الوضع دا تما الناقص يعني مف وقت للقرايه بس بركز ف الحصص قدر م اقدر.. ومرات بكون م عندي اخلاق ف م بركز.. البيت غير انو مليان كان معسكرين فيهو اخوات مواهب البناتهم اغلبهم قدري وكانو فيهم البتخاسس علي وفيهم البحاول يصاحبني.. كلهم كنت سافهاهم المهم بنتظر الايام دي تخلص ونرجع بيتنا.. وفعلا حدث بس مواهب كان لسه اخواتها معاها وامها الجات من الامارات راجعه.. كل يوم بكونو قاعدين ف البيت و م بسلم من مطاعناتهم.. حاولت اركز ف قرايتي شويه لكن م بقيت بنفس شطارة زمان.. م بعرف كيف ولا متين عدت السنه المهم فجاة لقيتهم بقولو الامتحانات التجريبية! امتحننا وجبت الما كنت متوقعاهو! 74.6% طبعا بكيت كترة بكاء وصحباتي واسوني وقالو لي دا يادوب الاول ودرجتك م كعبه و..و..و.. المهم بعدها زهجت شديد وبقيت احاول اشد في القرايه واضغط نفسي لكن اكتشفت انو ف الزمن الضايع💔 يوم ريان ضربت لي قالت لي نتلاقى ف سوبر ماركت الحلة فعلا مشينا اشترينا شوكولاتات واتونسنا وقعدنا ف زاويه شربنا بارد واتونسنا وبعدها كنا ماشين فجاة شفت عربية امين.. حسيت نفسي اتشرقت من ماف ومسكتني حالة هيستيريا وبقيت برجف وببكي وشغاله اقول دا هو دا هو.. ريان بقت تهدي فيني وهي م فاهمه لحدي م شافتو.. هو نزل من العربية وجا علينا،، ريان مشت ادتو كف و م خلت ردحي م ردحتو هي طبعا الحاجات دي لعبتها بقت شغاله تكورك وبقو يتشاكلو وانا ف حاله تانيه.. مسكتني حاجه م بعرفها شنو وفجاة لقيت روحي واقعه وتاني م حسيت بشي.. لما صحيت لقيت ناس كتار ف راسي وبقو يتكلمو كلام كتير.. نمت خليتهم.. كأني م كنت نايمه الوقت دا كلو نمت زيادة.. دخلت ف حاله غريبه حتى مواهب بقت تتعامل معاي كويس شويه لانو حنت على حالتي،
بعد كم يوم رجعت داومت عادي وكتمتها ف نفسي زي م بكتم كل شي وحاولت اركز ف القرايه.. بعد كم يوم كان يوم جمعة اسراء قالت لينا كلنا نجيها عشان نقرا سوا وكدا.. مفترض اننا نقرا لكن قضيناها لعب كلها لانو والله كان يوم حلو شديددد.. كانو ناس خالتها اسمها انتصار قاعدين معاهم وعندها شفع كتار شقيين عملو لينا مواضييع كدا ( نوع الشفع البكسرو يدهم تلاته مرات ف الشهر😂).. كلنا لعبنا دسوسية سوا وعملنا ف بعض مقالب ضحكنا كترة ضححك.. حتى كان عندها بنات ف سن الجامعه ونسونا وضحكنا تاني لما قلنا بس.. وحكو انو عندهم اخوهم اسمو حاجه كدا م متذكراها المهم ورتنا اختو صورتو وكان سمح شديد شديد لدرجة انو كلهم بقو ينبرشو فيهو الا اسراء قالت لينا اتقو الله غض البصر واجب وانكم تعاينو ليهو ساي دا اثم خلي تقولو عليهو سمح وبتاع.. نون قالت ليها اسراء م شفتي لحيتو مسطرة بس ماشاءالله😭 نادين قالت احي.. اسراء قامت خلتهم.. طبعا انا م كنت بعلق معاهم لكن م بنكر انو شكلو جذاب.. حتى جابت صورة ليهو مع مجموعة من اصحابو كدا قعدو يصرخو عديل والانبراشات اتضاعفت.. المهم عدا اليوم بالطريقه دي ورجعت البيت لقيت مواهب قاعده وجمبها امها وواحدة من اخواتها.. امها قالت لي تعالي.. قلت ليها انا؟ قالت لي اي سريع.. مشيت قعدت ف الواطه قدامها قالت لي انتِ ناوية تعرسي متين.. مواهب قالت لي خلاص م ناقصك شي بعد دا بقيتي زولة عرس.. اختها قالت لي م ناقصك شي زاتو العرسان بجوك افواج.. لي م يجوك وانتِ اسم وجسم وملامح وسماحه.. لونك سمح لكن لو دايره تبقي حلبيه والله نظبطك بالكريمات دي اسبوعين م تعرفي روحك.. مواهب قالت لي بتبقي نجفه.. قمت خليتهم ودخلت غرفتي قفلت الباب بس.. سامعه امهم قالت خلوها اصلو الحسنه في الملعون م بتنفع.. اسه هي عمرها كم؟ 16؟! والله بَارَت عديل انا لما كان عمري 14 كان عرست وحملت.. ياخ قراية شنو القر ينفخها ياخ.. تاني م سمعت شي ركبت سماعات ونمت.. و م اكلت شي واساسا لا في زول بسالني عن اكل لا بنادوني لصينية وبقولو لابوي براها ابت.. بعد كم يوم كنت مارقه من المدرسه ومعاي حنين شفت عربية امين وهو واقف متكل عليها بعاين لي بنظرة دخلت جوا قلبي.. مسكت حنين شديد هي استغربت ودخلت ف الحاله دي تاني بقت تحاول تنقذني جات نون اتخلعت هي زاتها اتلفتت شافت امين مشت عليهو ونفس موقف المرة الفاتت اتكرر.. امين خلا نون بتردح ليهو وجا قريب مني وانا هنا طبعا داخله ف حاله غريبه وشغاله م تقرب مني.. م اشتغل بي بس قال لي "انتقامك جاي" وعاين لي بنظرة كدا ومشى.. نون قالت دا مالو دا.. وبقت تشتمو.. انا تاني دخلت في الحاله ديك حنين رجعت معاي بالترحيل وقعدت معاي اليوم كلو شربتني كركدي وهدتني شويه وروحت عني كتير.. انا كنت بفكر ف كلام امين كتير وخايفه شديد..
بعد كم يوم مواهب قالت لي اسمعي هنا انا ماشه لتهاني امسكي احمد دا.. وما انتظرت ردي مرقت لابسه توبها ومتمكيجه.. طبعا احنا ساكنين ف عمارة،، في شقتين ابوي مشتريهم مؤجر واحدة واحنا ساكنين ف واحدة.. وباقي العمارة فيها طوابق وشقق تانيه كتيره ساكنين فيها ناس.. وتهاني دي جارتنا.. احمد بقى يبكي سكّتو و عملت ليهو بزة وغيرت ليهو ونومتو وبقيت قاعده جمبو وقاعده ف تلفوني لما جات.. كوركت فيني قالت لي مالك م قاعده تحرسيهو دا اخوك ولا اخو الجيران خالاهو وقاعده ف النصيبه دي نصيبة تاخدك ان شاء الله.. طبعا من صوتها احمد صحى مخلوع وبقى يبكي،، شالتو وقالت كر عليك ي ولدي عندك اخت الحجر احن منها.. م اشتغلت بيها بس سكتت،، خشيت غرفتي قريت وشربت حليب.. مواهب ضحكت فيني قالت لي قايله نفسك عمرك 7 لما بتشربي لبن😂؟ م اشتغلت بيها رقدت نمت تاني يوم مشيت المدرسه وانا طالعه نهاية اليوم عشان امشي الترحيل فجاة لقيت امين في وشي عديل م بعرف طلع من وين لكن من الخلعه بقيت اصرررخ واساسا الصدمه دي كل مرة بتتعبني.. اتلمو الاساتذة والطلبة قبل صحباتي البرضو اتلمو.. كل الناس كانو بعاينو لي بخلعه.. انا بس بقيت ببكي.. صحباتي اداركو الموقف وقالو للناس اي كلام خارم بارم خارجوهم.. وجو قبلو عليهو دايرين يشاكلوهو فجاة ساقهم معاهو اتكلمو كم دقيقه كدا جا وعيونو متغيرة.. انا ف الدقيقه د كنت واقفه بجمود وداخله ف حاله غريبه.. المهم فجاة صحباتي قالو لي اقعدي معاهو ومشو.. قلت كيف يخلوني ليهو!! مشو لترحيلي صرفوهو كمان بتصرفو بدون اذني!! المهم امين داك قعدني ف حتة وقعد يبكي.. انا اتخلعت.. قال لي يا سندس انا والله ندمان وسافي التراب.. انتِ عارفه انو.. قاطعتو قلت ليهو لا م بعرف و م عندي شغله فيك وم دايره اي كلام معاك اسكت اسكت اسكت بس يسكت حسك واديتو كف وبقيت اضربو في صدرو بعنف وهو ساكت بس.. لحدي م اتفشيت قعدت ف الواطه ببكي وبرجف وهو بعاين لي بس.. قمت وحيلي م شايلني م بعرف وصلت كيف وتاااني مسكتني حمه يومين.. مواهب قالت لي مرضك د كتر يا بت غاايتو انا حاسه في إن.. لكن م قدر دا ياخ مبالغه الا كان عيانه قربتي تموتي.. وبعدين ابوك لو عرف انك فوتي الترحيل الليله برضو بضبحك.. عاينت ليها وغمضت عيوني بس.. نادين كانت ممارضاني وبتقريني برضو.. فجاة الجرس ضرب مواهب قالت لنادين افتحي الباب.. قامت وهي بتنبز "م بتحب مواهب".. فتحتو قالت في مرة لابسه توب ومعاها بت وشافعه.. مواهب استقبلتهم بطريقه حلوة ونادت نادين شالت الشياله ادتهم حلاوة.. نادين جاتني قالت مرة ابوك العجيبه دي مالها.. طبعا اصلا البيت شقه وأي شي بتسمع ف سامعنهم ف الصاله بعلقو انو نادين سمحه شديد وكدا.. نادين قالت لي ديل مالهم ديل اسه يعني ماداهم حلاوه لي.. انا م رديت طبعا حالتي حاله💔.. تاني رجعت مشيت المدرسه وكل ما امين يحاول يشوفني بصدو وعدت شهور وعملو تجريبي تاني جبت 78.9 برضو م عجبتني وزهجت زيادة ونفسياتي بقت ف الواطه اسراء قالت لي قولي الحمدلله قلت ليها شايفاني جبت 98؟ قالت لي استغفرالله الحمد لربنا دايما في كل الاحوال يا سندس.. السنه كانت بتعدي وانا مرات بقرا من غير نفس ومرات م بقرا المهم ف النهايه زهجت بقيت بحل امتحانات بس.. و م بحسب لنفسي درجه عشان عارفه درجتي كعبه.. يوم حلمت انو النتيجه طلعت وجبت 79 صحيت وانا ببكي شديد م دايره يحصل كدا حاولت اجتهد لكن في الوقت الضايع💔 بدت الاجازة وبعدها امتحانات الشهادة بقى ليلي ونهاري كلهم قرايه في قرايه غايتو تعبت شديد لما بقيت مصدعه طوالي وعيوني ديل م حاسه بيهم من كترة الوجع!! بدت الامتحانات واحد ورا التاني وكل يوم انا وصحباتي نتلمى نراجع نتونس ونضحك ونخش ونطلع وكمان بنتلمى مع باقي بنات المدرسه.. مف زول كان بقدم لي دعم من الاهل غير خالاتي وحبوبتي كانو بشجعوني وقالو لي اجي اقعد معاهم.. خلصت الامتحانات كان اخر يوم انجليزي في بنات قالو صعب وبنات قالو ساهل وكانو فرحانات لكن الزعلانات على الفرحانات طلعو بزغردو قالو يضربو الهم بالفرح.. حتى انا بقيت بزغرد والبنات كلهن المدرسه كلها بقت عباره عن زغاريد وصريخ انو خلصنا وارتحنا وتاني مافي شي اسمو مدرسه.. طلعنا الشارع بنزغرد عديل والاساتذة غلبهم البعملوهو نهرونا و م نفع في استاذات بقو يزغردن معانا وكانو جد فرحانين لينا.. البيوت الجنب المدرسه مرقو بقو يتفرجو ويتشمشرو وفي ناس بقو يزغردو معانا هم زاتهم المهم م قصرو حتى ف ناس من عرباتهم مرقو فرحو معانا 😭😂 اي صاح المنظر دراما واوفر شويه لكن دا الحصل وما اظن في زي مدرستنا عملت الكلام دا.. في النهايه كلنا بصوت واحد كوركنا اسم مدرستنا وقلنا احنا بنات الريااض.. مع انو م كلهم ساكنين الرياض طبعا لكن المدرسه قريبه للرياض.. رجعنا البيت مواهب قالت لي يختي د شنو الفضيحه العملتوها حكت لي جارتي نسيبة يختي فضحتونا كان بنات الرياض م عارفه.. عاينت ليها بطرف عيني وخشيت نمت بس.. ولا سالتني زاتو امتحنت كيف.. المهم المفترض انو بدت الاجازة..
تاني يوم مواهب قالت لي جايبه ليك عريس لقططططططططه خلاص تالت وكملتيها.. قلت ليها انا حصل قلت ليك القرايه هي السبب؟؟ م عايزه اعرس قرفا في العرس بس م عشان اقرا ولا اي زفت والقرايه دي اسه بخليها ليكم اصلا م متمسكه بشي.. قالت لي اجي اسه مالك حارقه رزك وبعدين م تكضبي ساي ماف بت م بتدور العرس ها! خصوصا لو بارت ووصلت عمرك دا!! 16 سنه قايله روحك صغيرة؟!؟! قلت ليها على اساس انتِ عرستي اصغر من كدا! بلعت لسانها.. بعد مسافه قالت لي م حتسأليني من العريس؟ م رديت عليها. قالت لي طيب حاوريك هو اسمو احمد ومغترب في قطر والقروش مطر عندو هنا ف الرياض شقه وعندو شقه تانيه في المعمورة وبيت بانيهو في المهندسين دا غير شكلو طويل عمود بس واسمر وملتحي ووجيه البنات كلهن متكسرات فيهو وهو اختارك بينهم كلهم لانو امو شافتك يوم عقد بت عمتي وعجبتيها وقالت لي ارسل ليك صورة رسلتها وهي رسلتها لولدها قالت ولدها جنّ بيك عديل واسه نزل السودان يعمل خطوبه ويتم العرس ويسوقك.. عمرو 32.. طبعا م هماني الكلام كلو بس انها ترسل صوري من غير علمي دا زهجني ف كوركت فيها وجطت تلاته يوم م اتكلمنا بس بمشي المطبخ آكل وارجع احبس نفسي في غرفتي.. تالت يوم لبست عبايتي وانا مخنوقه وشلت شنطه مشيت لاسراء بكيت ليها وحكيت ليها وكالعاده كلامها كلو عن الله والرسول (ودا احسن كلام❤).. مواهب جاتني فجاة في بيت ناس اسراء خبطت الباب شديد البيت كلو صحى مخلوع ولما فتحنا ليها الباب قعدت تكورك فيني،، ام اسراء دافعت عني وبقت تشاكلها.. مواهب قالت لي ابوك لو عرفك مرقتي خلاص واطاتك اصبحت والليله سجمك اخير ترجعي معاي شان م تبقى ليك ندامه.. عاينت ليها بس وخشيت غرفه اسراء.. سامعه اسراء اتكلمت معاها بأدب كدا واقنعتها انها تقول لابوي اني حاقعد معاهم كم اسبوع نسبة للاجازة وكدا في النهايه قالت ليها يا بت انتِ اسلوبك حلو وكويس ومؤدبة م بعرفك مصاحبه واحدة زي الشوم دي كيف! لكن لو ابوها ضبحها على مسؤوليتك تمام؟ ومرقت وهي بتشتم فيني.. اسراء جات قالت لي عايزه تبكي؟ وحضنتني؟ قلت ليها لا اصلا وصلت مرحلة لا مبالاة بقيت م بحس بس.. ركبت سماعاتي بقيت بسمع اغاني.. اسراء شالتها طلعتها ومسحت الاغاني طبعا جني قام.. قالت لي دي حرام ولو عارفاها بعدين حتتكب شنو ف اضانك م بتجي جمبها زاتو.. طبعا هجت فيها وكوركت وشلت شنطتي وقلت اسه بس مارقه واتشاكلنا قالت لي م تمرقي اسه الدنيا حتليل براك عارفه الرياض عامله كيف! قلت ليها يخ م عندي اي ستين شغله اسه بس ماشه.. قالت لي خلاص اسفه اها كدا ارتحتي يا ستي؟ قلت ليها آي ورقدت في سريرها اتغطيت ببطانيتها واتخمدت نمت! تاني يوم نون جاتنا طبعا نون دي وناسة مبالغه يعني اي زول بتتونس معاهو وبتضحكك شديد وصحبة الناس كلهم واجتماعية وظريفة.. وكنا بنتكلم مع باقي البنات ف القروب طبعا ددخلنا رتاج ف قروبنا.. اتفقنا نعمل جدول 9 يوم يبدا من بكره كل يوم نمشي نقعد في بيت واحده اليوم كلو عشان نعدي 9 يوم من الاجازة دي ونهون على روحنا شويه.. اسراء قالت لينا يومي حاخليكم مرتاحين راحه حاعلمكم كتاب الله.. نادين قالت ليها غاايتو.. حنين قالت ليها عندك اعتراض؟ نادين قالت ليها مستحيل طبعا.. المهم اختلفنا ف الترتيب ونبدا بمنو وكدا ف النهايه اتفقنا نعملو بالترتيب الهجائي.. حتى حيكون في يوم لي وحاضطر ارجع البيت داك تاني.. قلت م مشكله ربنا يهون.. وانا بفكر كدا ضرب لي ابوي رديت قال لي اديني اسراء اتاكد انك معاها.. قلت ليهو لو اديتك بتخليني بدون مشاكل صح؟ وحنجي انا وصحباتي كلنا يوم نقعد ف البيت تمام يا ابوي؟ بزهج قال لي اديني اسراء بعدين نتفاهم انتِ اصلا م فيك نفع.. طبعا حكاية انهم بحبو اسراء اكتر مني وبشكروها😂.. طبعا هي اتكلمت معاهو بكل ادب لما ابوي اتكيف.. قال لي كدا اتاكدت انتِ مع بت ممتازة زي ما دايما عهدناها يلا مع السلامه وقفل الخط.. قلت شي عجيب.. المهم الترتيب الهجائي حيكون كدا..:
اليوم الاول: اسراء
اليوم الثاني: حنين
اليوم الثالث: رتاج
اليوم الرابع: ريان
اليوم الخامس: سندس (انا)
اليوم السادس: لين
اليوم السابع: مزن
اليوم الثامن: نادين
اليوم التاسع: نون
نون قالت دي حقااره لي انا اخر يوم😭👊🏻 اسراء قالت ليها جات كدا ي زوله.. انا قلت ليها غيري اسمك لي "انون "عشان تكوني تاني واحده لو م عاجبك 🤣💔،،. قالت لي بري د اسم شنو دا،،
اتفقنا على انو كل يوم يكون في شي بميز صاحبة اليوم دا.. واصلا الشي الحلو انو كل بيت من بيوتنا عندو جو واحساس معين لما تدخلو وكل بيت بحلاوتو❤❤⭐..
قلت لاسراء اسه بكره يكون نفس الشي نقعد ف بيتكم دا يووخ.. قالت لي قصدك شنو😒..
تاني يوم كان الاحد كلهم جو لينا ف بيت اسراء صحيت بصوت جوطه كدا😭 طبعا اخوات اسراء ظبطو البوش الما خمج وفطرنا كلنا بيهو يخ الحمدلله كان ظابط شديد فيهو زبادي وشبس واندومي وطعميه وجبنه وأي شي كمان.. باقي اليوم كنا بنتونس عادي لكن كل ما تجي صلاة اسراء بتخلينا نصليها في وقتها لحدي ما جات صلاة العشاء صلتها بينها اسراء وبعدها ادت كل واحدة مصحف وبقت هي تقرا الآيات طبعا صوتها ماشاءالله تبارك الله حلو شديد ومُجَوّد.. ياخ بشبه ائمة الحرم المكي😭 ماشاءالله وكل آية بتقراها بتفسرها تفسير مفصل لحدي م جات الساعه 10 احنا بنستمع ليها وم انتبهنا للزمن! صراحه سبحان الله اسراء قدرنا وعمرها 16 بس كبيرة عقل يعني مف زول بالساهل ف العمر دا بفسر القران لكن جد تبارك الله🖤✨جد انتعشنا وارتحنا وكان اليوم ممتع باحسن طريقه❤ مف قصص احسن من قصص القران لا روايات لا غيرو حتى البنقراها دي.. المهم كلنا بتنا مع اسراء جدعنا المراتب في الارض وبننوم اتنين اتنين ياخ كان يوم حلو شديد حتى اخوات اسراء كانو بتونسو معانا وشاركونا ف السهره😭 ملينا الغرفه كلها مراتب والمرتبه م اتنين بس ممكن تلاته ننوم فيها لو صجبات 😭 طبعا اقنعنا ام حنين بصعوبة تخليها تجي لانو بقت محرمة عليها الدخله والمرقه واقنعناها قلنا ليها بكره بنجيبها ليك راجعه.. فعلا من الصباح صحينا دا يوم حنين بقينا عايزين نستحمى ونلبس ونتظبط وشغالين نتشاكل ف الحمام يخ حمامات البيت كلها استغليناها كل حمام مشغول و م بنريح الفي الحمام شغالين ليهم خبيط خبيط واتشاكلنا شكله موبالغه😭 ياخ ياهو الشكلة حقت الحمام دي ولما الزول يطول يخ جطنا كترة جوطة😂😂😭😭 في النهايه مرقنا اخو اسراء وصلنا بيت حنين وطبعا انبرشو فيهو اصلا من زمان كل م يشوفوهو ينبرشو🤦🏽‍♀️ المهم وصلنا بيت حنين طبعا حنين الزمان غير الاسه زمان كانت حتشغل لينا اغاني وتتكلم عن الاولاد وحبايبها وتمرقنا مطاعم وكذا لكن قضت اليوم بطريقة شبيهة ليوم اسراء بس كنا ف بيت حنين.. كمان سمعنا محاضرة عن الفقه❤❤ وبرضو كنا بنقنع ام حنين تخليها تكمل بقية الايام كل يوم تمشي لبيت وكدا.. وخالتو رافضه تماما ومصرة.. حنين بصوت معبور (يعني مالياهو العبرة) قالت خلوها وخشت الغرفه قفلت الباب.. نون قالت ليها يا خالتو شفتي حالة حنين بتقطع القلب خليها تواصل معانا مش هي بتك وانتِ امها وبتحبيها اكتر من اي شي؟! نون بقت تتكلم مع خالتو واحنا خشينا لحنين لقيناها مغطيه وشها ومحشورة فزاويه بتبكي قالت لينا بكواريك اطلعو برا.. برررررررررا قلت ليكم كلكم يلا! مرقنا طبعا.. وامها بتعاين للباب كدا بنظرة مكسورة.. في النهايه قالت لينا طيب يا بناتي.. في اللحظة دي كلنا حضناها ف وقت واححد لما اتخلعت ونون قربت تزغرد بس مسكناها بالقوة.. مشينا بشرنا حنين ابتسمت وحاولت تخفي وجعتها.. قالت لينا يلا ورح نشرب الشاي منو الحيجيب بسكويت رويال؟ نادين قالت ليها صايعات الشله طبعا.. مزن قالت ليها ي بت امي كلنا صايعات عدا اسراء ربنا رحمها.. اسراء قالت انا بحب الطلعات والمرقات الحلوة م لما تكون هايفه.. نون قالت لينا ها حتتشاكلو لي اسه د اي اتنين يمشو وخلاص! الاولى ريان لانها معروفه اصيع من صايعه.. بقو يتشاكلو منو يمشي معاها.. ريان قالت يخ بمشي براي الموضوع م خطير.. اسراء قالت ليها لا م بتمشي براك.. ريان قالت ليها آج! المهم ف النهايه مشت معاها رتاج جابو رويال وبيبو😭اخوات حنين عملو الشاي ومزن عملتو معاهم وجو قعدو معانا كلنا اتونسنا طبعا قاعدين ف الارض بطريقة حلوة😭 والضحك م يديك الدرب ضحكنا كتيير وفرحنا كتير واتونسنا.. بعدين اخوات حنين مشو واتونسنا نحنا ك صحبات وغسلنا العدة وجدعنا المراتب ومفترض ك بنات شاطرات ننوم لانو د الطبيعي بالليل لكن لا لازم نعمل جنون ف اتذكرنا البيبو شربناهو وبعدين حنين بقت تعمل لينا شعرنا م عارفه لي المهم كوينا شعورنا وعملنا حركات كدا غريبه المهم ساهرنا وفي النهاية جينا ننوم اتجدعنا نمنا.. انا كنت جمب اسراء لكن كنت صاحيه لسه م نمت فجاة اسراء قالت لي دنو! اتخلعت.. قالت لي عارفاك صاحيه دايره اقول ليك شي مع اني عارفاك حترفضي لكن متذكرة احمد؟ قلت ليها احمد اخوي؟! قالت لي لا احمد ود خالتي! قلت ليها عندك ولد خالة بالاسم داك.. قالت لي داك ياخ الجا زماان ديك عندنا ود خالتو انتصار قلت ليها ااا اخو البنات الظراف داك مالو.. قالت لي اتقدم ليك.. قلت ليها شنو😂😂 د ضحك كتير يا اسراء.. قالت لي م بهظر ي بت يخ والله خالتو قالت لي كلمي صحبتك شوفيها لو م عندها اعتراض نجيهم قلت ليها عندي و م موافقه طبعا.. قالت لي اصلا كنت عارفه.. فجاة جانا صوت نون قالت خليها ي سرو اصلا الحسنه فيها م بتنفع عرسيهو لي انا🙈🙈 والله اسمح مني م بلقى.. قلت ليها ي بت م تنزلي القزاز د شنو مبالغه اصلا عافياهو ليك.. فجاة ريان قالت لي على اساس هو حقك بقى عشان تعفيهو ولالا.. نادين قالت الصراحه الود دماار.. قلت ليهم ياخي د شنو الحكايه د كل العرسان البجوني اسمهم احمد احمد ياخ.. مزن قالت اريتو حالي ياخ اسه اكيد كل واحد اسمح من التاني مش حق قطر داك؟ قلت ليهم يخ اسكتو بعدين بسم الله مش على اساس احنا نايمين فجاة تطلعو كلكم صاحين.. رتاج قالت انا بتكلم مع مازن واتس واسه قال حيضرب لي.. خطفت تلفونها قلت ليها لا عليك الله فكينا من شرو الشي دا خلينا ننوم بسلام.. المهم اتونسنا كتير كدا ونمنا😭 صحينا تاني يوم على واقع انو الليله اليوم التالت يوم رتاج طبعا رتاج مفترض انها كانت مغتربه وكدا ف ارقى واحدة فينا يخ وشها ساي بشع سماحه اللهم بارك💗💗 المهم مشينا بيتهم قالت لينا الليله عمارتنا دي حلفلفكم فيها كلها فيها بنات قدرنا.. قلت ليها يعني عندك صحبات غيرنا😡 قالت لي استكاناتك ي ستي🤣 المهم فعلا الروتين اليومي حق الاكل والقعدة بس بيت ناس رتاج اسمح مننا كلنا حتى امها واهلها ناس كدا غير.. المهم حومتنا في الشقق كلها بنات حلبيات مدلعات كدا وسمحات😭كل بت بنتونس معاها مسافه كداا بعدين بنمشي للبعديها يخ مبالغه احتمال خاشين اكتر من 13 بيت وكل بيت يجيبو لينا ضيافة😭 في النهاية عزمتنا اوزون اختها وصلتنا قلت ليها يخ مبالغه المويه ساي ب16 مليون!! مزن قالت لي خليها ديل برجوازيين.. المهم فعلا عزمتنا وكان يوم حلو شديد وفي النهاية رجعنا البيت وحضرنا فيلم حق كرتون ونمنا😭💛 بالجد كل يوم بكون حلو بطريقتو وحلو شديد وبعكس البت بطريقتها.. يوم ريان حومتنا حوامه مشينا بحري وامدرمان وشرق النيل وسوبا وجبل اولياء قربت تودينا مدني ياخ طبعا سارقه عربية اختها وسواقتها كعبه شديد ومتهورة قربت توقعنا ف الكبري استشهدنا كلنا كان شي مخيف وفي نفس الوقت ذكرى حلوة نتذكرها دايما.. اصلا ريان دي ملكة المشاوير وكدا والشفتنه ف كانت بتعمل عمايل مبالغه.. كنا ف بحري وقفنا ف محل الايسكريم الظابط داك،،... كنا عاوزين نشتري، ريان قالت مقطعه انا م عندي قروش قدر دا كل واحدة تدفع حقها براها فاهمين؟ نون قالت ليها غاايتو جنس بلاوي.. سندس ادفعي لي.. قلت ليها آجي.. نون قالت لي يخ يجهجه باكاتك ادفعي لي بس.. (باكاتك يعني شنو بالمناسبه).. قلت لمزن سمح ادفعي لي انا ونون ظابط؟ مزن بقت تردح وتكورك فضحتنا غايتو ندمنا ريان على اليوم القررت فيهو تطلعنا😭 قالت ناس فضيحه!!المهم ف النهايه جينا نرجع الخرطوم من بحري وريان سايقه بسرررعه وبتلفلف بطريقه مبالغه واحنا بنصرخ،،،.. خشت الكبري قلنا ليها لا عليك الله ياخ م تاني.. قلت ليها انزلي انا بسوق.. اسراء قالت لي سندس اكفينا شرك بسوق انا.. بقينا نتشاكل في منو يسوق ريان ولا اشتغلت بينا شغاله تسوق بسرعه بقينا نصرخ زيادة فجاة العربية انزلقت منها وملنا على حتة النيل يعني شويه والعربية تقع ف المويه هنا خلاص وصلنا اخر حاله وبقينا نبكي عديل وريان م هاميها!! قعدت تلفلف كدا لما دخلنا الخرطوم مشينا شارع النيل طلبت لينا قهوة طبعا بتتبلع لي بالغصب بعد الخوف دا! وهي باردة ضربت لحبيبها جاها مشت قعدت معاهو خلتنا بنردح.. ياخ رغم كل شي بس كان يوم حلو شديد😭 بعدها ركبنا مركب في النيل وكدا بعدها ريان قالت لينا عندي صحبتي ف داخليه لازم نمشي نشوفها قلت ليها يااخ واي الليله حومتينا 200202020 مشوار.. لين قالت لي كيف تبقى ريان كان م عملت كد.. المهم مشينا لصحباتها ف الداخليه طبعا شهادة عربية.. (احنا من الصباحح حايمين في الحتات الكتيره د عشان كدا لما وصلنا هنا بعد المشاوير دي كلها كان بالليل) الحرس ابى يدخلنا ريان بقت تتبكى ليهو م بعرف حنكتو كيف بس ورتو صورة صحبتها وهي عندها فقر دم ونينينيني واغلبو كذب استغفرالله بس المهم دخلنا وكان م موافق يدخلنا كلنا لانو 9 بنات كتيره لكن م ركز اتلفت كدا توشك دخلنا كلنا يخ عملنا هاي فايف🤣❤ المهم طلعنا ليهم ف طابقهم لقينا لمة بتاعة بنات كدا شهادة عربية كلهم طالبين بيتزا وقاعدين ف سفرة بضحكو وكلامهم عن الجامعه و م الجامعه والاولاد والانبراشات وكدا المهم لما شافونا رحبو بريان وكدا.. قلت لمزن دا شنو الجابتو لينا ريان دا😭 قالت لي بري البت دي مجنونه.. المهم قعدنا معاهم كم وقت كدا وهم شغالين يقولو انو اجازة الجامعه قربت وماشين لاهلهم ف السعودية وقطر وكدا.. فجاة المشرفة جات داخله وهي صاره بقو يدسدسو في البيتزا وهم مخلوعين قالو لو لقو انهم طلبو بضبحوهم.. ضحكنا كدا واتونسنا رجعنا البيت قعدنا مع اهل ناس ريان واخواتها شويه وبعدها نمنا،،... تاني يوم كان يومي😭 نون قالت اسه نرجع نمشي للمرة الفقر ديك؟ اسراء قالت ليها يا نون.. قبل م تكمل قاطعتها قالت ليها عارفه حرام وبتاع خلاص سكتّ.. المهم مشينا فتحت لينا الباب مواهب وهي مخلوعه ومتمكيجه اصلا د حالتها الطبيعيه🤣 شافت وشي اتاففت كدا شافت وراي البنات كلهم قالت سلاما قولا من رب رحيم.. بقت تتافاف واحنا بقينا نضحك معاقين بس.. المهم هي اتجاوزتنا كلنا سلمت على اسراء بس ورتاج قالت ليها بت الامارات السمحه وبقت تتونس معاها وجابت ليها عصير هي واسراء واحنا كاننا م موجودين😂😭😭 يخ الضحك ضحكناهو كلو ف تصرفاتها د المهم مشينا غرفتي شغلت عدا الزمان اسراء قفلتها قالت لي سندس😡😡 قلت ليها الغنية ظابطة قالت لي الجنة اظبط.. نون قالت ليها اسه انتِ حددتي انها حتخش النار بس عشان سمعت غنية؟ غلطانه ي ستي.. وشغلت اسياد اللواري.. اسراء قفلتها برضو وقالت لينا صدقوني انا دايره ليكم الخير.. نادين قالت لي اها ي سندس انتِ ميزتك شنو ف اليوم دا وحتمرقينا وين.. قلت ليها تتحبسو بس زي حياتي البائسة دي وتشبعو قعدة بيت😂 مزن قالت لي م عندي اعتراض بمكيفك الفريون د😭 ابرد منك زاتو.. المهم عدا اليوم وجا يوم لين ياخ كان يوم مرررح ودتنا حتة نطيط كدا حلوة ونططنا ولعبنا يخ كان شي حلو شديد وودتنا مطعم وامها ظريفه يخ😭 قالت لينا نمشي الملاهي المنتزه؟ قلت ليها اي عليك الله يخ والله اصلا الملاهي بشبهك بس تدفعي قروش التذاكر انتِ😍 قالت لينا غيرت راي ورح البيت بس.. بكينا ليها عديل م اشتغلت بينا.. نون قالت ولا يهمكم بالمتخلفه د انا يومي حيكون ابداع.. اليوم البعدو كان يوم مزن مواهب ضربت لي قلت ليها ياخ اتفقنا م حجي.. قالت لي ابوك هايج قفلت الخط ف وشها وطلعت الموضوع من بالي.. مزن طبعا زوله دمها بارد وهمها الاكل بس قالت لينا م عندي قروش دايرين تطلعو بقروشكم تمام؟ قاعدين معاها ف البيت وبنتونس مع اهلها بس لكن بعدين طلعتنا المنتزه ولعبنا ف الملاهي يخ فرحنا فرح لعبنا قطر الموت وكل اللعبات والله الحمدلله كان يوم حلو شديد😭 قضينا اليوم كلو من ملاهي لملاهي وبرضو مشينا مطاعم ظابطة..